Ĩtĩkĩria Jehova Agũtongorie Harĩ Wĩyathi wa Ma
Ĩtĩkĩria Jehova Agũtongorie Harĩ Wĩyathi wa Ma
“[Cũthagĩrĩria] watho ũrĩa ũtarĩ wa ũkombo.”—JAK. 1:25.
NO ŨTAARĨRIE?
Nĩ watho ũrĩkũ werekagĩria harĩ wĩyathi wa ma, na nĩ a magunĩkaga nĩguo?
Hitho ya kũgĩa na wĩyathi wa ma nĩ ĩrĩkũ?
Nĩ wĩyathi ũrĩkũ ũkaaheo arĩa othe mekũrũmia njĩra ya muoyo?
1, 2. (a) Nĩ kĩĩ kĩrekĩka harĩ wĩyathi thĩinĩ wa thĩ, na nĩkĩ? (b) Nĩ wĩyathi ũrĩkũ ndungata cia Jehova ikaaheo?
TŨRATŨŨRA ihinda rĩrĩ na wongerereku wa ũkoroku, uuni watho, na ũhinya. (2 Tim. 3:1-5) Nĩkĩo thirikari irathondeka mawatho merũ, ikongerera thigari, na ikahũthĩra macini cia gũkũũrana eki naĩ. Mabũrũri-inĩ mamwe, raia mageragia kwĩgitĩra o ene na njĩra ya gwĩkĩra ing’ora mĩciĩ-inĩ yao, o ũndũ ũmwe na kuongerera konji na ngiri cia thitima. Aingĩ matiumaga nja ũtukũ kana kũreka ciana ciao ithaakĩre nja itarĩ na wa gũcirora, kũrĩ mũthenya kana ũtukũ. Hatarĩ nganja, wĩyathi ũrathiĩ ũthirĩte, na ũndũ ũcio kwahoteka nĩ ũgũthiĩ na mbere.
2 Thĩinĩ wa mũgũnda wa Edeni, Shaitani onanirie atĩ kũrega gũtongorio nĩ Jehova nokuo kũngĩhe mũndũ wĩyathi wa ma. Maheeni macio nĩ monekete atĩ maarĩ moru mũno na ma gĩcambio! Ma nĩ atĩ, o ũrĩa andũ mararegana na ithimi iria Ngai aigĩte cia mĩtugo, noguo mĩnyamarĩko ĩrongerereka harĩ kĩrĩndĩ. Rĩrĩa maũndũ mathũka ũguo, o na ithuĩ tũrĩ ndungata cia Jehova nĩ tũhutagio. O na kũrĩ ũguo, tũrĩ na kĩĩrĩgĩrĩro gĩa kuona andũ magĩkũũrũo ũkombo-inĩ wa mehia na gĩkuũ na gĩa gũkenera kĩrĩa Bibilia ĩtaga ‘wĩyathi wĩ na riri ũrĩa ũkaheo ciana cia Ngai.’ (Rom. 8:21) Jehova o na nĩ ambĩrĩirie kũhaarĩria ndungata ciake nĩ ũndũ wa wĩyathi ũcio. Na njĩra ĩrĩkũ hihi?
3. Nĩ watho ũrĩkũ Jehova aheete arũmĩrĩri a Kristo, na nĩ ciũria irĩkũ tũkwarĩrĩria?
3 Macokio mehocetie harĩ kĩrĩa mwandĩki wa Bibilia Jakubu, eetire ‘watho ũrĩa mwagĩrĩru kũna ũtarĩ wa ũkombo.’ (Thoma Jakubu 1:25.) Bibilia imwe igĩtaarĩria watho ũcio, ciwĩĩtaga “watho ũrĩa ũtũheaga wĩyathi” (The New English Bible) na “watho ũrĩa mũkinyanĩru wa wĩyathi” (The New American Bible). Kaingĩ andũ makuruhithanagia watho na mĩhĩnga, no ti wĩyathi. No hihi-rĩ, ‘watho ũrĩa mwagĩrĩru kũna ũtarĩ wa ũkombo’ nĩ kĩĩ? Na watho ũcio ũtũheaga wĩyathi atĩa?
WATHO ŨRĨA ŨKŨŨRAGA ANDŨ ŨKOMBO-INĨ
4. ‘Watho ũrĩa mwagĩrĩru kũna ũtarĩ wa ũkombo’ nĩ kĩĩ, na nĩ a magunĩkaga nĩguo?
