1. Nĩkĩ kũbatithio nĩ ũndũ wa o mũhaka? (Rora mbica kĩambĩrĩria-inĩ gĩa gĩcunjĩ gĩkĩ.)

O MWAKA arutwo a Bibilia ngiri nyingĩ nĩ mabatithagio. Aingĩ ao nĩ matinĩnja kana ciana ninanini, na no makorũo marereirũo ũhoro-inĩ wa ma. Hihi ũrĩ ũmwe wao? Angĩkorũo nĩguo, nĩ wĩkĩte ũndũ mwega. No mũhaka Mũkristiano abatithio nĩguo akaahonoka.​—Mat. 28:​19, 20; 1 Pet. 3:21.

2. Nĩkĩ mũndũ ndagĩrĩirũo gwĩtigĩra kana gwĩthema kwĩyamũrĩra Jehova?

² O na gũtuĩka kũbatithio nĩ gũtũmaga mũndũ agĩe irathimo nyingĩ, ningĩ no gũtũmaga mũndũ ehokerũo maũndũ. Na njĩra ĩrĩkũ? Mũthenya ũrĩa wabatithirio nĩ woigire ĩĩ harĩ kĩũria gĩkĩ, “Thĩinĩ wa mũthingi wa igongona rĩa Jesu Kristo-rĩ, nĩ wĩrirĩte mehia maku na ũkeyamũrĩra Jehova nĩ getha wĩke wendi wake?” Kũbatithio gwaku kuonanagia atĩ nĩ weyamũrĩire Jehova. Nĩ mwĩhĩtwa wehĩtire harĩ we atĩ nĩ ũkũmwenda na ũrĩigaga maũndũ make mbere ya marĩa mangĩ mothe. Rĩu rĩarĩ itua  iritũ. Hihi nĩ wagĩrĩirũo kwĩrira nĩ ũndũ wa itua rĩu? Aca ndwagĩrĩirũo. Gũtirĩ hĩndĩ ũkeerira nĩ ũndũ wa kũreka Jehova agũtongoragie. Mũgarũ na ũguo, mũndũ ũrĩa ũtatongoragio nĩ Jehova akoragwo agĩtongorio nĩ Shaitani. Mũcukani ndakoragwo na ũhoro na ũhonokio waku. Hatarĩ nganja, gĩkeno gĩake nĩ rĩrĩa ũngĩũrũo nĩ muoyo wa tene na tene nĩ ũndũ wa kũnyitanĩra nake harĩ gũkararia ũnene wa Jehova.

3. Nĩ irathimo irĩkũ mũndũ agĩaga nacio nĩ ũndũ wa kwĩyamũrĩra Jehova?

³ Handũ ha kũnyita Shaitani mbaru, wĩcirie ũhoro wa irathimo iria ũgĩte nacio nĩ ũndũ wa kwĩyamũrĩra Jehova na kũbatithio. Tondũ nĩ wĩyamũrĩire Jehova, no uuge ũũ ũrĩ na ũmĩrĩru: “Jehova e mwena wakwa; ndingĩĩtigĩra: mũndũ-rĩ, nĩ atĩa angĩhota kũnjĩka?” (Thab. 118:6) Gũtirĩ mweke ũngĩ wa bata ũngĩagĩire naguo ũkĩrĩte gũkorũo mwena wa Ngai na gwĩtĩkĩrĩka nĩwe.

4, 5. (a) Nĩ na njĩra ĩrĩkũ kwĩyamũrĩra Jehova kũrĩ itua rĩa mũndũ kĩũmbe? (b) Nĩ moritũ marĩkũ Akristiano othe macemanagia namo?

⁴ Ũrĩ Mũkristiano mũbatithie, ũrata waku na Jehova ndũngĩhaananio na mũgũnda kana indo cia famĩlĩ iria ũngĩgaya. Wee nĩwe wagĩrĩirũo kũrutĩra ũhonokio waku wĩra o na angĩkorũo mũikaraga hamwe na aciari aku. Nĩkĩ harĩ bata kũririkana ũndũ ũcio? Nĩ tondũ ndũngĩhota kũmenya mathĩna marĩa ũgacemania namo mahinda mokĩte. Kwa ngerekano, angĩkorũo wabatithirio ũtanatuĩka tinĩnja, no kũhoteke nĩ ũgaacemania na moritũ ũtarĩ wacemania namo watuĩka tinĩnja. Tinĩnja ũmwe oigire ũũ: “Mwana ndangĩigua ũũru tondũ ndanarĩa keki ya kũririkana mũthenya wa gũciarũo arĩ cukuru nĩ ũndũ wa gũkorũo arĩ Mũira wa Jehova. No thutha wa mĩaka ĩigana ũna rĩrĩa agaakorũo hatĩka-inĩ nĩ ũndũ wa merirĩria ma ngomanio, nĩ agĩrĩirũo gũkorũo etĩkĩtie biũ atĩ gwathĩkĩra mawatho ma Jehova nĩrĩo itua rĩrĩa rĩega.”

