GĨCUNJĨ KĨA WĨRUTI GĨA 17
Jehova nĩ Akenagio Nĩwe!
“Jehova nĩ akenagio nĩ andũ ake.”—THAB. 149:4.
RWĨMBO NA. 108 Wendo Mwĩhokeku wa Ngai
GĨCUNJĨ-INĨ GĨKĨ *
Ithe witũ wa igũrũ “nĩ akenagio” nĩ o ũmwe witũ (Rora kĩbungo kĩa 1)
1. Nĩ maũndũ marĩkũ Jehova onaga harĩ andũ ake?
JEHOVA NGAI “nĩ akenagio nĩ andũ ake.” (Thab. 149:4) Ũcio nĩ ũndũ wa gwĩkĩra ngoro mũno! Jehova nĩ onaga ngumo citũ njega, akona atĩ no tũtuĩke andũ ega o na makĩria na kwoguo agatũgucĩrĩria harĩ we. Tũngĩtũũra tũrĩ ehokeku harĩ we, o nake egũtũũra arĩ hakuhĩ na ithuĩ tene na tene.—Joh. 6:44.
2. Nĩ kĩĩ gĩtũmaga andũ amwe mone ũrĩ ũndũ mũritũ gwĩtĩkia atĩ Jehova nĩ amendete?
2 Andũ amwe no moige, ‘Nĩ njũĩ atĩ Jehova nĩ endete andũ ake marĩ gĩkundi, no ingĩkorũo na ma atĩa niĩ mwene nĩ anyonaga ndĩ wa bata?’ Nĩ kĩĩ kĩngĩtũma mũndũ eyũrie kĩũria kĩu? Oksana *, ũrĩa wacemanirie na maũndũ maritũ arĩ mũnini ooigire ũũ: “Nĩ ndaakenire mũno rĩrĩa ndabatithirio na ngĩambĩrĩria ũpainia. No mĩaka 15 thutha ũcio, nĩ ndambĩrĩirie kũririkana maũndũ moru marĩa meekĩkĩte ũtũũro-inĩ wakwa ndĩ mũnyinyi. Ngĩambĩrĩria kuona ta itagĩrĩire maitho-inĩ ma Jehova na kuona ta Jehova atanyendete.” Mwarĩ wa Ithe witũ ũmwe painia wĩtagwo Yua ũrĩa o nake wacemanirie na maũndũ maritũ arĩ mũnyinyi ooigire ũũ: “Ndeyamũrĩire Jehova tondũ nĩ ndendaga kũmũkenia. No ndetĩkĩtie atĩ Jehova ndangĩnyenda.”
3. Tũkwarĩrĩria maũndũ marĩkũ gĩcunjĩ-inĩ gĩkĩ?
3 O ta aarĩ a Ithe witũ acio erĩ magwetwo, no gũkorũo nĩ ũkoragwo na nganja kana Jehova nĩ akwendete o na gũtuĩka we nĩ ũmwendete biũ. Nĩkĩ nĩ ũrabatara gũkorũo na ma atĩ nĩ akũrũmbũyagia biũ? Na nĩ ũndũ ũrĩkũ ũngĩgũteithia rĩrĩa ũraigua ta Jehova atakwendete? Rekei twarĩrĩrie macokio ma ciũria icio.
GŨKORŨO NA NGANJA NĨ ŨGWATI
4. Nĩkĩ nĩ ũgwati gũkorũo na nganja kana Jehova nĩ atwendete?
4 Rĩrĩa twakorũo na ma atĩ Jehova nĩ atwendete, nĩ tũiguaga tũkĩenda gwĩka ũrĩa wothe tũngĩhota kũmũtungatĩra, o na rĩrĩa tũracemania na moritũ. No rĩrĩa twakorũo na nganja kana Ngai nĩ atũrũmbũyagia, ‘hinya witũ ũrĩkoragwo ũrĩ mũnini.’ (Thim. 24:10) Na rĩrĩa twakua ngoro na twaga gwĩtĩkia atĩ Ngai nĩ atwendete, nĩ tũrĩtooragio nĩ tharĩkĩro cia Shaitani.—Ef. 6:16.