4 ‘Watho ũrĩa mwagĩrĩru kũna ũtarĩ wa ũkombo’ ti watho wa Musa, amu watho ũcio warĩ wa kwanĩka mehia ningĩ nĩ waahingirio nĩ Kristo. (Mat. 5:17; Gal. 3:19) Kwoguo-rĩ, watho ũrĩa Jakubu aaragĩrĩria nĩ ũrĩkũ? Aaragĩrĩria ũhoro wa “watho wa Kristo,” o guo wĩtagwo “watho ũrĩa wa wĩtĩkio” o na ‘watho wa arĩa matarĩ ũkombo-inĩ.’ (Gal. 6:2; Rom. 3:27; Jak. 2:12) Ũguo nĩ kuuga atĩ, “watho ũrĩa mwagĩrĩru kũna,” nĩ maũndũ marĩa mothe Jehova endaga twĩke. Akristiano arĩa aitĩrĩrie maguta hamwe na “ng’ondu ingĩ” nĩ magunĩkaga nĩguo.—Joh. 10:16.
5. Nĩkĩ watho ũrĩa ũtarĩ wa ũkombo ti mũritũ?
5 Ngũrani na mawatho ma mabũrũri maingĩ, “watho ũrĩa mwagĩrĩru kũna” ti mũritũ na ndũrĩ maũndũ maingĩ, ũkoragwo na mawatho mahũthũ na motaaro ma mũthingi. (1 Joh. 5:3) Jesu oigire ũũ: “Icoki rĩakwa nĩ rĩnyoroku, o na mũrigo wakwa nĩ mũhũthũ.” (Mat. 11:29, 30) Hamwe na ũguo, “watho ũrĩa mwagĩrĩru kũna” ndũkoragwo ũiyũire mĩkaana na matuĩro tondũ mũthingi waguo nĩ wendo na wandĩkĩtwo meciria-inĩ na ngoro-inĩ cia andũ, no ti ihengere-inĩ cia mahiga.—Thoma Ahibirania 8:6, 10.
ŨRĨA “WATHO ŨRĨA MWAGĨRĨRU” ŨTŨKŨŨRAGA ŨKOMBO-INĨ
6, 7. Tũngiuga atĩa igũrũ rĩgiĩ ithimi cia Jehova, na nĩkĩ watho ũrĩa ũtarĩ wa ũkombo nĩ ũtũheaga wĩyathi?
6 Mĩhaka ĩrĩa Jehova aigĩire andũ nĩ ya kũmaguna na kũmagitĩra. Kwa ngerekano, ta wĩcirie ũhoro wĩgiĩ mawatho ma ndũire ta ũrĩa ũtũmaga indo ciaikio igũrũ icoke thĩ. Andũ matitetaga atĩ mawatho macio nĩ mamahinyagĩrĩria. Ithenya rĩa ũguo, nĩ mamakenagĩra, nĩ kũmenya atĩ nĩ ma kũmaguna. Ũndũ ũmwe na ũguo, ithimi cia Jehova cia mĩtugo, iria cionanĩtio ‘watho-inĩ ũrĩa mwagĩrĩru kũna’ wa Kristo, nĩ cia kũguna andũ.
7 Makĩria ma gũtũgitĩra, watho ũcio ũtarĩ wa ũkombo nĩ ũtũhotithagia kũhingia merirĩria maitũ mothe marĩa magĩrĩire tũtegwĩthũkia kana kũingĩrĩra wĩyathi wa andũ arĩa angĩ. Kwoguo, hitho ya kũgia wĩyathi wa ma—kũhota kũhingia merirĩria maitũ—nĩ gũkũria merirĩria marĩa magĩrĩire, marĩa maringaine na ngumo cia Jehova na ithimi ciake. Na njĩra ĩngĩ, no mũhaka twĩrute kwenda maũndũ marĩa Jehova endete, na gũthũũra marĩa athũire, na watho ũrĩa ũtarĩ wa ũkombo nĩ ũtũteithagĩrĩria gwĩka ũguo.—Amos 5:15.
8, 9. Arĩa marũmagĩrĩra watho ũrĩa ũtarĩ wa ũkombo magunĩkaga atĩa? Heana ngerekano.
