Meerutĩire Meyendeire Bũrũri-inĩ wa Ecuador

 MŨRŨ wa ithe witũ ũmwe mwĩthĩ bũrũri-inĩ wa Italia aarĩ hatĩka-inĩ. Aakoretwo arĩkia cukuru ya sekondarĩ, na tondũ nĩwe waahĩtũkĩte biũ kĩrathi kĩao, andũ ao na arutani maamũhatagĩrĩria athingate gĩthomo kĩa yunivasĩtĩ. No rĩrĩ, mĩaka ĩigana ũna kabere, Bruno nĩ eeyamũrĩire Jehova na akĩmwĩra atĩ nĩ arĩigaga wendi wa Ngai mbere ũtũũro-inĩ wake. Aathurire gwĩka atĩa? Aataarĩirie ũũ: “Nĩ ndeerire Jehova mahoya-inĩ atĩ ngũtũũra kũringana na wĩyamũrĩri wakwa na nĩwe ndĩrĩigaga mbere. Na ngĩongerera atĩ ingĩenda ũtũũro wĩ na maũndũ maingĩ ma gwĩka ũtungata-inĩ wake, no ti mũtũũrĩre ũhaana o ũguo.”

 Mĩaka ĩigana ũna thutha ũcio, Bruno nĩ eekorire bũrũri-inĩ wa Ecuador, Amerika ya Mũhuro. Oigaga ũũ: “Jehova aacokirie mahoya makwa makĩria ma ũrĩa ndeerĩgagĩrĩra.” Ũndũ ũrĩa waamũmakirie akinya Ecuador, nĩ gũkora andũ angĩ aingĩ ethĩ take arĩa maathamĩire kuo nĩguo mandandũre ũtungata wao harĩ Jehova.

ANDŨ ETHĨ ARĨA ‘MARORAGIA JEHOVA’

O ta andũ angĩ ethĩ ngiri nyingĩ thĩinĩ wa thĩ, Bruno nĩ eetĩkĩrire rĩĩtana rĩrĩ rĩa Jehova: ‘Ndoriai muone kana ndingĩmũhingũrĩra ndirica cia igũrũ, ndĩmũikũrũkĩrie kĩrathimo kĩingĩ.’ (Mal. 3:10) Wendo wao harĩ Ngai watũmire matue itua rĩa ‘kũroria Jehova’ na njĩra ya kwĩrutĩra mahinda mao, hinya, na indo ciao meyendeire, gũteithĩrĩria wĩra wake thĩinĩ wa bũrũri wĩ na bata mũnene wa ahunjia a Ũthamaki.

Ũndũ wa mbere ũrĩa erutĩri acio meyonagĩra maakinya gĩcigo-inĩ kĩu kĩerũ, nĩ atĩ “magetha nĩ maingĩ, no aruti wĩra nĩ anyinyi.” (Mat. 9:37) Kwa ngerekano, Jaqueline kuuma Njĩrĩmani aandĩkĩire wabici ya rũhonge ya Ecuador ũũ akenete: “Ngoretwo ngĩtungata bũrũri-inĩ wa Ecuador ihinda rĩa mĩaka ĩĩrĩ tu, na ndĩ na arutwo 13 a Bibilia, na 4 gatagatĩ-inĩ kao nĩ mokaga mĩcemanio mategũtĩrĩria. Githĩ ũcio ti ũndũ mwega mũno?” Chantal kuuma Kanada arataarĩria ũũ: “Mwaka wa 2008, nĩ ndaathamĩire mwena ũmwe gĩcũa-inĩ kĩa Ecuador kũrĩa kwarĩ  na kĩũngano kĩmwe tu. Rĩu kwĩna ciũngano ithatũ na mapainia makĩria ma 30 gĩcigo-inĩ kĩu. Gũtirĩ ũndũ ũngĩringithanio na kuona andũ aingĩ erũ magĩthiĩ na mbere kĩĩroho!” Ongereire kuuga ũũ: “Ica ikuhĩ nĩ ndĩrathamĩire taũni ĩrĩ mita 2,743 Irĩma-inĩ cia Andes. Taũni ĩyo ĩkoragwo na andũ makĩria ma 75,000 no gwĩ kĩũngano kĩmwe tu. Nĩ gĩcigo kĩrĩ na uumithio mũno! Nĩ ndĩrakenera mũno ũtungata wakwa.”