5. Andũ amwe mahutĩtio na njĩra ĩrĩkũ nĩ ũndũ wa gwĩkĩrĩra nganja kana Ngai nĩ amendete?
5 Gũkorũo na nganja nĩ gũtũmĩte wĩtĩkio wa Akristiano amwe ehokeku mahinda-inĩ maya wage hinya. Mũthuri ũmwe wa kĩũngano wĩtagwo James ooigire ũũ: “O na gũtuĩka ndaatungataga Betheli na nĩ ndaakenagĩra ũtungata kĩũngano-inĩ kĩa rũthiomi rũngĩ kĩrĩa ndaanyitanagĩra nakĩo, nĩ ndaarigagwo kana Jehova nĩ etĩkagĩra ũtungata wakwa. O na kũrĩ hĩndĩ ndeyũragia kana Jehova nĩ athikagĩrĩria mahoya makwa.” Eva, ũrĩa o nake ũrĩ ũtungata-inĩ wa mahinda mothe ooigire: “Gwĩkĩrĩra nganja kana Jehova nĩ akwendete nĩ ũgwati, tondũ kũhutagia maũndũ maku ma kĩĩroho na njĩra nene. Ũndũ ũcio nĩ ũtũmaga mũndũ age gũkenera maũndũ ma kĩĩroho na akaga gĩkeno agĩtungatĩra Jehova.” Michael, ũrĩa ũtungataga arĩ mũthuri wa kĩũngano na painia wa hĩndĩ ciothe ooigire: “Ũngĩaga gwĩtĩkia atĩ Ngai nĩ akwendete, nĩ ũkũmũraihĩrĩria.”
6. Twagĩrĩirũo gwĩka atĩa tũngĩambĩrĩria gwĩciria atĩ Ngai ndatwendete?
6 Ũhoro wa Akristiano acio ũronania atĩ gwĩkĩrĩra nganja kana Jehova nĩ atwendete no gũkorũo na moimĩrĩro moru harĩ wĩtĩkio witũ. No twagĩrĩirũo gwĩka atĩa tũngĩambĩrĩria gwĩciria atĩ Ngai ndatwendete? Twagĩrĩirũo kũregana na mwĩcirĩrie ũcio o na ihenya. Thaitha Jehova akwehererie “mĩtangĩko ya meciria” na akũhe ‘thayũ wa Ngai, ũrĩa ũgitagĩra ngoro yaku na ũhoti waku wa gwĩciria.’ (Thab. 139:23; Afil. 4:6, 7) Ningĩ ririkanaga atĩ ndũrĩ wiki. Kũrĩ na aarĩ na ariũ a Ithe witũ angĩ mararũa na mwĩcirĩrie ũcio ũtarĩ mwega. O na ndungata cia Jehova cia mahinda ma tene cianakorũo na meciria ta macio. Rekei tuone maũndũ marĩa tũngĩĩruta kuumana na kĩonereria kĩa mũtũmwo Paulo.
ŨRĨA TŨNGĨĨRUTA KUUMANA NA PAULO
7. Paulo aahiũranagia na moritũ marĩkũ?
7 Hihi nĩ kũrĩ hĩndĩ wonaga ũrĩ na maũndũ maingĩ ma gwĩka na ũkona ta ũtangĩhota kũmahingia mothe? Angĩkorũo nĩ wonaga ũguo, no ũhote gũtaũkĩrũo nĩ mũtũmwo Paulo. Aaiguaga agĩtangĩka to ũndũ wa kĩũngano kĩmwe, no “nĩ ũndũ wa ciũngano ciothe.” (2 Kor. 11:23-28) Hihi ũrĩ na mũrimũ mũnene ũtũmaga wage gĩkeno? Paulo nĩ aathumbũragwo nĩ “mũigua thĩinĩ wa mwĩrĩ,” ũrĩa no kũhoteke warĩ thĩna mũna wa mwĩrĩ, na nĩ eeriragĩria mũno kwehererio thĩna ũcio. (2 Kor. 12:7-10) Hihi rĩmwe nĩ ũiguaga ũkuĩte ngoro nĩ ũndũ wa mawathe maku? Rĩmwe Paulo nĩ aaiguaga ũguo. Ooigire atĩ ‘aarĩ na thĩna,’ tondũ hingo ciothe aakoragwo akĩrũa na mawathe make.—Rom. 7:21-24.
