1-2. Taarĩria ũrĩa motaaro ma Bibilia mangĩtuĩka ma bata mũno harĩ ithuĩ rĩrĩa maũndũ maitũ macenjia.

 MŨTHENYA wa ũhiki, mũhiki na mũhikania nĩ mathikagĩrĩria na kinyi mĩario ya Bibilia ĩrĩa yaragĩrĩria ũhoro wa kĩhiko. Maandĩko marĩa maragĩrĩrio matikoragwo marĩ mageni harĩ o. No kuuma hĩndĩ ĩyo gũthiĩ na mbere, maandĩko macio nĩ makoragwo marĩ ma bata mũno harĩ o. Gĩtũmi nĩ tondũ nĩ marĩmahũthagĩra kĩhiko-inĩ kĩao.

² Ũguo noguo gũthiaga rĩrĩa mũthuri na mũtumia magĩa na mwana. Kwa ihinda rĩa mĩaka mĩingĩ, no makorũo mathikĩrĩirie mĩario mĩingĩ ya Bibilia ĩgiĩ ũhoro wa kũrera ciana. No rĩu tondũ nĩ mekwambĩrĩria kũrera mwana, motaaro macio marĩkoragwo marĩ ma bata mũno harĩ o. Marĩ na ũigĩrĩrĩki mũnene! Kwoguo rĩrĩa maũndũ maitũ macenjia ũtũũro-inĩ, maandĩko mamwe nĩ matuĩkaga ma bata mũno harĩ ithuĩ. Ũcio nĩ ũndũ ũmwe ũtũmaga athathaiya a Jehova mathome Maandĩko na mamecũũranie “matukũ-inĩ mothe” ma ũtũũro wao, o ta ũrĩa athamaki a Isiraeli meerĩtwo mekage.—Gũcok. 17:19.

3. Tũkwarĩrĩria maũndũ marĩkũ gĩcunjĩ-inĩ gĩkĩ?

³ Aciari, mũrĩ na mweke wa mwanya mũno wa kũruta ciana cianyu igũrũ rĩgiĩ Jehova. No nĩ mũrabatara gwĩka makĩria ma kũruta ciana cianyu igũrũ rĩgiĩ Ngai. Nĩ mwagĩrĩirũo kũruta ciana cianyu kwenda Jehova biũ. Mũngĩka atĩa nĩguo mũciteithie kũmwenda? Gĩcunjĩ-inĩ gĩkĩ, nĩ tũkwarĩrĩria motaaro  mana ma Bibilia mangĩmũteithia mũrĩ aciari. (2 Tim. 3:16) Ningĩ nĩ tũkuona ũrĩa aciari amwe Akristiano magunĩkĩte nĩ ũndũ wa kũhũthĩra ũtaaro wa Bibilia.

4. Ũtaaro ũmwe ũngĩteithia aciari kũruta ciana ciao kwenda Jehova kuuma ngoro nĩ ũrĩkũ? (Jakubu 1:5)

⁴ Ũtaaro wa 1: Caragia ũtongoria wa Jehova. Hoya Jehova akũhe ũũgĩ ũrĩa ũrabatara wa gũteithia ciana ciaku kũmwenda. (Thoma Jakubu 1:5.) Jehova nĩwe ũngĩheana ũtaaro ũrĩa mwega biũ. Tũrĩ na itũmi nyingĩ cia kuuga ũguo. Igĩrĩ ciacio nĩ: Kĩa mbere, Jehova nĩwe mũciari ũrĩa ũrĩ na ũmenyeru mũingĩ mũno. (Thab. 36:9) Gĩa kerĩ, ũtaaro ũrĩa atũheaga wa ũũgĩ hingo ciothe nĩ ũtũgunaga.—Isa. 48:17.

5. (a) Nĩ indo ta irĩkũ ithondeka rĩa Jehova rĩrutĩte cia gũteithia aciari? (b) Kũringana na video-rĩ, ũrerutire atĩa kuumana na ũrĩa mũrũ na mwarĩ wa Ithe witũ Amorim maarerire ciana ciao?

