GĨCUNJĨ KĨA WĨRUTI KĨA 49
No Tũtũũre Tene na Tene
Kĩheo kĩrĩa Ngai aheanaga nĩ muoyo wa tene na tene.”—ROM. 6:23.
RWĨMBO NA. 147 Nĩ Twĩrĩirũo Muoyo wa Tene na Tene
GĨCUNJĨ-INĨ GĨKĨ a
1. Gwĩcũrania igũrũ rĩgiĩ kĩĩranĩro kĩa Jehova kĩa muoyo wa tene na tene gũtũhutagia atĩa?
JEHOVA eranĩire atĩ arĩa mamwathĩkagĩra nĩ makoona “muoyo wa tene na tene.” (Rom. 6:23) Rĩrĩa twecũrania igũrũ rĩgiĩ kĩĩranĩro kĩu Jehova atũheete, wendo witũ harĩ we nĩ ũgĩaga na hinya makĩria. Ta wĩcirie ũndũ ũyũ: Ithe witũ wa igũrũ nĩ atwendete mũno nĩkĩo atũheete kĩheo kĩu nĩguo tũtikanatigithũkanio nake.
2. Kĩĩranĩro kĩa muoyo wa tene na tene gĩtũteithagia atĩa?
2 Kĩĩranĩro kĩa Ngai kĩa muoyo wa tene na tene nĩ gĩtũteithagia gũkirĩrĩria magerio marĩa tũragerera ihinda rĩrĩ. O na rĩrĩa thũ citũ ciauga nĩ igũtũũraga, tũtingĩtiga gũtungatĩra Jehova. Nĩkĩ? Gĩtũmi kĩmwe nĩ tondũ nĩ tũĩ atĩ tũngĩkua tũrĩ ehokeku harĩ Jehova, nĩ agaatũriũkia tũrĩ na kĩĩrĩgĩrĩro atĩ tũtigakua rĩngĩ. (Joh. 5:28, 29; 1 Kor. 15:55-58; Ahib. 2:15) Nĩkĩ no tũkorũo na ma atĩ nĩ tũgaatũũra tene na tene? Rekei twarĩrĩrie itũmi cigana ũna.
JEHOVA ATŨŨRAGA TENE NA TENE
3. Nĩkĩ no tũkorũo na ma atĩ Jehova arĩ na ũhoti wa gũtũteithia gũtũũra tene na tene? (Thaburi 102:12, 24, 27)
3 Nĩ tũĩ atĩ Jehova arĩ na ũhoti wa gũtũteithia gũtũũra tene na tene tondũ nĩwe Kĩhumo kĩa muoyo na atũũraga tene na tene. (Thab. 36:9) Harĩ mĩhari ĩmwe ya Bibilia yonanagia atĩ Jehova atũũrĩte kuo hingo ciothe na egũtũũra kuo hingo ciothe. Kwa ngerekano, Thaburi 90:2 yugaga atĩ Jehova atũũrĩte “kuuma tene nginya tene.” Thaburi 102 o nayo nĩ yugaga ũndũ o ta ũcio. (Thoma Thaburi 102:12, 24, 27.) Nake mũnabii Habakuku aandĩkire ũũ igũrũ rĩgiĩ Ithe witũ wa igũrũ: “Atĩrĩrĩ Jehova, na githĩ wee ndũtũire kuuma tene na tene? Wee Ngai wakwa, Ũrĩa Wakwa Mũtheru, ndũkuaga.”—Hab. 1:12.
4. Hihi nĩ twagĩrĩirũo kũmaka tũngĩona atĩ nĩ tũraritũhĩrũo gũtaũkĩrũo nĩ rĩciria rĩa atĩ Jehova atũũrĩte kuo hingo ciothe? Taarĩria.
