1-3. (a) Akristiano monanĩtie atĩa atĩ nĩ monaga mĩcemanio ĩrĩ ya bata? (Rora mbica kĩambĩrĩria-inĩ gĩa gĩcunjĩ gĩkĩ.) (b) Nĩ maũndũ marĩkũ tũkwarĩrĩria?

RĨRĨA Corinna aarĩ na mĩaka 17, nyina nĩ aanyitirũo na agĩtwarũo kambĩ-inĩ ya kũrutithio wĩra mũritũ. Thutha ũcio nake Corinna nĩ aanyitirũo na agĩtwarũo Siberia, kũndũ kũraya mũno na mũciĩ kwao. Aarutithagio wĩra ta ngombo na rĩmwe na rĩmwe nĩ aarutagĩra wĩra nja kũrĩ na heho mũno na ndaakoragwo na nguo cia ũrugarĩ. O na marĩ rungu rwa mathĩna macio, Corinna na mwarĩ wa Ithe witũ ũngĩ nĩ maatuire itua rĩa gũthiĩ mĩcemanio ya kĩũngano.

² Corinna oigire ũũ: “Twoimire kũrĩa twarutagĩra wĩra hwaĩ-inĩ na tũgĩthiĩ magũrũ kilomita 25 nĩguo tũkinye ceceni-inĩ ya mũgithi. Mũgithi wakũũrire thaa inyanya cia ũtukũ na rwarĩ rũgendo rwa mathaa matandatũ. Twacuka tũgĩthiĩ magũrũ kilomita 10 nginya kũrĩa mĩcemanio yekagĩrũo.” Hihi rũgendo rũu rwarĩ rwa tũhũ? Corinna oigire ũũ: “Hĩndĩ ya mĩcemanio ĩyo, twerutire Mũrangĩri na tũkĩina nyĩmbo cia Ũthamaki. Twaiguire wĩtĩkio witũ wekĩrũo hinya mũno.” O na gũtuĩka maacokire wĩra-inĩ  thutha wa thikũ ithatũ, mũnene wao ndaigana kũmenya atĩ Corinna na mwarĩ wa Ithe witũ ũcio matiarĩ kuo.

³ Andũ a Jehova nĩ makenaga mũno magĩcemania hamwe. Thutha wa kĩũngano gĩa Gĩkristiano kwambĩrĩria, arũmĩrĩri a Jesu matekũrĩa marĩĩgu nĩ maambĩrĩirie “kũrũmĩrĩra na kĩyo . . . gũcemanagia hamwe.” (Atũm. 2:42) O nawe no kũhoteke nĩ wendete gũthiĩ mĩcemanio ya kĩũngano ũtegũtĩrĩria. O na kũrĩ ũguo Akristiano othe nĩ macemanagia na moritũ. Wĩra, mĩhang’o ya o mũthenya, kana mĩnoga no ĩtũme ũkorũo ũtarĩ ũndũ mũhũthũ gũthiĩ mĩcemanio. Nĩ kĩĩ kĩngĩtũteithia twĩke o ũrĩa wothe tũngĩhota nĩguo tũtoorie moritũ macio na tũthiage mĩcemanio tũtegũtĩrĩria? ^[1] Tũngĩteithia arutwo aitũ a Bibilia na andũ angĩ atĩa mone atĩ gũthiĩ mĩcemanio nĩ kwa bata? Thĩinĩ wa gĩcunjĩ gĩkĩ nĩ tũkwarĩrĩria itũmi inyanya cia gũthiĩ mĩcemanio. No tũgayanie itũmi icio maita matatũ: ũrĩa ũgunĩkaga, ũrĩa arĩa angĩ magunĩkaga, na ũrĩa Jehova aiguaga rĩrĩa wathiĩ mĩcemanio. ^[2]

