1-3. (a) Twagĩrĩirũo gũkorũo na mawoni marĩkũ kwerekera ũhoro wa ma? Heana ngerekano. (Rora mbica kĩambĩrĩria-inĩ gĩa gĩcunjĩ gĩkĩ.) (b) Tũkwarĩrĩria ciũria irĩkũ gĩcunjĩ-inĩ gĩkĩ?

KAINGĨ andũ nĩ macokagia kĩndũ nduka-inĩ thutha wa gũkĩgũra. Ũthuthuria wonanĩtie atĩ mabũrũri-inĩ mamwe andũ nĩ macokagia gĩcunjĩ gĩa kenda harĩ igana kĩa indo thutha wa gũcigũra. Gĩcunjĩ kĩa mĩrongo ĩtatũ harĩ igana kĩa indo iria igũragwo kũgerera Intaneti nĩ icokagio. No kũhoteke agũri makoraga atĩ kĩndũ kĩu gĩtinahingia muoroto wakĩo, nĩ gĩthũku, kana o na hihi gĩkaga kũmakenia. Kwoguo magagĩcokia nĩguo macenjanĩrio na kĩngĩ kana makoiga macokerio mbeca.

² O na gũtuĩka no tuuge tũcokerio mbeca cia indo iria tũgũrĩte, tũtingĩenda gũcokia, kana ‘kwendia,’ “ũmenyo mũkinyanĩru” wa ma cia Bibilia iria ‘tũgũrĩte.’ (Thoma Thimo 23:23, NWT; 1 Tim. 2:4) O ta ũrĩa tuonire gĩcunjĩ-inĩ kĩu kĩngĩ, twabatarire kũhũthĩra ihinda rĩingĩ nĩguo tũgĩe na ũhoro wa ma. Makĩria ma ũguo, nĩguo tũgũre ũhoro wa ma, no kũhoteke nĩ tweimire kũgĩa na wĩra mwega, tũgĩka mogarũrũku ũhoro-inĩ wĩgiĩ arata na andũ a famĩlĩ, tũgĩcenjia mwĩcirĩrie na mĩthiĩre itũ, na tũgĩtigana na mĩtugo na ũndũire ũtakenagia Ngai. O na kũrĩ ũguo, thogora  ũrĩa twarĩhire nĩ mũnini ũkĩringithanio na irathimo iria tũgĩte nacio.

³ Ũhoro wĩgiĩ kwĩgĩĩra na ma cia Bibilia no ũringithanio na wa mũndũ ũmwe Jesu aagwetire thĩinĩ wa ngerekano ĩmwe nguhĩ. Jesu akĩonania ũrĩa ma ĩgiĩ Ũthamaki wa Ngai ĩrĩ ya goro harĩ arĩa mamĩonete, nĩ aaheanire ngerekano ya mũhũũri biacara wagendaga ũrĩa wacaragia ruru cia goro na akĩona ĩmwe. Ruru ĩyo yarĩ ya goro mũno nginya ‘akĩendia na ihenya’ indo ciake ciothe nĩguo amĩgũre. (Mat. 13:45, 46) Na njĩra o ta ĩyo ũhoro wa ma ũrĩa tuonire, ta ũhoro wa ma wĩgiĩ Ũthamaki wa Ngai na ma icio ingĩ cia goro iria twerutire kuuma Kiugo-inĩ kĩa Ngai, nĩ cia goro mũno ũũ atĩ nĩ tweimire twĩyendeire maũndũ marĩa maabataranagia nĩguo twĩgĩĩre ũhoro ũcio. Tũngĩthiĩ na mbere kuona ũhoro wa ma ũrĩ wa goro mũno, tũtirĩ hĩndĩ ‘tũkawendia.’ No ũndũ wa kĩeha nĩ atĩ, ndungata imwe cia Ngai nĩ itigĩte kuona bata wa ũhoro wa ma ũrĩa meerutire, na amwe nginya nĩ mawendetie. Rekei tũtikaneke ũndũ ta ũcio! Nĩguo tuonanie atĩ nĩ tuonaga ũhoro wa ma ũrĩ wa bata na atĩ tũtingĩwendia, nĩ twagĩrĩirũo gwathĩkĩra ũtaaro wa Bibilia wa ‘gũthiĩ na mbere kũrũmĩrĩra ũhoro ũrĩa wa ma.’ (Thoma 3 Johana 2-4.) Tuonanagia atĩ nĩ tũrarũmĩrĩra ũhoro wa ma na njĩra ya kũũiga mbere ũtũũro-inĩ witũ na gũkorũo na mĩtugo ĩringaine naguo. Rekei twarĩrĩrie ciũria ici: Nĩkĩ na nĩ na njĩra ĩrĩkũ mũndũ ‘angĩendia’ ũhoro wa ma? Tũngĩĩthema atĩa gwĩka ihĩtia ta rĩu? Nĩ na njĩra ĩrĩkũ tũngĩkĩra hinya itua ritũ rĩa ‘gũthiĩ na mbere kũrũmĩrĩra ũhoro wa ma’?