4 Hihi nĩ wonaga arĩ ũndũ mũritũ gũtaũkĩrũo nĩ rĩciria rĩa atĩ Jehova atũũrĩte kuo “tene na tene”? (Isa. 40:28) Ndũrĩ wiki. Elihu aaugire ũũ igũrũ rĩgiĩ Ngai: “Mũigana wa mĩaka yake ndũngĩtaũkĩka.” (Ayub. 36:26) No gũkorũo atĩ tũtirataũkĩrũo nĩ ũndũ mũna, ti kuuga atĩ ũndũ ũcio ti wa ma. Kwa ngerekano, o na gũtuĩka no twage gũtaũkĩrũo wega biũ nĩ ũrĩa hinya wa thitima ũrutaga wĩra, tũtingiuga atĩ hinya ũcio ndũrĩ kuo. Ũndũ ũmwe na ũcio, tũrĩ andũ no twage gũtaũkĩrũo nĩ rĩciria rĩa atĩ Jehova atũũrĩte kuo hingo ciothe na egũtũũra kuo hingo ciothe. No ũguo ti kuuga atĩ Ngai ndatũũraga kuo tene na tene. Kwoguo gũkorũo nĩ tũrataũkĩrũo kana tũtirataũkĩrũo, gũtingĩcenjia ũrĩa kũrĩ ũhoro-inĩ wĩgiĩ Mũũmbi witũ. (Rom. 11:33-36) Atũũrĩte kuo mbere ya kĩndũ kĩngĩ o gĩothe gũkorũo kuo kũrĩa igũrũ na gũkũ thĩ, o hamwe na riũa na njata. Nĩ tũkoragwo na ma atĩ Jehova nĩwe “Mũũmbi wa thĩ kũgerera hinya wake.” ‘Atanatambũrũkia igũrũ,’ aarĩ o kuo. (Jer. 51:15; Atũm. 17:24) Nĩ gĩtũmi kĩrĩkũ kĩngĩ kĩngĩtũma tũkorũo na ma atĩ no tũtũũre tene na tene?
TUOMBĨTWO TŨTŨŨRE TENE NA TENE
5. Nĩ mweke ũrĩkũ Adamu na Hawa maarĩ naguo?
5 Indo ciothe irĩ muoyo iria Jehova oombire thĩinĩ wa thĩ, mũthia-inĩ nĩ ingĩakuire. No mũndũ oombirũo arĩ na mweke wa mwanya wa gũtũũra ategũkua. O na kũrĩ ũguo, Jehova eerĩte Adamu ũũ: “Mũtĩ wa kũmenyithania wega na ũũru, ndũkanarĩe matunda maguo, nĩ gũkorũo mũthenya ũrĩa ũkaamarĩa, hatarĩ nganja no gũkua ũgaakua.” (Kĩam. 2:17) Korũo Adamu na Hawa nĩ maathĩkĩire Jehova, matingĩakuire. Kũrĩ na itũmi njega cia gwĩtĩkia atĩ mũthia-inĩ Jehova nĩ angĩametĩkĩririe marĩe matunda ma ‘mũtĩ wa muoyo.’ Ũguo nĩ kuuga atĩ nĩ angĩametĩkĩririe ‘gũtũũra tene na tene.’ b—Kĩam. 3:22.
6-7. (a) Nĩ ũndũ ũrĩkũ ũngĩ wonanagia atĩ andũ matiombĩtwo makuage? (b) Nĩ maũndũ marĩkũ wĩriragĩria gũgeeka thĩinĩ wa thĩ njerũ? (Rora mbica.)
6 Athomi amwe a sayansi nĩ monete ũira wa atĩ tombo wa mũndũ no ũige ũhoro mũingĩ gũkĩra ũrĩa mũndũ agĩaga naguo ihinda rĩothe rĩa ũtũũro wake. Ũcio nĩ ũndũ wa kũgegania! Mwaka-inĩ wa 2010, gĩcunjĩ kĩmwe ngathĩti-inĩ ya Scientific American Mind kĩaugĩte atĩ tombo witũ no ũhote kũiga ũhoro ũngĩĩrorerũo TV-inĩ mĩaka makĩria ma 300 (mathaa milioni ithatũ). Na no kũhoteke tombo ũrĩ na ũhoti wa kũiga ũhoro mũingĩ gũkĩra ũcio. Ũguo nĩ kuuga Jehova oombire tombo witũ ũrĩ na ũhoti wa kũiga ũhoro mũingĩ makĩria ma ũrĩa tũngĩĩruta mĩaka 70 kana 80.—Thab. 90:10.
