NA NJĨRA ya mũhaano, arutwo a Bibilia makoragwo mahaana ta andũ maracaria thahabu. Arutwo acio mabataraga gũthiĩ na mbere gwĩkĩra kĩyo gũcaria ũũgĩ ũrĩa ũrĩ Maandĩko-inĩ. Tũrĩ arutwo a Bibilia-rĩ, tũngĩĩruta atĩa tũngĩthuthuria njĩra ithatũ iria thahabu yethagwo nacio?

Ta hũra mbica ũgĩthiĩra rũĩ-inĩ ũkona kahiga kanini karahenia. Ũkainamĩrĩra gũkarora na ũgakena mũno wona nĩ thahabu. Nĩ kanini mũno, no ti ũndũ mũhũthũ kuona thahabu. Ũkambĩrĩria kũrora kana nĩ ũkuona tũhiga tũngĩ ta tũu.

Na njĩra ta ĩyo, ihinda rĩigana ũna ihĩtũku no kũhoteke Mũira wa Jehova nĩ aagũcereire na mũkĩarĩrĩria kĩĩrĩgĩrĩro kĩrĩa Bibilia ĩheanĩte. No gũkorũo nĩ ũririkanaga wega ũndũ ũrĩa werutire riita rĩa mbere, ũrĩa ũngĩringithanio na thahabu. No gũkorũo nĩ rĩrĩa wamenyire rĩĩtwa rĩa Ngai nĩ Jehova. (Thab. 83:18) Kana rĩrĩa werutire atĩ no ũtuĩke mũrata wa Jehova. (Jak. 2:23) Nĩ wamenyire atĩ nĩ wona kĩndũ kĩa goro gũkĩra thahabu. Na no gũkorũo nĩ weendaga kũmenya makĩria maũndũ mangĩ ma kĩĩroho.

Rĩmwe tũcunjĩ tũnini twa thahabu tũkoragwo twĩcokanĩrĩirie njũĩ-inĩ. Thutha wa mĩeri mĩnini, andũ arĩa macaragia thahabu na kĩyo no makorũo monete kilo cigana ũna cia thahabu cia makiri maingĩ ma mbeca.

Rĩrĩa wambĩrĩirie kwĩruta Bibilia na Mũira wa Jehova, no gũkorũo waiguire ta ũrĩa mũndũ wethaga thahabu aiguaga amĩona. Gwĩcũrania igũrũ rĩgiĩ maũndũ marĩa marĩ Bibilia-inĩ nĩ gwagũteithirie kwongerera ũmenyo na ũndũ ũcio ũgĩgũteithia gũkũra kĩĩroho. Nĩ ũndũ wa gwĩcũrania maũndũ macio ma bata, nĩ werutire ũrĩa ũngĩkuhĩrĩria Jehova na ũikare wendo-inĩ wake ũrĩ na kĩĩrĩgĩrĩro kĩa muoyo wa tene na tene.—Jak. 4:8; Jud. 20, 21.

O ta ũrĩa mũndũ ekĩraga kĩyo gĩa gũcaria thahabu, no gũkorũo noguo wanekĩra kĩyo gĩa gũcaria maũndũ ma kĩĩroho. Thutha wa kwĩruta maũndũ ma mũthingi ma Bibilia, no kũhoteke nĩ  wagĩire na wendi wa kuoya makinya nĩguo wĩyamũrĩre Jehova na ũbatithio.—Mat. 28:19, 20.

Mũndũ wethaga thahabu no one tũcunjĩ tũnini twa thahabu mahiga-inĩ mamwe. Na mahiga mangĩ ta macio nĩ menjagwo makarutwo thahabu nyingĩ. No ũkĩmarora ndũngĩona ta marĩ na thahabu. Nĩkĩ? Tondũ harĩ tani ya ihiga ta rĩu, no harutwo o gramu 10 tu cia thahabu. No harĩ mũndũ ũramĩetha, gramu icio nini nĩ cia bata mũno harĩ we.

Mũndũ nĩ abataraga gwĩkĩra kĩyo gĩa gũthiĩ na mbere kwĩruta thutha wa kũmenya “ũrutani wa mũthingi wĩgiĩ Kristo.” (Ahib. 6:1, 2) Nĩ ũkũbatara kwĩrutanĩria kũmenya maũndũ makĩria hamwe na marĩa ũngĩhũthĩra ũtũũro-inĩ kuuma wĩruti-inĩ waku wa Bibilia. Kwoguo ũngĩka atĩa nĩguo ũtigĩrĩre atĩ wĩruti waku wa Bibilia nĩ ũrakũguna, o na angĩkorũo wĩrutĩte Maandĩko mĩaka mĩingĩ?

Ikaraga wĩhaarĩirie kwĩruta makĩria. Thuthuria maũndũ na kinyi. Thiĩ na mbere gwĩkĩra kĩyo na nĩ ũrĩgĩaga na ũũgĩ na ũtongoria kuuma Maandĩko-inĩ. (Rom. 11:33) Nĩguo ũgĩe na ũmenyo makĩria wĩgiĩ Maandĩko, hũthagĩra indo iria tũrĩ nacio cia gwĩka ũthuthuria cia rũthiomi rwaku. Caragia ũtegũkua ngoro ũtongoria ũrĩa ũrabatara na macokio ma ciũria ciaku ciĩgiĩ Bibilia. Ũragia arĩa angĩ nĩ maandĩko kana icunjĩ irĩkũ monete irĩ na ũteithio makĩria na cia gwĩkĩra ngoro. Ĩraga andũ arĩa angĩ maũndũ marĩa wonete mega wĩruti-inĩ waku wa Bibilia.

Muoroto waku to kũgĩa na ũũgĩ mũingĩ tu tondũ mũtũmwo Paulo oigire atĩ “ũmenyo nĩ ũtũmaga mũndũ etũũgĩrie.” (1 Kor. 8:1) Kwoguo wĩrutanĩrie biũ gũkoragwo ũrĩ mwĩnyihia na ũrĩ na wĩtĩkio mũrũmu. Gũkoragwo na ũthathaiya wa famĩlĩ na wĩruti waku wa Bibilia ũtegũtĩrĩria nĩ kũrĩgũteithagia gũtũũra kũringana na ithimi cia Jehova na ũndũ ũcio nĩ ũrĩgũtindĩkaga kuonia arĩa angĩ wendo. Makĩria ma ũguo, nĩ ũrĩgĩaga na gĩkeno tondũ nĩ wĩgĩrĩire na kĩndũ kĩa goro mũno gũkĩra thahabu.—Thim. 3:13, 14.