Suleimani nĩwe warĩ ithe wa Rehoboamu, na aathamakire Isiraeli mĩaka 40. (1 Ath. 11:42) Aakuire mwaka wa 997 mbere ya Kristo. Thutha ũcio Rehoboamu nĩ oimire Jerusalemu agĩthiĩ nginya Shekemu nĩguo agatuwo mũthamaki. (2 Maũ. 10:1) No gũkorũo nĩ eetigagĩra gũtuĩka mũthamaki tondũ ithe Suleimani oĩkaine na gũkorũo na ũũgĩ mũingĩ. Thutha wa ihinda, Rehoboamu nĩ angĩonanirie kana aarĩ na ũũgĩ wa kũigana kũhota gũtua itua iritũ.

No mũhaka akorũo Rehoboamu akĩambĩrĩria gũthamaka, maũndũ maarĩ maritũ bũrũri-inĩ wa Isiraeli. Aisiraeli nĩ maatũmire andũ makeere Rehoboamu ũndũ ũrĩa wamagiaga: “Watho urĩa thoguo aratwathaga naguo nĩũratũritũhĩire mũno; tondũ ũcio tũhũthahũthĩrie wĩra ũcio ũrarĩ hinya wa thoguo, o wĩra ũcio wake ũratariĩ ta mũtĩ wa ngingo mũritũ atwĩkĩrĩte, na nĩtũrĩgũtungatagĩra.”—2 Maũ. 10:3, 4.

Kwahoteka Rehoboamu nĩ aaiguire ũndũ ũcio wamũritũhĩra. Angĩetĩkĩrire gwĩka ũguo andũ mendaga, no mũhaka we na famĩlĩ yake na andũ arĩa maaikaraga nyũmba-inĩ yake ya ũthamaki mangĩahũthahũthirie mũtũũrĩre wao wa kĩrathi kĩa igũrũ. Ningĩ nĩ onaga aarega, andũ mahota kũrega gwathwo nĩwe. Eekire atĩa? Aambire akĩhoya ũtaaro kũrĩ athuri arĩa mataaraga Suleimani. O na kũrĩ ũguo, aacokire akĩhoya ũtaaro kũrĩ anake a riika rĩake. Rehoboamu aahũthĩrire ũtaaro wa anake, agĩtua itua rĩa kũhinyĩrĩria andũ. Oigire ũũ: “Niĩ [mũtĩ wa ngingo] nĩ kũritũhia ngũũritũhia makĩria; ningĩ baba aramũhũraga na iboko, no niĩ ndĩrĩmũrũmithagia ing’aurũ.”—2 Maũ. 10:6-14.

Hihi nĩ ũrona ũndũ tũngĩĩruta? Nĩ wega gũthikagĩrĩria andũ arĩa akũrũ na agima kĩĩroho. Tondũ nĩ matungatĩire Jehova ihinda iraya, kwahoteka no mamenye moimĩrĩro ma itua rĩna na kwoguo matũhe ũtaaro mwega.—Ayub. 12:12.

Rĩrĩa mĩhĩrĩga ĩmwe yeyeheririe, Rehoboamu aacokanĩrĩirie mbũtũ yake mathiĩ makahũrane nao. No Jehova nĩ aaingĩrĩire na akĩmeera ũũ kũgerera mũnabii Shemaia: “Mũtikwambata, o na kana mũkahũrane na ariũ a ithe wanyu ciana icio cia Isiraeli; cokai o mũndũ kwao mũciĩ; nĩ gũkorũo ũndũ ũcio nĩ niĩ ndũmĩte woneke.”—1 Ath. 12:21-24. *

Hihi warĩ ũndũ mũhũthũ harĩ Rehoboamu gwathĩkĩra Jehova? Andũ mangĩamuonire atĩa? Eerĩte andũ atĩ angĩamaherithirie na “ing’aurũ” ĩndĩ rĩu no kwĩrorera angĩeroreire ũremi ũcio gũtarĩ ũndũ angĩka. (Ringithania 2 Maũndũ ma Matukũ ma Tene 13:7.) O na kũrĩ ũguo, we na mbũtũ yake “magĩkĩigua ũhoro ũcio wa Jehova, makĩhũndũka, magĩĩthiĩra, o ta ũrĩa ũhoro ũcio merĩtwo nĩ Jehova watariĩ.”

