Jehova endaga andũ arĩa mahikanĩtie makorũo na gĩkeno na matũũrie ũrata wa hakuhĩ. (Mat. 19:4-6) Angĩkorũo nĩ wendaga kũhika kana kũhikania-rĩ, ũngĩka atĩa nĩguo wone mũndũ ũrĩa wagĩrĩire? Tondũ Jehova nĩwe Mũũmbi witũ, nĩ oĩ kĩrĩa tũngĩbatara nĩguo tũkorũo na kĩhiko kĩrĩ na gĩkeno. Kwoguo tũkĩhũthĩra motaaro marĩa atũheete, no tũkorũo na maumĩrĩra mega. Rekei tuone motaaro mamwe atũheete.

Wa mbere, nĩ tũbatiĩ gũtaũkĩrũo nĩ ũndũ ũyũ: “Ngoro nĩ ĩheenanagia gũkĩra kĩndũ kĩngĩ o gĩothe na nĩ ũgwati.” (Jer. 17:9) Rĩrĩa andũ erĩ marenda kũhikania macemania hamwe nĩguo mamenyane makĩria, no mekore nĩ mambĩrĩirie kũgucanĩrĩria o na ihenya na ũndũ ũcio ũtũme mage gũtua matua ma ũũgĩ. Andũ mangĩtua itua rĩa kũhikania no ũndũ tu wa ũrĩa maraigua ngoro-inĩ, kaingĩ ũndũ ũcio ndũrĩkagĩrĩria wega. (Thim. 28:26) Nĩkĩo ti ũndũ wa ũũgĩ andũ kwambĩrĩria kwĩrana ũrĩa mendaine na atĩ nĩ mekũhikania o na matarĩ maramenyana wega.

Thimo 22:3 yugaga: “Mũndũ mũũgĩ onaga ũgwati akehitha, no arĩa matarĩ na ũmenyeru mathiaga o na mbere magacemania na maũndũ moru.” Nĩ mogwati marĩkũ mũndũ angĩcemania namo nĩ ũndũ wa kũhũthĩra website cia kũnyitithania andũ? Ũndũ wa kĩeha nĩ atĩ andũ amwe manambĩrĩria kwaranĩria na mũndũ Intaneti-inĩ, no thutha-inĩ makamenya atĩ mũndũ ũcio nĩ kũmaheenia aamaheenagia. Ningĩ andũ matarĩ ehokeku manahingũra akaunti itarĩ cia ma thĩinĩ wa website icio na makaiya andũ mbeca. Rĩmwe andũ arĩa mahingũraga akaunti ta icio cia maheeni meĩtaga Aira a Jehova.

Harĩ o na ũgwati ũngĩ. Website imwe cia kũnyitithania andũ nĩ ikoragwo ithondekeirũo programu cia kompiuta cia gũthuurĩra mũndũ mũndũ wa kũhikania nake. No gũtirĩ ũira wonanĩtie atĩ andũ arĩa mahikanagia na njĩra ta ĩyo nĩ makoragwo na maumĩrĩra mega. Hihi nĩ ũndũ wa ũũgĩ kwĩhoka programu ya kompiuta ĩthondeketwo nĩ andũ ĩgũteithie gũtua itua rĩa bata rĩa gũthuura mũndũ ũrĩa mũkũhikania nake? Hihi programu ta ĩyo ya kompiuta no ĩringithanio na ithimi cia Bibilia?—Thim. 1:7; 3:5-7.

Thimo 14:15 ĩtũheaga ũtaaro ũyũ: “Mũndũ ũrĩa ũtarĩ na ũũgĩ etĩkagia kiugo o gĩothe, no ũrĩa mũũgĩ nĩ ecũranagia ikinya o rĩothe.” Ũtanatua itua atĩ mũndũ mũna nĩ mwega wa kũhikania nake, no ũbatare kwamba kũmũmenya wega.  Nĩ ũndũ mũritũ kũmenya mũndũ wega angĩkorũo mũkũhũthĩra Intaneti. Hihi nĩ ũkuona ta ũngiuga nĩ ũĩ mũndũ wega atĩ tondũ nĩ ekĩrĩte ũhoro wake Intaneti-inĩ na nĩ mũhũthagĩra mahinda maingĩ mũgĩtũmanĩra ndũmĩrĩri? Andũ amwe maneciria atĩ nĩ monete mũndũ mwega wa kũhikania nake, no thutha wa gũcemania na mũndũ ũcio ĩmwe kwa ĩmwe makamaka tondũ wa kuona ũrĩa mareciragia tiguo.

