1, 2. Nĩkĩ nĩ twagĩrĩirũo kũmenyeria arĩa angĩ maũndũ-inĩ ma kĩĩroho?

WĨRA ũrĩa mũnene Jesu aarutaga warĩ kũhunjia ũhoro mwega wa Ũthamaki. O na kũrĩ ũguo nĩ aahũthagĩra mahinda kũmenyeria angĩ makorũo marĩ arĩithi na arutani. (Mat. 10:5-7) O na gũtuĩka Filipu nĩ aahũthagĩra mahinda maingĩ ũtungata-inĩ, nĩ aateithirie airĩtu ake ana makorũo marĩ ahunjia ega. (Atũm. 21:8, 9) Kũmenyeria arĩa angĩ na njĩra ta ĩyo nĩ kwa bata nĩkĩ ũmũthĩ?

² Thĩinĩ wa thĩ yothe, arĩa maretĩkĩra ũhoro wa ma no marongerereka. Arĩa matarĩ abatithie nĩ marabatara kũmenya bata wa mũndũ gũkorũo na wĩruti wake wa Bibilia. Ningĩ nĩ marabatara kũmenyerio kũhunjĩria na kũruta arĩa angĩ Bibilia. Thĩinĩ wa ciũngano, ariũ a Ithe witũ nĩ magĩrĩire gwĩkĩrũo ngoro merutanĩrie nĩguo magĩrĩre gũtuĩka ateithia a ũtungata na athuri a kĩũngano. Akristiano arĩa agimaru kĩĩroho no mateithie arĩa erũ makũre kĩĩroho na njĩra ya ‘kũmarutaga ndeto iria njega.’—Thim. 4:2.

3, 4. (a) Paulo onanirie atĩa ũkuruhanu wa kwĩruta Maandĩko na gũkorũo na moimĩrĩro mega ũtungata-inĩ? (b) Twagĩrĩirũo gũkorũo tũgĩka atĩa mbere ya gwĩkĩra arutwo a Bibilia ngoro merutage Bibilia?

³ Nĩkĩ nĩ ũndũ wa bata mũndũ gũkorũo na wĩruti wake wa Bibilia? Macokio ma kĩũria kĩu nĩ monekaga ciugo-inĩ cia mũtũmwo Paulo kũrĩ Akolosai. Aandĩkire ũũ: “Tũtirĩ twatiga kũhoya nĩ ũndũ wanyu na gũthaithana atĩ mũiyũrũo nĩ ũmenyo ũrĩa wa ma wĩgiĩ wendi wake [Ngai] mũrĩ na ũũgĩ wothe na ũtaũku wa kĩĩroho, nĩ getha mũthiage na mĩthiĩre ĩrĩa ĩratwarana na wendi wa Jehova nĩguo mũmũkenagie maũndũ-inĩ mothe o mũgĩthiaga na mbere kũgĩa na maciaro wĩra-inĩ wothe mwega na mũkĩongagĩrĩra ũmenyo ũrĩa wa ma wa Ngai.” (Kol. 1:9, 10) Marĩ na ũmenyo ũcio wa ma, Akristiano acio a Kolosai nĩ mangĩahotire ‘gũthiaga na mĩthiĩre ĩrĩa ĩratwarana na wendi wa Jehova nĩguo mamũkenagie maũndũ-inĩ mothe.’ Ũndũ ũcio nĩ ũngĩamateithirie ‘kũgĩaga na maciaro wĩra-inĩ wothe mwega,’ makĩria wĩra-inĩ wa kũhunjia. Nĩguo Mũkristiano akoragwo na moimĩrĩro mega, no mũhaka akoragwo na mũtaratara mwega wa kwĩrutaga Bibilia. Nĩ twagĩrĩirũo gũteithia arutwo a Bibilia mamenye ũguo.

