Mwĩhĩtwa “nĩ ciugo cia kuuma ngoro cia kuonania atĩ ũndũ mũna nĩ wa ma, kana mũndũ kwĩranĩra atĩ nĩ ekũhingia ũndũ mũna, na kaingĩ mũndũ ehĩtaga na Ngai . . . arĩ we mũira.” Ciugo icio no ikorũo ciarĩtio kana ciandĩkĩtwo handũ.

Andũ amwe monaga ta atarĩ ũndũ mwagĩrĩru kwĩhĩta tondũ Jesu aaugire ũũ: “Mũtikanehĩte o na atĩa . . . No rekei ‘Ĩĩ’ yanyu ĩtuĩke ĩĩ, nayo ‘Aca’ yanyu ĩtuĩke aca, tondũ ũndũ ũrĩa ũkĩrĩte macio uumĩte kũrĩ ũrĩa mũũru.” (Mat. 5:33-37) Hatarĩ nganja, Jesu nĩ aamenyaga atĩ Watho wa Musa nĩ wabataraga Aisiraeli mehĩte maũndũ-inĩ mamwe, na atĩ ndungata imwe njĩhokeku cia Ngai nĩ ciehĩtĩte. (Kĩam. 14:22, 23; Tham. 22:10, 11) Ningĩ nĩ aamenyaga atĩ o na Jehova kũrĩ hĩndĩ anehĩta. (Ahib. 6:13-17) Kwoguo Jesu ndeendaga kuuga atĩ tũtiagĩrĩirũo kwĩhĩta o na rĩ. Handũ ha ũguo, aakananagia igũrũ rĩgiĩ kwĩhĩta tũmaũndũ-inĩ tũtarĩ twa bata kana hatarĩ na gĩtũmi kĩega. Twagĩrĩirũo kũhingagia ũrĩa tweranĩra hingo ciothe tondũ ũguo nĩguo Jehova endaga twĩke.

Gũkĩrĩ ũguo-rĩ, wagĩrĩirũo gwĩka atĩa ũngĩrũo wĩhĩte? Wa mbere, wĩthuthurie wone kana no ũhote kũhingia mwĩhĩtwa ũcio. Angĩkorũo ndũngĩhota kũũhingia, kaba wage kwĩhĩta. Bibilia ĩtũheete mũkaana ũyũ: “Nĩ kaba wage kwĩhĩta gũkĩra wĩhĩte na wage kũhingia.” (Koh. 5:5) Thutha ũcio, wĩcirie ũhoro wa motaaro ma Kĩĩmaandĩko marĩa mahutanĩtie na ũndũ ũrĩa ũrehĩta, ũcoke ũtue itua ũkĩhũthĩra thamiri yaku ĩmenyeretio. Nĩ motaaro ta marĩkũ macio ũngĩĩciria ũhoro wamo?

Mĩĩhĩtwa ĩmwe nĩ ĩkoragwo ĩringaine na wendi wa Ngai. Kwa ngerekano, Aira a Jehova nĩ mehĩtaga rĩrĩa marahikania. Mũhiki na mũhikania mehĩtaga mbere ya Ngai na mbere ya aira atĩ nĩ marĩendanaga, makamenyanĩrĩra, na magatĩana mũndũ na ũrĩa ũngĩ na atĩ megwĩka ũguo “matukũ marĩa mothe [eerĩ megũtũũra] muoyo.” (No gũkorũo angĩ makĩhikania matiugaga ciugo ihaanaine na icio biũ, no o na kũrĩ ũguo nĩ mehĩtaga mbere ya Ngai.) Thutha ũcio makanĩrĩrũo atĩ rĩu nĩ mũthuri na mũtumia, na kĩhiko kĩao kĩagĩrĩire gũtũũra. (Kĩam. 2:24; 1 Kor. 7:39) Mwĩhĩtwa ũcio ũkoragwo ũrĩ mwagĩrĩru na nĩ ũtwaranaga na wendi wa Ngai.

Mĩĩhĩtwa ĩmwe ndĩkoragwo ĩringaine na wendi wa Ngai. Kwa ngerekano, Mũkristiano wa ma ndangĩĩhĩta atĩ nĩ ekuoya matharaita akarũĩrĩre bũrũri kana atĩ nĩ egũkaana wĩtĩkio wake harĩ Ngai. Gwĩka ũguo kũngĩkorũo kũrĩ mũgarũ na watho wa Ngai. Akristiano magĩrĩirũo gũkorũo “[matarĩ] a thĩ ĩno” na kwoguo tũtiĩingĩranagia na ngũĩ kana mbaara.​—Joh. 15:19; Isa. 2:4; Jak. 1:27.

