AARĨ na ariũ a Ithe witũ aingĩ arĩa maathamĩte mabũrũri-inĩ mao magathiĩ mabũrũri-inĩ mangĩ gwetha mbeca nĩ macokete mabũrũri-inĩ mao. Magĩtindĩkwo nĩ wendo wao harĩ Jehova na harĩ andũ arĩa angĩ nĩ mathamĩire kũndũ kũrĩa kũrĩ na bata mũnene wa ahunjia a Ũthamaki. (Mat. 22:37-39) Meimaga maũndũ marĩkũ, na nĩ irathimo irĩkũ monaga? Nĩguo tuone macokio ma ciũria icio, rekei twarĩrĩrie ũhoro wa bũrũri wa Cameroon ũrĩa ũkoragwo Afrika ya Ithũĩro.

Mwaka-inĩ wa 1998, mũrũ wa Ithe witũ wĩtagwo Onésime nĩ aathamire akiuma bũrũri-inĩ wa Cameroon kũrĩa aaciarĩirũo. Kwa ihinda rĩa mĩaka 14 aaikaraga Rũraya. Mũthenya ũmwe arĩ mũcemanio-inĩ wa Gĩkristiano nĩ kwaheanirũo ngerekano ĩgiĩ wĩra wa kũhunjia. Mwaria ooririe kĩũria gĩkĩ, “Andũ erĩ mangĩkorũo magĩtega thamaki o mũndũ handũ hake-rĩ, na ũmwe akorũo nĩ aranyita thamaki nyingĩ gũkĩra ũcio ũngĩ-rĩ, na githĩ ũrĩa ũtaranyita thamaki nyingĩ ndegũthiĩ harĩ ũrĩa ũranyita thamaki nyingĩ?”

Ngerekano ĩyo yatũmire Onésime ecirie ũhoro wa gũcoka Cameroon kũrĩa andũ aingĩ meendaga kwĩruta Bibilia, nĩguo athiĩ agateithie ariũ a Ithe witũ a kũu. No harĩ maũndũ maatũmaga akorũo na guoya. Hihi nĩ angĩahotire gũikara rĩngĩ bũrũri-inĩ wa Cameroon thutha wa gũikara mĩaka mĩingĩ ũguo mũrĩmo? Nĩguo one kana nĩ ekũhota, Onésime aathamĩire kuo ihinda rĩa mĩeri ĩtandatũ. Na mwaka-inĩ wa 2012 agĩthamĩra kuo biũ.

Onésime ooigire ũũ: “Nĩ ndabatarire kũmenyera rĩera ihiũ rĩa kũu na mĩikarĩre ya kũu. Thĩinĩ wa Nyũmba ya Ũthamaki ndabatarire kũmenyera gũikarĩra itĩ cia mbaũ.” Aacokire akiuga ũũ acanjamũkĩte: “Ĩndĩ o ũrĩa ndaigaga meciria makwa harĩ programu, noguo ndariganagĩrũo nĩ itĩ njega iria ndaikaragĩra mũrĩmo.”

Mwaka-inĩ wa 2013, Onésime nĩ maahikanirie na Géraldine, ũrĩa wacokete Cameroon thutha wa gũikara Faranja mĩaka kenda. Hihi maagĩire na irathimo irĩkũ nĩ ũndũ wa kũiga wĩra wa kũhunjia mbere ũtũũro-inĩ wao? Onésime ooigire ũũ: “Nĩ twetirũo Cukuru ya Ahunjia a Ũthamaki na tũgĩtwo Betheli. Mwaka ũrĩa ũrathirire, arutwo a Bibilia 20 kĩũngano-inĩ gitũ nĩ maabatithirio. Rĩu nĩ nyonaga ndĩ handũ harĩa hagĩrĩire ha ‘gũtega andũ.’” (Mar. 1:17, 18) Géraldine oongereire ũũ: “Nĩ ngĩte na irathimo nyingĩ gũkĩra ũrĩa ingĩecirĩirie.”