⁴ No mũhaka ithuĩ tũkorũo tũkĩona bata wa kwĩruta Bibilia mbere ya gũteithia arĩa angĩ gwĩka ũguo. No mũhaka tũkorũo na mũtaratara mwega wa kwĩruta Bibilia. Kwoguo no wĩyũrie ciũria ta ici: ‘Rĩrĩa ene nyũmba maruta mawoni mataringaine na Bibilia kana moria ciũria nditũ-rĩ, nĩ hotaga kũmacokeria ngĩhũthĩra Bibilia? Rĩrĩa ndathoma ũrĩa Jesu, Paulo na angĩ momĩrĩirie ũtungata-inĩ-rĩ, nĩ ndĩcũranagia ũrĩa kũũmĩrĩria kwao kũngĩndeithia ũtungata-inĩ?’ Ithuothe nĩ tũbataraga ũmenyo na ũtaaro wa Kiugo kĩa Ngai. Tũngĩra arĩa angĩ ũrĩa tũgunĩkĩte nĩ ũndũ wa kwĩruta Bibilia, kwahoteka no tũmekĩre ngoro makorũo na kĩyo gĩa kwĩrutaga Maandĩko nĩguo o nao magunĩke.

5. Gweta ũndũ ũngĩka nĩguo ũteithie mũrutwo wa Bibilia akoragwo na mũtaratara mwega wa kwĩruta Bibilia.

⁵ No hihi no wĩyũrie ũũ: ‘Ingĩhota atĩa gũteithia mũrutwo wakwa erutage Bibilia ategũtĩrĩria?’ No wambĩrĩrie na kũmuonia ũrĩa angĩhaarĩria kĩrĩa mũreruta. Ningĩ no ũmũrie athome ũhoro muongerere ibuku-inĩ rĩa Bibilia Ĩrutanaga Atĩa Kũna? na athome maandĩko marĩa monanĩtio. Mũteithĩrĩrie kũhaaragĩria mĩcemanio arĩ na muoroto wa kũruta macokio. Mwĩkĩre ngoro athomage ngathĩti ya Mũrangĩri na Arahũkai! rĩrĩa cioka. Angĩkorũo Watchtower Library kana Ũthuthuria INTANETI-INĨ nĩ cionekaga na rũthiomi rwake, no ũmuonie ũrĩa angĩcihũthĩra gũcokia ciũria cia Bibilia. Ũngĩka maũndũ  macio, no kũhoteke mũrutwo waku wa Bibilia ambĩrĩrie gũkenera kwĩrutaga Bibilia rĩrĩa arĩ wiki.

6. (a) Ũngĩteithia atĩa mũrutwo waku akũrie wendi wa gũthomaga Bibilia? (b) Kwahoteka mũrutwo wa Bibilia aigue atĩa angĩkũria wendi wa gũthomaga Bibilia?

⁶ Tũtiagĩrĩirũo gũtindĩkĩrĩria mũndũ athomage kana erutage Bibilia. Handũ ha ũguo, rekei tũhũthagĩre indo iria tũheetwo nĩ ithondeka rĩa Jehova gũteithia mũrutwo wa Bibilia akũrie wendo wa gũthomaga Bibilia. Thutha wa ihinda, ahota kũigua ta mwandĩki wa Thaburi ũrĩa wainire ũũ: “Gũkuhĩhĩria Ngai, nĩkuo kũnjagĩrĩire; Mwathani Jehova nowe nduĩte irahĩro rĩakwa.” (Thab. 73:28) Jehova nĩ arĩteithagia mũrutwo ta ũcio ũrĩ na ngoro njega kũgerera roho wake.

7. Jesu aamenyeririe atũmwo ake atĩa? (Rora mbica kĩambĩrĩria-inĩ gĩa gĩcunjĩ gĩkĩ.)

⁷ Thĩinĩ wa Mathayo 10, Jesu nĩ aaheire atũmwo ake 12 maũndũ ma kũrũmĩrĩrũo. Handũ ha kũgweta maũndũ igũrũ igũrũ, aamataarĩirie maũndũ macio na njĩra mekũnyita. ^[1] Atũmwo acio nĩ maathikĩrĩirie Jesu akĩmaruta ũrĩa mangĩkorũo marĩ ahunjia ega, magĩcoka magĩthiĩ kũhunjia. Nĩ ũndũ wa kũrũmĩrĩra njĩra iria Jesu aamarutire, nĩ maatuĩkire arutani ega a Bibilia. (Mat. 11:1) No tũmenyerie arutwo aitũ a Bibilia gũkorũo marĩ ahunjia marĩ na moimĩrĩro mega. Rekei rĩu twarĩrĩrie njĩra igĩrĩ tũngĩmateithia nacio.

8, 9. (a) Jesu aaranagĩria atĩa na andũ arĩ ũtungata-inĩ? (b) Tũngĩteithia atĩa ahunjia erũ mahote kwaranĩria na andũ ta ũrĩa Jesu eekaga?