4. Nĩ kĩĩ gĩatũmire andũ amwe ‘mendie’ ũhoro wa ma karine-inĩ ya mbere?

⁴ Thĩinĩ wa karine ya mbere, andũ amwe arĩa hau kabere maakenagio nĩ morutani ma Jesu nĩ maatigire kũrũmĩrĩra ũhoro wa ma. Kwa ngerekano-rĩ, thutha wa kĩrĩndĩ kĩnene kũheo irio na njĩra ya kĩama nĩ Jesu, kĩrĩndĩ kĩu nĩ kĩamũrũmĩrĩire nginya mwena ũcio ũngĩ wa Iria rĩa Galili. Marĩ kũu, Jesu nĩ ooigire ciugo ici, iria ciamamakirie: “Mũngĩaga kũrĩa mwĩrĩ wa Mũrũ wa mũndũ na kũnyua thakame yake, mũtingĩgĩa na muoyo thĩinĩ wanyu.” Handũ ha kwĩra Jesu amataarĩrie, nĩ maahĩngĩkire nĩ ciugo icio na makĩũria ũũ: “Ũhoro ũcio nĩ wa kũmakania; nũ ũngĩũthikĩrĩria?” Nĩ ũndũ ũcio, “arutwo ake aingĩ makĩmũtiganĩria magĩcokerera maũndũ marĩa maatigĩte na matiatwaranire nake rĩngĩ.”—Joh. 6:53-66.

5, 6. (a) Andũ amwe matigĩte kũrũmia ũhoro wa ma nĩkĩ? (b) Nĩ na njĩra ĩrĩkũ mũndũ angĩtigana na ũhoro wa ma o kahora?

⁵ Ũndũ wa kĩeha nĩ atĩ andũ amwe ũmũthĩ nĩ matigĩte kũrũmia ũhoro wa ma. Amwe maahĩngirũo nĩ ũtaũku mwerũ wĩgiĩ gĩcunjĩ kĩna kĩa Bibilia kana makĩhĩngwo nĩ ũndũ woigirũo kana ũgĩkwo nĩ mũrũ wa Ithe witũ ũheetwo gĩtĩo. Angĩ maarakaririo nĩ ũtaaro maaheirũo wa Kĩĩmaandĩko, kana magĩtiga ũhoro wa ma nĩ ũndũ wa kwaga kũiguithania na Mũkristiano ũngĩ. Nao angĩ makĩnyitanĩra na aregenyũki na aregani angĩ arĩa makararagia ũhoro wa ma. Na njĩra ĩyo amwe makĩambĩrĩria “kwĩyeheria kuuma” harĩ Jehova na kĩũngano. (Ahib. 3:12-14) Na githĩ ndũngĩarĩ ũndũ mwega korũo nĩ maatũũririe wĩtĩkio wao na mwĩhoko harĩ Jesu, ta ũrĩa mũtũmwo Petero eekire? Rĩrĩa Jesu ooririe atũmwo kana nĩ mekwenda gũthiĩ, o rĩo Petero ooigire: “Mwathani, tũgũgĩthiĩ kũrĩ ũ? Wee ũrĩ na ciugo cia muoyo wa tene na tene.”—Joh. 6:67-69.