Judith aathamĩire bũrũri-inĩ wa Amerika (US), no nĩ eeriragĩria kwandandũra ũtungata wake. Ooigire ũũ: “Hĩndĩ ciothe ngĩcoka Amerika kuuma Cameroon gũceerera famĩlĩ itũ, nĩ ndarĩraga nĩ ũndũ wa kuona ũrĩa ndatiga andũ aingĩ arĩa ndakoragwo ndambĩrĩria kwĩruta Bibilia nao.”  O na kũrĩ ũguo, Judith ndaaiguaga akĩenda gũcoka Cameroon. Aarĩ na mũcara mwega ũrĩa wamũhotithagia gũteithia ithe ũrĩa wakoragwo arĩ mũrwaru. No Judith nĩ eehokire Jehova, na agĩthamĩra Cameroon. Oigaga atĩ nĩ aiguaga akĩĩrirĩria maũndũ mamwe marĩa aakenagĩra arĩ mũrĩmo. Nĩ aahoire Jehova nĩguo amũteithie ahote kũmenyera, na nĩ aateithirio nĩ ciugo cia gwĩkĩra ngoro cia mũrori ũmwe wa mũthiũrũrũko na mũtumia wake.

Agĩcokia meciria na thutha, Judith ooigire ũũ: “Kwa ihinda rĩa mĩaka ĩtatũ, nĩ ndahotire gũteithia andũ ana nginya magĩkinyĩrĩra kũbatithio.” Judith nĩ aambĩrĩirie gũtungata arĩ painia wa mwanya. Ũmũthĩ ũyũ, matungataga hamwe na mũthuri wake Sam-Castel, wĩra-inĩ wa gũceerera ciũngano. Gwathiire atĩa ũhoro-inĩ wĩgiĩ ithe wa Judith? Judith na famĩlĩ yao nĩ moonire thibitarĩ ĩmwe mũrĩmo ĩrĩa yarĩhire mbeca iria ciabataranagia nĩguo baba wao athĩnjwo. Ũndũ wa gĩkeno nĩ atĩ, ũrigitani ũcio nĩ wathiire o wega.

Mũrũ wa Ithe witũ ũmwe wĩtagwo Victor nĩ aathamĩire Canada. Thutha wa gũthoma gĩcunjĩ kĩmwe kĩa Mũrangĩri kĩaaragĩrĩria ũhoro wĩgiĩ gĩthomo kĩa igũrũ, nĩ eeciririe ũhoro wa gĩthomo gĩake. Nĩ aatiganire na gĩthomo kĩa yunivasĩtĩ na akĩambĩrĩria gũthomera kothi ĩtangĩoire mĩaka mĩingĩ. Ooigire ũũ: “Ũndũ ũcio nĩ wandeithirie kuona wĩra na ihenya na ũkĩndeithia kwambĩrĩria ũpainia, ũndũ ũrĩa ndatũire ndĩrirĩirie.” Thutha ũcio Victor nĩ maahikanirie na Caroline, na magĩthiĩ gũceera Cameroon. Marĩ kũu, nĩ maathiire gũceera wabici-inĩ ya rũhonge ya Cameroon, na magĩkĩrũo ngoro kana no mecirie gũthamĩra Cameroon. Victor ooigire ũũ: “Tũtionire kĩrĩa kĩngĩatũmire twage gũthama, na ũndũ ũcio ndwarĩ mũritũ harĩ ithuĩ tondũ nĩ twakoretwo tũhũthĩtie ũtũũro witũ.” O na gũtuĩka Caroline aarĩ na tũmathĩna twa mwĩrĩ, nĩ maatuire itua rĩa gũthama.

