1. Nĩ kĩĩ gĩatũmire Jesu ere Jehova agitagĩre arutwo ake?

ŨTUKŨ wa mũico mbere ya Jesu kũũragwo, nĩ eeciragia ũhoro wĩgiĩ moritũ marĩa arutwo ake mangĩacemanirie namo. Nĩ ũndũ wa ũrĩa eendete arutwo ake, aahoire Ithe ũũ: “Ũmagitagĩre kuumana na ũrĩa mũũru.” (Joh. 17:14, 15) Jesu nĩ aamenyaga atĩ acoka igũrũ, Shaitani nĩ angĩathiire na mbere kũrũa na andũ arĩa maatungatagĩra Jehova. Hatarĩ nganja, andũ a Jehova nĩ maabataraga kũgitĩrũo.

2. Nĩ kĩĩ kĩngĩtũma tũkorũo na ma atĩ Jehova nĩ arĩcokagia mahoya maitũ?

² Jehova nĩ aacokirie mahoya ma Jesu tondũ nĩ aamwendete. Tũngĩĩrutanagĩria biũ gũkenia Jehova, o na ithuĩ nĩ arĩtwendaga, na nĩ arĩthikagĩrĩria mahoya maitũ rĩrĩa tũramũhoya atũteithie na atũgitĩre. O ta ũrĩa Ithe ũrĩ wendo ekaga, Jehova nĩ arĩthiaga na mbere gũtũgitĩra tũrĩ ciana ciake. Ndarĩ hĩndĩ angĩaga gwĩka ũguo tondũ ũndũ ũcio nĩ ũhutĩtie rĩĩtwa rĩake.

3. Nĩkĩ nĩ tũrabatara ũgitĩri wa Jehova mahinda-inĩ maya?

³ Ihinda-inĩ rĩrĩ nĩ tũrabatara ũgitĩri wa Jehova gũkĩra hĩndĩ ĩngĩ o yothe. Gĩtũmi nĩ tondũ Shaitani nĩ aharũrũkĩtio kuuma kũrĩa igũrũ, “arĩ na marakara manene.” (Kũg. 12:12) Nĩ atũmĩte andũ amwe arĩa matũnyariraga metĩkie atĩ, rĩrĩa maratũnyarira makoragwo makĩrutĩra “Ngai ũtungata mũtheru.” (Joh. 16:2) Nao andũ arĩa matetĩkĩtie Ngai, matũnyariraga tondũ wa kuona tũrĩ ngũrani na andũ arĩa angĩ thĩinĩ wa thĩ. Ĩndĩ gũtekũmakania kĩrĩa kĩratũma andũ matũnyarire, tũtibatiĩ gwĩtigĩra. Nĩkĩ? Tondũ Kiugo kĩa Ngai kiugaga ũũ: “Mwathani nĩ mwĩhokeku, na nĩ ekũmwĩkĩra hinya na amũgitĩre kuumana na ũrĩa  mũũru.” (2 Thes. 3:3) Hihi Jehova atũgitagĩra na njĩra irĩkũ? Rekei twarĩrĩrie njĩra igĩrĩ.

4. Kũringana na Aefeso 6:13-17, Jehova atũheete kĩĩ nĩguo atũgitĩre?

⁴ Jehova nĩ atũheete indo cia mbaara iria ingĩtũgitĩra kuumana na tharĩkĩro cia Shaitani. (Thoma Aefeso 6:13-17.) Indo icio cia mbaara ikoragwo na hinya na nĩ irutaga wĩra ũrĩa kwagĩrĩire. Ĩndĩ indo icio itũgitagĩra o rĩrĩa tu twehumba irĩ ciothe na twaga gũciruta. Hihi indo icio irũgamĩrĩire kĩĩ? Rekei twarĩrĩrie o kĩndũ thutha wa kĩrĩa kĩngĩ.

