MŨRŨ WA ITHE WITŨ ũmwe wĩtagwo Allen * oigire ũũ: “Nĩ ndaiguaga guoya ndeciria atĩ nĩ ingĩathamĩire gũkũ. Ndionaga ta ingĩahotire kũgĩa na arata kana njĩtĩkĩrĩke.” Allen arĩ kĩũngano-inĩ kĩerũ kĩrĩa kĩrĩ makĩria ma kilomita 1,400 kuuma kwao mũciĩ.

Angĩkorũo nĩ ũthamĩire kĩũngano-inĩ kĩngĩ, no gũkorũo o nawe nĩ ũraigua guoya. Ũngĩka atĩa nĩguo ũigue ũiganĩire? Angĩkorũo nĩ ũraritũhĩrũo nĩ gwĩka ũguo-rĩ, ũngĩka atĩa? Ningĩ angĩkorũo ndũrathama-rĩ, ũngĩka atĩ nĩguo ũteithĩrĩrie arĩa mathamĩte maigue maiganĩire?

Ta wĩcirie ũhoro wa ngerekano ĩno: Mĩtĩ ĩngĩmunywo ĩcoke ĩthiĩ ĩhandwo handũ hangĩ, ndĩthiaga na mbere ta ũrĩa ĩramenyerete. Hĩndĩ ĩrĩa mũtĩ ũramũnywo, kaingĩ mĩri ĩrĩa mĩingĩ nĩ itinagio nĩguo ũhote gũkuuĩka na njĩra hũthũ. Mũtĩ ũcio wahandwo handũ hangĩ, no mũhaka wambĩrĩrie kũruta mĩri ĩngĩ o na ihenya. O ũndũ ũmwe na ũcio, gũthamĩra kĩũngano-inĩ kĩngĩ no gũkorũo nĩ gũtũmĩte wage gũthiĩ na mbere ta ũrĩa ũramenyerete. Kĩũngano-inĩ kĩrĩa ũroimire ũrarĩ na “mĩri” tondũ nĩ ũrakenagĩra gũkorũo na arata na mũbango mwega wa maũndũ ma kĩĩroho. Rĩu no mũhaka ũrute mĩri ĩngĩ nĩguo ũthiĩ na mbere thĩinĩ wa kĩũngano kĩu kĩerũ. Nĩ kĩĩ kĩngĩgũteithia gwĩka ũguo? Nĩ kũrũmĩrĩra motaaro ma Bibilia. Ta reke tũrore mamwe mamo.

Mũndũ ũrĩa ũthomaga Kiugo kĩa Ngai o mũthenya ahaana “ta mũtĩ wahandirũo mĩtaro-inĩ ya maĩ, ũciaraga maciaro maguo hingo yamo yakinya, mathangũ maguo namo matihohaga; nake, ũndũ o wothe egwĩka, nĩũgaacagĩra.”—Thab. 1:1-3.

O ta ũrĩa mũtĩ ũbataraga kũgucia maĩ hĩndĩ ciothe nĩguo ũikare ũrĩ mũruru, no mũhaka Mũkristiano erute Kiugo kĩa Ngai hĩndĩ ciothe nĩguo ũrata wake na Ngai ũikare ũrĩ mũrũmu. Nĩ ũndũ ũcio, thiĩ na mbere gũthomaga Bibilia o mũthenya, na ũthiage mĩcemanio ũtegũtĩrĩria. Thiĩ na mbere gũkorũo na ũthathaiya wa famĩlĩ na wĩrutage o ta ũrĩa ũramenyerete. Ũrĩ kĩũngano-inĩ kĩerũ, no mũhaka ũthiĩ na mbere gwĩka maũndũ marĩa mothe maratũmaga ũgĩe na hinya kĩĩroho.

“Ũrĩa ũkundanagia maĩ, we nake no arĩkundagio.”—Thim. 11:25.

Werutĩra biũ ũtungata-inĩ, nĩ ũkũgĩa na hinya na ũhote kũigua ũiganĩire o na ihenya. Mũthuri ũmwe wa kĩũngano wĩtagwo Kevin oigire ũũ: “Kĩrĩa gĩatũteithirie mũno tũrĩ na mũtumia wakwa nĩ gũtuĩka mapainia a gũteithĩrĩria ihinda inini thutha wa gũthama. Nĩ twamenyire gĩcigo gĩa kũhunjia na ihenya, na tũkĩmenyana na aarĩ na ariũ a Ithe witũ o hamwe na mapainia.” Nake Roger ũrĩa wathamĩire makĩria ma kilomita 1,600 kuuma kũrĩa aaikaraga, oigire ũũ: “Njĩra ĩrĩa njega ya kũmenyera kĩũngano kĩerũ nĩ gũthiaga ũtungata kaingĩ o ũrĩa kũngĩhoteka. Ningĩ, menyithia athuri atĩ no ũteithĩrĩrie handũ o hothe, rĩngĩ ta gũthambia Nyũmba ya Ũthamaki, kwĩrutĩra tũcunjĩ twa mũcemanio, kana gũkuua andũ na ngari yaku mũgĩthiĩ mĩcemanio. Rĩrĩa aarĩ na ariũ a Ithe witũ mona mũndũ mũgeni akĩĩrutĩra kĩũngano-inĩ, nĩ marĩmũtuaga mũrata wao na njĩra hũthũ.”

