TONDŨ tũraikara thĩinĩ wa thĩ ĩtarĩ na thayũ, no mũhaka twĩrutanĩrie nĩguo tũkorũo na thayũ. Ningĩ o na rĩrĩa twĩna thayũ, kaingĩ nĩ tũbataraga kwĩrutanĩria kũũtũũria. Nĩ ũndũ ũrĩkũ Kiugo kĩa Ngai kiugaga no ũtũteithie kũgĩa thayũ wa ma na wa gũtũũra? Na tũngĩteithia andũ arĩa angĩ atĩa kũgĩa naguo?

Nĩguo tũkorũo na thayũ wa ma, no mũhaka tũkorũo nĩ tũraigua atĩ tũtirĩ ũgwati-inĩ na tũtirathumbũka meciria. Ningĩ nĩ tũrabatara gũkũria ũrata mũrũmu na andũ arĩa angĩ. Ũndũ ũrĩa wa bata makĩria, nĩguo tũgĩe thayũ wa gũtũũra no mũhaka tũkũrie ũrata wa hakuhĩ na Ngai. Tũngĩka ũguo atĩa?

Rĩrĩa twathĩkĩra maathani ma Jehova na motaaro make, tuonanagia atĩ nĩ tũmwĩhokete na atĩ nĩ twendaga gũkorũo na ũrata wa hakuhĩ hamwe nake. (Jer. 17:7, 8; Jak. 2:22, 23) Tweka ũguo nĩ atũkuhagĩrĩria na agatũma tũkorũo na thayũ wa ngoro. Isaia 32:17 yugaga: “Na rĩrĩ, ũndũ ũrĩa ũkoimana na ũthingu ũcio nĩ thayũ mũtheri, o namo maũndũ marĩa makoneka moimanĩte naguo nĩ atĩ andũ matũũre mahoreire gũtarĩ ũgwati tene na tene.” Tũngĩathĩkĩra Jehova kuuma ngoro no tũgĩe na thayũ wa ma.—Isa. 48:18, 19.

Ningĩ roho mũtheru, ũrĩa nĩ kĩheo kĩa mwanya kuuma kũrĩ Ithe witũ wa igũrũ nĩ ũtũteithagia kũgĩa na thayũ wa gũtũũra.—Atũm. 9:31.

Mũtũmwo Paulo agwetete thayũ ũrĩ wa gatatũ harĩ “maciaro ma roho.” (Gal. 5:22, 23) Tondũ thayũ wa ma umanaga na roho wa Ngai, no mũhaka twĩtĩkĩre gũtongorio nĩ roho ũcio nĩgetha tũgĩe na thayũ. Reke tuone njĩra igĩrĩ iria kũgerera cio roho mũtheru ũngĩtũteithia kũgĩa na thayũ.

 Wa mbere, gũthomaga Kiugo kĩa Ngai kaingĩ nĩ gũtũteithagia kũgĩa na thayũ. (Thab. 1:2, 3) Hĩndĩ ĩrĩa tũrecũrania ndũmĩrĩri ya Bibilia, roho wa Ngai nĩ ũtũteithagia gũtaũkĩrũo nĩ mwĩcirĩrie wa Ngai maũndũ-inĩ maingĩ. Kwa ngerekano, nĩ tuonaga ũrĩa aikaraga na thayũ na nĩkĩ thayũ nĩ wa bata mũno harĩ we. Rĩrĩa tweruta maũndũ ta macio kuuma Kiugo-inĩ kĩa Ngai na tũkamahũthĩra mũtũũrĩre-inĩ witũ, nĩ tũgĩaga na thayũ mũingĩ.—Thim. 3:1, 2.

Wa kerĩ, no mũhaka tũhoe Ngai atũhe roho mũtheru. (Luk. 11:13) Jehova oigĩte atĩ tũngĩmũhoya ũteithio, “thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro [citũ] na meciria [maitũ] kũgerera Kristo Jesu.” (Afil. 4:6, 7) Tũngĩhoyaga Jehova kaingĩ na tũkamũũria atũhe roho wake, nĩ arĩtũmaga ngoro citũ igĩe na thayũ mũingĩ ũrĩa wonagwo nĩ andũ arĩa tu makoragwo marĩ arata ake.—Rom. 15:13.

