NĨ MŨTHENYA ũrĩkũ warĩ na gĩkeno kĩnene mũno ũtũũro-inĩ waku? Hihi nĩ rĩrĩa waingĩrire kĩhiko-inĩ kana nĩ rĩrĩa mwana waku wa mbere aaciarirũo? Kana hihi nĩ mũthenya ũrĩa wabatithirio? No kũhoteke atĩ rĩrĩa wabatithirio nĩguo mũthenya waku ũrĩa wa bata mũno na warĩ wa gĩkeno kĩnene. Na githĩ Akristiano arĩa angĩ matiakenire mũno mona ũkĩonania atĩ nĩ wendete Ngai na ngoro, muoyo, meciria na hinya waku wothe!​—Mar. 12:30.

Kuuma rĩrĩa wabatithirio nĩ ũgĩte na gĩkeno kĩnene ũgĩtungatĩra Jehova. O na kũrĩ ũguo-rĩ, ahunjia amwe matikoragwo na gĩkeno ta kĩrĩa maarĩ nakĩo tene. Nĩ kĩĩ gĩtũmĩte gĩkeno kĩao kĩnyihanyihe? Tũrĩ na itũmi irĩkũ cia gũthiĩ na mbere gũtungatĩra Jehova tũrĩ na gĩkeno?

Ndũmĩrĩri ya Ũthamaki nĩ ĩtũheaga gĩtũmi gĩa gũkorũo na gĩkeno, tondũ kũgerera ndũmĩrĩri ĩyo Jehova nĩ atwĩrĩire atĩ ica ikuhĩ nĩ ekũrehe mũico wa mũtabarĩre ũyũ mũru na arehe thĩ yake njerũ. Ibuku rĩa Zefania 1:14 rĩtwĩraga ũũ: “Amu mũthenya ũrĩa mũnene wa Jehova nĩũkuhĩhĩirie, ũgagĩkuhĩhĩria mũno na ũkehĩka.” Ĩndĩ, gweterera mũthenya ũcio ihinda iraya gũkĩra ũrĩa tweciragia no gũtũme gĩkeno kĩrĩa twarĩ nakĩo tene kĩnyihanyihe na gũtũme tũhoerere ũtungata-inĩ witũ.​—Thim. 13:12.

Ũrũmwe ũrĩa tũkoragwo naguo na aarĩ na ariũ a Ithe witũ nĩ ũtwĩkagĩra hinya tũthiĩ na mbere gũtungatĩra Jehova tũrĩ na gĩkeno. No kũhoteke twagucĩrĩirio ũhoro-inĩ wa ma nĩ mĩthiĩre mĩega ya andũ a Jehova na mĩthiĩre yao mĩega ĩgĩtũma twambĩrĩrie gũtungatĩra Jehova tũrĩ na gĩkeno. (1 Pet. 2:12) No rĩrĩ, kũngĩthiĩ atĩa mũrũ kana mwarĩ wa Ithe witũ angĩrũithio kana arũngwo nĩ ũndũ wa gwĩka mehia maritũ? Andũ amwe arĩa maagucĩrĩirio ũhoro-inĩ wa ma nĩ mĩthiĩre mĩega ya andũ a Jehova no makue ngoro na gĩkeno kĩao gĩthire.

Kwenda mũno indo cia kĩĩmwĩrĩ o nakuo no gũtũme gĩkeno gitũ gĩthire. Na njĩra ĩrĩkũ? Mũcukani ahũthagĩra thĩ yake gũtũma twĩtĩkie atĩ kũrĩ na indo nyingĩ mũno tũrabatara. Gũkĩrĩ ũguo-rĩ, nĩ wega kũririkana ciugo ici cia Jesu: “Gũtirĩ mũndũ ũngĩhota gũtungatĩra athani erĩ, nĩ gũkorũo egũthũũra ũmwe na ende ũrĩa ũngĩ kana egwatanie na ũmwe na anyarare ũcio ũngĩ. Mũtingĩtungatĩra Ngai na mũtungatĩre Ũtonga.” (Mat. 6:24) Tũtingĩhota gũtungatĩra Jehova tũrĩ na gĩkeno na hĩndĩ o ĩyo no tũrenda kũgĩa na indo nyingĩ cia kĩĩmwĩrĩ.