8. Nĩ kĩĩ gĩateithirie Paulo kũhiũrania na moritũ make?
8 O na Paulo agĩcemanagia na magerio matiganĩte na maũndũ ma kũmũũraga ngoro, aathiire na mbere gũtungatĩra Jehova. Aarutire kũ hinya wa gwĩka ũguo? O na gũtuĩka nĩ aamenyaga wega mawathe marĩa aarĩ namo, aarĩ na wĩtĩkio mũnene harĩ ũkũũri. Ningĩ nĩ aamenyaga wega kĩĩranĩro kĩrĩa Jesu eeranĩire atĩ “mũndũ o wothe ũrĩonanagia wĩtĩkio” harĩ Jesu, nĩ “akaagĩa na muoyo wa tene na tene.” (Joh. 3:16; Rom. 6:23) Paulo hatarĩ nganja nĩ ũmwe wa andũ arĩa moonanagia wĩtĩkio harĩ ũkũũri. Aarĩ na ma biũ atĩ Jehova nĩ akoragwo eehaarĩirie kuohera nginya andũ arĩa meka mehia maritũ mangĩĩrira.—Thab. 86:5.
9. Tũreruta atĩa kuumana na ciugo cia Paulo thĩinĩ wa Agalatia 2:20?
9 Paulo ningĩ nĩ eetĩkĩtie atĩ Ngai nĩ aamwendete mũno tondũ nĩ aamenyaga atĩ Ngai nĩ aarutire Jesu akue nĩ ũndũ wake. (Thoma Agalatia 2:20.) Ta rora ciugo cia gwĩkĩra ngoro cia kũrĩkĩrĩria iria irĩ thĩinĩ wa mũhari ũcio. Paulo ooigire ũũ: “Mũrũ wa Ngai, o we wanyendire na akĩĩneana we mwene nĩ ũndũ wakwa.” Paulo ndeeyonaga arĩ mũũru ũndũ Ngai atangĩmwenda, kana akeĩra ũũ: ‘Nĩ njũĩ Jehova nĩ endete aarĩ na ariũ a Ithe witũ arĩa angĩ, no niĩ ndirona ta angĩnyenda.’ Paulo aaririkanirie Aroma ũũ: “Hĩndĩ ĩrĩa twarĩ ehia, Kristo nĩ aakuire nĩ ũndũ witũ.” (Rom. 5:8) Gũtirĩ ũndũ ũngĩgirĩrĩria Ngai age gũtwenda!
10. Tũreruta atĩa kuumana na Aroma 8:38, 39?
10 Thoma Aroma 8:38, 39. Paulo aarĩ na ma biũ atĩ wendo wa Ngai ũkoragwo ũrĩ mũnene. Aandĩkire atĩ “gũtirĩ kĩndũ kĩngĩhota gũtũtigithũkania na wendo wa Ngai.” Paulo nĩ aamenyaga ũrĩa Jehova aarũmbũyanĩtie na rũrĩrĩ rwa Isiraeli arĩ na wetereri. Ningĩ nĩ aaririkanaga ũrĩa Jehova aamuonetie tha. Na njĩra ĩngĩ nĩ ta Paulo ooigaga, ‘Tondũ Jehova nĩ aatũmire Mũrũ wake akue nĩ ũndũ wakwa, ndiagĩrĩirũo gũkorũo na nganja o na hanini atĩ nĩ anyendete.’—Rom. 8:32.