4. Mĩcemanio itũ ĩtũteithagia atĩa kwĩruta ũhoro wa Jehova?

⁴ Mĩcemanio nĩ ĩtũrutaga. Mĩcemanio yothe ya kĩũngano nĩ ĩtũteithagia kwĩruta ũhoro wa Jehova, Ngai witũ. Kwa ngerekano, nĩ twathomire ibuku rĩa Mwĩigei Wendo-inĩ wa Ngai thĩinĩ wa Wĩruti wa Bibilia wa Kĩũngano. Waiguiaga atĩa tũkĩarĩrĩria ibuku rĩu na aarĩ na ariũ a Ithe witũ magĩcokia macokio mao? Hatarĩ nganja ũndũ ũcio nĩ watũmire wendo waku harĩ Jehova wongerereke. Ningĩ nĩ tuongagĩrĩra ũmenyo wa Kiugo kĩa Ngai rĩrĩa tũrathikĩrĩria mĩario, cionereria na ũthomi wa Bibilia. (Neh. 8:8) Kwa ngerekano, ta wĩcirie maũndũ ma bata marĩa wĩrutaga o kiumia hĩndĩ ĩrĩa ũrahaarĩria ũthomi wa Bibilia wa o kiumia na rĩrĩa ũrathikĩrĩria maũndũ marĩa arĩa angĩ marerutire!

5. Mĩcemanio ĩgũteithĩtie atĩa kũhũthĩra mootaro ma Bibilia na kwagagĩria ũtungata waku?

⁵ Mĩcemanio nĩ ĩtũrutaga kũhũthĩra mootaro ma Bibilia ũtũũro-inĩ witũ wothe. (1 Thes. 4:​9, 10) Kwa ngerekano Wĩruti wa Mũrangĩri ũkoragwo ũrongoreirio kũhingia mabataro ma kĩĩroho ma andũ a Jehova. Hihi nĩ harĩ Wĩruti wa Mũrangĩri wagwĩkĩrire hinya wongerere ũtungata waku, wagĩrie mahoya maku, kana wohere Mũkristiano wakũhĩtĩirie? Mũcemanio wa Ũtũũro na Ũtungata Witũ wa Gĩkristiano nĩ ũtũrutaga ũrĩa tũngĩhunjia ũhoro ũrĩa mwega na ũrĩa tũngĩteithia andũ arĩa angĩ mataũkĩrũo nĩ ma cia Bibilia.​—Mat. 28:​19, 20.

6. Nĩ na njĩra ĩrĩkũ mĩcemanio itũ ĩtwĩkagĩra ngoro na ĩgatwĩkĩra hinya?

⁶ Mĩcemanio nĩ ĩtwĩkĩraga ngoro. Maũndũ marĩa marĩ thĩinĩ wa mũtabarĩre ũyũ no matũme tũũrũo nĩ hinya kĩĩmeciria, na kĩĩroho. Ngũrani na ũguo, mĩcemanio ya kĩũngano ĩtwĩkĩraga ngoro na ĩgatwĩkĩra hinya. (Thoma Atũmwo 15:​30-32.) Kaingĩ thĩinĩ wa mĩcemanio itũ nĩ twĩrutaga ũrĩa morathi ma Bibilia mahingĩte. Na nĩ ũndũ ũcio tũkagĩa na wĩtĩkio mũrũmu atĩ o na ciĩranĩro cia Jehova cia mahinda marĩa maroka no mũhaka ikaahinga. Ma nĩ atĩ to arĩa marutanaga kĩũngano-inĩ matwĩkagĩra ngoro. Aarĩ na ariũ a Ithe witũ arĩa macokagia ciũria na makainĩra Jehova kuuma ngoro o nao nĩ matwĩkagĩra hinya. (1 Kor. 14:26) Ningĩ rĩrĩa tũraaria nao mbere na thutha wa mĩcemanio, nĩ twĩiguaga twĩ mũciĩ na tũgacanjamũka.​—1 Kor. 16:​17, 18.

7. Nĩkĩ nĩ ũndũ wa bata mũno gũthiĩ mĩcemanio ya kĩũngano?

⁷ Nĩ gũkoragwo na roho wa Jehova mĩcemanio-inĩ itũ. Jesu oigire ũũ: “Ũrĩa ũrĩ gũtũ nĩ aigue ũrĩa roho ũrera ciũngano.” (Kũg. 2:7) Jesu atongoragia kĩũngano gĩa Gĩkristiano  kũgerera roho mũtheru. Nĩ tũbataraga roho wa Jehova nĩguo tũhote gũtooria magerio, tũgĩe na ũmĩrĩru na ũmenyeru wa kũhunjia, na tũhotage gũtua matua mega. Na githĩ tũtiagĩrĩirũo nĩ kũhũthĩra maũndũ mothe marĩa tũheagwo o hamwe na mĩcemanio ya Gĩkristiano, nĩguo twamũkagĩre roho mũtheru?