⁶ Angĩ nao matigĩte ũhoro wa ma kahora kahora o na hihi matekũmenya ũndũ ũcio ũgĩkĩka. Mũndũ ũtiganaga na ũhoro wa ma o kahora no ahaananio na gatarũ karĩa kahurutagwo gakehera rũteere-inĩ o kahora.  Bibilia ĩtũheaga mũkaana twĩmenyagĩrĩre “tũtikanoime njĩra-inĩ.” (Ahib. 2:1) Mũndũ ũrĩa wĩyeheragia agatigana na ũhoro wa ma, nĩ ngũrani na ũrĩa uumaga njĩra-inĩ ya ũhoro wa ma atekũmenya. O na kũrĩ ũguo, mũndũ ũcio uumaga njĩra-inĩ ya ũhoro wa ma atekũmenya, akoragwo aingĩrĩtie ũrata wake hamwe na Jehova ũgwati-inĩ na no orũo nĩguo. Tũngĩka atĩa nĩguo ũndũ ũcio ndũkahaanĩke harĩ ithuĩ?

7. Nĩ ũndũ ũrĩkũ ũngĩtũteithia gwĩthema kwendia ũhoro wa ma?

⁷ Nĩguo tũthiĩ na mbere kũrũmia ũhoro wa ma, no mũhaka twĩtĩkĩre na twathĩkĩre maũndũ mothe marĩa Jehova oigĩte. No mũhaka tũige ũhoro wa ma mbere ũtũũro-inĩ na tũtũũre kũringana na motaaro ma Bibilia. Mũthamaki Daudi eerire Jehova ũũ: “Niĩ ndĩrĩrũmagĩrĩra ũhoro waku wa ma.” (Thab. 86:11, NWT) Daudi nĩ aatuĩte itua. O na ithuĩ tũbatiĩ gũkorũo twĩhotorete gũthiĩ na mbere kũrũmĩrĩra ũhoro wa ma wa Ngai. Tũngĩaga gwĩka ũguo, no twambĩrĩrie gwĩciria ũhoro wa maũndũ marĩa twatigire nĩguo tũgũre ũhoro wa ma na twambĩrĩrie gũcokerera mamwe mamo. Handũ ha ũguo twagĩrĩirũo kũrũmia ũhoro wa ma biũ. Tũtiagĩrĩirũo gũthuura ũhoro wa ma ũrĩa tũgwĩtĩkĩra na ũrĩa tũtegũtindanĩra naguo. Twagĩrĩirũo kũrũmĩrĩra “ma yothe.” (Joh. 16:13) Rekei twĩcirie ũhoro wa maũndũ matano tweimire nĩguo tũgũre ũhoro wa ma. Gwĩka ũguo nĩ gũgwĩkĩra hinya itua ritũ rĩa kwaga gũcokerera maũndũ marĩa twatigire.—Mat. 6:19.