Mĩĩhĩtwa ĩmwe ĩringanaga na thamiri. Rĩmwe na rĩmwe no tũbatare gwĩciria ũhoro wa ũtaaro  wa Jesu wa ‘kũrĩha Kaisari indo cia Kaisari na indo cia Ngai tũrĩhe Ngai,’ tũtanatua itua kana nĩ tũkwĩhĩta mwĩhĩtwa mũna.​—Luk. 20:25.

Kwa ngerekano, ta nĩ tũtue Mũkristiano araihũria fomu ya kũhoya atuĩke raia wa bũrũri mũna kana ya passport, agacoka akamenya atĩ nĩ arabatara kwĩhĩta mwĩhĩtwa wa gũkorũo arĩ mwĩhokeku harĩ bũrũri ũcio. Angĩkorũo bũrũri-inĩ ũcio kwĩhĩta mwĩhĩtwa ũcio wa gũkorũo arĩ mwĩhokeku harĩ bũrũri kũngĩbatara ehĩte atĩ nĩ egwĩka ũndũ mũgarũ na wendi wa Ngai, thamiri yake ĩmenyeretio nĩ Bibilia ndĩngĩmwĩtĩkĩria kwĩhĩta mwĩhĩtwa ta ũcio. O na kũrĩ ũguo, thirikari ya kũu hihi yahota kũmwĩtĩkĩria acenjie ciugo cia mwĩhĩtwa ũcio nĩguo thamiri yake ĩmwĩtĩkĩrie kwĩhĩta.

Kwĩhĩta mwĩhĩtwa ta ũcio ũgarũrĩtwo wa gũkorũo ũrĩ mwĩhokeku harĩ bũrũri, no gũtwarane na ũtaaro ũrĩa ũrĩ thĩinĩ wa Aroma 13:1 ĩrĩa yugaga ũũ: “Mũndũ o wothe nĩ athĩkagĩre athani arĩa anene.” Kwoguo Mũkristiano no atue atĩ ti ũũru kwĩhĩta gwĩka ũndũ Ngai atwĩrĩte twĩke.

Thamiri ningĩ nĩ ĩbataranagia rĩrĩa mũndũ erũo ahũthĩre kĩndũ kĩna kana eke gĩĩko kĩa mũthemba mũna rĩrĩa arehĩta. Aroma na Asikuthi a tene maahũthagĩra rũũri rwa ngai ya mbaara na njĩra ya kwĩhĩta na hiũ ciao cia njora nĩguo mũndũ onanie atĩ nĩ egũkorũo arĩ mwĩhokeku. Nao Angiriki mooyaga guoko na igũrũ makĩĩhĩta, ũndũ ũrĩa wonanagia atĩ nĩ maamenyaga atĩ nĩ kũrĩ Ngai ũrĩ hinya ũrĩa ũroraga maũndũ marĩa mũndũ aroiga na marĩa areka, na nĩwe andũ magĩrĩirũo gwathĩkĩra.

Ndungata ya Jehova ndĩngĩĩhĩta ĩkĩhũthĩra rũũri o ruothe rwa bũrũri rũkonainie na ũthathaiya wa maheeni. No ũngĩka atĩa ũngĩthiĩ igooti-inĩ, wĩrũo ũigĩrĩre guoko gwaku Bibilia-inĩ na wĩhĩte atĩ ũkũruta ũira wa ma? Hĩndĩ ta ĩyo no ũthuure gwĩtĩkĩra gwĩka ũguo tondũ o na Maandĩko nĩ magwetete ndungata njĩhokeku ciekire gĩĩko kĩa mũthemba mũna ikĩĩhĩta. (Kĩam. 24:2, 3, 9; 47:29-31) Nĩ ũndũ wa bata kũririkana atĩ ũngĩĩhĩta mwĩhĩtwa ũcio, ũkoragwo ũkĩĩhĩta mbere ya Ngai atĩ ũkwaria ma. Kwoguo wagĩrĩirũo gũkorũo wĩhaarĩirie gũcokia kĩũria o gĩothe ũngĩũrio ũtekũheenania.

Tondũ nĩ tuonaga ũrata witũ na Jehova ũrĩ wa bata, twagĩrĩirũo kũhoya na gwĩcũrania wega igũrũ rĩgiĩ mwĩhĩtwa ũrĩa tũrorio twĩhĩte, tũtigĩrĩre atĩ ndũraregana na thamiri citũ kana na motaaro ma Bibilia. Ũngĩtua itua rĩa kwĩhĩta no mũhaka ũhingie mwĩhĩtwa ũcio.​—1 Pet. 2:12.