1, 2. Nĩkĩ gũtirĩ hĩndĩ gũkaaga andũ athĩni mũtabarĩre-inĩ ũyũ wa maũndũ?

MAŨNDŨ ma kĩĩmbeca thĩinĩ wa thĩ ũmũthĩ nĩ maritũ na ti ma kĩhooto. Andũ ethĩ methaga mawĩra na mationaga. Aingĩ maigaga mĩoyo yao ũgwati-inĩ makĩĩrutanĩria gũthamĩra mabũrũri-inĩ marĩa magacĩrĩte. Ũthĩni ũtheremete kũndũ guothe nginya mabũrũri marĩa marĩ mbeca nyingĩ. Na arĩa atongu na arĩa athĩni marathiĩ matiganĩte ta thĩ na igũrũ. Kũringana na ũthuthuria wa ica ikuhĩ, gĩcunjĩ kĩa 1 harĩ 100 kĩa andũ arĩa atongu mũno thĩinĩ wa thĩ, kĩrĩ na ũtonga ũiganaine na wa andũ arĩa angĩ othe thĩinĩ wa thĩ ũturanĩirũo. O na gũtuĩka ti ũhũthũ gũtuĩria biũ mũigana ũcio, gũtirĩ mũndũ ũngĩkararia atĩ andũ bilioni nyingĩ nĩ athĩni gũkĩra njano nao angĩ marĩ na ũtonga wa kũmaigana o hamwe na njiarũa ciao. Jesu nĩ oigire ciugo ici cia ma: “Athĩni mũrĩkoragwo nao hĩndĩ ciothe.” (Mar. 14:7) Arĩa atongu na arĩa athĩni matiganĩte na gĩkĩro kĩnene ũguo nĩkĩ?

² Jesu nĩ aamenyaga atĩ mathĩna ma kĩĩmbeca matingĩthira nginya rĩrĩa Ũthamaki wa Ngai ũgoka. Gĩcunjĩ kĩmwe gĩa thĩ ĩno ya Shaitani gĩthondeketwo nĩ maũndũ ma gĩũteti, ma kĩndini, na maũndũ ma biacara irĩ na ũkoroku ikĩrũgamĩrĩrũo nĩ “ahũri biacara” arĩa magwetetwo thĩinĩ wa Kũguũrĩrio 18:3. Andũ aingĩ a Ngai no maremwo kwĩyeherania biũ na maũndũ ma biacara ma thĩ ĩno ya Shaitani ta ũrĩa meyeheranagia biũ na maũndũ ma gĩũteti na ndini cia maheeni.

3. Nĩ ciũria irĩkũ tũkwarĩrĩria?

 ³ Tũrĩ Akristiano nĩ twagĩrĩirũo gũthuthuria muonere witũ wĩgiĩ maũndũ ma biacara na njĩra ya kwĩyũria ciũria ta ici: ‘Ingĩhũthĩra atĩa indo ciakwa cia kĩĩmwĩrĩ kuonania wĩhokeku harĩ Ngai? Ingĩhota atĩa gwĩthema kwĩingĩrania mũno maũndũ-inĩ ma biacara? Nĩ maũndũ marĩkũ monetwo maronania atĩ andũ a Ngai nĩ maramwĩhoka biũ o na maũndũ marĩ maritũ?’

4, 5. (a) Mũramati ũrĩa ũgwetetwo ngerekano-inĩ ya Jesu eekorire thĩna-inĩ ũrĩkũ? (b) Nĩ ũtaaro ũrĩkũ Jesu aaheire arũmĩrĩri ake?