Ũndũ ũrĩa wa bata harĩ Ngai nĩ maũndũ marĩa tũreka ihinda rĩrĩ, na marĩa tũrĩka ihinda rĩũkĩte, no ti mahĩtia marĩa twekire tene (Rora kĩbungo gĩa 11) *
11. O na gũtuĩka Paulo nĩ eekĩte mehia ta ũrĩa 1 Timotheo 1:12-15 yonanĩtie-rĩ, nĩ kĩĩ gĩatũmaga akorũo na ma atĩ Ngai nĩ amwendete?
11 Thoma 1 Timotheo 1:12-15. No kũhoteke rĩmwe na rĩmwe Paulo nĩ aaiguaga agĩthumbũka nĩ ũndũ wa maũndũ marĩa eekĩte tene. No gũkorũo ũndũ ũcio nĩguo watũmire eĩte mwĩhia “wa mbere.” Paulo ataneruta ũhoro wa ma, nĩ aanyariraga Akristiano kuuma itũũra rĩmwe nginya rĩrĩa rĩngĩ agĩikagia amwe njera, o na nĩ aaikagia kura nĩguo Akristiano amwe moragwo. (Atũm. 26:10, 11) Ta hũũra mbica ũrĩa Paulo angĩkorũo aaiguaga rĩrĩa acemania na Mũkristiano mwĩthĩ, ũrĩa aciari ake mooragithĩtio nĩwe. Paulo nĩ aaiguaga ũũru nĩ ũndũ wa mahĩtia macio eekĩte, no nĩ aamenyaga atĩ ndangĩahotire gũcenjia maũndũ marĩa mahĩtũku. Nĩ eetĩkĩtie atĩ Kristo aakuire nĩ ũndũ wake, na akĩandĩka ũũ: “Nduĩkĩte ũguo ndariĩ kũgerera ũtugi mũnene wa Ngai.” (1 Kor. 15:3, 10) Tũreruta atĩa? Koragwo na ma atĩ Kristo nĩ aakuire nĩ ũndũ waku, na agĩkũhotithia kũgĩa na ũrata wa hakuhĩ hamwe na Jehova. (Atũm. 3:19) Ũndũ ũrĩa wa bata harĩ Ngai nĩ maũndũ marĩa tũreka ihinda rĩrĩ, na marĩa tũrĩka ihinda rĩũkĩte, no ti mahĩtia marĩa twekire tene, gũtekũmakania kana nĩ twatuĩkĩte Aira a Jehova kana tũtiatuĩkĩte.—Isa. 1:18.
12. Ciugo iria irĩ thĩinĩ wa 1 Johana 3:19, 20, ingĩtũteithia atĩa rĩrĩa tũreigua ta tũtarĩ kĩene kana ta tũtangĩendeka?
12 Mũndũ angĩciria atĩ Jesu aakuire nĩ ũndũ wa mehia make, no eĩre ũũ: ‘Niĩ ndirona ta njagĩrĩirũo kuonio gĩtĩo ta kĩu kĩnene.’ Nĩ kĩĩ kĩngĩtũma mũndũ akorũo na mawoni ta macio? Nĩ tondũ ngoro itũ no ĩtũheenie na ĩtũme mũndũ eigue atarĩ kĩene, kana ta atangĩendeka. (Thoma 1 Johana 3:19, 20.) Hĩndĩ ta ĩyo, nĩ twagĩrĩirũo kũririkana atĩ “Ngai nĩ mũnene gũkĩra ngoro citũ.” Ithe witũ wa igũrũ nĩ atwendete na nĩ atuohagĩra, o na rĩrĩa tũngĩkorũo tũkĩigua ta atatwendete na kuona ta atangĩtuohera. Nĩ twagĩrĩirũo gũkorũo na ma biũ atĩ Jehova nĩ atwendete. Nĩguo twĩke ũguo, nĩ twagĩrĩirũo kwĩrutaga Kiugo gĩake kaingĩ, kũmũhoyaga tũtegũtĩrĩria, na kũnyitanagĩra hingo ciothe na ndungata ciake njĩhokeku. Gwĩka maũndũ macio nĩ kwa bata mũno nĩkĩ?