Nĩ ũndũ ũrĩkũ tũreruta? Nĩ wega gwathĩkĩra Ngai o na angĩkorũo gwĩka ũguo nĩ gũgũtũma tũthekererũo kana tũnyũrũrio. Mũndũ angĩathĩkĩra Ngai nĩ etĩkĩrĩkaga nĩwe na akarathimwo.—Gũcok. 28:2.

Hihi Rehoboamu nĩ aarathimirũo? Nĩ ũndũ wa gwathĩka nĩ aathire na mbere gũkorũo arĩ mũthamaki wa Juda na Benjamini na akĩambĩrĩria gwaka matũũra merũ kuo. Nĩ eekĩrire matũũra maigana ũna “hinya mũno.” (2 Maũ. 11:5-12) Ũndũ ũrĩa wa bata makĩria nĩ atĩ nĩ aarũmĩrĩire mawatho ma Jehova kwa ihinda. Tondũ ũthamaki wa mĩhĩrĩga ikũmi wa Isiraeli ũrĩa wathagwo nĩ Jeroboamu nĩ warikĩrĩte ũthathaiya-inĩ wa ngai cia maheeni, andũ aingĩ kuuma kuo nĩ maathiaga Jerusalemu nĩ ũndũ wa ũthathaiya mũtheru, na kwoguo “makĩnyiitĩrĩra Rehoboamu.” (2 Maũ. 11:16, 17, Holy Bible in Gĩkũyũ) Nĩ ũndũ ũcio, wathĩki wa Rehoboamu nĩ watũmire ũthamaki wake ũgĩe na hinya.

O na kũrĩ ũguo, hĩndĩ ĩrĩa ũthamaki wa Rehoboamu wagĩire na hinya nĩ eekire ũndũ ũterĩgĩrĩirũo. Nĩ aatigire kũrũmĩrĩra watho wa Jehova na akĩambĩrĩria gũthathaiya ngai cia maheeni. Hihi aagucĩrĩirio eke ũguo nĩ nyina ũrĩa warĩ Mũamoni? (1 Ath. 14:21) Tũtingĩmenya wega kĩrĩa gĩatũmire eke ũguo, no ũrĩa kũrĩ nĩ atĩ rũrĩrĩ ruothe rwarũmĩrĩire kĩonereria gĩake kĩũru. Ũndũ ũcio watũmire Jehova etĩkĩrie Mũthamaki Shishaka wa Misiri atunyane matũũra maingĩ ma Juda, o na gũtuĩka Rehoboamu nĩ aamekĩrĩte hinya.—1 Ath. 14:22-24; 2 Maũ. 12:1-4.

Maũndũ maathũkire hĩndĩ ĩrĩa Shishaka okire gũtharĩkĩra Jerusalemu kũrĩa Rehoboamu aathamakagĩra. Hĩndĩ ĩyo nĩrĩo mũnabii Shemaia aaheire Rehoboamu na anene ake ndũmĩrĩri ĩno kuuma kũrĩ Ngai: “Atĩrĩrĩ, nĩmũtiganĩte na niĩ, na tondũ ũcio niĩ o na niĩ nĩndĩmũtigĩte mũhũrũo nĩ Shishaka.” Rehoboamu aaiyũkirie atĩa ndũmĩrĩri ĩyo ya kũmũrũnga? Nĩ eekire ũrĩa kwagĩrĩire tondũ Bibilia yugaga ũũ: “Hĩndĩ ĩo anene a Isiraeli, o na mũthamaki, magĩkĩĩnyihia; nao makiuga atĩrĩ, Jehova nĩwe mũthingu.” Nĩ ũndũ ũcio Jehova nĩ aahonokirie Rehoboamu na kwoguo Jerusalemu ndĩatharĩkĩirũo.—2 Maũ. 12:5-7, 12.

