Nĩ kĩĩ gĩatũmire Jesu kahinda kanini atanakua agwete ciugo cia Daudi thĩinĩ wa Thaburi 22:1?

▪ Ciugo imwe iria Jesu ooigire atanakua nĩ iria irĩ thĩinĩ wa Mathayo 27:46: “Ngai wakwa, Ngai wakwa, ũndiganĩirie nĩkĩ?” Rĩrĩa Jesu ooigire ũguo, aahingirie ciugo cia Daudi mwandĩki wa thaburi iria irĩ thĩinĩ wa Thaburi 22:1. (Mar. 15:34) No tũkorũo tũhĩtĩtie tũngiuga atĩ Jesu ooigire ciugo icio nĩ ũndũ wa gũkua ngoro, kana nĩ ũndũ wa gũkorũo atĩ ihinda-inĩ rĩu ndaarĩ na wĩtĩkio. Jesu nĩ aataũkagĩrũo gĩtũmi kĩrĩa gĩatũmaga abatare gũkua, na nĩ eehaarĩirie gwĩka ũguo. (Mat. 16:21; 20:28) Ningĩ nĩ aamenyaga atĩ ihinda rĩake rĩa gũkua rĩakinya, Jehova ndangĩekĩrire ‘rũgiri rwa kũmũirigĩra.’ (Ayub. 1:10) Na njĩra ĩyo, Jehova nĩ aarekire Jesu onanie biũ hatarĩ na nganja atĩ nĩ angĩahotire gũikara arĩ mwĩhokeku gũtekũmakania maũndũ marĩa angĩagereire mbere ya gĩkuũ gĩake.—Mar. 14:35, 36.

Gũkĩrĩ ũguo-rĩ, nĩ kĩĩ gĩatũmire Jesu agwete ciugo cia thaburi ĩyo? O na gũtuĩka tũtingiuga gĩtũmi tũrĩ na ma biũ, rekei twĩcirie maũndũ mamwe mangĩkorũo maatũmire agwete ciugo icio. *

Rĩrĩa Jesu aagwetire ciugo icio, no kũhoteke aatĩtĩrithagia atĩ Jehova ndangĩaingĩrĩire maũndũ nĩguo age gũkua. Jehova no mũhaka angĩarekire Jesu arĩhe thogora wa ũkũũri atekũingĩrĩra maũndũ. Jesu aarĩ mũndũ, na nĩ aabataraga gũkua nĩguo “acame gĩkuũ nĩ ũndũ wa andũ othe.”—Ahib. 2:9.

Rĩrĩa Jesu aagwetire ciugo nini cia thaburi ĩyo, no kũhoteke eendaga andũ mecirie ũhoro wĩgiĩ thaburi ĩyo ĩrĩ yothe. Matukũ-inĩ macio,  Ayahudi nĩ maahotaga kũiga meciria-inĩ na kũririkana mĩrango mĩingĩ ya thaburi. Kwoguo mangĩaiguire mũhari ũmwe wa mũrango mũna wa thaburi, warĩ ũndũ mũhũthũ harĩ o kũririkana mũrango ũcio ũrĩ wothe. Angĩkorũo Jesu aarĩ na ũndũ ũcio meciria-inĩ, no kũhoteke eendaga gũteithia arũmĩrĩri ake, o acio maarĩ Ayahudi kũririkana morathi maingĩ marĩa maarĩ thĩinĩ wa thaburi ĩyo maarĩtie ũhoro wĩgiĩ gĩkuũ gĩake. (Thab. 22:7, 8, 15, 16, 18, 24) Ningĩ mĩhari ya mũthia ya thaburi ĩyo nĩ ĩragoocithia Jehova, na ĩkonania atĩ nĩ mũthamaki thĩinĩ wa ituri ciothe cia thĩ.—Thab. 22:27-31.

Rĩrĩa Jesu aagwetire ciugo icio cia Daudi, no kũhoteke eendaga kuonania atĩ ndaarĩ na mahĩtia. Jesu atanoragwo, aambĩte agaciirithio na njĩra yaagararĩte watho, na agĩtuĩrũo mahĩtia ma kũruma Ngai. (Mat. 26:65, 66) Ciira ũcio watuirũo na ihenya mathaa ma ũtukũ ũndũ ũrĩa warĩ mũgarũ biũ na mawatho marĩa maahũthĩkaga hĩndĩ ĩyo. (Mat. 26:59; Mar. 14:56-59) Rĩrĩa Jesu ooririe “Ngai wakwa, Ngai wakwa, ũndiganĩirie nĩkĩ?” no kũhoteke eendaga kuonania atĩ gũtirĩ ũndũ mũũru eekĩte wa gũtũma oragwo.