8. Akristiano arĩa angĩ magunĩkaga atĩa matuona mĩcemanio-inĩ, maigua tũgĩcokia ciũria, na tũkĩina? (Ningĩ rora gathandũkũ “Ainũkaga Akenete Gũkĩra Agĩthiĩ.”)

⁸ Mĩcemanio nĩ ĩtũheaga mĩeke ya kuonia aarĩ na ariũ a Ithe witũ atĩ nĩ tũmendete. Ta wĩcirie moritũ marĩa aarĩ na ariũ a Ithe witũ amwe thĩinĩ wa kĩũngano kĩanyu mahiũranagia namo. No kũhoteke nĩkĩo mũtũmwo Paulo aandĩkire ũũ: “Nĩ twĩciranagie mũndũ na ũrĩa ũngĩ.” Aacokire agĩtaarĩria atĩ no tuonanie nĩ tũreciria andũ arĩa angĩ na njĩra ya kwaga “gũtiga gũcemanagia hamwe.” (Ahib. 10:​24, 25) Rĩrĩa twathiĩ mĩcemanio, tuonagia Akristiano arĩa angĩ atĩ nĩ tũrenda gũkorũo hamwe nao, kwaria nao na atĩ nĩ tũmarũmbũyagia. Ningĩ nĩ tũmekagĩra ngoro rĩrĩa maraigua tũgĩcokia ciũria na tũkĩina kuuma ngoro.​—Kol. 3:16.

9, 10. (a) Taarĩria ũrĩa ciugo cia Jesu thĩinĩ wa Johana 10:16 itũteithagia kuona bata wa gũthiĩ mĩcemanio. (b) Rĩrĩa twathiĩ mĩcemanio tũtegũtĩrĩria, tũngĩteithia atĩa arĩa mamenagwo nĩ andũ a famĩlĩ ciao?

⁹ Mĩcemanio nĩ ĩtũmaga tũkorũo na ũrũmwe na aarĩ na ariũ a Ithe witũ. (Thoma Johana 10:16.) Jesu eeringithanirie na mũrĩithi nao arũmĩrĩri ake akĩmaringithania na rũũru rwa ng’ondu. Ta wĩcirie ũndũ ũyũ: Ng’ondu igĩrĩ ingĩkorũo handũ karĩma-inĩ, nacio ingĩ igĩrĩ ikorũo handũ kĩanda-inĩ, nayo ng’ondu ĩngĩ ĩkorũo ĩkĩrĩa nyeki handũ hangĩ-rĩ, hihi no tuuge atĩ ng’ondu icio ithano nĩ rũũru rũmwe? Na njĩra nguhĩ, rũũru rũmwe rwa ng’ondu rũikaraga hamwe rungu rwa mũrĩithi waruo. O ũndũ ũmwe na ũcio tũtingĩkorũo tũrĩ arũmĩrĩri a Mũrĩithi witũ angĩkorũo tũtirĩnyitanagĩra na Akristiano arĩa angĩ. Nĩguo tũkorũo thĩinĩ wa “rũũru rũmwe” rwa “mũrĩithi ũmwe” nĩ tũkũbatara gũcemanagia hamwe na Akristiano arĩa angĩ.

¹⁰ Rĩrĩa twathiĩ mĩcemanio nĩ twĩkagĩra hinya ũrũmwe witũ wa Gĩkristiano. (Thab. 133:1) Akristiano amwe nĩ mamenagwo na makaregwo nĩ aciari ao na andũ arĩa maciaranĩirũo nao. O na kũrĩ ũguo, Jesu eeranĩire atĩ nĩ angĩkaamahe famĩlĩ ya kĩĩroho ĩrĩa ĩrĩmendaga na ĩkamarũmbũyia. (Mar. 10:​29, 30) Ũngĩmenyera gũthiaga mĩcemanio ũtegũtĩrĩria, no ũtuĩke ithe, nyina, mũrũ wa nyina, kana mwarĩ wa nyina na andũ ta acio. Na githĩ ũndũ ũcio ndwagĩrĩirũo nĩ gũtũtindĩka twĩrutanagĩrie gũkoragwo mĩcemanio-inĩ yothe?