8. Kwaga kũhũthĩra mahinda na njĩra njega kũngĩtũma Mũkristiano ehere njĩra-inĩ ya ma atĩa? Heana ngerekano.

⁸ Mahinda. Nĩguo twĩtheme kwehera ũhoro-inĩ wa ma, no mũhaka tũhũthagĩre mahinda maitũ na njĩra njega. Tũngĩaga kwĩmenyerera no twambĩrĩrie kũhũthagĩra mahinda maingĩ mũno maũndũ-inĩ ma gwĩkenia, gwĩka maũndũ marĩa twendete, kũhũthĩra Intaneti, kana kwĩrorera TV. O na gũtuĩka maũndũ macio mo mene ti moru, no twĩkore tũkĩhũthĩra mahinda harĩ mo, mahinda marĩa mbere ĩyo tũrahũthagĩra wĩruti-inĩ witũ kĩũmbe kana maũndũ-inĩ mangĩ ma kĩĩroho. Ta wĩcirie ũrĩa gwathiire harĩ mwarĩ wa Ithe witũ Emma. * Kuuma arĩ mũnini nĩ eendete mbarathi mũno. Rĩrĩa rĩothe ona mweke nĩ aathiaga gũtwarithia mbarathi. Thutha wa ihinda akĩambĩrĩria gũthumbũka nĩ ũndũ wa mahinda marĩa mothe aahũthagĩra ũndũ-inĩ ũcio. Nĩ eekire mogarũrũku na mũthia-inĩ akĩhota kũiga maũndũ ma gwĩkenia harĩa magĩrĩire. Ningĩ nĩ eekĩrirũo ngoro nĩ kĩonereria kĩa mwarĩ wa Ithe witũ Cory Wells, ũrĩa mbere ĩyo wathaakaga mathako ma mbarathi. * Emma rĩu nĩ akenagĩra kũhũthĩra mahinda maingĩ maũndũ-inĩ ma kĩĩroho na gũkorũo hamwe na aarĩ na ariũ a Ithe witũ na arata. Aiguaga akuhĩrĩirie Jehova makĩria na arĩ na thayũ nĩ ũndũ wa kũmenya atĩ arahũthĩra mahinda na njĩra njega.

9. Gũthingata indo cia kĩĩmwĩrĩ kũngĩtũma amwe matigane na maũndũ ma kĩĩroho atĩa?

⁹ Indo cia Kĩĩmwĩrĩ. Nĩ twagĩrĩirũo kũiga indo cia kĩĩmwĩrĩ harĩa ciagĩrĩire nĩguo tũthiĩ na mbere ũhoro-inĩ wa ma. Rĩrĩa twerutire ũhoro wa ma, maũndũ ma kĩĩroho nĩmo twaigire mbere ya maũndũ ma kĩĩmwĩrĩ. Nĩ twehaarĩirie kwĩima maũndũ ma kĩĩmwĩrĩ nĩgetha tũrũmĩrĩre ũhoro wa ma. O na kũrĩ ũguo, thutha wa ihinda no tuone arĩa angĩ makĩgũra indo cia kĩĩrĩu kana magĩkenera indo ingĩ cia kĩĩmwĩrĩ, na twambĩrĩrie kwĩrirĩria. Ũndũ ũcio no ũtũme tũtige kũiganĩra na maũndũ marĩa ma o mũhaka, twambĩrĩrie gũtiganĩria maũndũ ma kĩĩroho  tũgĩetha indo cia kĩĩmwĩrĩ. Ũndũ ũcio no ũtũririkanie ũhoro wa Dema. Kwenda “mũtabarĩre ũyũ wa maũndũ” nĩ gwatũmire atiganĩrie ũtungata wake na atiganĩrie mũtũmwo Paulo. (2 Tim. 4:10) Nĩ kĩĩ gĩatũmire Dema atiganĩrie Paulo? Bibilia ndiugaga kana nĩ kwenda eendire indo cia kĩĩmwĩrĩ gũkĩra maũndũ ma kĩĩroho kana ndeendaga kwĩima nĩguo atungate hamwe na Paulo. Tũtingĩenda kwarahũra merirĩria ma indo cia kĩĩmwĩrĩ na gwĩtĩkĩria merirĩria macio mahatĩke wendo witũ harĩ ũhoro ũrĩa wa ma.