⁴ Thoma Luka 16:1-9. Ngerekano ya Jesu ya mũramati ũtaarĩ mũthingu nĩ ya gũtũma twĩcirie. Thutha wa gũthitangwo atĩ nĩ aaitangaga indo iria eehokeirũo, nĩ aahũthĩrire “ũũgĩ” na ‘akĩĩthondekera arata’ nĩguo mamũteithie ehererio wĩra ũrĩa eehokeirũo. * Jesu ti ngoro eekagĩra arutwo ake atĩ meke maũndũ matarĩ ma ũthingu nĩguo metiirie thĩ ĩno. Onanirie mĩtugo ta ĩyo nĩ ya “ciana cia mũtabarĩre ũyũ wa maũndũ,” ĩndĩ aahũthĩrire ngerekano ĩyo kũrutana ũndũ wa bata.

⁵ Jesu nĩ aamenyaga atĩ o ta mũramati ũcio wekorete handũ hairũ, arũmĩrĩri aingĩ a Jesu nĩ mangĩabatarire gwetha mabataro ma o mũhaka ma ũtũũro thĩinĩ wa thĩ ĩno ya biacara ĩtarĩ kĩhooto. Kwoguo akĩmekĩra ngoro na ciugo ici: “Mwĩthondekerei arata kũgerera ũtonga ũrĩa ũtarĩ wa ũthingu, nĩguo hĩndĩ ĩrĩa ũgaathira, [Jehova na Jesu] makaamwamũkĩra thĩinĩ wa ciikaro cia tene na tene.” Nĩ ũndũ ũrĩkũ tũngĩĩruta kuumana na ũtaaro ũcio wa Jesu?

6. Tũmenyaga atĩa atĩ maũndũ ma biacara ma thĩ ĩno matiarĩ muoroto-inĩ wa Ngai wa kĩambĩrĩria?

⁶ O na gũtuĩka Jesu ndataarĩirie kĩrĩa gĩatũmire awĩte ũtonga “ũtarĩ wa ũthingu,” Bibilia nĩ yonanagia wega atĩ maũndũ ma biacara matiarĩ thĩinĩ wa muoroto wa Ngai wa kĩambĩrĩria. Jehova nĩ aatigĩrĩire atĩ Adamu na Hawa nĩ maarĩ na kĩrĩa gĩothe mangĩabatarire mũgũnda-inĩ wa Edeni. (Kĩam. 2:15, 16) Thutha-inĩ, rĩrĩa roho mũtheru watongoragia kĩũngano kĩa aitĩrĩrie maguta karine-inĩ ya mbere, “gũtirĩ o na ũmwe wao wonaga indo iria aarĩ nacio irĩ ciake, ĩndĩ maagayanaga indo ciothe.” (Atũm. 4:32) Mũnabii Isaia nĩ aarathire ũhoro wa ihinda rĩrĩa andũ othe mangĩgakenera indo iria irĩ thĩinĩ wa thĩ matekũrĩha. (Isa. 25:6-9; 65:21, 22) No mbere ya hĩndĩ ĩyo, arũmĩrĩri a Jesu nĩ mekũbatara “ũũgĩ” nĩguo mone mabataro mao ma o mũhaka makĩhũthĩra “ũtonga ũrĩa ũtarĩ wa ũthingu” wa thĩ ĩno, o makĩĩrutanagĩria gũkenia Ngai.

7. Nĩ ũtaaro ũrĩkũ ũkoragwo thĩinĩ wa Luka 16:10-13?

⁷ Thoma Luka 16:10-13. Mũramati ũrĩa ũragwetwo ngerekano-inĩ ya Jesu aathondekire arata nĩguo egune we mwene. O na kũrĩ ũguo, Jesu eekĩraga ngoro arũmĩrĩri ake mathondeke arata kũrĩa igũrũ nĩ ũndũ wa itũmi itarĩ cia mwĩyendo. Mĩhari ĩrĩa ĩrũmĩrĩire ngerekano-inĩ ĩyo, ĩronania atĩ ũrĩa tũrahũthĩra “ũtonga ũrĩa ũtarĩ wa ũthingu” no kuonanie wĩhokeku witũ harĩ Ngai. Jesu onanagia atĩ no ‘tuonanie atĩ tũrĩ ehokeku’ na njĩra ĩrĩa tũrahũthĩra ũtonga ũcio rĩrĩa twagĩa naguo. Tũngĩka ũguo atĩa?