Victor na Caroline nĩ maambĩrĩirie gũtungata marĩ mapainia a hĩndĩ ciothe, nĩguo mahote gũteithia andũ aingĩ gĩcigo-inĩ kĩu arĩa maakenagio nĩ ũhoro. Kĩambĩrĩria-inĩ nĩ maahotaga kũhingia mabataro mao kuumana na mbeca iria maaigĩte. Thutha ũcio nĩ maathiire Canada kũruta wĩra ihinda rĩa mĩeri ĩigana ũna na ũndũ ũcio nĩ wamateithirie gũcoka Cameroon magĩthiĩ na mbere ũtungata-inĩ wa ũpainia. Hihi maagĩire na irathimo irĩkũ? Nĩ maathiire Cukuru ya Ahunjia a Ũthamaki, magĩtungata marĩ mapainia a mwanya, na rĩu marutaga wĩra mĩako-inĩ ya ithondeka. Victor ooigire ũũ: “Gũtiga ũtũũro mwega ũrĩa twarĩ naguo, nĩ gwatũhotithirie gũkenera ũteithio wa Jehova.”

Mwaka-inĩ wa 2002, Alain, ũrĩa warĩ mũrutwo wa yunivasĩtĩ bũrũri-inĩ wa Njĩrĩmani, nĩ aathomire trakti, Vijana—Mtatumiaje Maisha Yenu? Ũhoro ũrĩa aathomire nĩ watũmire eigĩre mĩoroto ĩngĩ. Mwaka-inĩ wa 2006, nĩ aathiire Cukuru ya Kũmenyeria Maũndũ ma Ũtungata na agĩtũmwo bũrũri-inĩ wa Cameroon kũrĩa ooimĩte.

Alain athiĩ Cameroon, nĩ oonire wĩra aarutaga rĩmwe na rĩmwe. Thutha ũcio nĩ oonire wĩra ũrĩ na mũcara mwega, no nĩ oonaga atĩ ũndũ ũcio wahota gũtũma ũtungata wake ũcoke thĩ. Kwoguo rĩrĩa ooririo kana no atungate arĩ painia wa mwanya, eetĩkĩrire atekũrĩa marĩĩgu. Mũndũ ũrĩa wamwandĩkĩte nĩ aamwĩrire atĩ nĩ ekũmuongerera mũcara, no Alain akĩrega. Thutha ũcio, Alain nĩ maahikanirie na Stéphanie, ũrĩa waikarĩte Faranja ihinda rĩa mĩaka mĩingĩ. Stéphanie aacemanirie na mathĩna marĩkũ thutha wa gũthamĩra Cameroon?

 Stéphanie ooigire: “Nĩ ndanyitirũo nĩ tũmathĩna twa mwĩrĩ na ngĩgĩa na aranjĩ, no nĩ ndathondekagwo kaingĩ na kwoguo ngaigua wegega.” Alain na Stéphanie nĩ maarathimirũo nĩ ũndũ wa ũkirĩrĩria wao. Alain ooigire ũũ: “Rĩrĩa twathiire kũhunjia gĩcagi-inĩ kĩmwe kĩarĩ kũraihu gĩetagwo Katé, nĩ tuoonire andũ maigana ũna meendaga kwĩruta Bibilia. Thutha-inĩ nĩ twahotaga kwĩruta Bibilia nao tũkĩhũthĩra thimũ. Erĩ harĩ acio nĩ maabatithirio, na gĩcagi-inĩ kĩu gũkĩambĩrĩrio gĩkundi kĩnini.” Stéphanie ooigire ũũ: “Gũtirĩ ũndũ ũrehaga gĩkeno kĩnene gũkĩra gũteithia andũ meyamũrĩre Jehova. Gũtungata gũkũ nĩ gũtũhotithĩtie kũgĩa na gĩkeno kĩu maita maingĩ.” Ũmũthĩ ũyũ, Alain na Stéphanie marutaga wĩra wa gũceerera ciũngano.

