KŨRĨ Machi 26, 1937, athuri erĩ arĩa maanogete mũno nĩ thabarĩ nĩ maingĩrire Sydney, gĩcigĩrĩra-inĩ kĩa Australia, marĩ na kĩroori kĩao maiyũire rũkũngũ. Mwaka ũmwe nĩ wathirĩte kuuma rĩrĩa moimire taũni ya kwao, na maathiĩte makĩria ma kilomita 19,300 magereire icigo-inĩ irĩ kũraihu mũno gĩcigĩrĩra-inĩ kĩu, na irĩ na mahiga na mĩambato. Athuri acio matiathiĩte iceera rĩa ũthuthuria kana rĩa gwetha ikeno. Athuri acio erĩ, Arthur Willis na Bill Newlands, maarĩ amwe a mapainia arĩa maarĩ kĩyo na maatuĩte itua rĩa gũtwara ũhoro ũrĩa mwega wa Ũthamaki wa Ngai nginya werũ-inĩ mũnene mũno wa Australia.

Gũkinyĩria mũthia-inĩ wa mĩaka ya 1920, gakundi kanini ka Arutwo a Bibilia * thĩinĩ wa Australia, nĩ kaahunjĩtie taũni-inĩ iria ciarĩ gĩcũa-inĩ na icigo-inĩ iria ciakuhĩrĩirie. Kũraihu na gĩcũa-inĩ nĩ werũ ũtarĩ na andũ aingĩ, kũndũ kũũmũ, gĩcigo kĩnene gũkĩra nuthu ya Amerika (US). O na kũrĩ ũguo, ariũ a Ithe witũ acio nĩ maamenyaga wega biũ atĩ arũmĩrĩri a Jesu maagĩrĩirũo nĩ kũruta ũira ũmwĩgiĩ “o nginya ituri ciothe cia thĩ,” hamwe na werũ wa Australia ũrĩa ũrĩ kũraihu mũno. (Atũm. 1:8) No mangĩahotire atĩa kũhingia wĩra ũcio mũnene ũguo? Maatuĩte itua rĩa gwĩka ũrĩa wothe mangĩahotire, marĩ na wĩtĩkio mũrũmu biũ atĩ Jehova nĩ angĩarathimire kĩyo kĩao.

Mwaka-inĩ wa 1929 kĩũngano kĩarĩ Queensland na kĩngĩ kĩarĩ Western Australia nĩ ciakire tũkari tũigana ũna tũrĩa tũngĩahũthĩrirũo kũhunjia icigo-inĩ iria ciarĩ thĩinĩ mũno. Tũkari tũu twatwarithagio nĩ mapainia maarĩ na hinya arĩa mangĩahotire kũhiũrania na moritũ o mothe njĩra-inĩ na mahote gũthondeka tũkari tũu rĩrĩa twathũka. Mapainia acio nĩ maahunjirie icigo nyingĩ iria itaahunjĩtio nĩ Aira a Jehova mbere ĩyo.

Mapainia arĩa mataarĩ na ngari maathiaga kũhunjia kũu werũ-inĩ na mĩithikiri. Kwa ngerekano mwaka-inĩ wa 1932, Mũrũ wa Ithe Witũ Bennett Brickell ũrĩa warĩ na mĩaka 23, oimire Rockhampton, Queensland agĩthiĩ thabarĩ ya kũhunjia ya mĩeri ĩtano agereire icigo-inĩ iria irĩ thĩinĩ mũno cia mwena wa rũgongo bũrũri-inĩ ũcio. Aakuuĩte mĩrengeti, nguo, na mabuku maingĩ mũithikiri-inĩ wake ũrĩa wakuuĩte indo nyingĩ mũno. Rĩrĩa mũithikiri wake wathirire magũrũ, aathire na mbere arĩ na ma atĩ Jehova nĩ angĩamũtongoririe. Aatindĩkire mũithikiri wake gĩcunjĩ kĩrĩa gĩatigarĩte gĩa kilomita 320 agereire kũndũ kũũmũ, kũrĩa andũ manakuĩra nĩ kwaga maĩ. Kwa ihinda rĩa  mĩaka 30 ĩrĩa yarũmĩrĩire, Mũrũ wa Ithe Witũ Brickell aathiũrũrũkire kilomita ngiri nyingĩ kũu Australia akĩhũthĩra mũithikiri, kibikibi, kana ngari. Nĩwe warĩ wa mbere kũhunjĩria andũ a tene a bũrũri ũcio (Aborigines) na agĩteithĩrĩria kwambĩrĩria ciũngano njerũ, ũndũ ũrĩa watũmire amenyeke mũno na aheo gĩtĩo kũu guothe werũ-inĩ.

