O na gũtuĩka Akristiano no moe makinya ma gũtigĩrĩra atĩ marĩ na ũgitĩri, matiagĩrĩirũo kwagarara motaaro marĩa marĩ thĩinĩ wa Maandĩko nĩguo meke ũguo. Motaaro macio monanagia atĩ ti wega Mũkristiano gũkorũo na matharaita ta mũcinga wa mũthemba o wothe nĩguo egitĩre kuumana na andũ angĩ. Ta wĩcirie maũndũ maya:

Maitho-inĩ ma Jehova, muoyo wa mũndũ nĩ mũtheru. Mwandĩki wa Thaburi, Daudi, nĩ aamenyaga atĩ Jehova nĩwe “itherũkĩro rĩa muoyo.” (Thab. 36:9) Kwoguo, angĩkorũo Mũkristiano nĩ egũthuura kuoya makinya nĩguo egitĩre hamwe na indo ciake, agĩrĩirũo gwĩka ũrĩa wothe angĩhota nĩguo etheme kũũraga mũndũ kana gũkorũo na mahĩtia ma gũita thakame.—Gũcok. 22:8; Thab. 51:14.

O na gũtuĩka nĩ ũhũthũ mũndũ kũgĩa na mahĩtia ma gũita thakame rĩrĩa ahũthĩra itharaita rĩa mũthemba o wothe, mĩcinga nĩ ĩtũmaga ũkorũo arĩ ũhũthũ makĩria kũũraga mũndũ kĩĩmahĩtia kana ũkĩendaga. * Makĩria, mũndũ ũroka gũgũtharĩkĩra akoragwo agĩĩtigĩra ũrĩa gũgũthiĩ na kwoguo angĩona atĩ ũrĩ na mũcinga, ũndũ ũcio no ũthũkie maũndũ o na makĩria o na hihi gĩkuũ kiumĩre.

Rĩrĩa Jesu eerire arũmĩrĩri ake makuue hiũ cia njora ũtukũ-inĩ wake wa mũico gũkũ thĩ, ndaameraga ũguo agĩciria ũhoro wa kwĩgitĩra. (Luk. 22:36, 38) Handũ ha ũguo, Jesu akĩmeera makuue hiũ cia njora eendaga kũmaruta ũndũ wa bata atĩ matikanarũe, o na mangĩkang’ethanĩra na kĩrĩndĩ gĩĩthaĩte na matharaita. (Luk. 22:52) Thutha wa Petero kũhũthĩra rũhiũ rũmwe rwa icio maakuuĩte kũgera ngero ndungata ya mũthĩnjĩri-Ngai ũrĩa mũnene,  Jesu aamwathire ũũ: “Cokia rũhiũ rwaku handũ haruo.” Jesu agĩcoka akĩongerera ũtaaro ũyũ wa ma ũrĩa ũhũthĩkaga harĩ arũmĩrĩri ake nginya ũmũthĩ: “Arĩa othe moyaga rũhiũ makaaninwo o na rũhiũ.”—Mat. 26:51, 52.

Andũ a Ngai maikaraga kũringana na ũtaaro wa Mika 4:3 wa ‘gũtura hiũ ciao cia njora ituĩke hiũ cia mĩraũ, o namo matimũ mao matuĩke hiũ cia gũceha mĩtĩ.’ Ngumo ĩyo ĩrĩa ĩmenyithanagia Akristiano a ma nĩ ĩtwaranaga na ũtaaro ũyũ wa mũtũmwo Paulo watongoririo nĩ roho: “Mũtikaneke mũndũ o na ũrĩkũ ũũru tondũ wa ũũru ũrĩa amwĩkĩte. . . . Ĩkagai o ũrĩa wothe mũngĩhota mũkoragwo na thayũ hamwe na andũ othe.” (Rom. 12:17, 18) O na gũtuĩka mũtũmwo Paulo nĩ aacemanirie na mathĩna maingĩ, o hamwe na “ũgwati wa atunyani,” nĩ atũũrire kũringana na ciugo icio ciake, na ndegitĩrire na njĩra ya kwagarara ithimi cia Maandĩko. (2 Kor. 11:26) Handũ ha ũguo, eehokire Ngai o hamwe na ũũgĩ ũrĩa ũrĩ Kiugo-inĩ gĩake ũrĩa “mwega gũkĩra indo cia mbaara.”—Koh. 9:18.