MORITŨ MARĨA MAKORAGWO HO

Hatarĩ nganja, gũtungata bũrũri-inĩ mũgeni nĩ gũkoragwo na moritũ. Ma nĩ atĩ, andũ amwe ethĩ maanacemania na mĩhĩnga o na matathamĩte. Kayla kuuma Amerika U.S. oigire ũũ: “Ũrĩa aarĩ na ariũ a Ithe witũ a mũciĩ maiyũkirie ũndũ ũcio o na matarĩ na ũũru nĩ watũmire njũrũo nĩ hinya. Mationaga gĩtũmi kĩa nyende gũthiĩ gũtungata ndĩ painia bũrũri-inĩ mũgeni. Rĩmwe ũndũ ũcio nĩ waatũmaga ndĩyũrie, ‘Hihi itua rĩrĩ ndĩratua nĩ rĩega?’” O na kũrĩ ũguo, Kayla nĩ aathamire. Arataarĩria ũũ: “Kũhoya Jehova mũno na gũteereta na njĩra ndikĩru na aarĩ na ariũ a Ithe witũ agima kĩĩroho nĩ kwandeithirie kuona atĩ Jehova nĩ arathimaga ngoro ĩrĩ na wendi.”

Kwĩruta rũthiomi rũgeni nĩ mũhĩnga harĩ andũ aingĩ. Siobhan kuuma Ireland araririkana ũũ: “Warĩ ũndũ mũritũ harĩ niĩ kũremwo nĩ kwĩyaria. Nĩ ndaabataraga kwĩruta kũgĩa na wetereri, gwĩkĩra kĩyo kũmenya rũthiomi rũu, na gwĩthekerera rĩrĩa ndahĩtia.” Anna kuuma Estonia arongerera ũũ: “Kũmenyera ũrugarĩ mũingĩ, rũkũngũ rũingĩ, na kwaga maĩ mahiũ ma gwĩthamba gũtiarĩ kũritũ ta kwĩruta Kĩhisipania. Rĩmwe ndaiguaga ta ingĩtiga kwĩruta. Nĩ nderutire kũrora kũrĩa ndekaga wega handũ ha kũrĩa ndaahĩtagia.”

Ũritũ ũngĩ ũtangĩhũthio nĩ kũigua kĩeha nĩ ũndũ wa kũraihĩrĩria mũciĩ. Jonathan kuuma Amerika U.S. agĩtĩkania na ũguo oigire ũũ: “Kahinda kanini thutha wa gũkinya, nĩ ndakuire ngoro nĩ kũraihanĩrĩria na arata akwa na andũ a famĩlĩ. No gwĩkĩrĩra wĩruti wakwa wa Bibilia na ũtungata nĩ kwandeithirie gũtooria ũndũ ũcio. Thutha wa ihinda inini, moimĩrĩro mega marĩa ndonire ũtungata-inĩ hamwe na arata erũ arĩa ndagĩire nao kĩũngano-inĩ nĩ kwandeithirie gũcokererũo nĩ gĩkeno gĩakwa.”

 Naguo ũritũ ũngĩ nĩ wa mĩikarĩre. Kaingĩ no yaage kũhaanana na ĩrĩa ũmenyerete. Beau kuuma Kanada aratwĩra ũũ: “Wĩ bũrũri-inĩ wanyu, no ũhũthie indo imwe cia o mũhaka ta maĩ ma mũberethi na thitima. No gũkũ, itimenyagĩrũo.” Ũkĩa, njĩra cia ũthii itarĩ njega, na kwaga gĩthomo, nĩ maũndũ monekaga mabũrũri-inĩ maingĩ marĩa marathiĩ na mbere. Kũrora ngumo iria njega cia aikari a kũrĩa akoragwo, nĩ gũteithagia Ines kuuma Austria kũhiũrania na maũndũ ta macio. Aroiga ũũ: “Nĩ atana mũno, ahooreri, enyihia, na nĩ mateithanagia. Makĩria ma ũguo, nĩ mendete mũno kwĩruta ũhoro wĩgiĩ Ngai.”

‘KĨRATHIMO KĨINGĨ NGINYA MWAGE HANDŨ KĨNGĨIGANĨRA’

O na makĩĩimaga, andũ acio othe ethĩ matungataga bũrũri-inĩ wa Ecuador, nĩ monaga atĩ Jehova nĩ aheanaga ‘agakĩrĩrĩria mũno maũndũ marĩa mothe’ meerĩgagĩrĩra. (Ef. 3:20) Ti itherũ, no moige atĩ nĩ magĩĩte na ‘kĩrathimo kĩingĩ nginya makaaga handũ kĩngĩiganĩra.’ (Mal. 3:10) Ũũ nĩguo maiguaga igũrũ rĩgiĩ ũtungata wao:

Bruno: “Ndaambĩrĩirie ũtungata wakwa gũkũ Ecuador gĩcigo-inĩ kĩega mũno kĩa Amazon. Thutha-inĩ, ngĩteithĩrĩria wĩra wa kwaramia wabici ya rũhonge ya Ecuador. Rĩu ndĩratungata Betheli. Rĩrĩa ndaarĩ Italia, nĩ ndaatuire itua rĩa kũiga Jehova mbere, na nĩ ahingĩtie merirĩria makwa ma kũgĩa na ũtũũro wĩna gĩkeno, na maũndũ maingĩ ma gwĩka ũtungata-inĩ wake.”