Mwandĩki wa thaburi aaugire ũũ: “Ndinyitanagĩra na andũ a maheeni, na nĩ ndĩĩthemaga arĩa mehithaga ũrĩa matariĩ.” (Thab. 26:4) Andũ amwe nĩ maheenanagia ũrĩa matariĩ thĩinĩ wa website nĩguo magucĩrĩrie andũ arĩa angĩ. Nĩ mahithaga kana makaga kuonania ngumo ciao njũru rĩrĩa mararanĩria na andũ arĩa angĩ Intaneti-inĩ. Nĩ ũndũ wa bata kwĩyũria ciũria ici: O na gũtuĩka andũ amwe no mauge atĩ nĩ Aira a Jehova-rĩ, hihi nĩ ũhoro wa ma atĩ nĩ Akristiano abatithie? Hihi nĩ Akristiano agimaru kĩĩroho? Hihi nĩ makoragwo na ũrata wa hakuhĩ hamwe na Jehova? Hihi nĩ andũ maheetwo gĩtĩo kĩũngano-inĩ kĩao? Kana hihi o ti cionereria njega kana o na makorũo nĩ “thiritũ njũru”? (1 Kor. 15:33; 2 Tim. 2:20, 21) Hihi nĩ metĩkĩrĩtio nĩ Maandĩko kũhika kana kũhikania? No ũbatare kũmenya maũndũ macio o na gũtuĩka no ũkorũo ũrĩ ũndũ mũritũ kũmamenya ũtekwaranĩria na Aira a Jehova angĩ moĩ mũndũ ũcio wega. (Thim. 15:22) Ningĩ ndungata njĩhokeku ya Jehova ndĩngĩenda o na hanini ‘kuohithanio ũrĩa gũtagĩrĩire icoki-inĩ rĩmwe’ na mũndũ ũtarĩ mwĩtĩkia. (2 Kor. 6:14; 1 Kor. 7:39)

Nĩ ũndũ wa mogwati marĩa mangiumana na website cia kũnyitithania andũ, nĩ kaba kũhũthĩra njĩra ingĩ njega cia kũmenyana na mũndũ ũrĩa ũrona atĩ no mũhikanie nake. Nĩ ta kũ mũndũ angĩona mũndũ mwega wa kũhikania nake? Rĩrĩa tũrĩ na mĩeke ya gũcemania hamwe na Aira a Jehova arĩa angĩ ta hĩndĩ ya mĩcemanio, igomano, kana kũndũ kũngĩ, no tũhũthĩre mĩeke ta ĩyo kũmenyana nao wega.

Rĩrĩa tũtarahota gũcemania hamwe ta hĩndĩ ya mũrimũ wa Korona, nĩ tũhũthagĩra indo ta thimũ kũingĩra mĩcemanio-inĩ, na rĩrĩa twaingĩra nĩ tũgĩaga na mweke wa kũmenyana na Aira a Jehova angĩ matarĩ thĩinĩ wa kĩhiko. No ũhote kũigua makĩruta tũcunjĩ twao hĩndĩ ya mũcemanio na makĩruta macokio. (1 Tim. 6:11, 12) O na rĩrĩa mũreka mĩcemanio na indo ta thimũ, no mũgayanio na tũkundi thutha wa mĩcemanio nĩguo mũhote kũmenyana wega. Rĩrĩa Aira a Jehova aingĩ macemanĩtie hamwe kũgerera indo ta thimũ, no ũhote kuona ũrĩa mũndũ ũrĩa ũrakenio nĩwe ararũmbũyania na andũ arĩa angĩ na ũndũ ũcio no ũgũteithie kuona kana arĩ na ngumo njega. (1 Pet. 3:4) O ũrĩa mahinda marathiĩ noguo ũgũthiĩ ũmũmenyete wega na wone kana mĩoroto na ithimi ciaku nĩ iratwarana na ciake na kana no mũhotane.

Rĩrĩa mũndũ ũtarĩ thĩinĩ wa kĩhiko acaria mũndũ ũrĩa wagĩrĩire wa kũhikania nake kũringana na motaaro ma Bibilia, no eyonere ũũma wa thimo ĩno: “Mũndũ ũrĩa ũgĩĩte na mũtumia [kana mũthuri] mwega nĩ agĩĩte na kĩndũ kĩega, na nĩ etĩkĩrĩkaga harĩ Jehova.”—Thim. 18:22.