⁵ Hatarĩ nganja, to andũ ethĩ macemanagia na moritũ matamenyerete. O na arĩa maabatithirio marĩ andũ agima nĩ macemanagia na magerio maingĩ materĩgĩrĩire. Magerio ta macio no makorũo mahutanĩtie na kĩhiko, mĩrimũ, kana wĩra. Ma nĩ atĩ ithuothe gũtekũmakania mĩaka ĩrĩa tũrĩ nayo, no tũcemanie na maũndũ mangĩbatara tuonanie wĩhokeku witũ harĩ Jehova.​—Jak. 1:​12-14.

6. (a) Kwĩra Jehova ũgũtũũra ũmwĩyamũrĩire nĩ kuuga atĩa? (b) Nĩ ũndũ ũrĩkũ tũreruta kuumana na Afilipi 4:​11-13?

⁶ Nĩguo ũhote gũtũũra ũrĩ mwĩhokeku hĩndĩ ciothe, ndũkanariganĩrũo atĩ werire Jehova ũgũtũũra ũmwĩyamũrĩire. Ũguo nĩ kuuga werire Mwathani Mũnene wa igũrũ na thĩ atĩ ũgũtũũra ũmũtungatagĩra o na arata kana aciari aku mangĩtiga kũmũtungatĩra. (Thab. 27:10) Hoya Jehova agũteithie nĩguo ũhote gũtũũra ũmwĩyamũrĩire.​—Thoma Afilipi 4:​11-13.

7. Kũrutĩra ũhonokio waku wĩra ‘ũgĩĩtigagĩra na ũkĩinainaga’ nĩ kuuga atĩa?

⁷ Jehova nĩ endaga ũtuĩke mũrata wake. No gũtũũria ũrata ũcio na kũrutĩra ũhonokio waku wĩra nĩ gũkũbatara kĩyo. O na rĩandĩko rĩa Afilipi 2:12 riugaga ũũ: “Thiĩi na mbere kũrutĩra ũhonokio wanyu wĩra mũgĩĩtigagĩra na mũkĩinainaga.” Ciugo icio ironania atĩ nĩ ũkũbatara gwĩciria ũrĩa ũngĩtũũria ũrata waku na Jehova nĩguo ũtũũre ũrĩ mwĩhokeku o na rĩrĩa wacemania na magerio. Ndũngĩkira uuge atĩ no ũhote gwĩka ũguo. O na andũ amwe arĩa matungatĩire Jehova mĩaka mĩingĩ nĩ  matooretio nĩ magerio. Nĩ ũndũ ũcio-rĩ, nĩ makinya marĩkũ ũngĩoya nĩguo ũrutĩre ũhonokio waku wĩra?

8. Kwĩruta Bibilia kũhutĩtie maũndũ marĩkũ, na ũndũ ũcio nĩ wa bata nĩkĩ?

⁸ Kũgĩa ũrata na Jehova kũhutĩtie maũndũ merĩ, kwaria na gũthikĩrĩria. Kwĩruta Bibilia nĩkuo njĩra ĩrĩa nene tũthikagĩrĩria Jehova nayo. Ũndũ ũcio ũhutĩtie kũgĩa na ũũgĩ rĩrĩa tũrathoma na tũgecũrania Kiugo kĩa Ngai o hamwe na mabuku maitũ. Rĩrĩa ũreka ũguo, ririkana atĩ kwĩruta Bibilia ti ta gwĩka kĩgeranio. Ndwagĩrĩirũo kũiga maũndũ meciria-inĩ ta ũrĩa ũngĩka nĩguo ũhĩtũke kĩgeranio. Kwĩruta Bibilia na njĩra njega nĩ ta ũrĩa ũngĩkorũo ũrĩ thabarĩ-inĩ ũgathiĩ ũkĩmenyaga maũndũ merũ megiĩ Jehova. Ũndũ ũcio nĩ ũgũgũteithia ũkuhĩrĩrie Ngai, nake nĩ egũgũkuhĩrĩria.​—Jak. 4:8.