Andũ amwe mahũthĩrĩte atĩa ũtaaro ũcio wa Kĩĩmaandĩko na mageka mogarũrũku marĩa mamateithĩtie kũgĩa na thayũ wa gũtũũra hamwe na Jehova, o ene, na andũ arĩa angĩ?

Thĩinĩ wa kĩũngano gĩa Gĩkristiano kũrĩ na andũ maarĩ a “marakara” hĩndĩ ĩmwe, no rĩu rĩrĩa marahiũrania na arĩa angĩ nĩ mambaga gwĩciria, nĩ atugi, nĩ akirĩrĩria, na nĩ mathingataga thayũ. * (Thim. 29:22) Ta rora ũma wa ũndũ ũcio tũgĩĩciria ũhoro wa mũrũ na mwarĩ wa Ithe witũ arĩa maateithirio gũtooria marakara na kũmenya gũikaranagia na andũ arĩa angĩ na thayũ.

Mwerekera mũũru wa David nĩ watũmaga aarie na njĩra ĩtagĩrĩire. Ataneyamũrĩra Ngai, kaingĩ nĩ aarutaga andũ arĩa angĩ mahĩtia na akaarĩria andũ a famĩlĩ ũũru. David nĩ onire atĩ nĩ aabataraga gũcenjia nĩguo atuĩke mũndũ wa thayũ. Eekire atĩa nĩguo atuĩke mũndũ wa thayũ? Oigire ũũ: “Nĩ ndaambĩrĩirie kũhũthĩra motaaro ma Bibilia, na nĩ ũndũ ũcio gĩtĩo gatagatĩ gakwa na andũ arĩa angĩ thĩinĩ wa famĩlĩ gĩkĩongerereka.”

Ũrĩa Rachel aarerirũo nĩ wahutirie mwerekera wake. Oigire ũũ: “O na rĩu no ndũaga na  marakara tondũ ndaarereirũo thĩinĩ wa famĩlĩ ya andũ maarakaraga kaingĩ.” Nĩ kĩĩ kĩmũteithĩtie gũtuĩka mũndũ wa thayũ? Oigire: “Hoyaga Jehova kaingĩ ngamwĩra andeithie.”

David na Rachel no ngerekano igĩrĩ tu cia kuonania atĩ rĩrĩa twahũthĩra motaaro ma Bibilia na twahoya Ngai atũhe roho wake ũtũteithie, nĩ tũgĩaga na thayũ. Ũrĩa kũrĩ nĩ atĩ, o na angĩkorũo tũraikara thĩinĩ wa thĩ njũru, no tũkorũo na thayũ wa ngoro ũrĩa ũtũmaga tũkorũo na ũiguano thĩinĩ wa famĩlĩ, na Akristiano arĩa angĩ. Makĩria ma ũguo, Jehova atwĩraga ‘tũkoragwo na thayũ hamwe na andũ othe.’ (Rom. 12:18) Hihi ũndũ ũcio no ũhoteke? Na nĩ ũguni ũrĩkũ uumanaga na kĩyo gitũ gĩa gũcaria thayũ?

Hĩndĩ ĩrĩa tũrahunjia, tũkoragwo tũkĩhe andũ mweke wa kũgunĩka kuumana na ndũmĩrĩri ya thayũ ĩgiĩ Ũthamaki wa Ngai. (Isa. 9:6, 7; Mat. 24:14) Nĩ gĩkeno kuona atĩ aingĩ nĩ moete makinya marĩa magĩrĩire. Nĩ ũndũ ũcio, rĩu matitooragio nĩ gũkua ngoro kana kũrakara nĩ ũndũ wa maũndũ marĩa marahaanĩka. Handũ ha ũguo, makoragwo na mwĩhoko mũrũmu wa ihinda rĩũkĩte na nĩ ‘macaragia thayũ, o nginya kũũthingata.’—Thab. 34:14.