⁵ Jehova nĩ atũheete irio nyingĩ cia kĩĩroho kũgerera Kiugo gĩake na ithondeka rĩake, iria ingĩgũteithia kũruta ciana ciaku kũmwenda. (Mat. 24:45) Kwa ngerekano, no wone motaaro mangĩgũteithia thĩinĩ wa icunjĩ cia kĩrũmanĩrĩrio irĩ na kĩongo “Ũteithio Kũrĩ Famĩlĩ,” iria ciacabagwo thĩinĩ wa ngathĩti ya Arahũkai! kwa ihinda rĩa mĩaka ĩigana ũna na rĩu nĩ cionekaga thĩinĩ wa website itũ. Ningĩ kũrĩ na video nyingĩ thĩinĩ wa jw.org iria irĩ na icunjĩ cia kũhoyanwo ũhoro na video cia ngerekano iria ingĩteithia aciari kũhũthĩra ũtaaro wa Jehova makĩrera ciana ciao. b—Thim. 2:4-6.

6. Mũrũ wa Ithe witũ ũmwe aiguaga atĩa nĩ ũndũ wa ũtongoria ũrĩa marĩ na mũtumia wake mamũkagĩra kuuma kũrĩ ithondeka rĩa Jehova?

⁶ Aciari aingĩ nĩ macoketie ngatho nĩ ũndũ wa ũteithio ũrĩa Jehova aheanaga kũgerera ithondeka rĩake. Mũthuri ũmwe wĩtagwo Joe aaugire ũũ: “Kũrera ciana ithatũ ũhoro-inĩ wa ma ti ũndũ mũhũthũ. Tũrĩ na mũtumia wakwa hingo ciothe nĩ tũhoyaga Jehova atũteithie. Na kaingĩ rĩrĩa tũrĩ na ũndũ tũragerera, nĩ tuonaga ũhoro tũngĩthoma kana video ĩrarĩrĩria ũhoro ũcio, o ihinda-inĩ rĩrĩa rĩagĩrĩire. Hingo ciothe nĩ tũcaragia ũtongoria wa  Jehova.” Joe na mũtumia wake nĩ monete atĩ indo iria tũheagwo nĩ ithondeka rĩa Jehova nĩ iteithagia ciana ciao gũkuhĩrĩria Jehova.

7. Nĩkĩ nĩ ũndũ wa bata harĩ aciari kũrora kĩonereria kĩrĩa maraigĩra ciana? (Aroma 2:21)

⁷ Ũtaaro wa 2: Korũo ũrĩ kĩonereria kĩega. Ciana nĩ ciĩroragĩra mũno aciari a cio, na kaingĩ nĩ ciĩgerekanagia nao. Ũhoro wa ma nĩ atĩ gũtirĩ mũciari mũkinyanĩru. (Rom. 3:23) O na kũrĩ ũguo, aciari ogĩ nĩ merutanagĩria ũrĩa wothe mangĩhota gũkorũo marĩ kĩonereria kĩega harĩ ciana ciao. (Thoma Aroma 2:21.) Mũthuri ũmwe akĩaria igũrũ rĩgiĩ ciana ooigire ũũ: “Ikoragwo itariĩ ta thibonji ĩragucia maũndũ marĩa mothe tuugaga na tũgeka, na no itwĩre rĩrĩa kĩonereria gitũ gĩtaratwarana na maũndũ marĩa tũraciruta.” Kwoguo angĩkorũo nĩ tũrenda gũteithia ciana citũ ciende Jehova, no mũhaka o na ithuĩ tuonanie atĩ nĩ tũmwendete.

8-9. Weruta atĩa kuumana na ciugo cia Andrew na cia Emma?

⁸ Nĩ harĩ njĩra nyingĩ aciari mangĩhũthĩra kũruta ciana ciao kwenda Jehova. Mũrũ wa Ithe witũ ũmwe wa mĩaka 17 wĩtagwo Andrew aaugire ũũ: “Hĩndĩ ciothe aciari akwa nĩ maatĩtĩrithagia bata wa kũhoya. O mũthenya itanakoma baba nĩ ookaga tũkahoya hamwe, o na angĩkorũo nĩ ngũhoete ndĩ wiki. Aciari akwa hingo ciothe nĩ maatũririkanagia atĩ: ‘No ũhoe Jehova maita maingĩ o ũrĩa ũngĩenda.’ Ũndũ ũcio nĩ ũtũmĩte mahoya makorũo marĩ ma bata mũno harĩ niĩ, na rĩu nĩ njiguaga arĩ ũndũ mũhũthũ kũhoya na kuona Jehova arĩ Ithe witũ ũnyendete.” Aciari, hingo ciothe ririkanagai atĩ gũkorũo mwendete Jehova no gũteithie ciana cianyu o nacio kũmwenda.