Ningĩ no kũhoteke Jesu eendaga kũririkania andũ atĩ o na gũtuĩka Jehova nĩ eetĩkĩririe Daudi ũrĩa waandĩkire thaburi ĩyo anyamarĩke, ti kuuga atĩ ndeetĩkĩrĩkaga maitho-inĩ make. Daudi ndooririe kĩũria kĩu nĩ ũndũ wa kwaga wĩtĩkio. Thutha wa Daudi kũũria kĩũria kĩu, nĩ oonanirie aarĩ na ma atĩ Jehova nĩ ahonokagia andũ ake, na Jehova nĩ aathiire na mbere kũmũrathima. (Thab. 22:23, 24, 27) Na njĩra o ta ĩyo, o na gũtuĩka Jesu, “Mũrũ wa Daudi” nĩ aanyamarĩkire mũtĩ-inĩ, ti kuuga atĩ nĩ aatigĩte gwĩtĩkĩrĩka harĩ Jehova.—Mat. 21:9.

No kũhoteke Jesu eendaga kuonania kĩeha kĩnene kĩrĩa aarĩ nakĩo nĩ ũndũ wa kũmenya atĩ Jehova no mũhaka angĩamwehereirie ũgitĩri wake nĩgetha ahote kuonania biũ wĩkindĩru wake. Kuuma o kĩambĩrĩria, Jehova ndaabangĩte Mũriũ wake anyamarĩke na akue. No rĩrĩa Adamu na Hawa meehirie, Jehova nĩ aabatarire kũbanga ũndũ ũcio. Jesu ndarĩ ũndũ mũũru eekĩte, no nĩ aabatarire kũnyamarĩka na gũkua nĩgetha acokie thitango iria Shaitani ooimĩrĩtie na arĩhe thogora wa ũkũũri, ũrĩa wabataranagia kũrĩhĩra kĩrĩa Adamu aatete. (Mar. 8:31; 1 Pet. 2:21-24) Nĩguo ũndũ ũcio ũhoteke, Jehova no nginya angĩehereirie Jesu ũgitĩri wake kwa ihinda inini.

No kũhoteke Jesu aageragia gũteithia arũmĩrĩri ake mecirie ũhoro wĩgiĩ gĩtũmi kĩrĩa gĩatũmĩte Jehova etĩkĩrie akue na njĩra ta ĩyo. * Jesu nĩ aamenyaga atĩ kũũragwo na njĩra ya gũcuurio mũtĩ igũrũ ta mwĩki-naĩ nĩ kũngĩahĩngire andũ aingĩ. (1 Kor. 1:23) Arũmĩrĩri ake mangĩeciririe kĩrĩa kĩngĩatũmire Jesu akue, nĩ mangĩataũkĩirũo nĩ ũndũ ũrĩa ũngĩahingirio nĩ gĩkuũ gĩake. (Gal. 3:13, 14) Ũndũ ũcio nĩ ũngĩamateithirie kũmuona arĩ Mũhonokia, handũ ha kũmuona atariĩ ta mwĩki-naĩ.

Gũtekũmakania ũndũ ũrĩa watũmire Jesu agwete ciugo icio, nĩ aamenyaga atĩ gũkua na njĩra ya gũcuurio mũtĩ-inĩ nĩ kũngĩahingirie wendi wa Jehova. Kahinda kanini thutha wa Jesu kũgweta ciugo icio cia thaburi, ooigire ũũ: “Maũndũ mothe nĩ mahinga!” (Joh. 19:30; Luk. 22:37) Kwoguo, gũkorũo atĩ Jehova nĩ eehereirie Jesu ũgitĩri wake kwa ihinda, nĩ kwahotithirie Jesu kũhingia biũ ũndũ ũrĩa watũmĩte atũmwo gũkũ thĩ. Ningĩ nĩ kwamũhotithirie kũhingia maũndũ mothe marĩa maandĩkĩtwo mamwĩgiĩ “Watho-inĩ wa Musa na maandĩko-inĩ ma Anabii na Thaburi.”—Luk. 24:44.