O na kũrĩ ũguo, ti andũ aingĩ makenagio nĩ ndũmĩrĩri itũ, na makĩria tũkĩambĩrĩria kũmahunjĩria. (Joh. 3:19) No roho wa Ngai nĩ ũtũteithagĩrĩria kũmahe ũhoro ũrĩa mwega tũrĩ na thayũ na gĩtĩo. Tũgĩka ũguo tũkoragwo tũkĩrũmĩrĩra ũtaaro wa Jesu wĩgiĩ ũtungata ũrĩa ũrĩ thĩinĩ wa Mathayo 10:11-13, harĩa oigire: “Mwaingĩra nyũmba, geithiai ene kuo. Angĩkorũo nyũmba ĩyo nĩ yagĩrĩire, rekei thayũ wanyu ũgĩe harĩ yo, no angĩkorũo ndĩagĩrĩire, rekei thayũ wanyu ũmũcokerere.” Rĩrĩa twarũmĩrĩra ũtaaro wa Jesu, nĩ tũrĩtigagwo na thayũ na hagakorũo na ũhotekeku wa gũkaahunjĩria mũndũ ũcio hĩndĩ ĩngĩ.

Ningĩ nĩ tũthondekaga thayũ hĩndĩ ĩrĩa tũkwarĩria aruti wĩra a thirikari na gĩtĩo, nginya arĩa matakenagio nĩ wĩra witũ. Kwa ngerekano, thirikari ya bũrũri ũmwe wĩ thĩinĩ wa Afrika nĩ yathutũkanagia Aira a Jehova, ũndũ ũrĩa watũmaga ĩrege kũmahe marũa ma kũmetĩkĩria gwaka Nyũmba cia Ũthamaki. Nĩguo ũndũ ũcio wetherũo kĩhonia na njĩra ya thayũ, mũrũ wa Ithe witũ ũmwe watungatĩte arĩ mũmishonarĩ bũrũri-inĩ ũcio, nĩ aatũmirũo London, England akaarie na barũthi wa bũrũri ũcio. Eerĩtwo ataarĩrie barũthi ũcio ũrĩa Aira a Jehova marutaga wĩra wao na thayũ bũrũri-inĩ ũcio wa Afrika. Gwathiire atĩa?

Aataarĩirie ũũ: “Rĩrĩa ndakinyire wabici-inĩ yake, mwĩhumbĩre wa mũndũ ũrĩa wanyitire ũgeni nĩ watũmire ndĩcirie oimĩte kũndũ ndoĩ rũthiomi rwa kuo. Nĩ ũndũ ũcio ngĩmũgeithia na ngeithi cia kwao. Nĩ aamakire mũno na akĩnjũria, ‘Ũkwenda ngũteithie atĩa?’ Ngĩmwĩra na gĩtĩo atĩ ndĩrenda kuona barũthi. Nĩ aamũhũrĩire thimũ, na rĩrĩa okire aangeithirie na rũthiomi rwa kwao. Aacokire agĩthikĩrĩria na kinyi ngĩmũtaarĩria ũrĩa Aira a Jehova mekaga maũndũ mao marĩ na thayũ.”

Nĩ ũndũ wa mũrũ wa Ithe witũ ũcio gũtaarĩria maũndũ arĩ na gĩtĩo, barũthi ũcio nĩ aathereirũo nĩ maũndũ maingĩ megiĩ wĩra witũ na rũmena rwake gũtwerekera rũkĩnyihanyiha. Thutha wa ihinda, thirikari ya bũrũri ũcio wa Afrika nĩ yetĩkĩririe Aira a Jehova gwaka. Ũndũ ũcio nĩ watũmire ariũ a Ithe witũ makene mũno. Hatarĩ nganja, kũhe andũ arĩa angĩ gĩtĩo nĩ kũrĩ moimĩrĩro maingĩ mega, na nĩ nginya thayũ.

Mahinda maya andũ a Jehova nĩ makenagĩra paradiso ya kĩĩroho ĩiyũirũo nĩ thayũ. No ũtũme thayũ ũcio wongerereke o na makĩria ũngĩthiĩ na mbere gũkũria ngumo ĩno ũtũũro-inĩ waku, ĩrĩa nĩ ĩmwe ya maciaro ma roho. Ũndũ ũrĩa wa bata makĩria, nĩ ũgwĩtĩkĩrĩka nĩ Jehova na nĩ ũkaagĩa na thayũ mũingĩ tene na tene thĩinĩ wa thĩ njerũ.—2 Pet. 3:13, 14.