Mwarĩ wa Ithe witũ Gisèle aabatithĩirio Italy kũrĩa aathiĩte gũthomera maũndũ ma ũndagĩtarĩ. Mũrũ na mwarĩ wa Ithe witũ arĩa maamũrutaga Bibilia maaikaraga ũtũũro mũhũthũ na ũndũ ũcio nĩ wakenirie Gisèle mũno, nginya akĩenda kwandandũra ũtungata wake. Kwoguo Gisèle akuhĩrĩria kũrĩkia cukuru nĩ aambĩrĩirie ũpainia wa hĩndĩ ciothe.

Gisèle nĩ eendaga gũtungatĩra Jehova makĩria acoka Cameroon, no nĩ harĩ maũndũ maatũmaga atangĩke. Ooigire ũũ: “Ingĩabatarire gũthama Italy na ndige arata na andũ a famĩlĩ arĩa maaikaraga kuo.” O na kũrĩ ũguo, Mĩĩ 2016, Gisèle nĩ aathamĩire Cameroon.

Thutha ũcio nĩ maahikanirie na Léonce, na wabici ya rũhonge ya Cameroon ĩkĩmooria kana no mathamĩre taũni-inĩ ya Ayos, ĩrĩa yarĩ na bata mũnene wa ahunjia a Ũthamaki.

Ũtũũro wahaanaga atĩa taũni-inĩ ĩyo ya Ayos? Gisèle ooigire ũũ: “Kaingĩ kũu nĩ gwakoragwo gũtarĩ na thitima ciumia cigana ũna, na kaingĩ thimũ citũ tũtiacihũthagĩra tondũ citiakoragwo na mwaki. Nĩ nderutire kũruga na ngũ, na twathiaga gĩthima-inĩ na wheelbarrow na toci ũtukũ gũtaha maĩ, tondũ nĩrĩo gũtaakoragwo na andũ aingĩ.” Maahiũranirie atĩa na maũndũ macio? Gisèle ooigire ũũ: “Roho wa Jehova, gũkorũo kĩhiko-inĩ na mũndũ mũrateithania, na gwĩkĩrũo ngoro na gũteithio rĩmwe na rĩmwe na mbeca nĩ andũ a famĩlĩ na arata nĩ gwatũteithagia mũno.”

Hihi Gisèle nĩ akenaga nĩ ũndũ wa gũcoka bũrũri-inĩ wao? Ooigire ũũ: “Ĩĩ. Hatarĩ nganja nĩ ngenaga. Kĩambĩrĩria-inĩ nĩ twarĩ na moritũ na kũigua tũkuĩte ngoro, no twatooria maũndũ macio, twĩ na mũthuri wakwa tuoonaga atĩ twĩkĩte o ũrĩa twabataraga gwĩka. Nĩ twĩhokete Jehova, na ũndũ ũcio nĩ ũtũmaga tũigue tũmũkuhĩrĩirie.” Léonce na Gisèle nĩ maathiire Cukuru ya Ahunjia a Ũthamaki na rĩu maratungata marĩ mapainia a mwanya a ihinda.

O ta ategi a thamaki arĩa mabataraga gũkirĩrĩria maũndũ maingĩ nĩguo mahote gũtega thamaki nyingĩ, andũ arĩa macokaga mabũrũri-inĩ mao nĩ meimaga maũndũ maingĩ, nĩguo mahote gũteithia andũ a ngoro njega arĩa marakenio nĩ ndũmĩrĩri ya Ũthamaki. Hatarĩ nganja Jehova nĩ arĩrathimaga ahunjia acio marĩ kĩyo, nĩ ũndũ wa wendo ũrĩa maronania nĩ ũndũ wa rĩĩtwa rĩake. (Neh. 5:19; Ahib. 6:10) Angĩkorũo ũikaraga mũrĩmo, na bũrũri ũrĩa uumĩte kũrĩ na bata mũnene wa ahunjia a Ũthamaki-rĩ, hihi no wĩcirie gũcoka? Ũngĩka ũguo, nĩ ũkũrathimwo na njĩra nene.​—Thim. 10:22.