5. Mũcibi wa ũhoro ũrĩa wa ma ũrũgamĩrĩire kĩĩ, na twagĩrĩirũo kũwĩyoha nĩkĩ?

⁵ Mũcibi wa ũhoro ũrĩa wa ma ũrũgamĩrĩire ũhoro wa ma ũrĩa ũkoragwo Kiugo-inĩ kĩa Ngai, Bibilia. Twagĩrĩirũo kwĩyoha mũcibi ũcio nĩkĩ? Nĩguo tũtikahĩtithio nĩ Shaitani ũrĩa “nĩwe ithe wa maheeni.” (Joh. 8:44) Akoretwo akĩheenania mĩaka mĩingĩ mũno, na nĩ ahotete kũhĩtithia “thĩ yothe ĩrĩa ĩikaragwo.” (Kũg. 12:9) No ũhoro wa ma ũrĩa ũkoragwo thĩinĩ wa Bibilia nĩ ũtũgitagĩra nĩguo tũtikaheenio. Twĩyohaga atĩa mũcibi ũcio wa mũhaano? Twĩkaga ũguo na njĩra ya kwĩruta ũhoro wa ma wĩgiĩ Jehova, kũmũthathaiya na “roho na ma,” na gũikaraga tũrĩ ehokeku maũndũ-inĩ mothe.—Joh. 4:24; Ef. 4:25; Ahib. 13:18.

6. Gako ga gĩthũri karĩa ka ũthingu karũgamĩrĩire kĩĩ, na twagĩrĩirũo gũkehumba nĩkĩ?

⁶ Gako ga gĩthũri karĩa ka ũthingu karũgamĩrĩire ithimi cia Jehova cia ũthingu. Twagĩrĩirũo kwĩhumba gako kau ga gĩthũri nĩkĩ? O ta ũrĩa gako ga gĩthũri kagitagĩra mũthigari ndagathecwo ngoro, no taguo gako ga gĩthũri ka ũthingu kagitagĩra ngoro citũ cia mũhaano, kana ũmũndũ witũ wa na thĩinĩ, nĩguo tũtigathũkio nĩ mĩerekera mĩũru ya andũ a thĩ ĩno. (Thim. 4:23) Jehova erĩgagĩrĩra tũmwende na tũmũtungatĩre na ngoro itũ yothe. (Mat. 22:36, 37) Kwoguo Shaitani ageragia kũgayũkania ngoro itũ na njĩra ya gũtũma twende indo iria irĩ thĩinĩ wa thĩ ĩno iria Jehova athũire. (Jak. 4:4; 1 Joh. 2:15, 16) Angĩona njĩra ĩyo ndĩraruta wĩra, nĩ ageragia gũtũtindĩkĩrĩria twĩke ũndũ ũtaratwarana na ithimi cia Jehova.

7. Twĩhumbaga gako ga gĩthũri karĩa ka ũthingu na njĩra ĩrĩkũ?

⁷ Twĩhumbaga gako ga gĩthũri karĩa ka ũthingu na njĩra ya gwĩtĩkĩra ithimi cia Jehova cia wega na ũũru, na gũtũũra kũringana na ithimi icio. (Thab. 97:10) Andũ amwe no mone ta ithimi cia Jehova ta arĩ cia kũmahinyĩrĩria. No tũngĩtiga kũrũmĩrĩra motaaro ma Bibilia ũtũũro-inĩ witũ, tũngĩkorũo tũhaana ta mũthigari ũraruta gako ga gĩthũri hĩndĩ ĩrĩa mbaara ĩcacĩte atĩ tondũ araigua gako kau karĩ karitũ mũno. Ũcio ndũngĩkorũo ũrĩ ũndũ wa ũũgĩ! No tũngĩkorũo twendete Jehova, tũtirĩonaga mawatho make marĩ “mũrigo,” no tũrĩmonaga marĩ ma kũhonokia mĩoyo itũ.—1 Joh. 5:3.

8. Gũkorũo twĩkĩrĩte iratũ magũrũ-inĩ maitũ twĩhaarĩirie kũhunjia ũhoro ũrĩa mwega nĩ kuuga atĩa?

⁸ Paulo ningĩ aratwĩkĩra ngoro twĩkĩre iratũ magũrũ-inĩ maitũ twĩhaarĩirie kũhunjia ũhoro ũrĩa mwega wa thayũ. Ũguo nĩ kuuga atĩ hingo ciothe twagĩrĩirũo gũkorũo twĩhaarĩirie kũhunjia ũhoro ũrĩa mwega wa Ũthamaki. Rĩrĩa twahunjĩria andũ arĩa angĩ ndũmĩrĩri ya Bibilia, wĩtĩkio witũ nĩ wĩkĩragwo hinya. Nĩ ũndũ wa gwĩkĩra ngoro mũno kuona ũrĩa andũ a Jehova thĩinĩ wa thĩ yothe maracaria mĩeke ya kũhunjia ũhoro ũrĩa mwega marĩ wĩra-inĩ, cukuru, icigo-inĩ cia biacara, makĩhunjia nyũmba kwa nyũmba, rĩrĩa mathiĩte kũgũra indo, rĩrĩa maceerera andũ ao a famĩlĩ matarĩ etĩkia, makĩaria na arata ao, o na rĩrĩa matangĩhota kuuma kwao mũciĩ. Tũngĩtĩkĩra gũtoorio nĩ  guoya tũtige kũhunjia, tũngĩkorũo tũhaana mũthigari ũrutĩte iratũ hĩndĩ ya mbaara, na magũrũ make no magurare na njĩra hũthũ. Ũndũ ũcio no ũtũme atharĩkĩrũo na njĩra hũthũ, na ndangĩhota gwathĩkĩra maũndũ marĩa mũnene wao aroiga.