Thutha ũcio Rehoboamu nĩ aathire na mbere gũthamakĩra ũthamaki wa mũhuro. Mbere ya gũkua nĩ aaheire ariũ ake iheo nyingĩ. Kwahoteka eekire ũguo nĩguo agirĩrĩrie matigokĩrĩre mũrũwe Abija tondũ nĩwe ũngĩatuĩkire mũthamaki ithenya rĩake. (2 Maũ. 11:21-23) Ũndũ ũcio Rehoboamu eekire wonanirie atĩ nĩ aahũthĩrire ũũgĩ, mũgarũ na ũrĩa eekire rĩrĩa aarĩ mwĩthĩ.

O na gũtuĩka Rehoboamu nĩ eekire maũndũ mamwe mega, ndeetĩkĩrĩkire nĩ Ngai. Bibilia ĩkĩaria ũhoro wake yugaga ũũ: “Nake nĩekaga maũndũ moru.” Nĩkĩ? Tondũ “ndaigana kũroria ngoro yake ũhoro-inĩ wa kũrongoria Jehova.”—2 Maũ. 12:14.

Tũngĩĩruta atĩa kuumana na ũtũũro wa Rehoboamu? Nĩ aathĩkagĩra Ngai rĩmwe na rĩmwe. Na nĩ eekĩire andũ a Jehova maũndũ mamwe mega. No nĩ aagire gũkũria ũrata mũrũmu na Jehova na ndaarĩ na wendi wa kũmũtungatĩra. Ũndũ ũcio watũmire atige gwĩkaga wega na ambĩrĩrie gũthathayagia ngai cia maheeni. Hihi no wĩyũrie ũũ: ‘Hĩndĩ ĩrĩa Rehoboamu eetĩkĩrire kũrũngwo nĩ Jehova-rĩ, hihi eekire ũguo nĩ ũndũ wa kwĩrira kuuma  ngoro na kwenda gũkenia Ngai kana hihi nĩ ũndũ wa gũtindĩkĩrĩrio nĩ andũ arĩa angĩ?’ (2 Maũ. 11:3, 4; 12:6) Thutha ũcio aacokereire gwĩkaga maũndũ moru. Aarĩ ngũrani biũ na Mũthamaki Daudi, ũrĩa warĩ gukawe. Nĩ ma Daudi nĩ aahĩtagia, no ũtũũro wake nĩ wonanagia atĩ nĩ eendete Jehova, nĩ eerutĩire biũ harĩ ũthathaiya wa ma, na mehia maritũ marĩa eekire nĩ eeririre kuuma ngoro.—1 Ath. 14:8; Thab. 51:1, 17; 63:1.

Rũgano rwa Rehoboamu no rũtũrute maũndũ maingĩ. Nĩ tũrabatara gwethera famĩlĩ citũ mabataro na kwĩrutanĩria ũtungata-inĩ wa Jehova. No nĩguo twĩtĩkĩrĩke nĩ Ngai no mũhaka tũmũthathaiye na njĩra ĩrĩa ĩmũkenagia na tũkorũo na ũrata mũrũmu nake.

No tũhote gwĩka ũguo angĩkorũo nĩ tũrĩkoragwo twendete Jehova kuuma ngoro. O ta ũrĩa twĩkĩraga mwaki ngũ nĩguo ũthiĩ na mbere gwakana, noguo tũrabatara gũtũũria wendo witũ harĩ Ngai na njĩra ya gũthomaga Kiugo gĩake hĩndĩ ciothe, gwĩcũranagia maũndũ marĩa twathoma, na kũhoyaga hingo ciothe. (Thab. 1:2; Rom. 12:12) Nakuo kwenda Jehova nĩ gũgũtũma tũgĩe na wendi wa kũmũkenagia maũndũ-inĩ mothe marĩa tũreka. Ningĩ rĩrĩa twahĩtia, kwenda Jehova nĩ kũrĩtũmaga twĩrire kuuma ngoro. Nĩ ũndũ ũcio tũgũtũũra twĩhandĩte wega ũthathaiya-inĩ wa ma handũ ha kũhaana ta Rehoboamu.—Jud. 20, 21.