10. Nĩ hatĩka irĩkũ twagĩrĩirũo kũregana nacio nĩguo tũthiĩ na mbere kũrũmĩrĩra ũhoro wa ma?

¹⁰ Ũrata hamwe na andũ arĩa angĩ. Nĩguo tũthiĩ na mbere ũhoro-inĩ wa ma, nĩ twagĩrĩirũo kũregana na hatĩka kuuma kũrĩ arĩa angĩ. Rĩrĩa twambĩrĩirie kũrũmĩrĩra ũhoro wa ma, ũrata witũ hamwe na arata na andũ a famĩlĩ nĩ wacenjirie. No kũhoteke amwe nĩ maaheire wĩtĩkio ũcio witũ mwerũ gĩtĩo, nao angĩ magĩtũkararia. (1 Pet. 4:4) O na gũtuĩka nĩ twĩrutanagĩria gũikarania wega na andũ a famĩlĩ na kũmekĩra maũndũ mega, nĩ twagĩrĩire kwĩmenyerera tũtikaregerie ithimi cia Jehova nĩguo tũmakenie. Nĩ tũrĩgeragia gũikarania wega na andũ a famĩlĩ. No tũkĩrũmĩrĩra ũtaaro wa 1 Akorintho 15:33, arata aitũ a hakuhĩ marĩkoragwo marĩ o andũ arĩa mendete Jehova.

11. Tũngĩĩthema atĩa kũingĩra maũndũ-inĩ matarĩ matheru?

¹¹ Mwĩcirĩrie na mĩthiĩre ĩtarĩ mĩtheru. Arĩa othe marũmagĩrĩra ũhoro wa ma no mũhaka makorũo marĩ atheru. (Isa. 35:8; thoma 1 Petero 1:14-16.) Rĩrĩa twerutaga ũhoro wa ma ithuothe nĩ twabatarire gwĩka mogarũrũku nĩguo mũtũũrĩre witũ ũringane na ithimi cia ũthingu cia Bibilia. Amwe maabatarire gwĩka mogarũrũku manene. Gũtekũmakania mogarũrũku marĩa twekire, tũtiagĩrĩire gũkũũrania mũrũgamo witũ wa ũthingu na maũndũ matarĩ matheru ma thĩ ĩno. Tũngĩĩthema atĩa kũingĩra maũndũ-inĩ matarĩ matheru? Wĩcũranagie thogora mũnene ũrĩa Jehova aarĩhire nĩgetha tũkoragwo tũrĩ atheru, na thogora ũcio nĩ thakame ya goro ya Mũrũ wake Jesu Kristo. (1 Pet. 1:18, 19) Nĩguo tũtũũrie mũrũgamo witũ mwega mbere ya Jehova, twagĩrĩire gũikaraga tũkĩririkanaga ũrĩa igongona rĩa Jesu rĩrĩ rĩa goro.

12, 13. (a) Nĩkĩ gũkorũo na muonere ta wa Jehova wĩgiĩ ikũngũĩro itiganĩte nĩ kwa bata? (b) Nĩ ũndũ ũrĩkũ tũkwarĩrĩria?

¹² Mĩtugo na ũndũire ũtakenagia Ngai. Andũ a famĩlĩ, arĩa tũrutaga wĩra nao, na arĩa tũthomaga nao no matũtindĩkĩrĩrie tũnyitanĩre nao ikũngũĩro-inĩ ciao. Nĩ na njĩra ĩrĩkũ tũngĩregana na hatĩka cia kwĩingĩria mĩtugo-inĩ na ikũngũĩro-inĩ iria itatĩithagia Jehova? Nĩ na njĩra ya kũiga meciria-inĩ muonere wa Jehova wĩgiĩ maũndũ macio. Kwĩririkanagia maũndũ marĩa mandĩkĩtwo mabuku-inĩ maitũ marĩa monanagia kĩhumo kĩa ikũngũĩro imwe ciendetwo mũno no gũtũteithie. Kwĩririkanagia itũmi cia Kĩĩmandĩko iria itũmaga tũtikanyitanĩre ikũngũĩro-inĩ icio, nĩ kũrĩtũteithagia gũkorũo na ũũma atĩ nĩ tũreka maũndũ marĩa “metĩkĩrĩkĩte nĩ Mwathani.” (Ef. 5:10) Kwĩhokaga Jehova na Kiugo gĩake kĩa ma nĩ kũrĩtũgitagĩra tũtikagwe mũtego-inĩ wa “gwĩtigĩra andũ.”—Thim. 29:25.