⁹ Ningĩ ta wĩcirie ũhoro wĩgiĩ Emma. Rĩrĩa baba wao aamatiganĩirie, nĩ aatigire mathiirĩ maingĩ ma andũ marĩa mami wao aabataraga kũrĩha. Emma aaugire ũũ: “Maita maingĩ mami ndaakoragwo na mbeca cia kũigana, no hingo ciothe nĩ aaragia ũhoro wĩgiĩ ũrĩa Jehova arũmbũyagia ndungata ciake na agacihingĩria mabataro macio. Ndarora mũtũũrĩre wake nĩ ndonaga atĩ nĩ eetĩkĩtie ũndũ ũcio. Mami nĩ eekaga kũringana na maũndũ marĩa aandutaga.” Tũreruta atĩa? Aciari no mahote kũigĩra ciana ciao kĩonereria kĩega o na rĩrĩa maũndũ marĩ maritũ.—Gal. 6:9.

10. Aciari Aisiraeli maakoragwo na mĩeke ĩrĩkũ ya kwaria na ciana ciao? (Gũcokerithia Maathani 6:6, 7)

¹⁰ Ũtaaro wa 3: Aragia na ciana ciaku kaingĩ. Jehova eerĩte aciari Aisiraeli marutage ciana ciao ũhoro ũmwĩgiĩ hingo ciothe. (Thoma Gũcokerithia Maathani 6:6, 7.) Aciari acio nĩ maakoragwo na mĩeke mĩingĩ o mũthenya ya kwaria na ciana ciao na gũciteithia kwenda Jehova kuuma ngoro. Kwa ngerekano, tũmwana thĩinĩ wa Isiraeli nĩ tũngĩahũthĩrire mahinda maingĩ hamwe na ithe makĩhanda mĩmera kana makĩgetha. Natuo tũirĩtu nĩ tũngĩahũthĩrire mahinda maingĩ hamwe na nyina magĩtuma kana makĩruta mawĩra mangĩ ma mũciĩ. Hĩndĩ ĩyo aciari maarutithanagia wĩra na ciana ciao, nĩ maangĩarĩrĩirie maũndũ maingĩ ma bata. Kwa ngerekano, nĩ maangĩarĩrĩirie ũhoro wĩgiĩ wega wa Jehova na ũrĩa aateithagia famĩlĩ yao.

11. Nĩ mweke ũrĩkũ aciari Akristiano makoragwo naguo wa kwaria na ciana ciao?

¹¹ Ũmũthĩ ũtũũro nĩ ngũrani na ũrĩa watariĩ tene. Mabũrũri-inĩ maingĩ, ti ũndũ mũhũthũ harĩ aciari na ciana ciao kũhũthĩra mahinda hamwe. Aciari no makorũo wĩra-inĩ, nacio ciana irĩ cukuru. Kwoguo aciari no mũhaka mageragie gũcaria mahinda ma kwaria na ciana ciao. (Ef. 5:15, 16; Afil. 1:10) Ũthathaiya  wa Famĩlĩ nĩ ũheaga aciari mweke wa gwĩka ũguo. Mũrũ wa Ithe witũ ũmwe mwĩthĩ wĩtagwo Alexander aaugire ũũ: “Baba hingo ciothe nĩ atigagĩrĩra atĩ nĩ tweka ũthathaiya wa famĩlĩ, na ndarekaga ũndũ o na ũrĩkũ ũgirĩrĩrie tũhũthĩre mahinda macio hamwe. Thutha wa kwĩruta nĩ twaragia maũndũ maingĩ.”