7 Ningĩ Jehova aatũmbire twĩ na wendi mũnene wa gũtũũra muoyo. Bibilia ĩkĩaria ũhoro wa andũ, yugaga atĩ Ngai nĩ “ekĩrĩte ũhoro wa tene na tene ngoro-inĩ ciao.” (Koh. 3:11) Ũcio nĩ ũndũ ũmwe ũtũmaga tuone gĩkuũ kĩrĩ thũ. (1 Kor. 15:26) Rĩrĩa twarũara biũ-rĩ, hihi tũikaraga o ũguo twetereire gũkua? Aca. Kaingĩ tũthiaga thibitarĩ na rĩmwe na rĩmwe tũkanyua ndawa nĩguo tũhone. Twĩkaga ũrĩa wothe tũngĩhota nĩguo tũtigakue. Na rĩrĩa mũndũ twendete akua, gũtekũmakania ararĩ mwana kana mũndũ mũkũrũ, nĩ tũtigagwo na ruo rũingĩ mũno rwa ngoro. (Joh. 11:32, 33) Hatarĩ nganja, korũo Mũũmbi witũ ũrĩ wendo ndatũũmbĩte tũtũũrage tene na tene, ndangĩatũheire wendi ta ũcio na ũhoti ta ũcio tombo witũ ũkoragwo naguo. No tũrĩ na itũmi ingĩ cia gũtũma twĩtĩkie atĩ no tũtũũre tene na tene. Rekei twarĩrĩrie maũndũ mamwe Jehova eekire tene na mangĩ areka ihinda-inĩ rĩrĩ maronania atĩ ndarĩ acenjia muoroto ũrĩa aarĩ naguo kĩambĩrĩria-inĩ.
Nĩ ũndũ wa muoyo wa tene na tene ũrĩa twĩrĩirũo, nĩ tũkenaga gwĩcũrania igũrũ rĩgiĩ maũndũ marĩa tũkaahota gwĩka mahinda mokĩte (Rora kĩbungo kĩa 7) c
MUOROTO WA JEHOVA NDŨCENJETIE
8. Isaia 55:11 ĩtũheaga ũũma ũrĩkũ ũhoro-inĩ wĩgiĩ muoroto wa Jehova gũtwerekera?
8 O na gũtuĩka Adamu na Hawa nĩ meehirie na makĩrehera ciana ciao gĩkuũ, Jehova ndaacenjirie meciria igũrũ rĩgiĩ muoroto wake. (Thoma Isaia 55:11.) Muoroto wake wa atĩ andũ ehokeku magaatũũra tene na tene ũrĩ o ho. Nĩ tũmenyaga ũguo tondũ wa maũndũ marĩa Jehova augĩte na ageka nĩguo ahingie muoroto wake.
9. Ngai eranĩire atĩa? (Danieli 12:2, 13)
9 Jehova nĩ eranĩire atĩ nĩ akaariũkia andũ arĩa makuĩte na amahe mweke wa gũtũũra tene na tene. (Atũm. 24:15; Tit. 1:1, 2) Ayubu, mũthuri warĩ mwĩhokeku, aarĩ na ma atĩ Jehova nĩ eriragĩria mũno kũriũkia arĩa makuĩte. (Ayub. 14:14, 15) Nake mũnabii Danieli nĩ ooĩ atĩ andũ nĩ mangĩkaariũkio na maheo mweke wa gũtũũra tene na tene. (Thab. 37:29; thoma Danieli 12:2, 13.) Ayahudi matukũ-inĩ ma Jesu o nao nĩ mooĩ atĩ Jehova nĩ angĩkaahe ndungata ciake njĩhokeku “muoyo wa tene na tene.” (Luk. 10:25; 18:18) Jesu nĩ aaririe ũhoro wa kĩĩranĩro kĩu maita maingĩ na we mwene nĩ aariũkirio nĩ Ithe.—Mat. 19:29; 22:31, 32; Luk. 18:30; Joh. 11:25.
Ũriũkio ũrĩa wekirũo nĩ Elija ũtũmaga ũkorũo na ũũma ũrĩkũ? (Rora kĩbungo gĩa 10)
10. Ũriũkio ũrĩa wekĩkire mahinda-inĩ ma tene wonanagia atĩa? (Rora mbica.)
10 Jehova nĩwe Mũheani wa Muoyo na arĩ na hinya wa gũcokia andũ muoyo. Nĩ aaheire mũnabii Elija hinya wa kũriũkia mũriũ wa mũtumia wa ndigwa wa Zarefathu. (1 Ath. 17:21-23) Thutha ũcio, mũnabii Elisha agĩteithio nĩ Ngai nĩ aahotire kũriũkia kahĩĩ ka mũtumia Mũshunami. (2 Ath. 4:18-20, 34-37) Ngerekano icio cia andũ maariũkirio o hamwe na ingĩ, nĩ cionanagia atĩ Jehova arĩ na hinya wa gũcokia andũ muoyo. Rĩrĩa Jesu aarĩ gũkũ thĩ, nĩ oonanirie atĩ Ithe nĩ aamũheete hinya wa kũriũkania. (Joh. 11:23-25, 43, 44) Rĩu Jesu arĩ kũrĩa igũrũ na nĩ aheetwo “wathani wothe kũrĩa igũrũ o na gũkũ thĩ.” Nĩ ũndũ ũcio, arĩ na ũhoti wa kũriũkia “arĩa othe marĩ thĩinĩ wa mbĩrĩra” marĩ na kĩĩrĩgĩrĩro gĩa gũtũũra tene na tene.—Mat. 28:18; Joh. 5:25-29.