9. Nĩ indo irĩkũ igũteithĩtie hĩndĩ ĩrĩa ũreruta?

⁹ Ithondeka rĩa Jehova nĩ rĩrutĩte indo nyingĩ cia gũgũteithia nĩguo ũkorũo na mũtaratara mwega wa kwĩruta. Kwa ngerekano, gacunjĩ ga “Tũmaũndũ twa Kwĩruta Bibilia” karĩa karĩ thĩinĩ wa jw.org/ki rungu rwa “Andũ Ethĩ” no gagũteithie kuona maũndũ ma gwĩka marĩa ũngĩĩruta kuuma Bibilia-inĩ. Ningĩ thĩinĩ wa jw.org/ki tũcunjĩ twa ũteithio wa kwĩruta twa “Bibilia Ĩrutanaga Atĩa Kũna?” no tũgũteithie gwĩkĩra wĩtĩkio waku hinya. Tũcunjĩ tũu no tũgũteithie kwĩruta ũrĩa ũngĩtaarĩria andũ angĩ wĩtĩkio waku. Maũndũ mangĩ ũngĩĩruta no moneke gĩcunjĩ-inĩ kĩa Vijana Huuliza . . . Ninaweza Kufanya Nini ili Nifurahie Kusoma Biblia? thĩinĩ wa Amkeni! ya Ĩpuro 2009. Kwĩruta na gwĩcũrania nĩ gũkoragwo na itemi rĩa bata mũno harĩ kũrutĩra wĩra ũhonokio waku.​—Thoma Thaburi 119:105.

10. Nĩkĩ Mũkristiano mũbatithie nĩ arabatara kũhoya?

¹⁰ Rĩrĩa tũreruta tũkoragwo tũgĩthikĩrĩria Jehova, narĩo rĩrĩa tũrahoya tũkoragwo tũkĩmwarĩria. Mũkristiano ndagĩrĩirũo kũhũthia bata wa mahoya kana one ta arĩ ‘gĩthitũ’ gĩa kũmũteithia agaacĩre maũndũ-inĩ make. Handũ ha ũguo, mahoya makoragwo marĩ njĩra ya kwaranĩria  na Mũũmbi witũ. Jehova nĩ endaga ũmwaragĩrie. (Thoma Afilipi 4:6.) Rĩrĩa wacemania na mathĩna, Bibilia ĩragwĩkĩra ngoro ‘ũrekererie mũrigo waku na harĩ Jehova.’ (Thab. 55:22) Hihi nĩ wĩtĩkĩtie ũguo? Nĩ kũrĩ na aarĩ na ariũ a Ithe witũ milioni nyingĩ arĩa mangĩkwĩra atĩ ũndũ ũcio nĩ ũmateithĩtie. O nawe no ũgunĩke!

11. Wagĩrĩirũo hĩndĩ ciothe gũcokagĩria Jehova ngatho nĩkĩ?

¹¹ Mahoya to mweke wa kũhoya Jehova ũteithio. Bibilia yugaga ũũ: “Mũkonanagia atĩ mũrĩ na ngatho.” (Kol. 3:15) Rĩmwe no twĩcirie mũno ũhoro wa mathĩna maitũ nginya tũriganĩrũo nĩ irathimo iria tũgĩte nacio. Githĩ to ũtue itua atĩ o mũthenya nĩ ũrĩciragia ũhoro wa maũndũ ta matatũ ũguo ũngĩcokia ngatho nĩ ũndũ wamo? Ũcoke ũcokerie Jehova ngatho kũgerera mahoya. Tinĩnja ũmwe wĩtagwo Abigail ũrĩa wabatithirio arĩ na mĩaka 12, oigire ũũ: “Nyonaga atĩ Jehova nĩwe twagĩrĩirũo gũcokeria ngatho gũkĩra mũndũ ũngĩ o wothe. Twagĩrĩirũo kũmũcokeria ngatho hĩndĩ ciothe nĩ ũndũ wa indo iria atũheete. Ĩ tũngĩũkĩra mũthenya ũmwe tũkore tũtarĩ na indo iria tũtanacokia ngatho nĩ ũndũ wacio, hihi tũngĩtigwo na kĩĩ?”

12, 13. Nĩkĩ nĩ ũndũ mwega gwĩciria ũrĩa wee ũcamĩte wega wa Jehova?