“Hingũrai ngoro cianyu biũ.”—2 Kor. 6:13.

 Andandũra wendo waku kwerekera aarĩ na ariũ a Ithe witũ. Thutha wa Melissa na famĩlĩ yake gũthamĩra kĩũngano-inĩ kĩngĩ, nĩ meekĩrĩire mũno gũcaria arata angĩ. Oigire ũũ: “Nĩ twanyitanagĩra nao Nyũmba-inĩ ya Ũthamaki mbere na thutha wa mĩcemanio. Ũndũ ũcio nĩ watũheaga ihinda rĩa kwaranĩria gũkĩra o kũmageithia tu.” Ũndũ ũcio ningĩ nĩ wateithirie famĩlĩ ĩyo kũmenya marĩĩtwa ma andũ na ihenya. Makĩria ma ũguo, nĩ maanyitaga andũ ũgeni, na ũndũ ũcio ũgĩkĩra ũrata wao hinya. Aacokire akiuga ũũ: “Nĩ twaheanire namba cia thimũ nĩguo tũhote gũkinyĩrĩka na kũmenyithio maũndũ ma kĩũngano o hamwe na maũndũ mangĩ.”

Angĩkorũo nĩ ũrona arĩ ũndũ mũritũ kwaranĩria na andũ ageni, no wambĩrĩrie na tũũndũ tũrĩa tũnini. Kwa ngerekano, onania ũrĩ mũcanjamũku o na akorũo ndũraigua gwĩka ũguo. Gũcanjamũka nĩ gũgũtũma arĩa angĩ magucĩrĩrio nĩwe. Hatarĩ nganja, “gĩthiithi gĩcanjamũku nĩgĩkenagia ngoro.” (Thim. 15:30, The Holy Bible in Gĩkũyũ) Rachel ũrĩa wathamĩire kũndũ kũraihu na kũrĩa aarereirũo, oigire ũũ: “Ngoragwo na thoni nyingĩ. No rĩmwe nĩ nyonaga no mũhaka njarĩrie aarĩ na ariũ a Ithe witũ kĩũngano-inĩ. Ngeragia kũrora mũndũ ũrĩa ũikarĩte wiki thĩinĩ wa Nyũmba ya Ũthamaki. Amwe nĩ makoragwo na thoni ta niĩ.” Na githĩ to wĩigĩre muoroto wa kwaria na andũ ngũrani mbere na thutha wa mĩcemanio?

Ningĩ ciumia cigana ũna cia mbere no ũkenere gũcemania na andũ ũtaroĩ. No “ũgeni” ũcio no ũthire o ũrĩa mahinda marathiĩ. Ihinda-inĩ ta rĩu no ũbatare gwĩkĩra kĩyo nĩguo ũthiĩ na mbere gũcaria arata.

Mĩtĩ ĩmwe nĩ yoyaga ihinda iraihu gũkũra handũ hageni gũkĩra ĩrĩa ĩngĩ. O ũndũ ũmwe na ũcio, andũ nĩ matiganĩte harĩ ihinda rĩrĩa moyaga nĩguo maigue maiganĩire marĩ kĩũngano kĩerũ. Angĩkorũo wathamĩire kĩũngano kĩerũ tene na no ũraigua ũtaiganĩire, kũhũthĩra motaaro maya ma Bibilia no gũgũteithie:

“Tũtikananogio nĩ gwĩkaga wega, nĩ gũkorũo nĩ tũkaagetha hĩndĩ ĩrĩa yagĩrĩire twaga kũnoga.”—Gal. 6:9.

Wĩhe ihinda inene rĩa gwĩka mogarũrũku gũkĩra rĩrĩa ũrehete. Kwa ngerekano, amishonarĩ aingĩ arĩa mathiĩte Gileadi nĩ matungataga mĩaka mĩingĩ kũrĩa maatũmwo matarĩ marathiĩ kwao gũceera. Gwĩka ũguo nĩ kũmateithagia kũgĩa na ũrata na aarĩ na ariũ a Ithe witũ bũrũri-inĩ ũrĩa marĩ na makahota kwĩruta ũndũire ũtiganĩte.

Alejandro ũrĩa ũthamĩte maita maigana ũna nĩ amenyete atĩ gwĩka mogarũrũku ti ũndũ mũhũthũ. Oigire ũũ: “Twathama rita rĩa mũico mũtumia wakwa oigire, ‘Arata akwa othe marĩ kĩũngano kĩrĩa tũroimire.’” Nĩ aamũririkanirie atĩ ciugo icio nocio oigĩte mathama mĩaka ĩrĩ mbere ĩyo. No mĩaka-inĩ ĩyo ĩĩrĩ, nĩ aagucĩrĩirio nĩ andũ angĩ na magĩtuĩka arata a hakuhĩ.

