ŨTUNGATA witũ nĩ wa bata mũno. No ti andũ othe arĩa tũhunjagĩria mamenyaga ũguo. O na rĩrĩa andũ magucĩrĩrio nĩ ndũmĩrĩri ya Bibilia, ti hingo ciothe monaga bata wa kũrutwo nĩ ithuĩ.

Ũguo nĩguo gwathiire harĩ mũndũ wĩtagwo Gavin. Aambĩrĩirie gũthiĩ mĩcemanio ya kĩũngano no rĩrĩa ooririo ũhoro wa kũrutwo Bibilia, akĩrega. Oigaga ũũ: “Ndiamenyaga maũndũ maingĩ ma Bibilia no ndiendaga andũ mamenye ũguo. Nĩ ndetigagĩra kũheenio na ningĩ nĩ ndetigagĩra kũrutwo.” Ũngĩekire atĩa korũo nĩ wacemanirie na Gavin? Hihi ũngĩoigire atĩ ũcio ndangĩthiĩ na mbere kĩĩroho? Ta wĩcirie ũrĩa morutani ma Bibilia mangĩteithia mũndũ. Jehova eerire andũ ake a tene atĩrĩ, “Ciugo iria nguuga igũtuĩka o ta ireera [ime] rĩiyũrĩte thĩ, O na ituĩke o ta rũciciũ rũkĩihũgia nyeki.” (Gũcok. 31:​19, 30; 32:2) Ũrĩa ireera rĩkoragwo rĩtariĩ nĩ wonanagia wega ũrĩa tũngĩteithia andũ othe ũtungata-inĩ.​—1 Tim. 2:​3, 4.

Ireera nĩ ihũthũ. Ireera rĩyaragĩra nyeki-inĩ kahora kahora kuumana na kĩbii. Ciugo cia Jehova ‘ciatuĩkire o ta ireera’ na njĩra ĩrĩkũ? Aahũthagĩra ciugo cia ũtugi, ũhooreri, na cia gũcaĩra andũ ake. Twĩgerekanagia nake rĩrĩa tuonania gĩtĩo harĩ mawoni ma arĩa angĩ. Tũteithagia andũ mecirie, na njĩra ĩyo magetuĩra matua o ene. Tweka ũguo ciugo citũ nĩ ciĩtĩkagĩrũo nĩ arĩa tũrahunjĩria na ũtungata witũ ũkagĩa na moimĩrĩro mega makĩria.

Ireera nĩ rĩcanjamũraga. Ũtungata witũ no ũcanjamũre arĩa tũhunjagĩria tũngĩciria njĩra ĩrĩa njega biũ ya gũtwarithia na mbere ndeereti hamwe nao. Gavin ũrĩa ũkũgwetetwo hau kabere ndaaringĩrĩirio gũthomithio Bibilia. Handũ ha ũguo, mũrũ wa Ithe witũ wĩtagwo Chris, ũrĩa wamũhunjĩirie rĩa mbere, aageririe njĩra mwanya mwanya nĩguo Gavin erirĩrie kũrutwo Bibilia. Chris aatarĩirie Gavin atĩ Bibilia nĩ ĩkoragwo na ũrutani ũmwe wa mũthingi na akĩmwĩra atĩ angĩũmenya no ũmũteithie gũtaũkĩrũo wegega nĩ mĩcemanio ya kĩũngano. Agĩcoka akĩmwĩra atĩ kĩrĩa we mwene kĩamũteithirie gwĩtĩkia atĩ Bibilia nĩ ya ma, nĩ ũrathi wayo. Nĩ ũndũ ũcio, Gavin agĩtĩkĩra ndeereti ciĩgiĩ kũhingio kwa ũrathi. Ndeereti icio nĩ ciamũcanjamũrire mũno na marigĩrĩrio-inĩ agĩtĩkĩra kũrutwo Bibilia.

Ireera nĩ rĩteithagia gũtũũria kĩndũ muoyo. Bũrũri-inĩ wa Isiraeli nĩ gũkoragwo na mĩeri mĩingĩ ya ũrugarĩ na riũa na mĩeri-inĩ ĩyo gũtiuraga. Nĩ ũndũ wa kwaga maĩ ma ireera, mĩmera nĩ ĩhohaga na ĩkoma. Ũmũthĩ nĩ kũrĩ na ng’aragu ya kĩĩroho o ta ũrĩa Jehova aarathĩte. (Amos 8:11) Aarathĩte atĩ arĩa aitĩrĩrie maguta mangĩgatuĩka o “ta ireera riũmĩte he Jehova” wĩra-inĩ wa kũhunjia ndũmĩrĩri ya Ũthamaki, manyitĩtwo mbaru nĩ arĩa a “ng’ondu ingĩ.” (Mik. 5:7; Joh. 10:16) Hihi nĩ tuonaga ndũmĩrĩri ya ũhoro mwega wa Ũthamaki ĩrĩ kĩheo kuuma kũrĩ Jehova gĩa gũteithia andũ matũũre muoyo kĩĩroho?

Ireera nĩ kĩrathimo kĩa Jehova. (Gũcok. 33:13) Ũtungata witũ ũkoragwo ũrĩ kĩrathimo harĩ arĩa mawĩtĩkagĩra. Ũguo nĩguo gwathiire harĩ Gavin. Nĩ agĩire na macokio ma ciũria ciake ciothe hĩndĩ ĩrĩa aathomithagio Bibilia. Aathiire na mbere kĩĩroho o narua na akĩbatithio. Ũmũthĩ ũyũ, akoragwo arĩ mũhunjia wa ũhoro mwega wa Ũthamaki marĩ na mũtumia wake Joyce.

Gwĩcũrania ũhoro wa ireera o nakuo no gũteithie o mũndũ kuona wĩra wa kũhunjia ũrĩ wa bata. Na njĩra ĩrĩkũ? Itata rĩmwe rĩmwe rĩa maĩ ma ireera rĩtihingagia ũndũ mũnene, no matata maingĩ nĩ magunyagia thĩ. Na njĩra o ta ĩyo, no tuone maũndũ marĩa tũhingagia ũtungata-inĩ tũrĩ mũndũ ũmwe ũmwe ta matarĩ manene. O na kũrĩ ũguo, nĩ ũndũ wa kũnyitanĩra twĩyendeire tũrĩ ndungata cia Jehova, nĩ tũhotaga gũkinyia ndũmĩrĩri “kũrĩ ndũrĩrĩ ciothe.” (Mat. 24:14) Hihi ũtungata witũ nĩ ũgũtuĩka kĩrathimo kiumĩte kũrĩ Jehova harĩ arĩa tũhunjagĩria? Nĩ ũgũtuĩka angĩkorũo ndũmĩrĩri ĩrĩa tũhunjagia nĩ ĩkũhaana ta ireera​—ĩkorũo ĩrĩ hũthũ, ĩracanjamũra, na ĩrateithia gũtũũria andũ muoyo.