¹² Mũthamaki Daudi ũrĩa wahonoketio kuuma magerio-inĩ maingĩ maritũ, oigire ũũ kũgerera rwĩmbo: “Ĩ camai muone atĩ Jehova nĩ mwega: gũkena-rĩ, nĩ mũndũ ũrĩa ũrahĩire harĩ we.” (Thab. 34:8) Mũhari ũcio ũronania bata wa mũndũ kwĩyonera wega wa Jehova. Rĩrĩa wathoma Bibilia na mabuku maitũ kana wathiĩ mĩcemanio, nĩ ũiguaga maũndũ ma gũgwĩkĩra ngoro ma ũrĩa Ngai ateithĩtie andũ angĩ gũtũũra marĩ ehokeku. No o ũrĩa ũrakũra kĩĩroho, nĩ ũrabatara kwĩyonera Jehova agĩgũteithia. Nĩ na njĩra ĩrĩkũ ũcamĩte wega wa Jehova?

¹³ Harĩ njĩra ĩmwe Akristiano othe macamĩte wega wa Jehova. Nĩ magĩĩte na mweke wa kũgucĩrĩrio harĩ Ngai na Mũriũ wake. Jesu oigire: “Gũtirĩ mũndũ ũngĩũka kũrĩ niĩ atagucĩrĩirio nĩ Awa ũrĩa wandũmire.” (Joh. 6:44) Hihi nĩ ũrona ciugo icio ta irakũhutia? Mũndũ mwĩthĩ no oige, ‘Jehova nĩ aagucĩrĩirie aciari akwa, na niĩ ngĩmarũmĩrĩra.’ No rĩrĩa weyamũrĩire Jehova na ũkĩbatithio, nĩ wonanirie atĩ nĩ waagĩte na ũrata wa mwanya hamwe nake. Rĩu nĩ akũmenyete wega. Bibilia ĩtwĩraga ũũ: “Mũndũ o wothe angĩkorũo nĩ endete Ngai, ũcio nĩ oĩkaine nĩwe.” (1 Kor. 8:3) Hĩndĩ ciothe geragia kuona mweke wa gũkorũo ithondeka-inĩ rĩa Jehova ũrĩ wa goro na ũgacokagia ngatho nĩ ũndũ waguo.

14, 15. Kũhunjia kũngĩgũteithia atĩa gwĩkĩra wĩtĩkio waku hinya?

¹⁴ Njĩra ĩngĩ ũngĩcama wega wa Jehova nayo nĩ kwĩyonera ũrĩa aragũteithia ũkĩhunjĩria andũ arĩa angĩ. No wĩke ũguo rĩrĩa ũrĩ ũtungata-inĩ kana ũrĩ cukuru. Andũ amwe nĩ monaga ũrĩ ũndũ mũritũ kũhunjĩria andũ a riika rĩao marĩ cukuru. No gũkorũo no ũtaũkĩrũo nĩ kĩĩ gĩtũmaga. Mũndũ ndamenyaga ũrĩa megwĩka amahunjĩria. Na makĩria no ũkorũo ũrĩ ũndũ mũritũ rĩrĩa mũndũ araarĩria arutwo aingĩ gũkĩra rĩrĩa araaria na mũrutwo ũmwe. Nĩ kĩĩ kĩngĩgũteithia?

¹⁵ Amba wĩcirie nĩ kĩĩ gĩtũmaga ũkorũo na ma na maũndũ marĩa wĩtĩkĩtie. Hihi tũcunjĩ twa ũteithio wa kwĩruta tũrĩa tũrĩ thĩinĩ wa jw.org/ki nĩ tũroneka na rũthiomi rwaku? Angĩkorũo ndũĩ, geria kũrora kana no ũtuone. Tũhaarĩirio nĩguo tũgũteithie  gwĩcũrania nĩ kĩĩ wĩtĩkĩtie, kĩrĩa gĩtũmaga wĩtĩkie ũguo, na ũrĩa ũngĩhota kũhunjĩria andũ angĩ. Wakorũo na wĩtĩkio mũrũmu na wĩhaarĩrie wega, nĩ ũkũigua ũkĩenda gũtetera rĩĩtwa rĩa Jehova.​—Jer. 20:​8, 9.