8 Nĩ ũndũ wa kwaga gũkinyanĩra, ti ũndũ mũhũthũ gũtooria merirĩria moru. O na kũrĩ ũguo, tũngĩathĩkĩra watho ũrĩa ũtarĩ wa ũkombo tũrĩ na wĩhokeku, nĩ tũkenagĩra wĩyathi waguo o na rĩu. Kwa ngerekano: Jay, mũrutwo ũmwe mwerũ wa Bibilia, aarĩ mũnyui wa thigara. Rĩrĩa aamenyire atĩ mũtugo ũcio wake ndwakenagia Ngai, akĩona bata wa gũtua itua. Hihi angĩathiire na mbere gũtongorio nĩ merirĩria ma mwĩrĩ wake-ĩ, kana gwathĩkĩra Jehova? Wega nĩ atĩ aathurire gũtungatĩra Ngai, o na gũtuĩka no aiguaga akĩenda mũno kũnyua thigara. Hihi aiguire atĩa aatooria mũtugo ũcio mũũru? Oigire ũũ thutha-inĩ: “Ndaiguire ndĩ na wĩyathi mũnene na gĩkeno kĩingĩ ma.”
9 Jay nĩ eerutire na maũndũ marĩa eeyoneire, atĩ wĩyathi wa gũkũ thĩ, ũrĩa wĩtĩkagĩria andũ ‘mecirie maũndũ ma mwĩrĩ,’ ũingagĩria mũndũ ũkombo-inĩ, no wĩyathi wa Jehova, wa ‘gwĩciria maũndũ ma roho,’ ũkũũraga andũ ũkombo-inĩ na ũgatongoria harĩ “muoyo na thayũ.” (Rom. 8:5, 6) Jay aarutire kũ hinya wa gũtooria mũtugo ũcio wa ũkombo? Ndwoimire kũrĩ we; woimire kũrĩ Ngai. Oigire ũũ: “Nĩ ndeerutaga Bibilia itegũtĩrĩria, ngahoya heo roho mũtheru, na ngacaria ũteithio wa kĩũngano gĩa Gĩkristiano, kĩrĩa kĩandeithirie kĩrĩ na wendo.” Maũndũ oro macio no matũteithie tũgĩcaria wĩyathi wa ma. Rekei tuone nĩ na njĩra ĩrĩkũ.
CŨTHAGĨRĨRIA THĨINĨ WA KIUGO KĨA NGAI
10. ‘Gũcũthĩrĩria’ thĩinĩ wa kiugo kĩa Ngai nĩ kuuga atĩa?
10 Gĩcunjĩ kĩmwe kĩa Jakubu 1:25 kiugaga ũũ: ‘Mũndũ ũrĩa ũcũthagĩrĩria watho ũrĩa mwagĩrĩru kũna, o ũrĩa ũtarĩ wa ũkombo, na agatũũra aũcũthagĩrĩria-rĩ, nĩ akarathimĩrũo maũndũ marĩa ekaga.’ Kiugo gĩa Kĩgiriki kĩrĩa gĩtaũrĩtwo “ũcũthagĩrĩria” kiugĩte “kũinamĩrĩra nĩguo wone kĩndũ,” kuonania kĩyo kĩingĩ nĩ kĩbataranagia. Ĩĩ-ni, tũngĩenda watho ũrĩa ũtarĩ wa ũkombo ũtongoragie meciria na ngoro citũ, no mũhaka tũhingie itemi ritũ na njĩra ya kwĩruta Bibilia na kĩyo na gwĩcũrania maũndũ macio na njĩra ya mahoya.—1 Tim. 4:15.
11, 12. (a) Jesu aatĩtĩrithirie atĩa bata wa gũtongoragio nĩ ũhoro ũrĩa wa ma? (b) Kũringana na kĩonereria kĩu kĩagwetwo, nĩ ũgwati ũrĩkũ arĩ o mũhaka andũ ethĩ metheme?
11 O tũgĩkaga ũguo, no mũhaka ‘tũrũmanĩrĩrie,’ kana tũthiĩ na mbere kũhũthĩra Kiugo kĩa Ngai, na njĩra ĩyo ma ĩgatongoragia ũtũũro witũ. Jesu nĩ oigire ũndũ ta ũcio rĩrĩa eerire andũ amwe arĩa maamwĩtĩkĩtie ũũ: ‘Inyuĩ mwatũũra o mwĩtĩkĩtie uuge wakwa, mũrĩ arutwo akwa kũna, na nĩ mũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.’ (Joh. 8:31, 32) Ibuku rĩmwe riugaga atĩ kiugo “nĩmũkamenya” kĩrĩa kĩhũthĩrĩtwo haha, ningĩ no kiuge kuonania ngatho tondũ “ũndũ ũrĩa mũndũ ‘amenyete’ nĩ wa bata mũno harĩ ũcio ũũmenyete.” Kwoguo, ‘tũmenyaga’ ma biũ rĩrĩa twamĩĩtĩkĩria ĩtongorie ũtũũro witũ. Tũngĩka ũguo no tũhote kuuga atĩ “ũhoro wa Ngai” nĩ “ũrutaga wĩra” thĩinĩ witũ, ũkaagĩria ũmũndũ witũ nĩguo tuonanie ngumo ta cia Ithe witũ wa igũrũ wega makĩria.—1 Thes. 2:13.