Arĩa mendete Jehova mationaga kũmũtungatĩra kũrĩ mũrigo. (1 Joh. 5:3) Jesu oigire ũũ: “Ũkai harĩ niĩ, inyuothe arĩa mũnogete na mũtitikithĩtio mĩrigo, na nĩ ngũmũhurũkia. Oyai icoki rĩakwa mwĩigĩrĩre na mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ, na nĩ mũkũhurũkio. Tondũ icoki rĩakwa nĩ inyoroku, na mũrigo wakwa nĩ mũhũthũ.” (Mat. 11:​28-30) Gũtuĩka mũrũmĩrĩri wa Kristo nĩ gũcanjamũraga mũno na gũkarehera mũndũ gĩkeno. Tũrĩ na itũmi njega cia gũkorũo na gĩkeno kĩnene tũgĩtungatĩra Jehova. Rekei rĩu twarĩrĩrie itũmi ithatũ cia bata mũno iria itũmaga ‘tũcanjamũke ngoro nĩ ũndũ wa Ngai wa ũhonokio witũ.’​—Hab. 3:18.

Tũtungatagĩra Ngai ũrĩa ũtũheete muoyo, Ngai ũrĩ gĩkeno. (Atũm. 17:28; 1 Tim. 1:11) Nĩ tũmenyaga atĩ tũrĩ muoyo nĩ ũndũ wa Mũũmbi witũ. Nĩ ũndũ ũcio, tũthiaga na mbere kũmũtungatĩra tũrĩ na gĩkeno gũtekũmakania nĩ mĩaka ĩigana ĩhĩtũkĩte kuuma rĩrĩa twabatithirio.

Ta wĩcirie ũhoro wa Héctor ũrĩa watungatĩire Jehova arĩ mũrori ũrĩa ũgendaga kwa ihinda rĩa mĩaka 40. ‘O na arĩ mũkũrũ’ no akenagĩra gũtungatĩra Jehova. (Thab. 92:​12-14) Ndwari ya mũtumia wake nĩ ĩtũmĩte aremwo nĩ gũtungatĩra Jehova na gĩkĩro kĩnene, ĩndĩ gĩkeno gĩake gĩtinyihĩte. Oigaga ũũ: “Nĩ ũndũ wa kĩeha mũno kuona ũrĩa mũrimũ ũrathiĩ ũkĩhinyagĩrĩria mũtumia wakwa. Ningĩ ndũkoretwo ũrĩ ũndũ mũhũthũ kũmũtumberia. O na kũrĩ ũguo ndirekaga ũndũ ũcio ũtũme gĩkeno gĩakwa kĩnyihanyihe ũtungata-inĩ wakwa. Kũmenya atĩ ndĩ muoyo nĩ ũndũ wa Jehova, ũrĩa wombire mũndũ arĩ na muoroto, nĩ gĩtũmi kĩiganu gĩa gũtũma ndĩmwende mũno na ndĩmũtungatĩre na ngoro yakwa yothe. Nĩguo gĩkeno gĩakwa gĩtigathire nĩ ndĩĩrutanagĩria gũthiĩ na mbere kũhunjia, na gwĩciria mũno ũhoro wa kĩĩrĩgĩrĩro kĩa mahinda marĩa maroka.”

Jehova nĩ atũheete igongona rĩa ũkũũri, rĩrĩa rĩtũmaga tũkorũo na ũtũũro ũrĩ na gĩkeno. “Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Joh. 3:16) Nĩ ũndũ ũcio no tuoherũo mehia maitũ na tũgĩe na muoyo wa tene na tene tũngĩonania wĩtĩkio harĩ kĩheo kĩa Ngai kĩa wendo kĩa igongona rĩa ũkũũri rĩa Jesu. Na githĩ kĩu ti gĩtũmi kĩega mũno gĩa gũtũma tũkorũo na ngatho? Na githĩ ngatho citũ harĩ ũkũũri ũcio itiagĩrĩirũo nĩ gũtũtindĩka tũtungatagĩre Jehova tũrĩ na gĩkeno?

Mũrũ wa Ithe witũ ũmwe wĩtagwo Jesús kuuma Mexico oigire ũũ: “Ndaarĩ ngombo ya wĩra wakwa. Rĩmwe na rĩmwe ndaarutaga wĩra mathaa maingĩ harĩ mũthenya o na gũtuĩka to mũhaka ingĩekire  ũguo. Ndeekaga ũguo no getha tu ngĩe na mbeca nyingĩ makĩria. Thutha ũcio nĩ ndeerutire ũhoro wa Jehova na ũrĩa aarutire Mũriũ wake nĩ ũndũ wa kĩrĩndĩ gĩa thĩ. Ngĩigua nderirĩria mũno kũmũtungatĩra. Nĩ ũndũ ũcio ngĩyamũrĩra Jehova, na thutha wa gũkorũo ndutĩire kambuni ĩyo wĩra mĩaka 28, ngĩtiga wĩra nĩguo nyingĩre ũtungata-inĩ wa hĩndĩ-ciothe. Kuuma hĩndĩ ĩyo nĩ ndungatĩire Jehova mĩaka mĩingĩ ndĩ na gĩkeno.”

