Rĩrĩa Jehova eerire andũ ‘maiyũrie thĩ na mamĩtoorie,’ eendaga kuonania atĩ mũthia-inĩ thĩ yothe nĩ ĩngĩatuĩkire paradiso. (Kĩam. 1:28) Arĩa makaagaya thĩ nĩ makaabatara kũhingia rĩathani rĩu. Thĩ ndĩgaakorũo ĩrĩ paradiso hĩndĩ ĩyo, tondũ mũgũnda wa Edeni ndũtũũraga. Mbaara ya Hari–Magedoni yathira, nĩ tũgaakorũo na wĩra mũingĩ wa gũtheria thĩ kũrĩa ĩthũkangĩtio ũmũthĩ. Ũcio ndũgaakorũo ũrĩ wĩra mũhũthũ!

Ũndũ ũcio ũratũririkania wĩra ũrĩa Aisiraeli maabatarire kũruta rĩrĩa maacokire kuuma Babuloni. Bũrũri wao waniinĩte mĩaka 70 ũtegũikarũo. No Isaia nĩ aarathĩte atĩ Jehova nĩ angĩamateithirie gũcokereria itũũra rĩu. Aarathĩte ũũ: “Werũ wakuo akaaũtua o ta Edeni naguo werũ wakuo ũrĩa mwaraganu aũtue o ta mũgũnda wa Jehova.” (Isa. 51:3) Jehova nĩ aateithirie Aisiraeli na makĩhota gwĩka ũguo. Na njĩra o ta ĩyo, Jehova nĩ agaateithia arĩa makaagaya thĩ gũthondeka thĩ ĩtuĩke paradiso. O na ihinda-inĩ rĩrĩ  nĩ kũrĩ maũndũ ũngĩka wonanie atĩ nĩ wĩhaarĩirie gũkaaruta wĩra ũcio.

Ũndũ ũmwe ũngĩka nĩ kwĩrutanĩria kũiga mũciĩ waku ũrĩ mũtheru na ũbangĩtwo wega. No wĩke ũguo o na angĩkorũo andũ arĩa mũriganĩtie nao ti atheru. Ningĩ no ũteithĩrĩrie harĩ gũtheria na kũmenyerera Nyũmba ya Ũthamaki kana Nyũmba ya Kĩgomano ya kwanyu. Maũndũ maku mangĩgwĩtĩkĩria, o na no ũihũrie fomu ya kwĩrutĩra gũteithĩrĩria hĩndĩ ya gĩcanjama. Gwĩka ũguo no kuonanie atĩ nĩ wĩhaarĩirie gũteithia aarĩ na ariũ a Ithe witũ rĩrĩa marabatara ũteithio. Wĩyũrie, ‘Hihi harĩ mawĩra ingĩĩmenyeria ihinda-inĩ rĩrĩ marĩa ngaaruta thĩinĩ wa thĩ njerũ ingĩkaaheo mweke wa kũgaya thĩ?’

Thutha wa Jesu kũriũkia kairĩtu ka Jairo, aaugire kaheo kĩndũ gĩa kũrĩa. (Mar. 5:42, 43) No kũhoteke ndwarĩ ũndũ mũritũ kũhe kairĩtu kau ka mĩaka 12 gĩa kũrĩa. No ta wĩcirie wĩra ũrĩa ũkaabatarania rĩrĩa Jesu akaahingia kĩĩranĩro kĩrĩa eeranĩire atĩ “arĩa othe marĩ thĩinĩ wa mbĩrĩra [nĩ] makaaigua mũgambo wake na moime kuo.” (Joh. 5:28, 29) O na gũtuĩka Bibilia ndĩheanĩte ũhoro mũingĩ, no kũhoteke arĩa makaariũkio nĩ makaabatara irio, gwa gũikara, na nguo. O na ihinda-inĩ rĩrĩ-rĩ, hihi no wonanie atĩ nĩ wĩhaarĩirie gũgaateithia hĩndĩ ĩyo? Ciũria ici no igũteithie kũmenya kana nĩ wĩhaarĩirie.

