“NDAABATITHIRIO ndĩ na mĩaka 15, na thutha wa mĩeri ĩtandatũ ngĩtuĩka painia wa gũteithĩrĩria. Thutha wa mwaka ũmwe ngĩambĩrĩria ũpainia wa hĩndĩ ciothe. Ndarĩkia cukuru wa secondary, nĩ ndambĩrĩirie gũcaria kũrĩa kwarĩ na bata wa ahunjia. Ndeendaga gũthiĩ kũndũ kũraihu na taũni ya gwitũ na nyume gwa cũcũ witũ ũrĩa ũtaarĩ Mũira wa Jehova. Nĩ ndaaiguire ũũru mũno rĩrĩa mũrori wa mũthiũrũrũko aanjĩrire hunjie o kũu gwitũ. Ndiarekire amenye ũrĩa ndaiguire. Ngoetie ngingo, ngĩthiĩ nĩguo ngecirie ũhoro ũcio aanjĩrire. Ngĩra mwarĩ wa Ithe witũ ũrĩa twathiaga nake ũũ: ‘Ngwĩciria ndĩreka o ta Jona. No thutha-inĩ Jona nĩ aathire Nineve. Kwoguo o na niĩ ngũtungata o kũrĩa ngwĩrũo.’

“Ngoretwo ndĩ painia gĩcigo gĩa gwitũ mĩaka ĩna, na rĩu nĩ nyonaga atĩ warĩ ũndũ wa ũũgĩ kũrũmĩrĩra ũtaaro ũcio ndaaheirũo. Thĩna wakwa mũnene warĩ gũkorũo na mwerekera ũtagĩrĩire. No rĩu nĩ ngoragwo na gĩkeno kĩingĩ. Nĩ harĩ mweri ũmwe nderutire Bibilia na andũ 24. Nĩ njokagĩria Jehova ngatho mũno nĩ gũkorũo nĩ ndambĩrĩirie kwĩruta Bibilia na cũcũ witũ, ũrĩa mbere ĩyo warĩ na ũkararia mũnene.”

Mũrutwo ũmwe wa Bibilia wa Fiji nĩ aabataraga gũtua itua iritũ, rĩa gũthiĩ kĩgomano kana gũthiĩ na mũthuri wake gĩkũngũĩro kĩa mũthenya wa gũciarũo kĩa mũndũ wa famĩlĩ yao. Mũthuri wake nĩ aamwĩtĩkĩririe gũthiĩ kĩgomano. Eerire mũthuriwe atĩ nĩ egũthiĩ gĩkũngũĩro-inĩ kĩu thutha-inĩ. Rĩrĩa aacokire mũciĩ kuuma kĩgomano-inĩ, akĩona arĩ wega kwaga gũthiĩ kũndũ ta kũu kũngĩamũingĩririe ũgwati-inĩ wa kĩĩroho na kwoguo ndaathire.

Rĩrĩa mũthuri wake eerire andũ ao atĩ mũtumia wake egũka thutha wa kũrĩkia gĩthomo kĩao, maamwĩrire ũũ: “Ũcio ndangĩũka, Aira a Jehova matikũngũyagĩra mũthenya wa gũciarũo.” *

Moimĩrĩro marĩ mega tondũ mũthuri wake nĩ aakenire nĩ kuona atĩ mũtumia wake aarũgamire na wĩtĩkio wake na akĩrũmĩrĩra thamiri yake. Mũrũgamo wake mwega nĩ watũmire thutha-inĩ ahote kũhunjĩria mũthuri wake na andũ angĩ. Moimĩrĩro maarĩ marĩkũ? Mũthuri wake agĩtĩkĩra kwĩruta Bibilia na akĩambĩrĩria gũthiaga mĩcemanio hamwe nake.