⁸ Aranĩria na andũ. Jesu kaingĩ nĩ aaragia na mũndũ ũmwe ũmwe ũhoro wa Ũthamaki. Kwa ngerekano, nĩ aagĩire na ndeereti njega mũno na mũtumia wokĩte gũtaha maĩ gĩthima-inĩ kĩa Jakubu hakuhĩ na itũũra rĩa Sukaru. (Joh. 4:5-30) Ningĩ nĩ aaririe na Mathayo, ũrĩa warĩ mwĩtia wa mbeca cia igooti. Mabuku ma Injili matiaragia mũno ũhoro wa ndeereti ĩyo, no Mathayo nĩ eetĩkĩrire gũtuĩka mũrũmĩrĩri wa Jesu. Mathayo marĩ na andũ angĩ nĩ maathikĩrĩirie Jesu hĩndĩ ĩrĩa meetĩtwo iruga kwa Mathayo mũciĩ.—Mat. 9:9; Luk. 5:27-39.

⁹ Ningĩ hĩndĩ ĩngĩ Jesu nĩ aarĩirie Nathanaeli na njĩra ya ũrata, ũrĩa warĩ na mawoni matarĩ mega kwerekera andũ a Nazarethi. Ũndũ ũcio nĩ watũmire Nathanaeli agarũrĩre mawoni make. Nĩ aatuire itua rĩa kwĩruta makĩrĩa morutani ma Jesu, ũrĩa woimĩte Nazarethi. (Joh. 1:46-51) Kwoguo tũrĩ na gĩtũmi kĩega gĩa kũmenyeria ahunjia erũ mahote kwaranĩria na andũ na njĩra ya ũrata. ^[2] Arĩa tũgũteithia na njĩra ĩyo kwahoteka makene mona ũrĩa andũ arĩa makoragwo na ngoro njega megwĩtĩkĩra ũhoro nĩ ũndũ wa kuonio wendo na kwarĩrio ciugo njega.

10-12. (a) Nĩ na njĩra ĩrĩkũ Jesu aakũririe wendi harĩ arĩa maakenagio nĩ ũhoro ũrĩa mwega? (b) Tũngĩteithia ahunjia erũ atĩa kwagĩria ũhoti wao wa kũrutana Bibilia?

¹⁰ Kũria wendi. Jesu ndaarĩ na ihinda iraihu rĩa kũhunjia. O na kũrĩ ũguo, nĩ aahũthagĩra mahinda nĩguo akũrie wendi harĩ andũ arĩa maakenagio nĩ ũhoro ũrĩa mwega. Kwa ngerekano, nĩ aahunjĩirie kĩrĩndĩ kĩa andũ aikarĩte gatarũ-inĩ. Hĩndĩ ĩyo nĩ aateithirie Petero gũtega thamaki nyingĩ na njĩra ya kĩama na akĩmwĩra ũũ: “Kuuma rĩu ũrĩtegaga andũ.” Ciugo na ciĩko cia Jesu ciarĩ na moimĩrĩro marĩkũ? Petero na arĩa maarĩ nao “makĩruta tũtarũ tũu maĩ-inĩ na magĩtiga indo ciothe makĩmũrũmĩrĩra [Jesu].”—Luk. 5:1-11.

¹¹ Nikodemo, ũrĩa warĩ wa kĩama kĩa Sanhedrini, nĩ aakenirio nĩ morutani ma  Jesu. Nĩ eendaga kwĩruta makĩria no nĩ eetigagĩra ũrĩa andũ mangĩoigire mamuona akĩaria na Jesu. Jesu nĩ aakoragwo ehaarĩirie kwaria na andũ hĩndĩ o yothe, kwoguo Nikodemo agĩthiĩ kũrĩ Jesu ũtukũ nĩguo andũ matikamone makĩaria. (Joh. 3:1, 2) Tũngĩĩruta atĩa kuumana na ũndũ ũcio? Jesu nĩ aahũthagĩra mahinda nĩguo ekĩre hinya wĩtĩkio wa andũ arĩa angĩ. Na githĩ tũtiagĩrĩirũo gũkorũo na kĩyo gĩa gũcokera andũ na kwĩruta Bibilia na arĩa marakenio nĩ ũhoro?