12 Ta wĩyũrie ũũ, ‘Niĩ nĩ menyete ũhoro ũrĩa wa ma kũna? Hihi nĩguo ũndongoragia ũtũũro-inĩ? Kana no ndĩĩriragĩria “wĩyathi” ũmwe ũrĩa umanaga na thĩ ĩno?’ Akĩaria ũhoro wĩgiĩ wĩthĩ wake, mwarĩ wa Ithe witũ ũmwe ũrĩa waarerirũo nĩ aciari Akristiano aandĩkire ũũ: “Ũngĩrerũo nĩ aciari moĩ ma, nĩ ta Jehova akoragwo hamwe nawe hĩndĩ ciothe. No niĩ-rĩ, ndiamũmenyete biũ. Ndigana kwĩruta gũthũũra kĩrĩa athũire. Ndietĩkĩtie atĩ nĩ atindanagĩra na ciĩko ciakwa. Na ndierutĩte kũmũkayagĩra rĩrĩa ndĩ thĩna-inĩ. Ndeehokaga ũũgĩ wakwa mwene, ũrĩa rĩu ndĩkĩtie kũmenya atĩ warĩ ũrimũ mũtheri tondũ ndioĩ ũndũ.” Wega nĩ atĩ, thutha-inĩ mwarĩ ũcio wa Ithe witũ nĩ aamenyire atĩ mwĩcirĩrie wake warĩ mũhĩtanu mũno, na agĩĩka ũgarũrũku mũnene. O na akĩambĩrĩria gũtungata arĩ painia wa hĩndĩ ciothe.
ROHO MŨTHERU NO ŨGŨTEITHĨRĨRIE KUUMA ŨKOMBO-INĨ
13. Roho mũtheru wa Ngai ũtũteithagĩrĩria atĩa kuuma ũkombo-inĩ?
13 Tũthomaga ũũ thĩinĩ wa 2 Akorintho 3:17: “Harĩa Roho wa Mwathani ũrĩ, nĩho hohoranagĩrũo ũkombo.” Roho mũtheru ũkoragwo na itemi rĩrĩkũ harĩ wĩyathi witũ? Ũndũ ũmwe nĩ atĩ nĩ ũtũteithagia gũkũria thĩinĩ witũ ngumo cia bata harĩ kũgĩa wĩyathi ta—‘wendani, gĩkeno, thayũ, gũkirĩrĩria, gũtugana, gwĩkana wega, kwĩhokeka, kũhoorera, na kwĩgirĩrĩria.’ (Gal. 5:22, 23) Ngumo icio ingĩaga, na makĩria wendani, andũ matingĩkorũo na wĩyathi wa ma—ũndũ ũrĩa wĩyonanĩtie biũ thĩinĩ wa thĩ ũmũthĩ. Thutha wa kũgweta maciaro ma roho, mũtũmwo Paulo ongereire ũũ: “Macio-rĩ, gũtirĩ watho wa kũgiria mekagwo.” Hihi eendaga kuuga atĩa? Gũtirĩ watho o na ũmwe ũngĩgiria mũndũ gũthiĩ na mbere gũkũria maciaro ma roho wa Ngai. (Gal. 5:18) Ningĩ-rĩ, watho ta ũcio ũngĩkorũo na bata ũrĩkũ? Wendi wa Jehova nĩ tũkũrie ngumo ta cia Kristo tene na tene na tũcionanagie hatarĩ ũndũ ũgũtũgirĩrĩria.
