“Kĩroto Gĩakwa nĩ Kĩhingu”

Mĩaka 15 na ĩtano mĩhĩtũku, Emilia aatungataga arĩ painia wa hĩndĩ ciothe. No nĩ aatigire ũtungata ũcio. Mĩaka-inĩ ya ica ikuhĩ, eecũũrania mũno igũrũ rĩa ihinda rĩu rĩarĩ na gĩkeno ũtũũro-inĩ wake, nĩ eendire kwandandũra ũtungata wake rĩngĩ.

No wĩra ũrĩa aandĩkĩtwo nĩ woyaga mahinda make maingĩ, na ũndũ ũcio ũkagiria akorũo na gĩkeno. Hĩndĩ ĩmwe, arĩ na arĩa aarutithanagia wĩra nao, oigire ũũ arĩ na kĩeha: “Na arĩ korũo no njĩtĩkĩrio ndutage wĩra mathaa manini!” Mũnene wake aigua ũguo akĩmũũria kana nĩ ma nĩguo eendaga, nake Emilia akĩmwĩra atĩ nĩguo. No rĩrĩ, nĩgetha ahote kũruta wĩra mathaa manini, no mũhaka mũrũgamĩrĩri angĩetĩkĩrire tondũ watho wa kambuni woigĩte aruti wĩra othe meheane biũ. Mwarĩ wa Ithe witũ akĩhaarĩria gũcemania na mũrũgamĩrĩri ũcio na akĩhoya aheo thayũ na ũcamba.

Macemania, Emilia nĩ aahũthĩrire ũũgĩ kũũria anyihĩrio mathaa ma wĩra, arĩ na ũmĩrĩru. Agĩtaarĩria atĩ ahũthagĩra kahinda karĩa atarĩ wĩra-inĩ gũteithia andũ: “Ndĩ Mũira wa Jehova, na nĩ ndeithagia andũ kũgĩa na ũkuruhanu mwega na Ngai. Thikũ ici mĩtugo ya andũ aingĩ ti mĩega. Nĩ marabatara kuonio ithimi njega, na ũũgĩ ũrĩa ndĩmateithagia naguo kuuma Bibilia-inĩ nĩ wa bata mũno harĩ o. Ndingĩenda maũndũ marĩa njĩkaga thutha wa wĩra mathũkie wĩra ũrĩa ndutaga gũkũ, ĩndĩ no nyende ihinda rĩinga-ingĩ rĩa gũteithia andũ. Nĩkĩo ndĩrahoya kũnyihĩrio mathaa ma wĩra.”

Mũrũgamĩrĩri aathikĩrĩirie na kinyi, na akiuga atĩ o nake rĩmwe nĩ eecirĩtie kũruta wĩra wa gũteithia andũ. Agĩcoka akiuga: “Nĩ ũndũ wa itũmi icio waruta, nĩ ngwĩtĩkania na ihoya rĩaku. No hihi nĩ ũramenya atĩ mũcara waku nĩ ũkũnyiha?” Emilia akiuga atĩ nĩ oĩ na kũngĩbatarania, nĩ ekũhũthia mũtũũrĩre wake. Agĩcoka akĩongerera ũũ: “Muoroto wakwa ũrĩa mũnene nĩ gwĩka ũndũ ũngĩteithia andũ biũ.” Mũrũgamĩrĩri akĩmũcokeria ũũ: “Nĩngenagio nĩ andũ arĩa mahũthagĩra mahinda mao gũteithia arĩa angĩ matarĩ na mwĩyendo.”

Gũtirĩ mũndũ thĩinĩ wa kambuni ĩyo wakoretwo etĩkĩrĩtio kũruta wĩra na njĩra njega ũguo. Rĩu Emilia nĩ etĩkĩrĩtio kũruta wĩra thikũ inya tu harĩ kiumia. Ũndũ ũrĩa wamũmakirie nĩ atĩ, nĩ ongereirũo mũcara, na rĩu arĩhagwo mbia o ta iria aarĩhagwo mbere! Oigaga ũũ: “Kĩroto gĩakwa nĩ kĩhingu, na rĩu nĩ ndĩratungata ndĩ painia wa hĩndĩ ciothe rĩngĩ!”

Hihi nĩ wĩcirĩtie ũrĩa ũngĩbanga maũndũ maku nĩguo ũingĩre kana ũcokerere ũtungata wa ũpainia?

[Mbica karatathi ka 32]

Mũrũgamĩrĩri akĩmũcokeria ũũ: “Nĩngenagio nĩ andũ arĩa mahũthagĩra mahinda mao gũteithia arĩa angĩ matarĩ na mwĩyendo.”