Nĩ ũndũ ũcio, Bibilia ya mwaka wa 2013 yarũmĩrĩire maũndũ maya monanĩtio haha:

1. Thĩinĩ wa Bibilia ya 2013, ciugo icio ciataũrirũo ũguo tondũ nĩ ihutĩtie ũrĩa itamũkagwo na ũrĩa cingĩandĩkwo. Thaburi 144:12-15 na mĩhari ĩrĩa yambĩrĩirie ĩĩhocetie harĩ ũrĩa kiugo gĩa Kĩhibirania asher kĩrĩa kĩambĩrĩirie mũhari-inĩ wa 12 kiugĩte. Kiugo Asher no gĩtaũrũo na njĩra itiganĩte. Kwa ngerekano, no kiuge “nũ” kana “kĩndũ nĩ kĩaũ.” Thĩinĩ wa Bibilia ĩrĩa yarĩ hau mbere kiugo “nũ” nĩkĩo kĩahũthĩrĩtwo. Kwoguo, maũndũ mega marĩa magwetetwo kuuma mũhari wa 12 nginya 14 monekaga marĩ ma andũ aganu arĩa magwetetwo mĩhari-inĩ ĩrĩa yambĩrĩirie. No kiugo asher, ningĩ no kĩonanie moimĩrĩro na no gĩtaũrũo “nĩguo,” “kwoguo,” kana “hĩndĩ ĩyo.” Ciugo “hĩndĩ ĩyo” nĩcio ihũthĩrĩtwo thĩinĩ wa Bibilia ya 2013 o hamwe na Bibilia ingĩ.

2. Ciugo icio iratwarana wega na mĩhari ĩrĩa ĩngĩ ya thaburi ĩyo. Ciugo “hĩndĩ ĩyo” iria ihũthĩrĩtwo mũhari-inĩ wa 12 ironania atĩ irathimo iria igwetetwo mũhari wa 12 nginya 14 nĩ cia andũ athingu arĩa maroria ‘mahonokio na matharũo’ kuuma kũrĩ andũ aganu (mũhari wa 11). Ningĩ ũgarũrũku ũcio nĩ wonanĩtio mũhari-inĩ wa 15, harĩa kiugo “gũkena” kĩandĩkĩtwo maita merĩ na gĩkanyita mbaru ũhoro ũcio ũrĩ mĩhari-inĩ ĩyo yaambĩrĩirie. Nĩ ũndũ ũcio, maita macio merĩ maronania o andũ acio mareerũo me na gĩkeno arĩa “Jehova arĩ we Ngai wao!” Ningĩ ririkana atĩ, Kĩhibirania gĩa tene gĩtiakoragwo na marũũri ta tũthũrũbĩ (“” kana ‘’). Kwoguo, ataũri no mũhaka mamenye ũrĩa ciugo ciugĩte, makĩririkanaga ũrĩa rũthiomi rwa Kĩhibirania rwandĩkagwo ta arĩ marebeta, ciugo iria ithiũrũrũkĩirie mĩhari mĩna, na mĩhari ĩngĩ ĩrĩ na ũhoro ũringaine na ũcio.

3. Ciugo cia Bibilia ya 2013 nĩ iratwarana na mĩhari ĩngĩ ĩrĩa ĩranĩire irathimo cia Ngai kũrĩ andũ ehokeku. Nĩ ũndũ wa ũrĩa kiugo asher gĩtaũrĩtwo na njĩra ĩngĩ, rĩu thaburi ĩyo nĩ ĩronania kĩĩrĩgĩrĩro kĩrĩa Daudi aarĩ nakĩo thutha wa Ngai kũhonokia rũrĩrĩ rwa Isiraeli kuuma kũrĩ thũ ciao, na nĩ angĩamarathimire nĩguo magĩe na gĩkeno na magaacĩre. (Alaw. 26:9, 10; Gũcok. 7:13; Thab. 128:1-6) Kwa ngerekano, Gũcokerithia Maathani 28:4 yugĩte ũũ: “Ũrathimwo ũciari-inĩ wa ciana, na ũhoro-inĩ wa mĩgũnda yaku, na wa rũciaro rũa nyamũ ciaku, njaũ cia ng’ombe ciaku, na tũũri twa ndũũru ciaku cia mbũri.” Ũhoro wa ma nĩ atĩ, rĩrĩa Suleimani mũrũ wa Daudi aathanaga, rũrĩrĩ rũu nĩ rwarĩ na thayũ na nĩ rwagacĩrĩte. Makĩria ma ũguo maũndũ marĩa mekĩkire hĩndĩ ya wathani wa Suleimani monanagia ũrĩa Mesia ageeka hĩndĩ ya wathani wake.—1 Ath. 4:20, 21; Thab. 72:1-20.

Kwoguo, gũcenjia gwa ciugo thĩinĩ wa Thaburi 144 gũtiracenjia ũrĩa tũtaũkagĩrũo nĩ morutani ma Bibilia. O na kũrĩ ũguo, kũratũma thaburi yothe yonanie wega irathimo iria ndungata cia Jehova itũũraga ciĩrĩgĩrĩire, na nĩcio kũniinwo kwa andũ arĩa aganu o hamwe na kũgĩa na thayũ na kũgaacĩra kwa arĩa athingu.—Thab. 37:10, 11.