Rĩrĩa mwamenyithio atĩ mũrori wa mũthiũrũrũko nĩ egũceera kĩũngano-inĩ kĩanyu-rĩ, hihi nĩ wĩrutagĩra kũmũnyita ũgeni mũrĩanĩre nake? Rĩrĩa arĩa marĩ ũtungata-inĩ wa mwanya wa mahinda mothe matiga gũtungata Betheli na moka gĩcigo-inĩ kĩanyu, kana rĩrĩa mũrori wa mũthiũrũrũko atiga gũtungata wĩra-inĩ ũcio-rĩ, hihi no ũmateithĩrĩrie kuona handũ ha gũikara? Kũngĩkorũo na kĩgomano gĩa thikũ ithatũ kana kĩa mwanya gĩcigo-inĩ kĩanyu-rĩ, hihi no wĩrutĩre gũteithĩrĩria wĩra mbere kana thutha wa kĩgomano kana wĩrutĩre kwamũkĩra ageni arĩa magooka?

O ta ũrĩa Atũmwo 24:15 yonanĩtie, nĩ twĩrĩgagĩrĩra atĩ andũ bilioni nyingĩ nĩ makaariũkio. Aingĩ ao magaakorũo marĩ arĩa mataagĩte na mweke wa kũmenya Jehova mbere ya makuĩte. No nĩ makaaheo mweke ũcio rĩrĩa makaariũkio. a Ndungata njĩhokeku cia Jehova irĩ na ũmenyeru, nĩ igaateithĩrĩria wĩra-inĩ ta ũcio wa kũrutana. (Isa. 11:9) Mwarĩ wa Ithe witũ Charlotte, ũrĩa wanatungata icigo-inĩ cia Europe, South America, na Africa, nĩ eriragĩria mũno gũkaaruta wĩra ũcio. Augaga ũũ arĩ na gĩkeno: “Nĩ ndĩriragĩria mũno gũkaaruta andũ arĩa makaariũkio. Ingĩthoma ũhoro wa mũndũ watũũraga tene njugaga: ‘Na arĩ korũo mũndũ ũyũ nĩ aamenyete Jehova. Ũtũũro wake ũngĩarĩ ngũrani mũno.’ Nĩ ndĩriragĩria mũno gũkeera andũ arĩa makaariũkio ũhoro wĩgiĩ Jehova na ũrĩa ũtũũro wao ũngĩkorũo ũrĩ mwega mangĩmũtungatĩra.”

O na ndungata njĩhokeku cia Jehova iria ciatũũraga mbere ya Jesu gũka gũkũ thĩ, nĩ igaakorũo na maũndũ maingĩ ma kwĩruta. Ta hũũra mbica ũrĩa gĩgaakorũo kĩrĩ gĩkeno kĩnene na gĩtĩo kĩa mwanya gũtaarĩria Danieli ũrĩa morathi marĩa aandĩkire na ndaataũkagĩrũo nĩmo mahingĩte. (Dan. 12:8) Kana o na gũteithia Ruthu na Naomi kũmenya atĩ rũciaro rwao nĩruo Mesia aaumanire naruo. Na githĩ gĩtigaakorũo kĩrĩ gĩkeno kĩnene kũnyitanĩra wĩra-inĩ ũcio wa kũrutana ũrĩa ũkaarutwo thĩ yothe gũtarĩ na ihĩngĩca kana hatĩka iria tũcemanagia nacio thĩinĩ wa thĩ ĩno njũru?

Ũngĩonania atĩa ihinda-inĩ rĩrĩ atĩ nĩ wĩhaarĩirie gũkaanyitanĩra wĩra-inĩ ũcio wa kũrutana? Ũndũ ũmwe ũngĩka nĩ kwĩrutanĩria kwagagĩria ũhoti waku wa kũrutana na kũnyitanagĩra wĩra-inĩ wa kũhunjia kaingĩ. (Mat. 24:14) O na angĩkorũo ndũngĩhota kũhingia maũndũ maingĩ ihinda-inĩ rĩrĩ nĩ ũndũ wa ũkũrũ kana maũndũ mangĩ, kĩyo kĩrĩa wĩkĩraga no kĩonanie kana nĩ wĩhaarĩirie gũkaaruta arĩa makaariũkio.

Kĩũria kĩrĩa kĩnene nĩ gĩkĩ, Hihi wee nĩ wĩrĩgagĩrĩra gũkaagaya thĩ? Hihi nĩ ũrerirĩria gũgaatua thĩ paradiso o hamwe na kũrũmbũiya arĩa makaariũkio na kũmaruta? No wonanie atĩ nĩ wĩhaarĩirie ihinda-inĩ rĩrĩ na njĩra ya kũnyitanĩra mawĩra-inĩ ta marĩa ũkaaruta rĩrĩa ũkaagaya thĩ.