“Tigaga kuuga atĩrĩ, Nĩ kĩ gĩatũmire matukũ ma tene maagĩre gũkĩra matukũ maya? Nĩ ũndũ ha ũhoro ũcio, ndũrĩ na ũũgĩ ũkĩũũria.”—Koh. 7:10.

Wĩtheme kũringithania kĩũngano kĩrĩa ũthamĩire na kĩrĩa ũroimĩte. Kwa ngerekano, aarĩ na ariũ a Ithe witũ kũrĩa ũthamĩire no makorũo matarĩ aaria kana makorũo nĩ maragia mũno gũkĩra ũrĩa ũmenyerete. Roraga maũndũ mao mega o ta ũrĩa ũngĩenda mone maku. Andũ amwe arĩa mathamĩire kũndũ kũngĩ nĩ maamakire nĩ kuona atĩ gũthama  kwao nĩ gwatũmire meyũrie, ‘Hihi niĩ nĩ nyendete “thiritũ yothe ya ariũ a Ithe witũ”?’—1 Pet. 2:17.

“Thiĩi na mbere kũhoya, na nĩ mũkũheo.”—Luk. 11:9.

Thiĩ na mbere kũhoya Ngai agũteithie. Mũthuri ũmwe wa kĩũngano wĩtagwo David oigire ũũ: “Ndũkagerie kũhiũrania na ũndũ ũcio ũrĩ wiki. Nĩ kũrĩ maũndũ maingĩ tũtangĩhota gwĩka tũtarĩ na ũteithio wa Jehova. Hoyaga nĩ ũndũ wamo.” Rachel ũrĩa ũkũgwetetwo hau kabere nĩ eetĩkanirie na ũndũ ũcio. Oigire ũũ: “Tũrĩ na mũthuri wakwa tũngĩigua ta tũtarakenio nĩ kĩũngano kĩrĩa tũthamĩire, tũhoyaga Jehova tũkamwĩra, ‘Twagũthaitha ũreke tũmenye angĩkorũo nĩ harĩ ũndũ tũreka ũgatũma arĩa angĩ maage kũgucĩrĩrio nĩ ithuĩ.’ Tũcokaga tũkageria kũhũthĩra mahinda maingĩ na aarĩ na ariũ a Ithe witũ.”

Aciari, angĩkorũo ciana cianyu itiraigua ciganĩire, hoyai nacio igũrũ rĩgiĩ ũndũ ũcio. Bangai mahinda ma kũnyitanagĩra na andũ arĩa angĩ nĩguo mũciteithie gũcaria arata angĩ.

Ũngĩka atĩa nĩguo ũteithie andũ arĩa mathamĩire kĩũngano-inĩ kĩanyu? Wĩrutanĩrie gũtuĩka mũrata wa ma kuuma o kĩambĩrĩria. Nĩguo wĩke ũguo, geria gwĩciria nĩ maũndũ marĩkũ ũngĩkenera wĩ kĩũngano-inĩ kĩerũ, ũcoke ũmeke. (Mat. 7:12) Hihi no ũnyite ũgeni arĩa mathamĩire kĩũngano-inĩ kĩanyu nĩguo mũkorũo nao ũthathaiya-inĩ wanyu wa famĩlĩ kana mwĩrorere hamwe programu ya o mweri ya JW Broadcasting? Hihi no mũhunjie hamwe nao? Ũngĩmanyita ũgeni mũrĩanĩre kĩndũ kĩnini, no matũũre maririkanaga ũtana waku. Nĩ atĩa ũngĩ ũngĩka nĩguo ũteithie andũ ta acio?

Carlos oigire ũũ: “Rĩrĩa twathamĩire kĩũngano-inĩ kĩngĩ, nĩ harĩ mwarĩ wa Ithe witũ watũheire marĩĩtwa ma nduka iria ciendagia indo raithi, na ũndũ ũcio nĩ watũteithirie mũno.” Andũ arĩa moimĩte kũndũ kũngĩ no makene kũmenya ũrĩa rĩera rĩa kwanyu rĩhaana nĩguo mamenye nguo iria magĩrĩirũo nĩ gwĩkĩra. Ningĩ nĩguo magĩe na moimĩrĩro mega ũtungata-inĩ, no ũmataarĩrie ũrĩa andũ a gĩcigo kĩanyu gĩa kũhunjia mahaana kana ũmataarĩrie maũndũ marĩa metĩkĩtie.

Allen ũrĩa ũkũgwetetwo kĩambĩrĩria-inĩ gĩa gĩcunjĩ gĩkĩ rĩu nĩ aninĩte mwaka ũmwe kuuma athamĩra kĩũngano kĩngĩ. Oigire ũũ: “Mbere-inĩ nĩ ndabataraga kĩyo kĩingĩ nĩguo menyane na aarĩ na ariũ a Ithe witũ. No rĩu nyonaga tũrĩ famĩlĩ na ndĩ na gĩkeno.” Allen nĩ aamenyire atĩ gũthama gũtiatũmire orũo nĩ arata. Handũ ha ũguo, nĩ agĩire na arata angĩ, na no kũhoteke matũũre marĩ arata.