9. Twagĩrĩirũo gũkuua ngo ĩrĩa nene ya wĩtĩkio nĩkĩ?

⁹ Ngo ĩrĩa nene ya wĩtĩkio ĩrũgamĩrĩire wĩtĩkio witũ harĩ Jehova. Tũkoragwo twĩtĩkĩtie atĩ nĩ ekũhingia ciĩranĩro ciake ciothe. Wĩtĩkio ũcio nĩ ũtũteithagia kũhoria “mĩguĩ yothe ĩrĩa ĩrĩ mwaki ya ũrĩa mũũru.” Twagĩrĩirũo gũkuua ngo ĩyo nĩkĩ? Tondũ nĩ ĩtũgitagĩra tũtikahĩtithio nĩ morutani ma aregenyũki, na nĩguo tũtikoragwo ngoro nĩ andũ arĩa matũnyũrũragia. Tũngĩkorũo tũtarĩ na wĩtĩkio, no twage hinya wa kũregana na andũ arĩa matũtindĩkagĩrĩria twagarare ithimi cia Jehova. No rĩrĩa rĩothe twarega gwĩka ũndũ ũngĩrakaria Jehova tũrĩ wĩra-inĩ kana tũrĩ cukuru, tũkoragwo tũkĩhũthĩra wĩtĩkio witũ kwĩgitĩra o ta ngo. (1 Pet. 3:15) Na rĩrĩa rĩothe twaga gwĩtĩkĩra wĩra wĩ na mũcara mwega nĩ gũkorũo nĩ ũkũingĩrĩra maũndũ maitũ ma kĩĩroho, tũkoragwo tũkĩhũthĩra wĩtĩkio witũ kwĩgitĩra o ta ngo. (Ahib. 13:5, 6) Na rĩrĩa twathiĩ na mbere gũtungatĩra Jehova o na tũgĩũkagĩrĩrũo, tũkoragwo tũkĩgitĩrũo nĩ wĩtĩkio witũ.—1 Thes. 2:2.

10. Ngũbia ya ũhonokio ĩrũgamĩrĩire kĩĩ, na twagĩrĩirũo kwĩhumba ngũbia ĩyo nĩkĩ?

 ¹⁰ Ngũbia ya ũhonokio nĩ kĩĩrĩgĩrĩro kĩrĩa Jehova atũheete gĩa gũtũhonokia kuuma harĩ gĩkuũ na gĩa kũhe ngerenwa arĩa othe mekaga wendi wake. (1 Thes. 5:8; 1 Tim. 4:10; Tit. 1:1, 2) O ta ũrĩa ngũbia ĩgitagĩra mũthigari mũtwe, noguo kĩĩrĩgĩrĩro kĩa ũhonokio kĩgitagĩra ũhoti witũ wa gwĩciria. Na njĩra ĩrĩkũ? Kĩĩrĩgĩrĩro kĩu nĩ gĩtũmaga tũige meciria maitũ harĩ ciĩranĩro cia Ngai, na gĩgatũteithia kwaga gũtoorio nĩ mathĩna. Twĩhumbaga ngũbia ĩyo na njĩra ĩrĩkũ? Twĩkaga ũguo na njĩra ya gũkorũo na mwĩcirĩrie ta wa Jehova. Kwa ngerekano, tũtigaga mwĩhoko witũ harĩ ũtonga ũrĩa ũtamenyagĩrũo, no twĩhokaga Ngai.—Thab. 26:2; 104:34; 1 Tim. 6:17.