11. Ũkũũri ũkoragwo na itemi rĩrĩkũ harĩ andũ gũtũũra tene na tene?
11 Nĩ kĩĩ gĩatũmire Jehova etĩkĩrie Mũrũ wake endete akue gĩkuũ kĩa ruo? Jesu nĩ aataarĩirie gĩtũmi rĩrĩa aaugire ũũ: “Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Joh. 3:16) Rĩrĩa Ngai aarutire Mũrũ wake arĩ ũkũũri nĩ ũndũ wa mehia maitũ, nĩ aatũhotithirie kũgĩa na mweke wa gũtũũra tene na tene. (Mat. 20:28) Mũtũmwo Paulo nĩ aataarĩirie ũndũ ũcio wa bata wĩgiĩ muoroto wa Ngai rĩrĩa aandĩkire ũũ: “Tondũ gĩkuũ gĩokire kũgerera harĩ mũndũ, kũriũkio kwa arĩa akuũ o nakuo gũũkaga kũgerera harĩ mũndũ. Nĩ gũkorũo o ta ũrĩa othe makuaga nĩ ũndũ wa Adamu, noguo othe magaacokio muoyo nĩ ũndũ wa Kristo.”—1 Kor. 15:21, 22.
12. Jehova akaahingia muoroto wake atĩa?
12 Jesu aarutire arũmĩrĩri ake mahoyage Ũthamaki wa Ngai ũũke na atĩ wendi wa Ngai wĩkĩke gũkũ thĩ. (Mat. 6:9, 10) Muoroto ũmwe wa Ngai nĩ andũ matũũre gũkũ thĩ tene na tene. Nĩguo ahingie ũndũ ũcio, Jehova nĩ amũrĩte Mũrũ wake arĩ Mũthamaki wa Ũthamaki wa Kĩĩmesia. Ngai nĩ akoretwo agĩcokanĩrĩria andũ 144,000 kuuma gũkũ thĩ, nĩguo makaanyitanĩra na Jesu harĩ kũhingia wendi wa Ngai.—Kũg. 5:9, 10.
13. Jehova areka atĩa ihinda-inĩ rĩrĩ, na ũrĩ na itemi rĩrĩkũ ũndũ-inĩ ũcio?
13 Jehova ihinda-inĩ rĩrĩ nĩ aracokanĩrĩria “andũ kĩrĩndĩ kĩnene” na akamaruta gũtuĩka raia a Ũthamaki wake. (Kũg. 7:9, 10; Jak. 2:8) O na gũtuĩka andũ aingĩ thĩinĩ wa thĩ ũmũthĩ nĩ magayũkanĩte nĩ ũndũ wa rũmena na mbaara, andũ acio a kĩrĩndĩ kĩnene nĩ merutanagĩria kweheria rũmena rwa mũthemba o wothe gatagatĩ-inĩ kao. Na njĩra ya mũhaano, nĩ maratura hiũ ciao cia njora igatuĩka hiũ cia mĩraũ. (Mik. 4:3) Handũ ha kũnyitanĩra mbaara-inĩ iria itũmaga andũ aingĩ makue, nĩ marateithia andũ kuona “muoyo ũrĩa wa ma” na njĩra ya kũmaruta igũrũ rĩgiĩ Ngai ũrĩa wa ma na mĩoroto yake. (1 Tim. 6:19) No mokĩrĩrũo nĩ andũ ao a famĩlĩ kana magĩe na mathĩna ma mbeca nĩ ũndũ wa kũnyita mbaru Ũthamaki wa Ngai, no Jehova nĩ atigagĩrĩra atĩ marĩ na indo iria marabatara. (Mat. 6:25, 30-33; Luk. 18:29, 30) Maũndũ macio nĩ matũmaga twĩtĩkie atĩ Ũthamaki wa Ngai ũrĩ kuo na atĩ nĩ ũgũthiĩ na mbere kũhingia muoroto wa Jehova.
IHINDA RĨEGA RĨRĨ MBERE
14-15. Kĩĩranĩro kĩa Jehova gĩa gũkaaniina gĩkuũ tene na tene mũthia-inĩ gĩkaahinga atĩa?