Maciaro marĩa tũciaraga matũrehagĩra gĩkeno, no ti kĩeha. Hihi nĩ ũririkanaga ũrĩa ũtũũro waku watariĩ ũtaneruta ũhoro wa Jehova? Mũtũmwo Paulo eerire Akristiano a Roma atĩ nĩ kũrĩ hĩndĩ maarĩ “ngombo cia mehia” magĩcoka magĩtuĩka “ngombo cia ũthingu.” Makĩambĩrĩria gũciara maciaro ma “maũndũ matheru” marĩa marigĩrĩrio-inĩ mangĩamareheire muoyo wa tene na tene. (Rom. 6:17-22) O na ithuĩ tũrũmagĩrĩra njĩra theru, ĩrĩa ĩtangĩtũrehera kĩeha kĩrĩa kiumanaga na mĩthiĩre ya waganu na ciĩko cia ũhinya. Na githĩ kĩu ti gĩtũmi kĩega gĩa gũtũma tũkorũo na gĩkeno!

Ta wĩcirie ũhoro wa Jaime ũrĩa wetĩkĩtie atĩ gũtirĩ Ngai na atĩ andũ moimanire na nũgũ, na ningĩ nĩ aakoragwo mathako-inĩ ma kũrũa ngundi. Jaime nĩ aambĩrĩirie gũthiĩ mĩcemanio ya Gĩkristiano na akĩgucĩrĩrio mũno nĩ wendo ũrĩa oonirio. Nĩguo ahote gũtigana na mĩthiĩre yake ya hau mbere, nĩ aahoire Jehova amũteithie kũgĩa na wĩtĩkio harĩ we. Oigire ũũ: “Kahora kahora nĩ ndambĩrĩirie kuona Ngai arĩ Baba ũrĩ wendo na tha. Kũrũmĩrĩra ithimi cia Jehova gũkoretwo kũrĩ ũgitĩri harĩ niĩ. Korũo ndĩagarũrũkire no gũkorũo nĩ ingĩoragirũo ta arata akwa amwe arĩa twathakaga nao mathako ma ngundi. Mĩaka ĩrĩa ngoretwo na gĩkeno kĩnene nĩ ĩrĩa hũthĩrĩte ũtungata-inĩ wa Jehova.”

Ũgwĩciria twagĩrĩirũo gũkorũo tũgĩka atĩa o tũgĩetagĩrĩra mũico wa mũtabarĩre ũyũ mũũru? Nĩ wega kũririkana atĩ ‘tũhandaga tũtongoretio nĩ roho’ na nĩ ‘tũkaagetha muoyo wa tene na tene.’ Nĩ ũndũ ũcio rekei “tũtikananogio nĩ gwĩkaga wega, nĩ gũkorũo nĩ tũkaagetha hĩndĩ ĩrĩa yagĩrĩire twaga kũnoga.” (Gal. 6:​8, 9) Kũgerera ũteithio wa Jehova, rekei tũthiĩ na mbere gũkirĩrĩria, twĩrutanĩrie gũkũria ngumo iria irabatarania nĩguo tũkaahonoka hĩndĩ ya ‘thĩna ũrĩa mũnene,’ na tũthiĩ na mbere gũtungatĩra Jehova tũrĩ na gĩkeno o na rĩrĩa twacemania na magerio.​—Kũg. 7:​9, 13, 14; Jak. 1:​2-4.

No tũkorũo na ma atĩ nĩ tũkaaheo kĩheo nĩ ũndũ wa ũkirĩrĩria witũ, tondũ Ngai nĩ oĩ wĩra witũ na wendo ũrĩa tuonanagia nĩ ũndũ wake na nĩ ũndũ wa rĩĩtwa rĩake. Tũngĩthiĩ na mbere gũtungatĩra Jehova tũrĩ na gĩkeno, tũrĩkoragwo tũtariĩ ta mwandĩki wa thaburi ũrĩa woigire ũũ: “Jehova nĩndĩmwĩigĩire mbere yakwa hingo ciothe, na tondũ e guoko-inĩ gwakwa kwa ũrĩo, ndirĩ hĩndĩ ngenyenyeka. Hakĩrĩ ũguo-rĩ, ngoro yakwa nĩ gũkena ĩkenaga, ũrĩa guo riri wakwa ũgagĩcanjamũka, mwĩrĩ wakwa naguo no ũtũũre o na mwĩgangaro.”​—Thab. 16:​8, 9.