8, 9. Heana ngerekano ironania ũrĩa amwe monanagia wĩhokeku kũgerera njĩra iria mahũthagĩra ũtonga ũrĩa ũtarĩ wa ũthingu.

⁸ Njĩra ĩmwe ĩyumĩrĩtie wega ĩrĩa tũngĩonania tũrĩ ehokeku na indo citũ cia kĩĩmwĩrĩ nĩ kũruta mĩhothi nĩ ũndũ wa wĩra wa kũhunjia wa thĩ yothe, ũrĩa Jesu aarathĩte ũngĩkaarutwo. (Mat. 24:14) Kairĩtu kamwe kuuma bũrũri wa India nĩ gaakoragwo na gathandũkũ kanini karĩa gaaikagia maciringi, na o na nĩ keimaga kũgũra indo cia gũthaka nĩguo gaikie  mbeca hau. Rĩrĩa gathandũkũ kau kaiyũrire, kairĩtu kau kaaneanire mbeca icio nĩguo iteithĩrĩrie wĩra-inĩ wa kũhunjia. Mũrũ wa Ithe witũ ũmwe kuuma India ũkoragwo na mũgũnda wa coconut, aaheanire matunda ma coconut wabici-inĩ ya ũtaũri ya Malayalam marĩ ta mũhothi wake. Onire atĩ tondũ no marĩbatara kũgũra matunda, kũmatwarĩra no gũteithie makĩria gũkĩra ũrĩa angĩtwara mbeca. Ũcio nĩ ũndũ wa ũũgĩ. O ũndũ ũmwe na ũcio, ariũ a Ithe witũ kuuma bũrũri-inĩ wa Greece kaingĩ nĩ marutaga indo ta maguta ma mĩtamaiyũ, cheese, na irio cia mĩthemba ĩngĩ makahe famĩlĩ ya Betheli.

⁹ Mũrũ wa Ithe witũ ũmwe kuuma bũrũri wa Sri Lanka ũrĩa ũthamĩire bũrũri ũngĩ, nĩ aheanĩte mũciĩ o hamwe na mũgũnda wake ũrĩa aatigire ũhũthagĩrũo gwĩkĩrũo mĩcemanio na igomano na ũgaikaragwo nĩ ndungata cia mahinda mothe. Mũrũ wa Ithe witũ ũcio nĩ eimĩte na njĩra nene, ĩndĩ agateithia ahunjia a gĩcigo kĩu arĩa matarĩ na ũhoti mũnene. Bũrũri-inĩ ũmwe ũrĩa wĩra witũ wĩkĩrĩirũo mĩkaana, aarĩ na ariũ a Ithe witũ maheanaga mĩciĩ yao ĩhũthĩrũo ĩrĩ ta Nyũmba cia Ũthamaki, na ũndũ ũcio ũkahotithia mapainia o hamwe na andũ angĩ arĩa matarĩ na ũhoti mũnene wa kĩĩmbeca kũgĩa na handũ ha gũcemania matekũritũhĩrũo kĩĩmbeca.