ŨRĨA TŨNGĨTEITHIO NĨ WĨRUTI WA BIBILIA, MAHOYA, NA ARATA EHOKEKU
13. Kwĩruta Kiugo kĩa Ngai kũngĩtũteithia atĩa? (Ningĩ rora gathandũkũ “ Ũrĩa Kiugo kĩa Ngai Kĩmateithĩtie.”)
13 Thomaga Kiugo kĩa Ngai o mũthenya, nĩguo ũtaũkĩrũo nĩ ngumo cia Jehova wega makĩria. Nĩ ũkuona atĩ Jehova nĩ akwendete mũno. Gwĩcũrania gĩcunjĩ kĩna kĩa Bibilia o mũthenya no gũgũteithie kuona maũndũ na njĩra ĩrĩa yagĩrĩire, na gũgũteithie “kũrũnga maũndũ” meciria-inĩ na ngoro-inĩ yaku. (2 Tim. 3:16) Mũthuri ũmwe wa kĩũngano wĩtagwo Kevin, ũrĩa warũaga na mwĩcirĩrie wa kwĩyona atagĩrĩire ooigire: “Gũthoma na gwĩcũrania Thaburi 103 nĩ kwandeithirie gũkorũo na mawoni marĩa magĩrĩire na gũkĩndeithia kuona atĩ Jehova nĩ anũmbũyagia.” Eva ũrĩa ũkũgwetetwo na hau kabere ooigire: “O mũthenya gũgĩtuka, nĩ hũthagĩra mahinda gwĩcũrania ũrĩa Jehova onaga maũndũ. Ũndũ ũcio nĩ ũndeithagia gũkorũo na thayũ wa ngoro na wĩtĩkio wakwa ũkagĩa na hinya.”
14. Mahoya mangĩtũteithia atĩa?
14 Hoyaga hingo ciothe. (1 Thes. 5:17) Nĩguo andũ erĩ matũũrie ũrata mwega, mabataraga gũikara makĩaranagĩria na makaranĩria moimĩranĩtie ngoro. Ũguo noguo kũrĩ harĩ ũrata witũ na Jehova. Rĩrĩa twamwĩra ũrĩa tũraigua, ũrĩa tũreciria, na maũndũ marĩa maratũtanga kũgerera mahoya, nĩ tũmuonagia atĩ nĩ tũmwĩhokete na nĩ tũĩ atĩ nĩ atwendete. (Thab. 94:17-19; 1 Joh. 5:14, 15) Yua, ũrĩa ũkũgwetetwo na hau kabere ooigire: “Rĩrĩa ndĩrahoya, to kwĩra njĩraga Jehova maũndũ marĩa mekĩkire mũthenya ũcio. Nĩ njitũrũragĩra Jehova ngoro ngamwĩra maũndũ marĩa ndĩreciria na ũrĩa ndĩraigua. Gwĩka ũguo nĩ kũndeithĩtie ngatiga kuona Jehova atariĩ ta mũrũgamĩrĩri mũnene wa kambuni, no ngamuona atariĩ ta Ithe wendete ciana ciake biũ.”—Rora gathandũkũ karĩ na kĩongo “ Hihi nĩ Ũrĩthomete?”
15. Jehova onanĩtie nĩ atwendete na njĩra ĩrĩkũ?
15 Nyitanagĩra na arata ehokeku, tondũ arata acio nĩ kĩheo kuuma kũrĩ Jehova. (Jak. 1:17) Ithe witũ wa igũrũ nĩ atuonetie wendo na njĩra ya gũtũhe famĩlĩ ya kĩĩroho ya aarĩ na ariũ a Ithe witũ arĩa matuonagia “wendo hingo ciothe.” (Thim. 17:17) Marũa-inĩ ma Paulo kũrĩ Akolosai, nĩ agwetete Akristiano amwe maamũteithagĩrĩria, na akoiga atĩ ‘maakoretwo makĩmũmĩrĩria mũno.’ (Kol. 4:10, 11) O na Jesu Kristo nĩ aabataraga gũteithio nĩ arata ake, na nĩ aakeneire ũteithio ũrĩa aaheirũo nĩ andũ o hamwe na araika.—Luk. 22:28, 43.