¹³ Nĩ twĩrĩgĩrĩire kũrũmĩrĩra ũhoro wa ma nginya tene na tene. Nĩ na njĩra ĩrĩkũ tũngĩkĩra hinya itua ritũ rĩa gũthiĩ na mbere kũrũmĩrĩra ũhoro ũrĩa wa ma? Rekei twarĩrĩrie njĩra ithatũ.

14. (a) Gũthiĩ na mbere kũgũra ũhoro wa ma kũngĩkĩra hinya itua ritũ atĩa rĩa kwaga gũkanawendia? (b) Ũũgĩ, ũtaaro, na ũtaũku nĩ cia bata nĩkĩ?

¹⁴ Wa mbere, thiĩ na mbere kwĩruta ma cia goro cia Kiugo kĩa Ngai na ũciĩcũũranagie. Wĩgũrĩre ũhoro wa ma na njĩra ya kũiga  mahinda ma kwĩruta ma cia goro cia Kiugo kĩa Ngai. Gwĩka ũguo nĩ kũrĩtũmaga ũkona ũhoro wa ma ũrĩ wa bata na gũgũteithie ndũkanendie ũhoro ũcio. Makĩria ma gũtwĩra twĩgũrĩre ũhoro wa ma, rĩandĩko rĩa Thimo 23:23 ningĩ nĩ rĩtwĩraga tũgũre “ũũgĩ na ũtaaro na ũtaũku.” Ũmenyo wiki ti mũiganu. Nĩ twagĩrĩirũo kũhũthĩra ũhoro wa ma ũtũũro-inĩ witũ. Ũtaũku nĩ ũtũteithagia gũtaũkĩrũo nĩ ũrĩa ũtaaro ũmwe wa Jehova ũkonainie na ũrĩa ũngĩ. Ũũgĩ ũtũteithagia kũrũmĩrĩra maũndũ marĩa twĩrutĩte. Mahinda mangĩ ũhoro wa ma nĩ ũtũtaaraga, ũgatuonia harĩa tũrabatara gwĩka mogarũrũku. Rekei hingo ciothe twĩtĩkagĩre ũtongoria ũcio, tondũ nĩ wa bata gũkĩra betha.—Thim. 8:10.