10. Nĩ irathimo irĩkũ imwe twamũkagĩra rĩrĩa tuonania ũtaana?

¹⁰ Ngerekano icio twarĩrĩria ironania ũrĩa andũ a Ngai makoretwo marĩ ‘ehokeku ũndũ-inĩ mũnini,’ na njĩra ĩrĩa mahũthagĩra indo ciao cia kĩĩmwĩrĩ iria itangĩringithanio na ũtonga wa kĩĩroho. (Luk. 16:10) Arata acio a Jehova maiguaga atĩa nĩ ũndũ wa kwĩima na njĩra ta icio? Nĩ moĩ atĩ kuonania ũtaana nĩ njĩra ya kwĩĩgĩra na ũtonga wa “ma.” (Luk. 16:11) Mwarĩ wa Ithe witũ ũmwe ũrutaga mĩhothi kaingĩ nĩ ũndũ wa wĩra wa Ũthamaki, nĩ ataarĩirie kĩrathimo kĩrĩa agĩte nakĩo: “Nĩ ũndũ wa kuonania ũtaana wa indo cia kĩĩmwĩrĩ, nĩ njiguaga ũndũ wa mwanya ngoro-inĩ. Nĩ nyonete atĩ o ũrĩa nyonanagia ũtaana na indo cia kĩĩmwĩrĩ noguo hotaga kuonania ũtaana harĩ andũ arĩa angĩ maũndũ-inĩ mangĩ. Nĩ hotaga kuonania ũtaana makĩria ũhoro-inĩ wĩgiĩ kuohanĩra, gũkirĩrĩria arĩa angĩ, gũkirĩrĩria gũkua ngoro na gwĩtĩkĩra kũrũngwo.” Andũ aingĩ nĩ meyoneire atĩ ũtaana nĩ ũtongagia mũndũ kĩĩroho.—Thab. 112:5; Thim. 22:9.

11. (a) Kũheana gwitũ twĩyendeire kuonanagia atĩa “ũũgĩ”? (b) Nĩ na njĩra ĩrĩkũ andũ a Ngai maigananagia mbeca iria cioneka? (Rora mbica kĩambĩrĩria-inĩ gĩa gĩcunjĩ gĩkĩ.)

¹¹ Kũhũthĩra indo cia kĩĩmwĩrĩ nĩguo tũtwarithie na mbere wĩra wa Ũthamaki nĩ kuonanagia “ũũgĩ” na njĩra ĩngĩ. Nĩ tũhotaga kũhũthĩra indo iria tũrĩ nacio gũteithia angĩ. Andũ arĩa marĩ na indo cia gũkũ thĩ na matingĩhota kũingĩra ũtungata-inĩ wa mahinda mothe kana gũthamĩra bũrũri ũngĩ, no makene nĩ kũmenya atĩ mĩhothi yao nĩ ĩrahũthĩrũo gũteithia ũtungata wa andũ angĩ. (Thim. 19:17) Mĩhothi ya kwĩyendera nĩ ĩteithagia harĩ kũhaarĩria mabuku maitũ na ĩgateithia wĩra-inĩ wa kũhunjia icigo-inĩ iria irakũra mũno kĩĩroho o na gũtuĩka irĩ na ũthĩni mũingĩ. Kwa ihinda rĩa mĩaka mĩingĩ, mabũrũri-inĩ mamwe ta Congo, Madagascar, na Rwanda, ariũ a Ithe witũ aingĩ nĩ maabataraga gũthuura kana nĩ irio mekũgũra nĩ ũndũ wa famĩlĩ ciao kana mekũgũra Bibilia ĩrĩa rĩmwe yendagio thogora  ũiganaine na mũcara wa kiumia kĩmwe kana wa mweri wa mũndũ. Rĩu, kũgerera mĩhothi ya kwĩyendera ya andũ aingĩ na ‘kũigananio’ kwa mbeca icio, ithondeka rĩa Jehova nĩ rĩhotete gũtaũra Bibilia na gũtigĩrĩra atĩ o mũndũ thĩinĩ wa famĩlĩ o hamwe na arutwo a Bibilia arĩa marahũtĩra maũndũ ma kĩĩroho marĩ na kobĩ ya Bibilia. (Thoma 2 Akorintho 8:13-15.) Kwoguo, andũ othe arĩa maraheana na arĩa maramũkĩra nĩ maragĩa na mweke wa kũgĩa ũrata na Jehova hatarĩ marĩhi.