16. Arata ehokeku mangĩtũteithia atĩa gũkuhĩrĩria Jehova?
16 Hihi nĩ ũhoyaga ũteithio kuuma kũrĩ aarĩ na ariũ a Ithe witũ kĩũngano-inĩ na ũkamũkĩra ũteithio ũrĩa makũhe? Kwaria na mũrata mũgimaru kĩĩroho igũrũ rĩgiĩ ũndũ ũratũthĩnia ti kuuga atĩ wĩtĩkio witũ ndũrĩ na hinya, no gwĩka ũguo no gũtũgitĩre. James, ũrĩa ũkũgwetetwo na hau kabere ooigire: “Gũkorũo na ũrata wa hakuhĩ na Akristiano agimaru kĩĩroho nĩ kũndeithĩtie mũno. Rĩrĩa ndambĩrĩria gwĩciria atĩ Jehova ndanyendete, arata acio akwa nĩ maathikagĩrĩria marĩ na wetereri na makanjĩra atĩ nĩ manyendete. Rĩrĩa meka ũguo nĩ menyaga atĩ Jehova nĩ anyendete na nĩ anũmbũyagia.” Nĩ ũndũ wa bata gũkũria ũrata wa hakuhĩ hamwe na aarĩ na ariũ a Ithe witũ na kũũtũũria!
TŨŨRA WENDO-INĨ WA JEHOVA
17-18. Nũũ twagĩrĩirũo gũthikĩrĩria, na twagĩrĩirũo gwĩka ũguo nĩkĩ?
17 Shaitani endaga tũkue ngoro nĩguo tũtige gwĩka ũrĩa kwagĩrĩire. Endaga twĩtĩkie atĩ Jehova ndatwendete na atĩ tũtiagĩrĩire gũkaahonokio. Ĩndĩ o ta ũrĩa tuona, ũcio ti ũhoro wa ma.
18 Jehova nĩ akwendete. Ũrĩ wa bata mũno maitho-inĩ make. Ũngĩmwathĩkagĩra, ‘ũgũtũũra wendo-inĩ wake’ tene na tene o ta Jesu. (Joh. 15:10) Kwoguo ndũgetĩkie Shaitani kana ngoro yaku rĩrĩa ĩrakwĩra atĩ Jehova ndakwendete. Handũ ha ũguo, thikagĩrĩria Jehova ũrĩa wonaga maũndũ mega thĩinĩ witũ ithuothe. Koragwo na ma atĩ “nĩ akenagio nĩ andũ ake,” nginya o nawe.
RWĨMBO NA. 141 Kĩama kĩa Ngai gĩa Gũtũhe Muoyo
^ kĩb. 5 Aarĩ na ariũ a Ithe witũ amwe nĩ monaga arĩ hinya gwĩtĩkia atĩ Jehova nĩ amendete. Thĩinĩ wa gĩcunjĩ gĩkĩ, nĩ tũkwarĩrĩria kĩrĩa kĩngĩtũma tũkorũo na ma atĩ Jehova nĩ endete o ũmwe witũ. Ningĩ nĩ tũkwarĩrĩria ũrĩa tũngĩka angĩkorũo nĩ tuonaga ta Ngai atatwendete.
^ kĩb. 2 Marĩĩtwa mamwe nĩ macenjetio.
^ kĩb. 67 GŨTAARĨRIA MBICA: Mbere-inĩ, Paulo nĩ aatũmire Akristiano aingĩ maikio njera. Rĩrĩa aamenyire ũrĩa Jesu eekĩte nĩ ũndũ wake nĩ aagarũrũkire na akĩambĩrĩria gwĩkĩra ngoro Akristiano arĩa angĩ, na amwe no kũhoteke maarĩ andũ a famĩlĩ cia andũ arĩa aanyariraga mbere ĩyo.