12. Nĩ maũndũ marĩkũ kĩongo kĩa famĩlĩ agĩrĩire gwĩciria ũhoro wamo hĩndĩ ya ũthathaiya wa Famĩlĩ?

¹² Angĩkorũo ũrĩ kĩongo kĩa famĩlĩ-rĩ, ũngĩka atĩa nĩguo ciana ciaku ĩkenere ũthathaiya wa Famĩlĩ? No mwĩrute nacio ibuku ritũ rĩerũ rĩa Kenera Ũtũũro Tene na Tene! Ibuku rĩu no rĩmũteithie gũkorũo na ndeereti njega. Tondũ ũngĩenda ciana ciaku citũrũre kĩrĩa kĩrĩ ngoro-inĩ ciacio, ndũkahũthagĩre ihinda rĩu rĩa ũthathaiya wa famĩlĩ gũcinegenia kana gũcikũũma. Ningĩ geragia kwaga kũrakara rĩrĩa ciana ciaku ciauga maũndũ mataratwarana na morutani ma Bibilia. Handũ ha ũguo, kenaga tondũ ciana ciaku itirahitha kĩrĩa kĩrĩ ngoro-inĩ ciacio, na ũciĩkĩrage ngoro kwĩyaria itegwĩtigĩra. Ndũngĩhota gũteithia ciana ciaku ũtangĩmenya kĩrĩa kĩrĩ ngoro-inĩ ciacio.

13. Nĩ mĩeke ĩrĩkũ ĩngĩ aciari makoragwo nayo ya gũteithia ciana ciao gũkuhĩrĩria Jehova?

¹³ Aciari, rĩrĩa rĩothe mũrĩ na ciana cianyu, caragiai mĩeke ya gũciteithia ikuhĩrĩrie Jehova. Mũtigetagĩrĩre o hĩndĩ ĩrĩa mũreruta nacio Bibilia nĩguo mũcirute ũhoro wĩgiĩ Ngai witũ ũrĩ wendo. Mwarĩ wa Ithe witũ ũmwe wĩtagwo Lisa aaugire ũũ: “Nĩ twahũthagĩra ũũmbi gũteithia ciana citũ kwĩruta igũrũ rĩgiĩ Jehova. Kwa ngerekano, kagui gaitũ kangĩekire ũndũ ũgũtũma ciana citũ itheke, nĩ tũngĩahũthĩrire ũndũ ũcio gũciteithia kuona atĩ Mũũmbi witũ nĩ Ngai mũkeni na nĩ endaga tũkenere ũtũũro.”

14. Nĩkĩ nĩ ũndũ wa bata aciari gũteithia ciana ciao gũthuura arata na njĩra ya ũũgĩ? (Thimo 13:20)

¹⁴ Ũtaaro wa 4: Teithia ciana ciaku gũthuura arata ega. Kiugo kĩa Ngai kĩonanagia wega atĩ arata arĩa tũgũthuura no makorũo na ũgucania mwega kana mũũru harĩ ithuĩ. (Thoma Thimo 13:20.) Aciari, hihi nĩ mũĩ arata a ciana cianyu? Nĩ mũrĩ mwamona kana mũkahũthĩra mahinda hamwe nao? Ũngĩka atĩa nĩguo ũteithie ciana ciaku kũgĩa na arata arĩa mendete Jehova? (1 Kor. 15:33) No ũteithie  ciana ciaku gũthuura arata ega na njĩra ya kũnyita ũgeni aarĩ na ariũ a Ithe witũ arĩa marathiĩ na mbere wega kĩĩroho gwaku mũciĩ, nĩguo mũhũthĩre mahinda hamwe nao.—Thab. 119:63.

15. Aciari mangĩka atĩa nĩguo mateithie ciana ciao kũgĩa na arata ega?

¹⁵ Ta wĩcirie ũhoro wa mũrũ wa Ithe witũ ũmwe wĩtagwo Tony. Nĩ ataarĩirie ũrĩa we na mũtumia wake meekire nĩguo mateithie ciana ciao kũgĩa na arata ega. Aaugire ũũ: “Kwa ihinda rĩa mĩaka mĩingĩ, tũrĩ na mũtumia wakwa nĩ tũkoretwo tũkĩnyita ũgeni aarĩ na ariũ a Ithe witũ matiganĩte a ũkũrũ ngũrani gwitũ mũciĩ, tũkarĩanĩra hamwe na tũgeka ũthathaiya wa famĩlĩ hamwe. Ũndũ ũcio nĩ ũtũteithagia kũmenya arĩa mendete Jehova na matungatagĩra Jehova na gĩkeno. Nĩ tũgĩte na mweke wa kũnyita ũgeni arori a mũthiũrũrũko, amishonarĩ, na angĩ maikare gwitũ mũciĩ. Kĩyo kĩao, roho wao wa kwĩima, na maũndũ marĩa meyoneire nĩ ikoretwo na ũgucania mũnene harĩ ciana citũ na igaciteithia gũkuhĩrĩria Jehova.” Aciari, mwĩrutanagĩriei gũteithia ciana cianyu gũkorũo na arata ega.