¹² Ahunjia arĩa erũ no magagĩrie ũhoti wao wa kũrutana Bibilia tũngĩhunjagia nao. No tũmateithie kũririkanaga nginya arĩa monanirie o hanini tu atĩ nĩ marakenio nĩ ndũmĩrĩri. No tũthiĩ nao rĩrĩa tũracokera na tũreruta Bibilia na andũ. Nĩ ũndũ wa kũmenyerio na gwĩkĩrũo ngoro, ahunjia erũ nĩ marĩendaga gũkũria wendi wa andũ arĩa angĩ na magĩe na arutwo ao a Bibilia. Ningĩ nĩ mekwĩruta kwagaga gũkua ngoro na ihenya no magakoragwo na wetereri marĩ ũtungata-inĩ.—Gal. 5:22; Rora gathandũkũ “Kwaga Gũkua Ngoro nĩ kwa Bata.”

13, 14. (a) Nĩ ũndũ ũrĩkũ ũreruta kuumana na cionereria iria irĩ Bibilia-inĩ cia andũ arĩa meerutagĩra mũno nĩ ũndũ wa arĩa angĩ? (b) Nĩ na njĩra irĩkũ ũngĩmenyeria ahunjia erũ na arĩa ethĩ kuonagia Akristiano arĩa angĩ wendo?

¹³ Bibilia nĩ yonanagia atĩ nĩ tũkoragwo na mweke wa kuonanagia “wendo . . . ta ariũ a nyina ũmwe” na gũteithanagia. (Thoma 1 Petero 1:22; Luka 22:24-27.) Jesu eerutĩire biũ nginya akĩruta muoyo wake nĩguo atungatĩre andũ. (Mat. 20:28) Dorokasi nĩ “eekaga maũndũ maingĩ mega na nĩ aaheanaga iheo cia tha.” (Atũm. 9:36, 39) Mariamu, mwarĩ wa Ithe witũ kuuma Roma nĩ ‘aarutaga wĩra na kĩyo’ nĩguo ateithie Akristiano arĩa angĩ. (Rom. 16:6) Tũngĩteithia arĩa erũ na njĩra ĩrĩkũ mataũkĩrũo nĩ bata wa gũteithagia Akristiano arĩa angĩ?

¹⁴ Akristiano arĩa marĩ na ũmenyeru no mathiĩ na arĩa erũ gũceerera arĩa arwaru na arĩa akũrũ. Aciari no mathiĩ na ciana ciao gũceerera andũ ta acio hĩndĩ ĩrĩa kwagĩrĩire. Athuri a kĩũngano no mateithanie na arĩa angĩ kĩũngano-inĩ gũtigĩrĩra arĩa akũrũ marĩ na irio na mĩciĩ yao nĩ mĩige wega. Na njĩra icio, andũ arĩa ethĩ na arĩa erũ nĩ mekwĩruta gwĩkĩra arĩa angĩ ciĩko njega. Mũthuri ũmwe wa kĩũngano angĩakorirũo akĩhunjia itũũra rĩna, nĩ aahĩtũkagĩra kwa aarĩ na ariũ a Ithe witũ a itũũra rĩu. Mũrũ wa Ithe witũ ũmwe mwĩthĩ ũrĩa kaingĩ maathiaga nake nĩ eerutire atĩ andũ othe kĩũngano-inĩ nĩ magĩrĩire kũigua atĩ nĩ mendetwo.—Rom. 12:10.

15. Nĩkĩ nĩ ũndũ wa bata athuri a kĩũngano gũkorũo na wendi wa gũteithĩrĩria arũme kĩũngano-inĩ?

¹⁵ Tondũ Jehova ahũthagĩra arũme kũrutana kĩũngano-inĩ, nĩ ũndũ wa bata ariũ a Ithe witũ makũrie ũhoti wa kwaria. Angĩkorũo ũrĩ mũthuri wa kĩũngano-rĩ, hihi no ũthikĩrĩrie mũteithia wa ũtungata akĩĩmenyeria ũrĩa akaaruta mĩario? No ahote kwagagĩria ũhoti wake wa kũrutana nĩ ũndũ wa ũteithio waku.—Neh. 8:8. ^[3]

16, 17. (a) Paulo eekaga atĩa nĩguo ateithie Timotheo gũthiĩ na mbere? (b) Athuri a kĩũngano mangĩmenyeria arĩithi a mahinda mokĩte na njĩra njega atĩa?