12. Iburahimu onanirie atĩa atĩ nĩ eehokete Ngai?

¹² Njĩra ĩngĩ ĩngĩtũteithia gũthondeka ũrata na Jehova, nĩ kwaga kwĩingĩrania mũno na biacara cia thĩ ĩno, na kũhũthĩra maũndũ maitũ gwetha ũtonga “ũrĩa wa ma.” Iburahimu, mũthuri wa tene warĩ na wĩtĩkio, nĩ aathĩkĩire Jehova na agĩthama itũũra rĩagacĩire mũno rĩa Uru athiĩ agaikarage hema-inĩ nĩguo athingate ũrata wake hamwe na Jehova. (Ahib. 11:8-10) Hĩndĩ ciothe onaga Ngai arĩ we Kĩhumo kĩa ũtonga wa ma na ndeyethagĩra indo nyingĩ cia kĩĩmwĩrĩ iria ingĩonanirie kwaga kũmwĩhoka. (Kĩam. 14:22, 23) Jesu nĩ eekagĩra ngoro arĩa angĩ makũrie wĩtĩkio ta ũcio rĩrĩa eerire mũndũ ũmwe mwĩthĩ na warĩ mũtongu ũũ: “Ũngĩenda kwagĩrĩra, thiĩ wendie indo ciaku ũhe athĩni, na nĩ ũkũgĩa na mũthithũ kũrĩa igũrũ, ũcoke ũũke ũtuĩke mũrũmĩrĩri wakwa.” (Mat. 19:21) Mũndũ ũcio ndaarĩ na wĩtĩkio ta wa Iburahimu, no nĩ kũrĩ angĩ monanĩtie atĩ nĩ mehokete Ngai biũ.

13. (a) Nĩ ũtaaro ũrĩkũ Paulo aaheire Timotheo? (b) Tũngĩhũthĩra atĩa ũtaaro ũcio wa Paulo ũmũthĩ?

¹³ Timotheo aarĩ mũndũ warĩ na wĩtĩkio. Thutha wa Paulo gwĩta Timotheo “mũthigari mwega wa Kristo Jesu,” ongereire ũũ: “Gũtirĩ mũthigari wĩingĩragia biacara-inĩ cia ũtũũro, tondũ nĩ arenda gwĩtĩkĩrũo nĩ ũrĩa wamũtuire mũthigari.” (2 Tim. 2:3, 4) Arũmĩrĩri a Jesu ũmũthĩ, arĩa nĩ hamwe na mbũtũ ya ndungata cia mahinda mothe makĩria ma milioni ĩmwe, nĩ mahũthagĩra ũtaaro ũcio wa Paulo kũringana na ũrĩa maũndũ mao mekũmetĩkĩria. Nĩ methemaga kũhenererio nĩ andũ arĩa magaathagĩrĩria indo o hamwe na thĩ ĩrĩa ĩmathiũrũrũkĩirie na makaririkanaga ũtaaro ũyũ: “Muohori nĩ ngombo ya mũmuohoreri.” (Thim. 22:7) Gĩkeno gĩa Shaitani nĩ kuona tũkĩhũthĩra mahinda maitũ mothe na hinya witũ wothe gũtungata tũrĩ ngombo cia biacara cia thĩ ĩno yake. Matua mamwe no matũme tũtũũre tũrĩhaga mathiirĩ mĩaka mĩingĩ. Mathiirĩ marĩa moimanaga na kũgũra nyũmba nene, gĩthomo kĩa igũrũ, kũgũra ngari ya goro, kana gwĩka ũhiki mũnene no matũme tũgĩe na mathĩna manene ma kĩĩmbeca. Nĩ tuonanagia ũũgĩ rĩrĩa twahũthia ũtũũro witũ na twanyihia mathiirĩ o hamwe na mahũthĩro maitũ, nĩguo tũkorũo na wĩyathi wa gũtuĩka ngombo cia Ngai handũ ha ngombo cia biacara cia thĩ ĩno.—1 Tim. 6:10.

