“MBAARA ciothe iria ciarũĩtwo hau kabere ti kĩndũ iringithanĩtio na mbaara ĩrĩa ĩrathiĩ na mbere Rũraya.” Ũguo nĩguo ngathĩti ya The Watch Tower ya Septemba 1, 1915, yataarĩirie mbaara ya mbere ya thĩ ĩrĩa yahutirie mabũrũri ta 30. Nĩ ũndũ wa mbaara ĩyo yathiaga na mbere, ngathĩti ya The Watch Tower yoigire ũũ: “Wĩra wa [Ũthamaki] nĩũgirĩrĩirio na gĩkĩro kĩna, makĩria mabũrũri-inĩ ma Njĩrĩmani na Faranja.”

Nĩ ũndũ wa mbaara ĩrĩa yathiaga na mbere, Arutwo amwe a Bibilia nĩ maaingĩrire njeshi-inĩ tondũ matiataũkagĩrũo biũ nĩ motaaro ma Bibilia megiĩ kwĩingĩria mbaara-inĩ. O na kũrĩ ũguo, nĩ maatuĩte itua rĩa kũhunjia ũhoro mwega. Nĩguo Wilhelm Hildebrandt ahingie itemi rĩake wĩra-inĩ wa Ũthamaki, eetagia mabuku ma The Bible Students Monthly ma rũthiomi rwa Kĩfaranja. Ndaathiĩte Faranja arĩ mũhunjia wa mahinda mothe no aarĩ mũnjeshi wa Njĩrĩmani. Nĩ angĩonekire arĩ thũ ehumbĩte nguo cia njeshi, no aahunjagia ũhoro wa thayũ kũrĩ andũ a Faranja.

Marũa-inĩ marĩa maandĩkĩtwo ngathĩti-inĩ ya The Watch Tower monanagia atĩ Arutwo amwe a Bibilia kuuma Njĩrĩmani maarĩ na wendi wa kũhunjia o na marĩ njeshi-inĩ. Mũrũ wa Ithe witũ Lemke ũrĩa warĩ mũnjeshi wa maĩ-inĩ oigire atĩ andũ atano arĩa maarutithanagia wĩra nao nĩ maakenagio nĩ ũhoro. Aandĩkire ũũ: “O na ndĩ mũnjeshi no ndĩragetha maciaro maragoocithia Jehova.”

Georg Kayser aathiĩte mbaara-inĩ arĩ mũnjeshi ĩndĩ aacokire mũciĩ arĩ ndungata ya Ngai ũrĩa wa ma. Gwathire atĩa? Onire ibuku rĩa Arutwo a Bibilia, agĩtĩkĩra kuuma ngoro-inĩ ũhoro wa ma na agĩtigana na mbaara. Agĩcoka akĩambĩrĩria kũruta wĩra ũtaahutanagia na mbaara. Thutha wa mbaara ĩyo nĩ aatungatire mĩaka mĩingĩ arĩ painia ũrĩ kĩyo.

O na gũtuĩka Arutwo a Bibilia matiataũkagĩrũo biũ nĩ ũhoro wĩgiĩ kwaga kwĩingĩria mbaara-inĩ, mwerekera na mĩthiĩre yao yarĩ ngũrani na mawoni na ciĩko cia andũ arĩa angĩ. Ngũrani na ateti na atongoria a ndini arĩa maanyitaga mbaru mbaara ĩyo, Arutwo a Bibilia maanyitaga  mbaru “Mũnene-wa-Thayũ.” (Isa. 9:6) O na gũtuĩka amwe matiatiganĩte biũ na maũndũ megiĩ mbaara, nĩ meetĩkĩtie ũndũ ũyũ wagwetirũo nĩ Mũrutwo wa Bibilia wetagwo Konrad Mörtter, “Nĩ njũĩ na ma biũ atĩ Kiugo kĩa Ngai kĩonanĩtie Mũkristiano ndagĩrĩirũo nĩ kũũragana.”—Tham. 20:13. *

Bũrũri-inĩ wa Njĩrĩmani, kũrĩa watho ũteetĩkĩrĩtie mũndũ akorũo na wĩyathi wa gwĩka kũringana na wĩtĩkio wake, Arutwo a Bibilia makĩria ma 20 nĩ maaregire kwĩingĩrania na maũndũ megiĩ mbaara. Amwe meeragwo marĩ na thĩna wa meciria, ta Gustav Kujath ũrĩa watwarirũo thibitarĩ na akĩheo ndawa nĩguo erigwo. Nake Hans Hölterhoff nĩ aaregire gũthiĩ mbaara-inĩ, agĩikio njera, na o na kũu nĩ aaregire mawĩra mothe maahutanagia na mbaara. Thigari cia kũu njera ciamuohire ikĩmũnyitia nginya akĩganda moko na magũrũ. Rĩrĩa cioonire ndaragarũrũka, ikĩambĩrĩria kũmwĩra nĩ ikũmũraga. O na kũrĩ ũguo, Hans nĩ aatũririe mũrũgamo wake ihinda-inĩ rĩu rĩothe rĩa mbaara.

Ariũ a Ithe witũ arĩa angĩ maaregire kũingĩra mbaara-inĩ nĩ mooririe maheo mawĩra mangĩ mataahutanĩtie na mbaara. * Johannes Rauthe ũrĩa warĩ na mũrũgamo ta ũcio aaheirũo wĩra reri-inĩ. Konrad Mörtter na Reinhold Weber maaheirũo wĩra wa ũrigitani. August Krafzig nĩ aakenire tondũ wĩra wake ndwahutanĩtie na mbaara. Arutwo acio a Bibilia na angĩ nĩ maatuĩte itua rĩa gũtungatĩra Jehova kũringana na ũmenyo ũrĩa maarĩ naguo nĩ ũndũ wa wendo na wĩhokeku wao harĩ Jehova.

Arutwo a Bibilia nĩ maambĩrĩirie gũtuĩrio mũno nĩ ũndũ wa mũrũgamo wao hĩndĩ ĩyo ya mbaara. Mĩaka ĩrĩa yarũmĩrĩire Arutwo a Bibilia a Njĩrĩmani nĩ maathitangirũo maita maingĩ nĩ ũndũ wa wĩra wao wa kũhunjia. Wabici ya rũhonge ya Njĩrĩmani nĩ yathondekire kamĩtĩ ya maũndũ megiĩ watho nĩguo ĩteithĩrĩrie arutwo acio.

Aira a Jehova nĩ maathiire na mbere gũtaũkĩrũo makĩria nĩ ũhoro wĩgiĩ mũrũgamo wa Akristiano kwerekera mbaara. Rĩrĩa mbaara ya kerĩ ya thĩ yatuthũkire, Aira a Jehova matieingĩranirie nayo o na hanini. Nĩ ũndũ ũcio monagwo marĩ thũ cia bũrũri wa Njĩrĩmani na nĩ maanyaririrũo mũno. No ũndũ ũcio nĩ ũrĩarĩrĩrio hĩndĩ ĩngĩ gĩcunjĩ-inĩ gĩa “Kuuma Mũthithũ-inĩ Witũ.”—Kuuma Mũthithũ-inĩ Witũ thĩinĩ wa Central Europe.