11. Gũthiĩ mĩcemanio gũtũteithagia atĩa kũhe Jehova kĩrĩa kĩmwagĩrĩire?

¹¹ Twathiĩ mĩcemanio, tũkoragwo tũkĩhe Jehova kĩrĩa kĩmwagĩrĩire. Tondũ Jehova nĩwe watũmbire-rĩ, nĩ twagĩrĩirũo nĩ kũmũgooca, kũmũcokeria ngatho na kũmũtĩa. (Thoma Kũguũrĩrio 7:12.) No twĩke ũguo mĩcemanio-inĩ rĩrĩa tũramũhoya, rĩrĩa tũramũinĩra na rĩrĩa tũraaria ũhoro wake. Na githĩ ti mweke wa mwanya mũno tũkoragwo naguo o kiumia wa gũthathaiya Jehova!

12. Jehova aiguaga atĩa rĩrĩa twathĩkĩra watho wake wĩgiĩ gũthiĩ mĩcemanio?

¹² Ningĩ nĩ twagĩrĩirũo nĩ gwathĩkĩra Jehova. Atwathĩte tũtikanatige gũcemanagia hamwe, na makĩria mahinda-inĩ maya ma mũico. Rĩrĩa twathĩkĩra watho ũcio kuuma ngoro, Jehova nĩ akenaga. (1 Joh. 3:22) Nĩ onaga wendi witũ wa gũkorũo mĩcemanio-inĩ na nĩ akenagio mũno nĩ kĩyo kĩrĩa twĩkagĩra nĩguo tũthiĩ mĩcemanio.​—Ahib. 6:10.

13, 14. Nĩ na njĩra ĩrĩkũ tũkuhagĩrĩria Jehova na Jesu rĩrĩa twathiĩ mĩcemanio?

¹³ Twathiĩ mĩcemanio tuonagia Jehova atĩ nĩ tũrenda kũmũkuhĩrĩria na gũkuhĩrĩria Mũriũ. Rĩrĩa twathiĩ mĩcemanio, Jehova nĩ atũrutaga kũgerera Kiugo gĩake. (Isa. 30:​20, 21) O na andũ arĩa matarĩ Aira a Jehova moka mĩcemanio itũ nĩ monaga atĩ ‘hatarĩ nganja Ngai arĩ gatagatĩ-inĩ gaitũ.’ (1 Kor. 14:​23-25) Jehova nĩ atongoragia mĩcemanio itũ kũgerera roho wake mũtheru na maũndũ marĩa twĩrutaga kuo moimaga kũrĩ we. Rĩrĩa twathiĩ mĩcemanio, tũthikagĩrĩria mũgambo wa Jehova, tũkona ũrĩa atwendete, na nĩ ũndũ ũcio tũkamũkuhĩrĩria makĩria.

¹⁴ Jesu oigire ũũ: “Harĩa andũ erĩ kana atatũ macemanĩtie hamwe nĩ ũndũ wa rĩĩtwa rĩakwa, o na niĩ nĩ ndĩkoragwo hamwe nao.” (Mat. 18:20) Ningĩ Bibilia yugaga atĩ Jesu ‘athiaga arĩ gatagatĩ-inĩ’ ga ciũngano. (Kũg. 1:20–2:1) Ta wĩcirie ũndũ ũcio! Jehova na Jesu makoragwo na itemi inene mũno harĩ gũtwĩkĩra hinya rĩrĩa tũrĩ mĩcemanio-inĩ ya Gĩkristiano. Ũgwĩciria Jehova aiguaga atĩa rĩrĩa arona wendi witũ wa kũmũkuhĩrĩria na gũkuhĩrĩria Mũriũ wake?