14. Nĩ mwerekera ũrĩkũ twagĩrĩirũo gũkorũo naguo? Heana ngerekano.

¹⁴ Nĩguo tũtũũre ũtũũro mũhũthũ no mũhaka tũige maũndũ marĩa ma bata mbere. Mũrũ wa Ithe witũ ũmwe na mũtumia wake nĩ maarĩ na biacara nene. O na kũrĩ ũguo, tondũ nĩ meeriragĩria gũcokerera ũtungata wa mahinda mothe, nĩ maabatarire kwendia biacara yao, gatarũ kao, o hamwe na indo ingĩ cia kĩĩmwĩrĩ. Magĩcoka makĩĩrutĩra gũteithĩrĩria mwako-inĩ wa wabici nene ya Aira a Jehova ĩrĩa ĩrĩ Warwick, New York. Kĩrathimo kĩmwe kĩa mwanya magĩte nakĩo nĩ gĩa gũtungata Betheli marĩ hamwe na mwarĩ wao na mũthuri wake, na kwa ihinda rĩa ciumia cigana ũna, magĩtungata hamwe na aciari a mũrũ wa Ithe witũ ũcio arĩa o nao meerutĩire mwako-inĩ ũcio wa Warwick. Mwarĩ wa Ithe witũ ũmwe painia kuuma Colorado, U.S.A., nĩ onire wĩra ũtaarĩ wa mahinda mothe bengi-inĩ ĩmwe. Arĩa maamwandĩkĩte nĩ maakenirio mũno nĩ wĩra wake nginya akĩũrio arutage wĩra mahinda mothe na ongererũo mũcara maita matatũ ma ũrĩa aarĩhagwo. O na kũrĩ ũguo, tondũ  gwĩka ũguo nĩ kũngĩanyihirie mahinda make ma ũtungata, akĩrega mweke ũcio wonekaga ũrĩ mwega. Icio no ngerekano imwe nini cia ndungata cia Jehova iria ciĩimaga na njĩra nene. Matua ta macio marũmu ma kũiga maũndũ ma Ũthamaki mbere monanagia atĩ nĩ tuonaga ũrata witũ hamwe na Ngai na ũtonga wa kĩĩroho irĩ cia goro gũkĩra kĩndũ kĩngĩ o gĩothe tũngĩona biacara-inĩ cia thĩ ũmũthĩ.

15. Nĩ ũtonga ũrĩkũ ũrehagĩra mũndũ gĩkeno kĩrĩa kĩnene mũno?

¹⁵ To mũhaka ũtonga wa kĩĩmwĩrĩ ũkorũo ũkĩonania irathimo cia Ngai. Jehova nĩ arathimaga arĩa ‘makĩragĩrĩria harĩ gwĩka ciĩko njega.’ (Thoma 1 Timotheo 6:17-19.) Kwa ngerekano, rĩrĩa mwarĩ wa Ithe witũ Lucia * aamenyire atĩ nĩ kwarĩ na bata mũnene wa ahunjia bũrũri-inĩ wa Albania, aathamire kuuma Italy mwaka-inĩ wa 1993 atarĩ na njĩra o yothe ya kwĩrũgamĩrĩra ehokete biũ atĩ Jehova nĩ angĩamũrũmbũyirie. Nĩ aamenyire rũthiomi rwa Kĩalbania wega na nĩ ahotete gũteithia andũ makĩria ma 60 magakinyĩra kwĩyamũrĩra Jehova. O na gũtuĩka andũ aingĩ a Ngai matihunjagia icigo ta icio ikoragwo na moimĩrĩro mega ũguo, kaũndũ o gothe twĩkaga nĩguo tũteithie angĩ mone na maikare barabara-inĩ ĩrĩa ĩtongoragia muoyo-inĩ, tũgũtũũra tũgakenagĩra tene na tene hamwe nao.—Mat. 6:20.

16. (a) Gũgathiĩ atĩa harĩ mũtabarĩre wa biacara wa thĩ ĩno? (b) Ũrĩa tũĩ wĩgiĩ ihinda rĩũkĩte wagĩrĩirũo kũhutia atĩa muonere witũ wĩgiĩ indo cia kĩĩmwĩrĩ?