Australia nĩ bũrũri ũmwe wa mabũrũri marĩa makoragwo na andũ anini mũno thĩinĩ wa thĩ, na makĩria gĩcigo kĩu kĩa werũ-inĩ gĩkoragwo na aikari anini arĩa maikaraga gĩcigo-inĩ kĩnene mũno. Nĩ ũndũ ũcio andũ a Jehova nĩ merutanĩirie biũ gũkinyĩra andũ icigo-inĩ iria irĩ thĩinĩ mũno gĩcigĩrĩra-inĩ kĩu.

Stuart Keltie na William Torrington nĩ mapainia meerutanĩirie biũ na njĩra ĩyo. Mwaka-inĩ wa 1933, nĩ maatuĩkanirie Werũ mũnene wa Simpson, ũrĩa waiyũrĩte mũthanga, nĩguo makahunjie taũni-inĩ ya Alice Springs ĩrĩa ĩrĩ thĩinĩ mũno wa gĩcigĩrĩra kĩu kĩa Australia. Rĩrĩa gakari kao gaathũkire na magĩgatiga, Mũrũ wa Ithe Witũ Keltie, ũrĩa warĩ na kũgũrũ kwa rũbaũ, aathire na mbere kũhunjia akĩhũthĩra ngamĩra! Kĩyo kĩa mapainia acio nĩ kĩagĩire na moimĩrĩro mega rĩrĩa maakorire mũndũ ũmwe waigĩte mũkawa ceceni-inĩ ya mũgithi ya William Creek, ĩrĩa yarĩ kũu werũ-inĩ. Mũndũ ũcio waigĩte mũkawa etagwo Charles Bernhardt, na acokire agĩtĩkĩra ũhoro wa ma, akĩendia mũkawa wake, na agĩtungata arĩ painia mĩaka 15 arĩ wiki icigo-inĩ nyũmũ mũno na irĩ kũraihu mũno bũrũri-inĩ ũcio wa Australia.

No mũhaka gũkorũo mapainia acio a tene nĩ maabataraga ũmĩrĩru na ũkirĩrĩria mũnene nĩguo mahote kũhiũrania na moritũ marĩa maacemanagia namo. Hĩndĩ ĩmwe Arthur Willis na Bill Newlands, arĩa mekũgwetetwo kĩambĩrĩria-inĩ, marĩ rũgendo-inĩ rwa kũhunjia kũu werũ wa Australia, maahũthĩrire ciumia igĩrĩ gũthiĩ thabarĩ ya kilomita 32 tondũ mbura nene ĩrĩa yoirĩte yatũmĩte werũ ũcio ũiyũre ndoro. Maageragĩra kũndũ kũrĩ na mĩkuri ĩiyũire mũthanga na mahiga, na rĩmwe makanoga mũno na magathithina magĩtindĩka rori yao irĩma-inĩ nene cia mũthanga. Rori yao nĩ yathũkaga kaingĩ, na kũngĩathire ũguo maathiaga magũrũ kana magathiĩ na mũithikiri nginya taũni ĩrĩa ĩrĩ hakuhĩ, magacoka mageterera ciumia cigana ũna indo cia gũthondeka ikinye. Ona kũrĩ na moritũ macio mothe, nĩ maatũũririe mwerekera mwega. Thutha-inĩ, Arthur Willis agĩcokera ciugo ciagwetetwo ngathĩti-inĩ ya The Golden Age oigire ũũ: “Gũtirĩ barabara njũru mũno kana ndaihu mũno harĩ aira a [Jehova].”

Charles Harris, ũrĩa watungatĩte arĩ painia ihinda iraya, ataarĩrie atĩ gũkorũo arĩ kũraihu ũguo na andũ na gũcemania na moritũ maingĩ kũu werũ-inĩ nĩ gwatũmire akuhĩrĩrie Jehova makĩria. Ongereire ũũ: “Ũtũũro wagĩraga rĩrĩa mũndũ arĩ na indo nini o ũrĩa kũngĩhoteka. Angĩkorũo Jesu aakoragwo eharĩirie kũraara nja kũngĩabataranirie-rĩ, o na ithuĩ twagĩrĩirũo gwĩka o taguo kũngĩbatarania twĩke ũguo nĩ ũndũ wa ũtungata.” Na ũguo nĩguo mapainia aingĩ meekaga. Nĩ ũndũ wa gũkorũo na kĩyo matekũnoga, ũhoro mwega nĩ wahunjirio icigo-inĩ ciothe gĩcigĩrĩra-inĩ kĩu kĩa Australia, na magĩteithia andũ aingĩ kũrũgama mwena wa Ũthamaki wa Ngai.