14. Nĩ na njĩra irĩkũ arĩa matongoragio nĩ roho wa gũkũ thĩ matuĩkaga ngombo ciaguo?
14 Arĩa matongoragio nĩ roho wa gũkũ thĩ na arĩa marũmagĩrĩra merirĩria mao ma mwĩrĩ no mecirie marĩ na wĩyathi. (Thoma 2 Petero 2:18, 19.) No ũũma nĩ atĩ, matirĩ wĩyathi o na mũnini. Mabataraga mawatho maingĩ mũno nĩguo magirĩrĩrio gwĩka kũringana na merirĩria na mĩtugo yao mĩũru. Paulo oigire ũũ: ‘Watho ndwathanagwo nĩ ũndũ wa mũndũ ũrĩa mũthingu, tiga o ũndũ wa arĩa aregi watho na aremi.’ (1 Tim. 1:9, 10) Ningĩ makoragwo marĩ ngombo cia mehia, makagucĩrĩrio gwĩkaga ‘maũndũ marĩa mendagwo nĩ mwĩrĩ.’ (Ef. 2:1-3) Na njĩra ĩngĩ, andũ ta acio mahaana tũthigiriri tũratamba tũrorete mbakũri-inĩ ya ũũkĩ. Matongoretio nĩ merirĩria mao, mekoraga hatĩka-inĩ.—Jak. 1:14, 15.
WĨYATHI KĨŨNGANO-INĨ GĨA GĨKRISTIANO
15, 16. Harĩ bata ũrĩkũ wa kũnyitanĩra na kĩũngano, na nĩ wĩyathi ũrĩkũ tũkenagĩra?
15 Rĩrĩa waambĩrĩirie kũnyitanĩra na kĩũngano gĩa Gĩkristiano, ti kĩama kĩa mũthemba mũna waingĩrire. Ithenya rĩa ũguo, wokire thĩinĩ wa kĩũngano tondũ Jehova nĩ aakũgucĩrĩirie. (Joh. 6:44) Nĩ kĩĩ gĩatũmire eke ũguo? Hihi nĩ kuona onire wĩ mũndũ mũthingu na mwĩtigĩri Ngai? Wahota gũcokia ũũ: “Aca o na hanini!” Angĩkorũo tiguo-rĩ, nĩ kĩĩ Ngai onire? Kĩrĩa onire nĩ ngoro ingĩathĩkĩra watho wake ũrĩa ũtarĩ wa ũkombo, na ĩngĩĩtĩkĩra gũtongorio nĩwe na njĩra ya wendo. Thĩinĩ wa kĩũngano, Jehova nĩ amenyeretie ngoro yaku na njĩra ya gũkũhe irio cia kĩĩroho, gũgũkũũra kuumana na morutani na wĩtĩkio wa ndini cia maheeni, na gũkũruta ũrĩa ũngĩkũria ũmũndũ ta wa Kristo. (Thoma Aefeso 4:22-24.) Nĩ ũndũ ũcio, nĩ ũgĩte na mweke wa gũkorũo gatagatĩ-inĩ ka andũ arĩa oiki thĩinĩ wa thĩ mangĩĩtwo ‘a watho ũrĩa ũtarĩ wa ũkombo.’—Jak. 2:12.
16 Ta wĩcirie ũndũ ũyũ: Rĩrĩa wĩ hamwe na andũ arĩa mendete Jehova na ngoro yao yothe-rĩ, hihi nĩ ũiguaga guoya? Nĩ ũikaraga ũkĩĩhũgaga? Mũgĩteereta na arĩa angĩ Nyũmba-inĩ ya Ũthamaki-rĩ, hihi nĩ ũikaraga ũrũmĩtie indo ciaku itikae kũiyũo? Tiguo o na hanini! Ũiguaga ũiganĩire na wĩna wĩyathi. Hihi no ũigue ũguo ũrĩ hamwe na andũ a thĩ? No hinya! Makĩria ma ũguo-rĩ, wĩyathi ũrĩa ũrakenera rĩu gatagatĩ-inĩ ka andũ a Ngai ũronania wĩyathi ũrĩa tũrĩheo.
‘WĨYATHI WĨ NA RIRI ŨRĨA ŨKAHEO CIANA CIA NGAI’