¹⁶ Jesu oigire “hĩndĩ ĩrĩa [ũtonga ũtarĩ wa ũthingu] ũgaathira,” no ndoigire ‘ũngĩthira.’ (Luk. 16:9) Kũhara kwa mabengi na mathĩna maingĩ ma mbeca marĩa moimĩrĩte matukũ-inĩ maya ma kũrigĩrĩria nĩ maũndũ manini makĩringithanio na mathĩna manene marĩa mekuoneka thĩinĩ wa thĩ yothe ica ikuhĩ. Mũtabarĩre wothe wa Shaitani, wa gĩũteti, wa kĩndini, na wa kĩbiacara nĩ ũgũthira. Mũnabii Ezekieli na mũnabii Zefania nĩ maarathĩte atĩ thahabu na betha, iria ikoretwo irĩ cia bata mũno harĩ biacara cia thĩ mĩaka mĩingĩ, nĩ ingĩgaatuĩka cia tũhũ. (Ezek. 7:19; Zef. 1:18) Tũngĩigua atĩa tũngĩkinya mũthia wa ũtũũro witũ thĩinĩ wa thĩ ĩno na tũmenye atĩ tweimire ũtonga ũrĩa wa ma nĩguo twĩgĩre na mũthithũ mũnene wa “ũtonga ũrĩa ũtarĩ wa ũthingu” wa thĩ ĩno? Tũngĩigua ta mũndũ ũhũthĩrĩte ũtũũro wake wothe agĩthũkũma mbeca nyingĩ agacoka akamenya atĩ mbeca icio nĩ cia maheeni. (Thim. 18:11) Hatarĩ nganja, marigĩrĩrio-inĩ ũtonga ta ũcio no ũgaathira, kwoguo ndũgate mweke wa kũhũthĩra ũtonga ũcio ‘gwĩthondekera arata’ kũrĩa igũrũ. Ũndũ o wothe twĩkaga nĩguo tũtwarithie na mbere maũndũ ma Ũthamaki wa Jehova nĩ ũtũtongagia kĩĩroho.

17, 18. Nĩ maũndũ marĩkũ mega arata a Jehova maigĩirũo?

¹⁷ Rĩrĩa Ũthamaki wa Ngai ũgooka, mbeca cia kũrĩhaga nyũmba o mweri na mathiirĩ ma kũgũra nyũmba nĩ igaathira, irio igakorũo kuo kwa ũingĩ na itikendagio, na mbeca cia thibitarĩ itikabataranagia. Famĩlĩ ya Jehova ya gũkũ thĩ nĩ ĩgaakenera indo iria ciothe njega cia thĩ. Thahabu, betha, na mathaga mangĩ igaakoragwo irĩ cia kwĩgemia no ti cia kuonjorithia kana cia kũiga bengi. Mbaũ iria njega biũ, mahiga marĩa mega, na cuma iria njega itikendagio na ikaahũthĩkaga gwaka mĩciĩ mĩthaka. Arata aitũ magaatũteithagia nĩ ũndũ wa gũkenera no ti tondũ wa mbeca. Nĩ gũgakoragwo na mũtaratara mwega wa kũhũthĩra hamwe indo ciothe iria irĩ thĩinĩ wa thĩ.

¹⁸ Kĩu no gĩcunjĩ kĩmwe tu kĩa igai rĩa goro mũno rĩrĩa rĩkaaheo arĩa mathondekaga arata kũrĩa igũrũ. Athathaiya a Jehova magaakorũo na gĩkeno kĩnene mũno rĩrĩa makaigua ciugo ici cia Jesu: “Ũkai inyuĩ mũrathimĩtwo nĩ Awa, gayai Ũthamaki ũrĩa wahaarĩirio nĩ ũndũ wanyu kuuma kĩambĩrĩria gĩa thĩ.”—Mat. 25:34.