16. Nĩ kĩĩ kĩngĩgũteithia nĩguo ũhote kwaria ũhoro wĩgiĩ wĩtĩkio waku?

¹⁶ O na wĩhaarĩirie wega, no ũigue arĩ ũritũ kwaria ũhoro wĩgiĩ wĩtĩkio waku. Mwarĩ wa Ithe witũ ũmwe ũrĩ na mĩaka 18, ũrĩa wabatithirio arĩ na mĩaka 13, oigire ũũ: “Nĩ njũĩ ũrĩa njĩtĩkĩtie, no rĩmwe na rĩmwe nĩ nyonaga arĩ ũritũ kwaria ũhoro wĩgiĩ wĩtĩkio wakwa.” Ahiũranagia na ũndũ ũcio atĩa? Aacokire akiuga ũũ: “Ngeragia kwaria o ta ũrĩa njaragia rĩrĩa rĩngĩ. Arutwo arĩa angĩ nĩ maaragia moimĩranĩtie ngoro ũhoro wĩgiĩ maũndũ marĩa mekaga. O na niĩ njagĩrĩirũo kũigua o ũguo. Rĩmwe no ngwete kaũndũ ta, ‘Ndĩrarutanaga Bibilia mũthenya ũngĩ, na . . . ’ Ngacoka ngathiĩ na mbere kuuga ũrĩa ngugaga. O na gũtuĩka ũndũ ũrĩa ngũgweta hĩndĩ ĩyo ti wa Bibilia, kaingĩ arutwo arĩa angĩ nĩ manjũragia ũrĩa njĩkaga ngĩrutana Bibilia. O na rĩmwe na rĩmwe nĩ manjũragia ciũria ciĩgiĩ Bibilia. O ũrĩa hũthagĩra njĩra ĩno makĩria noguo nyonaga arĩ ũhũthũ kwaranĩria nao. Na ũndũ ũcio nĩ ũtũmaga ngene mũno!”

17. Maũndũ marĩa wĩtĩkĩtie mangĩgũteithia atĩa kwaria na andũ arĩa angĩ?

¹⁷ O ũrĩa ũkuonia andũ arĩa angĩ atĩ nĩ ũrameciria na ũkamatĩa, nĩ ũhũthũ magũthikĩrĩrie. Olivia ũrĩa ũrĩ na mĩaka 17, na wabatithirio arĩ mũninanini oigire ũũ: “Hĩndĩ ciothe nĩ ndakoragwo na guoya kwaria ũhoro wa Bibilia tondũ ndonaga andũ ta mekũnyona ta ndĩ wa ndini mũno.” No nĩ aambĩrĩirie gwĩciria ũndũ ũngĩ ngũrani. Handũ ha gũtoorio nĩ guoya ũcio, Olivia oigire: “Andũ aingĩ ethĩ o na matiũĩ ũhoro wĩgiĩ Aira a Jehova. No ithuĩ moĩ. Kwoguo ũrĩa twĩkaga maũndũ no gũtũme matũthikĩrĩrie kana mage. Ĩ angĩkorũo nĩ tũrĩ thoni kana guoya kana o na nĩ tũremagwo kwaria ũhoro wĩgiĩ wĩtĩkio witũ? Ũndũ ũcio no ũtũme mone ta tũtakenagĩra gũkorũo tũrĩ Aira a Jehova. O na no mage gwĩtĩkĩra ũhoro witũ tondũ tũtirĩ na ũũmĩrĩru. Kwoguo, tũngĩaria nao tũrĩ na ũũma ũhoro wĩgiĩ wĩtĩkio witũ, o ta ũrĩa twaragia na andũ arĩa angĩ, nĩ ũhũthũ matũhe gĩtĩo.”

18. Kũrutĩra ũhonokio waku wĩra gũkoniĩ maũndũ marĩkũ?

¹⁸ O ta ũrĩa tuona, kũrutĩra wĩra ũhonokio waku nĩ ũndũ wagĩrĩire kuoywo na ũritũ. Maũndũ mamwe makonainie na ũndũ ũcio nĩ gũthoma Kiugo kĩa Ngai na gũgĩcũrania, kũhoyaga, na gwĩciria maũndũ marĩa Jehova akũrathimĩte namo. Gwĩka maũndũ macio nĩ gũgũgũteithia ũkorũo na ma biũ atĩ Jehova nĩ mũrata waku. Na ũndũ ũcio nĩ ũrĩtũmaga warie ũhoro wĩgiĩ wĩtĩkio waku.​—Thoma Thaburi 73:28.

19. Nĩkĩ kĩyo kĩrĩa wĩkĩraga harĩ kũrutĩra ũhonokio waku wĩra nĩ kĩa bata?

¹⁹ Jesu oigire ũũ: “Mũndũ o wothe angĩenda kũnũmĩrĩra, nĩ erege na oe mũtĩ wake wa kũnyarirĩrũo na anũmagĩrĩre.” (Mat. 16:24) Ũhoro wa ma nĩ atĩ, nĩguo mũndũ akorũo arĩ mũrũmĩrĩri wa Jesu no mũhaka eyamũrĩre Jehova na abatithio. No ũndũ ũcio nĩ ũrehaga irathimo nyingĩ rĩu na ũkahingũra mweke wa kuona muoyo wa tene na tene thĩinĩ wa thĩ njerũ. Kwoguo ĩka ũrĩa wothe ũngĩhota nĩguo ũrutĩre ũhonokio waku wĩra!