Nĩ ũthomete na kinyi icunjĩ cia mwaka ũyũ cia Mũrangĩri? Ta rora kana no ũhote gũcokia ciũria ici:

Tũrĩgunĩkaga atĩa tũngĩhũthagĩra mahinda kwaria na Jehova, kũmũthikĩrĩria, na gwĩciria ũhoro wake?

Nĩ tũrĩhotaga gũtua matua mega, tũgatuĩka arutani ega, wĩtĩkio witũ ũkagĩa na hinya makĩria, na wendo witũ harĩ Jehova ũkongerereka.—w22.01, kar. 30-31.

Kwĩruta kwĩhoka Jehova na andũ arĩa amũrĩte matongoragie maũndũ ithondeka-inĩ rĩake gũgaatũteithia atĩa?

Rĩrĩ nĩrĩo ihinda rĩa kwĩruta kwĩhoka njĩra ya Ngai ya gwĩka maũndũ. No twĩke ũguo na njĩra ya kwaga gwĩkĩrĩra nganja ũtongoria kana matua ma athuri a kĩũngano. Rĩrĩa thĩna ũrĩa mũnene ũkaambĩrĩria, nĩ tũgaakorũo twĩhaarĩirie gwathĩka o na tũngĩkamũkĩra ũtongoria ũroneka ũrĩ mũritũ gwathĩkĩra.—w22.02, kar. 4-6.

Nĩ ũndũ ũrĩkũ mũraika eendaga kuonania rĩrĩa eerire Zekaria ũhoro wĩgiĩ kuona “kabirũ guoko-inĩ kwa [Ngavana] Zerubabeli”? (Zek. 4:8-10)

Kĩoneki kĩu nĩ gĩateithirie andũ a Ngai gũkorũo na ma atĩ o na gũtuĩka hekarũ ĩyo yaakagwo ndĩngĩarĩ na riri mũnene, nĩ ĩngĩarĩkirio na ĩkorũo ĩkinyanĩirie ithimi cia Ngai.—w22.03, kar. 16-17.

Nĩ na njĩra irĩkũ tũngĩkorũo tũrĩ ‘kĩonereria kĩega ũhoro-inĩ wĩgiĩ kwaria’? (1 Tim. 4:12)

Nĩ kwaragia na njĩra ya ũtugi na gĩtĩo tũrĩ ũtungata-inĩ, tũkaina kuuma ngoro, tũkaruta macokio kaingĩ tũrĩ mĩcemanio-inĩ, tũkaaragia ma na tũgaaka andũ arĩa angĩ, na tũgethema mĩario mĩũru.—w22.04, kar. 6-9.

Maũndũ ma mũhianĩre wa nyamũ iria inya (mothamaki) igwetetwo thĩinĩ wa Danieli mũrango wa 7 mahũthĩrĩtwo gũtaarĩria nyamũ ĩmwe nĩkĩ thĩinĩ wa Kũguũrĩrio 13:1, 2?

Nyamũ ya gĩthaka ĩrĩa ĩgwetetwo thĩinĩ wa Kũguũrĩrio 13 ndĩrũgamĩrĩire o ũthamaki ũmwe tu ta wa Roma. Handũ ha ũguo, ĩrũgamĩrĩire thirikari ciothe cia gĩũteti iria ikoretwo igĩatha andũ nginyagia ũmũthĩ.—w22.05, kar. 9.

Njĩra ĩmwe nene tũngĩonania nayo atĩ nĩ tũretĩkia Jehova nĩ arĩ kĩhooto nĩ ĩrĩkũ?

Angĩkorũo harĩ mũndũ ũtũrumĩte, agatũrakaria, kana agatũhĩtĩria, nĩ twĩrutanagĩria kweheria muku na marakara, tũgatiga ũndũ ũcio moko-inĩ ma Jehova. Nĩ akeeheria maũndũ mothe moru marĩa mareheetwo nĩ mehia.—w22.06, kar. 10-11.

Mũrũ wa Ithe witũ ũrĩa waheo mweke wa kũhoithia hĩndĩ ya mũcemanio agĩrĩirũo kũririkana ũndũ ũrĩkũ?

Mahoya matiagĩrĩire kũhũthĩrũo kũhe kĩũngano ũtaaro kana kũmenyithania maũndũ. Ndagĩrĩirũo kũhũthĩra “ciugo nyingĩ,” makĩria kĩambĩrĩria-inĩ kĩa mũcemanio. (Mat. 6:7)—w22.07, kar. 24-25.

“Arĩa meekaga maũndũ moru” makaaumĩra “iriũkĩro rĩa gũtuĩrũo” na njĩra ĩrĩkũ? (Joh. 5:29)

Matigaatuĩrũo atĩ nĩ meekire ũũru nĩ ũndũ wa maũndũ marĩa meekire matanakua. Magaathuthurio kũringana na mwerekera wao na maũndũ marĩa mageeka thutha wa kũriũkio.—w22.09, kar. 18.

Nĩ ciugo irĩkũ cia gwĩkĩra ngoro J. F. Rutherford aaugire kĩgomano-inĩ kĩmwe mweri-inĩ wa Septemba 1922?

Arĩ kĩgomano-inĩ kĩrĩa gĩekĩirũo Cedar Point, Ohio, Amerika (US), aaugire ũũ: “Mũthamaki nĩ arathana! Inyuĩ nĩ inyuĩ a kũmũmenyithania harĩ kĩrĩndĩ. Nĩ ũndũ ũcio anĩrĩrai, anĩrĩrai, anĩrĩrai, Mũthamaki na Ũthamaki wake!”—w22.10, kar. 3-5.

Kũringana na Isaia mũrango wa 30, nĩ njĩra irĩkũ ithatũ Jehova atũteithagia nacio gũkirĩrĩria?

Mũrango ũcio wonanĩtie atĩ (1) nĩ athikagĩrĩria mahoya maitũ na akamacokia, (2) nĩ atũheaga ũtongoria, na (3) nĩ atũrathimaga mahinda-inĩ maya na nĩ agaatũrathima mahinda mokĩte.—w22.11, kar. 9.

Nĩ kĩĩ kĩngĩtũma tuuge atĩ ciugo iria irĩ thĩinĩ wa Thaburi 37:10, 11, 29 nĩ ciahingire mahinda-inĩ ma tene na nĩ ikaahinga mahinda mokĩte?

Ciugo cia Daudi itaaragĩria mahinda mega marĩa Aisiraeli maakeneire, ta hĩndĩ ya wathani wa Mũthamaki Suleimani. Jesu nĩ oonanirie ũhoro wa paradiso ya ihinda rĩũkĩte na akĩgweta ciugo irutĩtwo mũhari-inĩ wa 11. (Mat. 5:5; Luk. 23:43)—w22.12, kar. 8-10, 14.