Nĩ ũthomete na kinyi icunjĩ cia ica ikuhĩ cia Mũrangĩri? ta rora kana no ũhote gũcokia ciũria ici:

Nĩ maũndũ marĩkũ mana tũngĩka nĩguo twagagĩrie mũinĩre witũ?

No tũrũgame wega na tuoe mabuku maitũ ma nyĩmbo na igũrũ. Twagĩrĩirũo kũhuhia wega. Ningĩ tũngĩina tũhingũrĩte kanua gaitũ biũ, no tũhote kũina twanĩrĩire makĩria.—w17.11, kar. 5.

Nĩ maũndũ marĩkũ ma mwanya megiĩ kũrĩa matũũra ma kũũrĩra maarĩ thĩinĩ wa Isiraeli na barabara iria ciathiĩte matũũra-inĩ macio?

Kwarĩ na matũũra matandatũ ma kũũrĩra marĩa maarĩ kũndũ gũtiganĩte bũrũri-inĩ wa Isiraeli, na barabara iria ciathiaga matũũra-inĩ macio ciakoragwo ithondeketwo wega. Mũndũ nĩ angĩakinyire matũũra-inĩ macio o na ihenya.—w17.11, kar. 14.

Nĩkĩ kĩheo kĩrĩa Ngai aaheanire gĩa gũkũũra andũ kũgerera harĩ Jesu nĩkĩo kĩheo kĩrĩa kĩega makĩria?

Nĩ kĩhingagia wendi witũ wa kwenda gũtũũra tene na tene, na nĩ gĩtũkũũraga kuuma ũkombo-inĩ wa mehia na gĩkuũ. Nĩ ũndũ wa Ngai gũtwenda, nĩ aarutire Jesu nĩ ũndũ witũ hĩndĩ ĩrĩa twarĩ ehia.—wp17.6, kar. 6-7.

Nĩ na njĩra ĩrĩkũ Thaburi 118:22 yonanagia kũriũka kwa Jesu?

Andũ nĩ maaregire atĩ Jesu nĩwe Mesia na magĩcoka makĩmũraga. Nĩguo atuĩke ‘ihiga rĩrĩa inene rĩa koine,’ no mũhaka angĩariũkire.—w17.12, kar. 9-10.

Hihi andũ arĩa Mesia oimanire nao no mũhaka mangĩakorirũo marĩ marigithathi?

Ti andũ othe arĩa Jesu oimanire nao maarĩ marigithathi. Daudi tiwe warĩ irigithathi rĩa Jesii, no Mesia oimanire na rũciaro rwake.—w17.12, kar. 14-15.

Nĩ motaaro marĩkũ mamwe megiĩ ũgima wa mwĩrĩ makoragwo thĩinĩ wa Bibilia?

Kũringana na Watho wa Musa, andũ mangĩarũarire mĩrimũ ĩmwe nĩ meheranagio na arĩa matarĩ arũaru. No mũhaka mũndũ angĩethambire thutha wa kũhutia mũndũ mũkuũ. Watho ũcio woigĩte gĩko kĩa andũ kĩagĩrĩire gũteo na njĩra ĩrĩa yagĩrĩire. Mwana aciarũo aagĩrĩirũo kũruithio mũthenya wa kanana, na ũndũ ũcio warĩ mwagĩrĩru tondũ nĩrĩo ũhoti wa thakame gũtiga kuura ũkoragwo igũrũ.—wp18.1, kar. 7.

Nĩkĩ ti ũũru Mũkristiano kwĩyenda?

No mũhaka twende andũ arĩa angĩ ta ũrĩa twĩyendete. (Mar. 12:31) Athuri magĩrĩirũo “kwendaga atumia ao o ta arĩ mĩĩrĩ yao ene.” (Ef. 5:28) O na kũrĩ ũguo, andũ no meyende gũkĩria njano.—w18.01, kar. 23.

Nĩ makinya marĩkũ mamwe tũngĩoya nĩguo tũkũre kĩĩroho?

Twagĩrĩirũo kwĩruta Kiugo kĩa Ngai, twĩcũranagie maũndũ marĩa tweruta, tũcoke tũmahũthĩre. Ningĩ no mũhaka tũreke roho mũtheru ũrute wĩra thĩinĩ wa meciria na ngoro citũ na tũkoragwo twĩhaarĩirie gwĩtĩkĩra ũteithio kuuma kũrĩ andũ arĩa angĩ.—w18.02, kar. 26.

Nĩkĩ ũũgĩ wa njata na kũrathĩrũo ũhoro ti njĩra njega cia kũmenya ũhoro wa mahinda mokĩte?

Nĩ kũrĩ itũmi nyingĩ, no gĩtũmi kĩrĩa kĩnene nĩ atĩ Bibilia nĩ ĩgirĩtie maũndũ macio merĩ.—wp18.2, kar. 4-5.

Twagĩrĩirũo gwĩka atĩa angĩkorũo nĩ tũnyitĩtwo ũgeni handũ na tũgetĩkĩra?

Tũngiuga nĩ tũgathiĩ handũ tũnyitĩtwo ũgeni, nĩ twagĩrĩirũo kũhingia kĩrĩko gitũ. (Thab. 15:4) Tũtiagĩrĩirũo gũtĩĩra hatarĩ gĩtũmi. Ũrĩa ũtũnyitĩte ũgeni no akorũo abangĩte maũndũ na akahaarĩria gĩa kũrĩa kana gĩa kũnyua.—w18.03, kar. 18.

Nĩ maũndũ marĩkũ arũme arĩa mamũrĩtwo mangĩĩruta kuuma kũrĩ Timotheo?

Timotheo nĩ aarũmbũyagia andũ biũ na aaigaga maũndũ ma kĩĩroho mbere. Nĩ eerutanagĩria mũno maũndũ-inĩ ma kĩĩroho na nĩ aahũthagĩra maũndũ marĩa eerutaga. Nĩ aathiaga na mbere kwĩruta na nĩ eehokaga roho wa Jehova. Athuri o hamwe na andũ arĩa angĩ no megerekanie na kĩonereria gĩake.—w18.04, kar. 13-14.