11. Rũhiũ rwa njora rwa roho rũrũgamĩrĩire kĩĩ, na twagĩrĩirũo kũrũhũthĩra nĩkĩ?

¹¹ Rũhiũ rwa njora rwa roho nĩ Kiugo kĩa Ngai, Bibilia. Rũhiũ rũu nĩ rũkoragwo na ũhoti wa kũguũria maheeni ma mĩthemba yothe, na kũruta andũ ũkombo-inĩ wa morutani ma maheeni na mĩtugo ĩtagĩrĩire. (2 Kor. 10:4, 5; 2 Tim. 3:16, 17; Ahib. 4:12) Nĩ twĩrutaga ũrĩa tũngĩhũthĩra rũhiũ rũu na njĩra ĩrĩa yagĩrĩire kũgerera wĩruti witũ kĩũmbe na kũgerera gĩthomo kĩrĩa twamũkagĩra ithondeka-inĩ rĩa Jehova. (2 Tim. 2:15) Makĩria ma indo icio cia mbaara, Jehova nĩ atũheaga ũgitĩri wa mũthemba ũngĩ. Ũgitĩri ũrĩkũ?

12. Nĩ ũteithio ũrĩkũ ũngĩ tũrabatara, na nĩkĩ ũteithio ũcio nĩ wa bata?

¹² Mũthigari ũrĩ na ũmenyeru wa kũrũa mbaara nĩ amenyaga atĩ ndangĩhoota mbũtũ nene arĩ wiki, nĩ arabatara ũteithio wa thigari iria ingĩ. Na njĩra o ta ĩyo, tũtingĩhota gũtooria Shaitani na arĩa mamũnyitaga mbaru tũrĩ ithuiki, nĩ tũrabatara ũteithio wa aarĩ na ariũ a Ithe witũ. Jehova nĩ atũheete ‘thiritũ ya ariũ a Ithe witũ’ thĩinĩ wa thĩ yothe nĩguo matũteithie.—1 Pet. 2:17.

13. Kũringana na Ahibirania 10:24, 25, gũthiĩ mĩcemanio gũtũgunaga atĩa?

¹³ Njĩra ĩmwe twamũkagĩra ũteithio nayo nĩ kũgerera mĩcemanio itũ. (Thoma Ahibirania 10:24, 25.) Gũtirĩ mũndũ ũtaiguaga akuĩte ngoro rĩmwe na rĩmwe, no rĩrĩa gwathiĩ ũguo, mĩcemanio no ĩtũũmĩrĩrie. Nĩ twĩkĩragwo ngoro nĩ macokio ma kuuma ngoro ma aarĩ na ariũ a Ithe witũ. Mĩario na cionereria iria marutaga, nĩ itwĩkagĩra hinya gũthiĩ na mbere gũtungatĩra Jehova. Ningĩ ndeereti iria tũkoragwo nacio mbere na thutha wa mĩcemanio nĩ itwĩkagĩra ngoro. (1 Thes. 5:14) Makĩria ma ũguo, mĩcemanio itũ nĩ ĩtũheaga mweke wa gũkorũo na gĩkeno kĩrĩa kiumanaga na gũteithia andũ arĩa angĩ. (Atũm. 20:35; Rom. 1:11, 12) Mĩcemanio itũ nĩ ĩtũteithagia na njĩra ingĩ nyingĩ. Nĩ ĩtũteithagia gũtuĩka ahunjia na arutani ega. Kwa ngerekano, nĩ twĩrutaga ũrĩa tũngĩhũthĩra Gathandũkũ Gaitũ ka Indo cia Kũrutana na njĩra ĩrĩ na moimĩrĩro mega. Kwoguo wĩhaaragĩrie wega nĩ ũndũ wa mĩcemanio. Na ũrĩ mĩcemanio-inĩ, thikagĩrĩria na kinyi. Thutha wa mũcemanio, hũthagĩra maũndũ marĩa weruta. Na rĩrĩa weka maũndũ macio, nĩ ũgũtuĩka “mũthigari mwega wa Kristo Jesu.”—2 Tim. 2:3.