16. Ũngĩka atĩa mwana waku angiuga atĩ ndakwenda gũtungatĩra Jehova?

¹⁶ Ĩ mwana waku angiuga atĩ ndarenda gũtungatĩra Jehova o na thutha waku kwĩrutanĩria biũ kũmũteithia? Ndũgatue atĩ ndwahingirie itemi rĩaku ũrĩ mũciari. Jehova nĩ atũheete ithuothe, o hamwe na mwana waku, wĩyathi wa gwĩthuurĩra na wĩyathi ũcio nĩguo ũtũteithagia gũthuura kana nĩ tũgũtungatĩra Ngai kana tũtikũmũtungatĩra. Mwana waku angĩthuura gũtiga Jehova, ndũkanate mwĩhoko atĩ nĩ akaamũcokerera hĩndĩ ĩmwe. Ririkanaga ngerekano ya mwanake ũrĩa worĩte. (Luk. 15:11-19, 22-24) Mwanake ũcio nĩ eekĩte maũndũ maingĩ moru, no thutha-inĩ nĩ aacokire mũciĩ. Andũ amwe no mauge, “Ĩyo yarĩ o ngerekano. Ndirona ta mwana wakwa angĩcokerera Jehova.” Ma nĩ atĩ, no amũcokerere! Ũguo nĩguo gwathiire harĩ mwanake ũmwe wĩtagwo Elie.

17. Wekĩrũo ngoro atĩa nĩ ngerekano ya Elie?

 ¹⁷ Elie aaugire ũũ akĩaria ũhoro wĩgiĩ aciari ake: “Nĩ meerutanĩirie biũ kũndeithia kwenda Jehova na Kiugo gĩake, Bibilia. No ndĩna kĩndũ mĩaka 15 nĩ ndambĩrĩirie kũrema.” Elie nĩ aambĩrĩirie gwĩka maũndũ moru ehithĩte, na o na aciari ake mageria kũmũteithia ndaamathikĩrĩirie. Thutha wake kwehera mũciĩ, nĩ eeingĩranirie na mĩtugo mĩũru. O na kũrĩ ũguo, rĩmwe nĩ aaragia maũndũ ma Bibilia na mũrata wake ũmwe. Elie aaugire ũũ: “O ũrĩa ndaragia ũhoro wa Jehova na mũrata wakwa, noguo ndeciragia ũhoro wa Jehova makĩria. Kahora o kahora, mbeũ cia ũhoro wa ma iria aciari akwa meerutanĩirie kũhanda thĩinĩ wa ngoro yakwa, nĩ ciambĩrĩirie gũkũra.” Thutha wa ihinda, Elie nĩ aacokereire ũhoro wa ma. c Na githĩ to mũhaka akorũo aciari ake nĩ maakenire mũno nĩ ũndũ wa kũgeria kũmũruta ũhoro wa Jehova arĩ o mũnini?—2 Tim. 3:14, 15.

18. Ũiguaga atĩa nĩ ũndũ wa aciari arĩa merutanagĩria kũruta ciana ciao kwenda Jehova?

¹⁸ Aciari, mũrĩ na mweke wa mwanya mũno wa gũteithia rũciaro rwerũ gũtuĩka athathaiya a Jehova. (Thab. 78:4-6) Ũcio ti wĩra mũhũthũ, na nĩ tũramũcokeria ngatho mũno nĩ ũndũ wa ũrĩa mwĩrutanagĩria na kĩyo gũteithia ciana cianyu. Mũngĩthiĩ na mbere kwĩrutanĩria ũrĩa wothe mũngĩhota gũteithia ciana cianyu kwenda Jehova, na gũcirera mũgĩcirũngaga na mũgĩcitaaraga na njĩra yake, nĩ mũrĩkoragwo na ma atĩ Ithe witũ wa igũrũ nĩ arĩkenagio nĩ inyuĩ.—Ef. 6:4.