Akristiano monaga muoyo ũrĩ wa bata gũkĩra indo cia kĩĩmwĩrĩ. “Muoyo [wa mũndũ] ndumanaga na indo iria arĩ nacio.” (Luk. 12:15) Angĩkorũo ciugo cia ũhooreri itikũhota kũiguithia mũici ũrĩ na matharaita, Mũkristiano mũũgĩ ahũthagĩra ũtaaro ũyũ wa Jesu: “Ndũkanagiane na mũndũ ũrĩa mũru.” Ũguo nĩ kuuga o na no tũbatare kũmũreka oye kĩrĩa gĩothe ekwenda. (Mat. 5:39, 40; Luk. 6:29) * Njĩra ĩrĩa njega ya kwĩgitĩra nĩ kũgeria kũgirĩrĩria ũndũ ta ũcio gwĩkĩka. Tũngĩĩthema “mwĩyonanio wa indo iria [tũrĩ] nacio” na tũkorũo tũĩkaine nĩ arĩa tũriganĩtie nao atĩ tũrĩ Aira a Jehova na nĩ twendete thayũ, no twĩtheme gũtharĩkĩrũo nĩ aici arĩa mahũthagĩra ũhinya.—1 Joh. 2:16; Thim. 18:10.

Akristiano nĩ matĩaga thamiri cia arĩa angĩ. (Rom. 14:21) Kũngĩmenyeka atĩ mũrũ kana mwarĩ wa Ithe witũ thĩinĩ wa kĩũngano arĩ na mũcinga wa kwĩgitĩra kuumana na andũ angĩ, Akristiano amwe no mamake kana o na mahĩngĩke. Wendo nĩ ũtũtindĩkaga kũiga wendi wa arĩa angĩ mbere ya witũ, o na angĩkorũo gwĩka ũguo nĩ kuuga twĩime ũndũ ũroneka ta arĩ kĩhooto gitũ.—1 Kor. 10:32, 33; 13:4, 5.

Akristiano nĩ merutanagĩria kũiga kĩonereria kĩega. (2 Kor. 4:2; 1 Pet. 5:2, 3) Mũkristiano angĩthiĩ na mbere gũkorũo arĩ na mũcinga wa kwĩgitĩra kuumana na andũ angĩ o na thutha wa kũheo ũtaaro wa Kĩĩmaandĩko, ndangĩonwo arĩ kĩonereria kĩega. Kwoguo, ndangĩagĩrĩra kwĩhokerũo mawĩra kana mĩeke o yothe ya mwanya thĩinĩ wa kĩũngano. Na noguo kũngĩkorũo kũrĩ o na harĩ Mũkristiano ũrutaga wĩra ũbataraga akorũo na mũcinga. Githĩ ti wega mũndũ ta ũcio gwetha wĩra ũngĩ? *

Njĩra ĩrĩa Mũkristiano egũthuura ya kwĩgitĩra, kũgitĩra famĩlĩ yake, kana o na kũgitĩra indo ciake nĩ itua rĩake, o ta ũrĩa harĩ ũhoro-inĩ wĩgiĩ gũthuura wĩra ũrĩa ekũruta. Ũndũ-inĩ ũcio, motaaro ma Bibilia nĩ monanagia ũũgĩ wa Ngai o hamwe na wendo wake gũtwerekera. Nĩ ũndũ wa gũtĩa motaaro macio, Akristiano agimaru kĩĩroho nĩ matuaga itua rĩa kwaga gũkorũo na mũcinga wa kwĩgitĩra kuumana na andũ angĩ. Nĩ mamenyaga atĩ ũgitĩri wa ma na wa gũtũũra wonagwo nĩ arĩa monanagia wĩtĩkio harĩ Ngai na magatũũra kũringana na motaaro ma Bibilia.—Thab. 97:10; Thim. 1:33; 2:6, 7.