14. Nĩ ũteithio ũrĩkũ ũngĩ Jehova atũheete?

¹⁴ Ningĩ nĩ tũteithagĩrĩrio nĩ araika aingĩ na makoragwo na hinya mũingĩ mũno. Ta wĩcirie maũndũ marĩa mũraika ũmwe angĩhota gwĩka. (Isa. 37:36) Rĩu ta wĩcirie maũndũ marĩa mbũtũ nene ya araika ĩngĩhota kũhingia. Gũtirĩ mũndũ kana ndaimono ĩngĩhota gũtooria mbũtũ ya Jehova. Ũrĩa kũrĩ nĩ atĩ, ndungata ĩmwe njĩhokeku ya Jehova ĩgĩteithio nĩ Jehova, ĩkoragwo na hinya gũkĩra andũ arĩa matũkararagia o na mangĩkorũo marĩ aingĩ atĩa.  (Atiir. 6:16) Ririkanaga ũndũ ũcio rĩrĩa rĩothe werũo kana wekwo ũndũ wa gũkũũraga ngoro nĩ mũndũ mũrutithanagia wĩra nake, mũndũ mũthomaga nake, kana mũndũ wanyu wa famĩlĩ ũtarĩ mwĩtĩkia. Ningĩ ririkana atĩ ndũrarũa mbaara ĩno ũrĩ wiki. Ũrarũa ũgĩtongorio nĩ Jehova.

15. Kũringana na Isaia 54:15, 17, nĩ kĩĩ gĩteithagia andũ a Jehova gũthiĩ na mbere na kũhunjia?

¹⁵ Thĩ ĩno ĩratongorio nĩ Shaitani nĩ ĩtũmenete nĩ ũndũ wa itũmi itiganĩte. Kwa ngerekano, tũtiĩingĩranagia na maũndũ ma ũteti na tũtithiaga mbaara-inĩ. Nĩ tũmenyithagia andũ rĩĩtwa rĩa Ngai, tũkameera atĩ Ũthamaki wake noguo ũkaarehe thayũ wa ma, na tũkarũmia ithimi ciake cia ũthingu. Nĩ tumbũranagia atĩ mũtongoria wa thĩ ĩno nĩ mũheenania mũũru na nĩ mũũragani. (Joh. 8:44) Ningĩ nĩ tũmenyithanagia atĩ thĩ ĩno ya Shaitani ĩrĩ hakuhĩ kwanangwo. O na kũrĩ ũguo, Shaitani na arĩa mamũrũmagĩrĩra matingĩtũma tũtige kũruta wĩra wa kũhunjia. Handũ ha ũguo, tũgũthiĩ na mbere kũgooca Jehova na njĩra o yothe tũngĩhota. O na gũtuĩka Shaitani nĩ arĩ hinya mũingĩ mũno, ndarĩ ahota kũgirĩrĩria ndũmĩrĩri ya Ũthamaki ĩkinyĩre andũ thĩinĩ wa thĩ yothe. Ũndũ ũcio ũhotekaga tondũ Jehova nĩ atũgitagĩra.—Thoma Isaia 54:15, 17.

16. Jehova akaahonokia andũ ake atĩa hĩndĩ ya thĩna ũrĩa mũnene?

¹⁶ Nĩ maũndũ marĩkũ megwĩkĩka mahinda marĩa maroka? Hĩndĩ ya thĩna ũrĩa mũnene, Jehova nĩ agatũhonokia na njĩra igĩrĩ cia magegania. Wa mbere, nĩ akaahonokia ndungata ciake njĩhokeku hĩndĩ ĩrĩa agatũma athamaki a thĩ manange Babuloni Ũrĩa Mũnene, ũguo nĩ kuuga ndini ciothe cia maheeni. (Kũg. 17:16-18; 18:2, 4) Thutha ũcio nĩ akaahonokia andũ ake rĩrĩa agakorũo akĩniina gĩcunjĩ kĩrĩa gĩgakorũo gĩtigarĩte gĩa thĩ ya Shaitani hĩndĩ ya mbaara ya Hari–Magedoni.—Kũg. 7:9, 10; 16:14, 16.

17. Tũgunĩkaga atĩa nĩ ũndũ wa gũikara hakuhĩ na Jehova?

¹⁷ Twatũũra hakuhĩ na Jehova, gũtirĩ ũndũ mũnene Shaitani angĩtwĩka ũkĩrĩte ũhoti wa Jehova. O na ũrĩa kũrĩ nĩ atĩ, Shaitani nĩwe ũkaaniinwo kaimana. (Rom. 16:20) Kwoguo wĩhumbe indo ciothe cia mbaara na ndũkanacige thĩ! Ndũkanagerie kũrũa mbaara ũrĩ wiki. Teithagĩrĩria aarĩ na ariũ a Ithe witũ. Na ũrũmagĩrĩre ũtongoria wa Jehova. Weka ũguo nĩ ũrĩkoragwo na ma atĩ Ithe witũ wa igũrũ nĩ arĩkũheaga hinya na agakũgitĩra.—Isa. 41:10.