14 Jesu rĩu nĩ Mũthamaki wa Ũthamaki wa Ngai kũrĩa igũrũ na nĩ arĩhingia ciĩranĩro ciothe iria Jehova eranĩire. (2 Kor. 1:20) Kuuma mwaka wa 1914, Jesu akoretwo akĩhoota thũ ciake. (Thab. 110:1, 2) Ica ikuhĩ, Jesu hamwe na arĩa magaathana nake nĩ mekũrĩkia ũhootani wao na maniine andũ arĩa oru.—Kũg. 6:2.
15 Hĩndĩ ya Wathani wa Mĩaka Ngiri wa Jesu, andũ arĩa akuũ nĩ makaariũkio, na andũ arĩa athĩki nĩ magaateithio gũtuĩka akinyanĩru. Thutha wa igerio rĩa mũthia, andũ arĩa Jehova akauga atĩ nĩ athingu “nĩ makaagaya thĩ, na magaatũũra thĩinĩ wayo tene na tene.” (Thab. 37:10, 11, 29) Na ũndũ wa gũcanjamũra nĩ atĩ ‘thũ ya mũico, nĩyo gĩkuũ, nĩ ĩkaaniinwo.’—1 Kor. 15:26.
16. Muoroto witũ mũnene wa gũtungatĩra Jehova wagĩrĩirũo gũkorũo ũrĩ ũrĩkũ?
16 O ta ũrĩa tuona, kĩĩrĩgĩrĩro gitũ gĩa gũtũũra tene na tene kĩĩhocetie biũ harĩ Kiugo kĩa Ngai. Kĩĩrĩgĩrĩro kĩu nĩ gĩtũteithagia gũikara tũrĩ ehokeku matukũ-inĩ maya maritũ ma kũrigĩrĩria. Ĩndĩ nĩguo tũkenie Jehova, tũtiagĩrĩirũo kũmũtungatĩra nogetha tũgaatũũra tene na tene. Wendo witũ mũnene harĩ Jehova na Jesu, nĩguo ũndũ ũrĩa mũnene ũbatiĩ gũtũma tũkorũo tũrĩ ehokeku harĩ o. (2 Kor. 5:14, 15) Wendo ũcio nĩguo ũtũmaga twĩgerekanie nao na ũgatũtindĩka kũhunjĩria andũ arĩa angĩ igũrũ rĩgiĩ kĩĩrĩgĩrĩro gitũ. (Rom. 10:13-15) Rĩrĩa tweruta gũkorũo tũtarĩ na mwĩyendo na tũrĩ ataana, nĩ tũtuĩkaga andũ arĩa Jehova angĩenda matuĩke arata ake tene na tene.—Ahib. 13:16.
17. Nĩ igũrũ ritũ gwĩka atĩa nĩguo tũkoona muoyo wa tene na tene? (Mathayo 7:13, 14)
17 Hihi nĩ tũgaakorũo gatagatĩ-inĩ ka andũ arĩa makaaheo muoyo wa tene na tene? Jehova nĩ atũheete mweke ũcio. Rĩu nĩ igũrũ ritũ gũtũũra njĩra-inĩ ĩrĩa ĩtongoragia muoyo-inĩ wa tene na tene. (Thoma Mathayo 7:13, 14.) No hihi ũtũũro ũgaakorũo ũhaana atĩa rĩrĩa tũgaatũũra tene na tene? Nĩ tũkoona macokio ma kĩũria kĩu gĩcunjĩ-inĩ kĩrĩa kĩrũmĩrĩire.
RWĨMBO NA. 141 Kĩama kĩa Ngai gĩa Gũtũhe Muoyo
a Hihi nĩ wĩriragĩria gũgaatũũra tene na tene? Jehova nĩ eranĩire atĩ kwĩ hĩndĩ tũgaatũũra tũtegwĩtigĩra atĩ nĩ tũgũkua. Gĩcunjĩ-inĩ gĩkĩ nĩ tũkwarĩrĩria itũmi imwe ingĩtũteithia gũkorũo na ma biũ atĩ Jehova nĩ akaahingia kĩĩranĩro gĩake.
b Rora gathandũkũ karĩ na kĩongo “ Ciugo ‘Tene na Tene’ Thĩinĩ wa Bibilia.”
c GŨTAARĨRIA MBICA: Mũrũ wa Ithe witũ mũkũrũ akĩhũũra mbica ya maũndũ mamwe agaakenera rĩrĩa tũgaatũũra tene na tene.