Beau: “Nĩ nguhĩrĩirie Jehova makĩria tondũ gũkũ Ecuador, no hote kũhũthĩra mahinda makwa mothe maũndũ-inĩ ma kĩĩroho. Ningĩ, nĩngĩĩte kĩrathimo gĩa gũceera kũndũ kũingĩ kwega—ũndũ ũrĩa ngoretwo ndĩĩrirĩirie gwĩka.”

Anna: “Ndieciragia atĩ no kũhoteke mũndũ ũtarĩ mũhiku ta niĩ akenere ũtũũro ta wa mishonarĩ. No rĩu nĩ njũũĩ atĩ no kũhoteke. Nĩ ũndũ wa kĩrathimo kĩa Jehova, nĩ ngenagĩra gũtua andũ arutwo, gwaka Nyũmba cia Ũthamaki, na ngagĩa na arata erũ.”

Elke: “Ndĩ gwitũ Austria, nĩ kaingĩ ndahoyaga Jehova na arĩ ngĩe mũrutwo ũmwe wa Bibilia. No gũkũ, ndĩ na arutwo a Bibilia 15! Kuona mothiũ makengu ma arutwo marathiĩ na mbere kĩĩroho nĩ gũtũmaga njiganĩre mũno.”

Joel: “Gũthiĩ kũndũ ũtoĩ nĩguo ũgatungatĩre Jehova nĩ ũndũ ũcanjamũraga mũno. Nĩ wĩrutaga kũmwĩhoka makĩria na ũgakena mũno kuona akĩrathima kĩyo gĩaku! Mwaka-inĩ wakwa wa mbere ndoima Amerika U.S., gĩkundi kĩrĩa ndungataga gĩakũrire kuuma ahunjia 6 nginya 21. Hĩndĩ ya Kĩririkano twarĩ andũ 110.”

Ĩ WEE NAWE?

Inyuĩ aarĩ na ariũ a Ithe witũ ethĩ, hihi maũndũ manyu no mamwĩtĩkĩrie gũtungata kũrĩa kũrĩ na bata mũnene wa ahunjia a Ũthamaki? Hatarĩ nganja, gũtua itua iritũ ta rĩu nĩ gũkũbatara mũbango mwega. Makĩria ma ũguo wothe, wendo waku mũingĩ harĩ Jehova na andũ nĩ ũrabatarania nĩguo ũtue itua ta rĩu. Angĩkorũo wĩna wendo ta ũcio na no ũhote, hoya Jehova na kĩyo igũrũ rĩgiĩ ũndũ ũcio wa gũtungata bũrũri-inĩ mũgeni. Hamwe na ũguo, menyithia aciari aku Akristiano na athuri a kĩũngano wendi waku. Nĩ ũkuona atĩ o nawe no ũgĩe na itemi ũtungata-inĩ ũyũ mũtheru wa gũcanjamũra na gũtũma mũndũ aiganĩre.

[Mbica karatathi ga 3]

“Kũhoya Jehova mũno na gũteereta na njĩra ndikĩru na aarĩ na ariũ a Ithe witũ agima kĩĩroho nĩ kwandeithirie kuona atĩ Jehova nĩ arathimaga ngoro ĩrĩ na wendi.”—Kayla kuuma Amerika U.S.

[Mbica karatathi ka 6]

Ũrĩa ũngĩĩhaarĩria gũtungata bũrũri-inĩ mũgeni

•Ambĩrĩria mũtugo mwega wa wĩruti waku kĩũmbe

• Thoma Ũtungata Witũ wa Ũthamaki wa Agosti 2011, karatathi ga 4-6

• Aria na arĩa manatungata mabũrũri-inĩ mageni

• Thuthuria ũndũire na historĩ ya bũrũri ũcio

• Wĩrute maũndũ ma mũthingi ma rũthiomi rwa kũu

[Mbica karatathi ka 6]

Amwe arĩa matungataga mabũrũri-inĩ mageni monaga mabataro mao na njĩra ya . . .

• kũruta wĩra mĩeri ĩigana ũna bũrũri-inĩ wao o mwaka

• gũkomborithia nyũmba ciao

• kũruta wĩra kũgerera Intaneti

[Mbica karatathi ka 4, 5]

Jaqueline kuuma Njĩrĩmani

2 Bruno kuuma Italia

3 Beau kuuma Kanada

4 Siobhan kuuma Ireland

5 Joel kuuma Amerika U.S.

6 Jonathan kuuma Amerika U.S.

7 Anna kuuma Estonia

8 Elke kuuma Austria

9 Chantal kuuma Kanada

10 Ines kuuma Austria