15. Mũcibi wa ũhoro wa ma ũtũgitagĩra atĩa?

¹⁵ Wa kerĩ, tua itua irũmu rĩa gũtũũra kũringana na ũhoro wa ma hĩndĩ ciothe. Wĩyohe mũcibi wa ũhoro wa ma njohero-inĩ yaku. (Ef. 6:14) Mahinda-inĩ ma Bibilia, mũcibi nĩ wanyitagĩrĩra na ũkagitĩra njohero na ciĩga ingĩ cia mũthigari arĩ mbaara-inĩ. O na kũrĩ ũguo, nĩguo mũcibi ũcio ũmũgitĩre wabataraga gũkorũo wohetwo ũkarũmio wega. Mũcibi mũregeru ndũngĩagitĩrire mũndũ wega. Mũcibi wa ũhoro wa ma ũtũgitagĩra atĩa? Tũngĩyoha ũhoro wa ma ũrũmĩte biũ o ta mũcibi, nĩ ũrĩtũgitagĩra kuumana na mwĩcirĩrie mũũru na ũtũteithagie gũtua matua mega. Rĩrĩa tũragerio, kana tũrĩ rungu rwa moritũ, ũhoro wa ma ũrĩa ũrĩ Bibilia-inĩ nĩ ũrĩkagĩra hinya itua ritũ rĩa gwĩka ũrĩa kwagĩrĩire. O ta ũrĩa mũthigari atangĩathiire mbaara-inĩ ateyohete mũcibi, o na ithuĩ twagĩrĩirũo gũtua itua rĩa kwaga gũkanaregeria kana kũruta mũcibi witũ wa ũhoro wa ma. Handũ ha ũguo, twĩkaga o ũrĩa wothe tũngĩhota nĩguo tũikare twĩyohete ũhoro wa ma na njĩra ya gũtũũra kũringana naguo. Ũndũ ũngĩ wa bata wĩgiĩ mũcibi ũcio nĩ atĩ nĩ wakoragwo na handũ mũthigari angĩahocirie rũhiũ rwake rwa njora. Rĩu rekei twarĩrĩrie ũndũ ũngĩ ũngĩtũteithia gwĩkĩra hinya itua ritũ rĩa gũthiĩ na mbere kũrũmĩrĩra ũhoro wa ma.

16. Kũruta arĩa angĩ ũhoro wa ma kũngĩkĩra hinya atĩa itua ritũ rĩa gũthiĩ na mbere kũrũmĩrĩra ũhoro wa ma?

¹⁶ Wa gatatũ, ĩkaga o ũrĩa wothe ũngĩhota nĩguo ũrute arĩa angĩ ũhoro wa ma wa Bibilia. Na njĩra ĩyo, nĩ ũrĩhotaga kũrũmia wega rũhiũ rwaku rwa njora rwa kĩĩroho, na nĩruo “kiugo kĩa Ngai.” (Ef. 6:17) Ithuothe nĩ twagĩrĩire kwĩrutanĩria kwagagĩria njĩra citũ cia kũrutana, ‘tũkĩhũthagĩra wega kiugo kĩa ũhoro ũrĩa wa ma.’ (2 Tim. 2:15) O ũrĩa tũrĩhũthagĩra Bibilia gũteithia arĩa angĩ kũgũra ũhoro wa ma na kũregana na morutani ma maheeni, noguo uuge wa Ngai ũrĩrikagĩra meciria-inĩ na ngoro-inĩ citũ. Na njĩra ĩyo tũgekĩra hinya itua ritũ rĩa gũthiĩ na mbere kũrũmĩrĩra ũhoro wa ma.

17. Wee wonaga ũhoro wa ma ũrĩ wa goro nĩkĩ?

¹⁷ Ũhoro wa ma nĩ kĩheo kĩa goro tũheetwo nĩ Jehova. Kĩheo kĩu nĩ gĩtũhotithagia kũgĩa na kĩndũ kĩa goro mũno kĩrĩa tũrĩ nakĩo, na nĩkĩo ũrata wa hakuhĩ hamwe na Ithe witũ wa igũrũ. Jehova nĩ atũrutĩte maũndũ maingĩ, no gĩkĩ no kĩambĩrĩria! Makĩria ma ũhoro wa ma ũrĩa Ngai atũrutĩte, nĩ atwĩrĩire atĩ egũtũũra atũrutaga tene na tene. Nĩ ũndũ ũcio, enda ũhoro wa ma na ũwonage ũrĩ wa bata ta ruru ya goro. Thiĩ na mbere ‘kũgũra ũhoro wa ma na ndũkanawendie.’ Weka ũguo, nĩ ũkũhota gũtũũria mwĩhĩtwa waku harĩ Jehova o ta Daudi, ũrĩa woigire ũũ: “Niĩ ndĩrĩrũmagĩrĩra ũhoro waku wa ma.”—Thab. 86:11, NWT.