15. Tuonagia Ngai wathĩki atĩa rĩrĩa twathiĩ mĩcemanio?

¹⁵ Twathiĩ mĩcemanio tuonanagia atĩ nĩ tũranyita mbaru ũnene wa Jehova. O na gũtuĩka Jehova nĩ atwathĩte tũthiage mĩcemanio, ndatũtindĩkagĩrĩria twathĩkĩre watho ũcio. (Isa. 43:23) Nĩ ũndũ ũcio, rĩrĩa twathuura gwathĩkĩra watho wake, tũmuonagia atĩ nĩ tũmwendete na atĩ nĩ twĩtĩkĩtie biũ atĩ nĩwe ũrĩ na kĩhooto gĩa gwathana. (Rom. 6:17) Kwa ngerekano mũndũ ũrĩa ũtwandĩkĩte no akorũo akĩenda tũrute wĩra mahinda marĩa twagĩrĩirũo gũkorũo mĩcemanio-inĩ. Thirikari no ĩtũgirie gũcemania hamwe na yuge atĩ twathiĩ na mbere gwĩka ũguo nĩ tũkũhũrũo baĩni, tũikio njera, kana twĩkwo ũndũ ũngĩ mũũru makĩria. Ningĩ no tũigue tũkĩenda gũthiĩ maũndũ-inĩ ma gwĩkenia handũ ha mĩcemanio. Maũndũ-inĩ macio mothe Jehova endaga twĩthurĩre ũrĩa tũgwĩka. (Atũm. 5:29) Twathuura kũnyita mbaru ũnene wa Jehova, nĩ tũkenagia ngoro yake.​—Thim. 27:11.

16, 17. (a) Tũmenyaga atĩa atĩ Akristiano a tene moonaga mĩcemanio ĩrĩ ya bata? (b) Mũrũ wa Ithe witũ George Gangas oonaga atĩa mĩcemanio ya Gĩkristiano?

¹⁶ Akristiano a tene nĩ maacemanirie hĩndĩ ya Pentekoste mwaka wa 33. Thutha ũcio nĩ maathire na mbere gũcemanagia magathathaiya Jehova. ‘Maathire na mbere kũrũmĩrĩra na kĩyo ũrutani wa atũmwo na gũcemanagia hamwe.’ (Atũm. 2:42) Kiugo gĩa Kĩngiriki kĩrĩa gĩtaũrĩtwo “kũrũmĩrĩra na kĩyo” kĩonanagia gũkirĩrĩria kana  kũũmĩrĩria ũndũ-inĩ mũna ũrĩ na kĩyo kĩnene. Nĩ ũndũ wa kũingĩrĩrũo nĩ thirikari ya Roma na gũũkĩrĩrũo nĩ atongoria a ndini ya Kĩyahudi, ndwarĩ ũndũ mũhũthũ harĩ Akristiano acio a tene gũthiĩ mĩcemanio. O na kũrĩ ũguo, no maacemanagia hamwe.

¹⁷ Ndungata nyingĩ cia Jehova cia mahinda maya nĩ cioyaga mĩcemanio ya Gĩkristiano na ũritũ mũno. George Gangas ũrĩa watungatĩire thĩinĩ wa Kĩama Kĩrĩa Gĩtongoragia makĩria ma mĩaka 22 oigire ũũ: “Gũkorũo mĩcemanio-inĩ hamwe na aarĩ na ariũ a Ithe witũ nĩ ũndũ ũmwe ũndehagĩra gĩkeno kĩnene mũno ũtũũro-inĩ na ũkanjĩkĩra ngoro. Kũngĩhoteka nyendaga gũkorũo ndĩ ũmwe wa arĩa makinyaga mbere Nyũmba-inĩ ya Ũthamaki na ngakorũo ndĩ ũmwe wa arĩa marĩrigia. Nĩ ngenaga mũno ngĩaria na andũ a Jehova. Rĩrĩa ndĩ hamwe nao ndĩiguaga ndĩ mũciĩ, thĩinĩ wa paradiso ya kĩĩroho.” Aacokire akiuga ũũ: “Wendi wa ngoro yakwa nĩ gũkorũo mĩcemanio-inĩ.”

18. Ũiguaga atĩa igũrũ rĩgiĩ mĩcemanio itũ, na ũtuĩte itua rĩa gwĩka atĩa?

¹⁸ Hihi ũguo nĩguo ũiguaga igũrũ rĩgiĩ mĩcemanio ya Gĩkristiano? Angĩkorũo nĩguo-rĩ, ĩkaga o ũrĩa wothe ũngĩhota ũthiage mĩcemanio ũtegũtĩrĩria o na rĩrĩa atarĩ ũndũ mũhũthũ gwĩka ũguo. Weka ũguo nĩ ũrĩonanagia atĩ nĩ ũretĩkania na ciugo cia Mũthamaki Daudi ũrĩa woigire ũũ: “Jehova, nĩnyenda mũno gĩtũũro kĩu nyũmba yaku ĩrĩ.”​—Thab. 26:8.