17. Gũkũũrũo kwa andũ gũkuruhanĩte atĩa na “kũguũranĩrio gwa ciana cia Ngai”?
17 Akĩarĩrĩria wĩyathi ũrĩa Jehova akahe ndungata ciake cia gũkũ thĩ-rĩ, Paulo aandĩkire ũũ: “Indo ciothe iria ciombirũo itũire o cietereire kũguũranĩrio gwa ciana cia Ngai.” Agĩcoka akĩongerera ũũ: “Ciũmbe icio, cio nyene, no ikohorũo ciume ũkombo-inĩ wa ũhoro wa kũbutha ikinye ũhoro-inĩ ũrĩa ũtarĩ wa ũkombo o na hanini, o ũrĩa ũkonainie na riri ũrĩa ũkaheo ciana cia Ngai.” (Rom. 8:19-21) “Ciũmbe icio” nĩ andũ arĩa marĩ na kĩĩrĩgĩrĩro gĩa gũgaatũũra gũkũ thĩ, arĩa makaagunĩka kuumana na “kũguũranĩrio” gwa ciana cia Ngai njitĩrĩrie maguta nĩ roho. Kũguũranĩrio kũu gũkaambĩrĩria rĩrĩa “ciana” icio, iria iriũkĩtio na igathiĩ igũrũ, ikaanyitanĩra na Kristo kũniina waganu thĩinĩ wa thĩ na kũhonokia “kĩrĩndĩ kĩingĩ,” kĩingĩre mũtabarĩre-inĩ mwerũ.—Kũg. 7:9, 14.
18. Andũ arĩa aathĩki makongererũo wĩyathi atĩa, na marigĩrĩrio-inĩ magaakenera wĩyathi ũrĩkũ?
18 Andũ arĩa magaakũũrũo nĩ magaakenera wĩyathi matarĩ maakorũo naguo—wĩyathi wa kwaga kũhĩtithio nĩ Shaitani na ndaimono. (Kũg. 20:1-3) Kaĩ nĩ makahurũkio-ĩ! Thutha ũcio, andũ 144,000 arĩa magaakorũo marĩ athamaki na athĩnjĩri Ngai hamwe na Kristo nĩ magathiĩ magĩkinyagĩria andũ irathimo cia igongona rĩa ũkũũri nginya rĩrĩa magaakorũo meheretie biũ mehia ma Adamu na kwaga gũkinyanĩra. (Kũg. 5:9, 10) Thutha wa gũkorũo marĩ ehokeku o na maagerio, andũ nĩ makagĩa wĩyathi mũkinyanĩru ũrĩa Jehova aatanyĩte—‘wĩyathi wĩna riri ũrĩa ũkaheo ciana cia Ngai.’ Ta wĩcirie! Ndũgacoka kũgiĩka rĩngĩ ũkĩgeria gwĩka ũrĩa Ngai endaga, tondũ mwĩrĩ waku wothe ũgaakorũo wĩ mũkinyanĩru na ũmũndũ waku naguo ũkagarũrũka biũ kũringana na mũhianĩre wa Ngai.
19. Nĩ ũndũ ũrĩkũ arĩ o mũhaka tũthiĩ na mbere gwĩka ũmũthĩ nĩguo tũtũũre njĩra-inĩ ĩrĩa ĩtongoragia harĩ wĩyathi wa ma?
19 Nĩ wĩriragĩria ‘wĩyathi wĩna riri ũrĩa ũkaheo ciana cia Ngai’? Angĩkorũo nĩguo-rĩ, reke meciria na ngoro yaku ithiĩ na mbere gũtongorio nĩ “watho ũrĩa mwagĩrĩru kũna o ũrĩa ũtarĩ wa ũkombo.” Ĩĩ-ni, thomaga Maandĩko na kĩyo. Tũũra kũringana na ma ĩrĩa wĩrutĩte. Hoyaga ũheo roho mũtheru. Wĩrutanĩrie biũ kũgunĩka kuumana na kĩũngano gĩa Gĩkristiano na irio cia kĩĩroho iria Jehova atũheaga. Ndũkareke Shaitani akũheenie, ta ũrĩa aaheenirie Hawa, atũme wĩcirie atĩ mawatho ma Ngai nĩ maimaga mũndũ wĩyathi. Hatarĩ nganja, Mũcukani nĩ mwara mũno. No o ta ũrĩa tũkona thĩinĩ wa gĩcunjĩ kĩrĩa kĩrũmĩrĩire tũtiagĩrĩirũo ‘kũhĩtwo nĩ Shaitani, amu maũndũ marĩa athugundaga tũtirigagwo nĩmo.’—2 Kor. 2:11.
[Ciũria cia wĩruti]
[Mbica karatathi ga 9]
Hihi no ndĩĩriragĩria “wĩyathi” ũmwe ũrĩa umanaga na thĩ ĩno?
[Mbica karatathi ga 9]
Hihi ũhoro ũrĩa wa ma nĩguo ũndongoragia ũtũũro-inĩ?