¹⁶ Arĩithi nĩ marabatarania mũno kĩũngano-inĩ gĩa Gĩkristiano, na arĩa makaaruta wĩra ũcio mahinda mokĩte, marabatara gũthiĩ na mbere kũmenyerio. Paulo nĩ onanirie ũrĩa mũndũ angĩmenyerio rĩrĩa eerire Timotheo ũũ: “Mwana wakwa . . . thiĩ na mbere kũgĩa na hinya kũgerera ũtugi mũnene ũrĩa ũrĩ thĩinĩ wa Kristo Jesu; namo maũndũ marĩa waiguire kuuma kũrĩ niĩ, marĩa  maanyitirũo mbaru nĩ aira aingĩ, ũmehokere arũme arĩa ehokeku, arĩa nao megũkorũo marĩ agĩrĩru biũ kũruta andũ arĩa angĩ.” (2 Tim. 2:1, 2) Timotheo nĩ eerutire maũndũ maingĩ nĩ ũndũ wa gũkoragwo hamwe na mũtũmwo ũcio warĩ mũkũrũ. Agĩcoka akĩhũthĩra maũndũ macio ũtungata-inĩ na maũndũ-inĩ mangĩ megiĩ ũtungata mũtheru.—2 Tim. 3:10-12.

¹⁷ Paulo nĩ oyaga na ũritũ mũno ũhoro wĩgiĩ kũmenyeria Timotheo. Maita maingĩ nĩ aakoragwo hamwe nake. (Atũm. 16:1-5) Athuri no marũmĩrĩre kĩonereria kĩa Paulo na njĩra ya gũthiaga na ateithia a ũtungata arĩa maragĩrĩra iceera-inĩ rĩa ũrĩithi rĩrĩa kwagĩrĩire. Na njĩra ĩyo nĩ mateithagia ariũ a Ithe witũ acio mone ũrutani, wĩtĩkio, ũkirĩrĩria na wendo ũrĩa wendekanaga harĩ athuri a kĩũngano. Ũndũ ũcio nĩ ũteithagia harĩ kũmenyeria arĩithi a “rũũru rwa Ngai” a mahinda mokĩte.—1 Pet. 5:2.

18. Nĩkĩ kũmenyeria arĩa angĩ ũtungata-inĩ wa Jehova kũbatiĩ gũkorũo kũrĩ kwa bata harĩ ithuĩ?

¹⁸ Kũmenyeria arĩa angĩ nĩ ũndũ wa bata tondũ kũrĩ na ũbataro mũnene na wĩra mũingĩ ũtungata-inĩ wa Jehova. Cionereria cia kũmenyeria arĩa angĩ iria ciaigirũo nĩ Jesu na Paulo no ihũthĩke nginya ũmũthĩ. Jehova endaga ndungata ciake cia mahinda maya imenyerio wega nĩ ũndũ wa mawĩra marĩa ciĩhokeirũo. Jehova nĩ atũheaga mweke wa gũteithia arĩa matarĩ na ũmenyeru mũingĩ makũrie ũhoti wa kũruta mawĩra kĩũngano-inĩ. Andũ nĩ marabatara kũmenyerio na ihenya o ũrĩa kwahoteka, nĩ ũndũ wa ũrĩa maũndũ marathiĩ mathũkĩte thĩinĩ wa thĩ na gũgakorũo na mĩeke mĩingĩ ya kũhunjia.

19. Nĩkĩ nĩ wagĩrĩirũo gũkorũo na ma atĩ kĩyo gĩaku gĩa kũmenyeria arĩa angĩ ũtungata-inĩ wa Jehova nĩ kĩrĩkoragwo na moimĩrĩro mega?

¹⁹ Kũmenyeria arĩa angĩ nĩ kuoyaga ihinda na nĩ kũbataraga kĩyo. Ĩndĩ Jehova na Mũriũ wake nĩ megũtũteithia na matũhe ũũgĩ wa kũmenyeria arĩa angĩ. Nĩ tũrĩkenaga kuona arĩa tũrateithĩrĩria ‘makĩruta wĩra na kĩyo na makĩrutanĩria.’ (1 Tim. 4:10) Rekei o na ithuĩ tũthiĩ na mbere gũkũra kĩĩroho tũkĩrutĩra Jehova ũtungata mũtheru.