Tungatĩra Ngai Mwene Wĩyathi

“Nĩ amu kwenda Ngai nĩgwathĩkĩra maathani maake, namo maathani make ti maritũ.”—1 JOH. 5:3, New Kikuyu Bible.

NO ŨHOTE GŨCOKIA?

Shaitani ageragia atĩa gũtũma tuone mawatho ma Ngai me maritũ?

Nĩkĩ no mũhaka twĩmenyerere mũno thiritũ citũ?

Nĩ kĩĩ gĩgũtũteithia gũtũũra tũrĩ ehokeku harĩ Ngai mwene wĩyathi?

1. Jehova akoragwo na mawoni marĩkũ kwerekera wĩyathi, na onanirie ũndũ ũcio atĩa ũhoro-inĩ wĩgiĩ Adamu na Hawa?

 JEHOVA nowe wiki ũkoragwo na wĩyathi wothe. O na kũrĩ ũguo, ndarĩ hĩndĩ aũhũthagĩra ũũru; kana akaũtua wake wiki na njĩra ya kwĩra ndungata ciake ũrĩa igwĩka tũũndũ-inĩ tuothe. Ithenya rĩa ũguo, aciheete wĩyathi ũrĩa ũcihotithagia gwĩtuĩra matua, na kũhingia merirĩria macio marĩa magĩrĩire. Kwa ngerekano-rĩ, Ngai aaheire Adamu na Hawa watho wamagirĩtie ũndũ ũmwe tu—kũrĩa maciaro ma ‘mũtĩ ũrĩa wa kũmenyithania wega na ũũru.’ (Kĩam. 2:17) Ũcio warĩ wĩyathi mũnene mũno maarĩ naguo magĩĩka wendi wa Mũũmbi wao!

2. Nĩ kĩĩ gĩatũmire aciari aitũ a mbere morũo nĩ wĩyathi ũrĩa Ngai aamaheete?

² Hihi Ngai aaheete aciari acio aitũ a mbere wĩyathi mũnene ũguo nĩkĩ? Aamombire na mũhianĩre wake na akĩmahe thamiri, kwoguo eerĩgĩrĩire atĩ wendo wao harĩ we arĩ Mũũmbi wao nĩ ũngĩamatongoririe ũrĩa kwagĩrĩire. (Kĩam. 1:27; Rom. 2:15) Kĩeha nĩ atĩ, Adamu na Hawa matigana kuonania ngatho harĩ Mũmahei-Muoyo o na kana wĩyathi ũrĩa aamaheete. Ithenya rĩa ũguo-rĩ, maathurire wĩyathi ũrĩa mataahetwo, ũrĩa Shaitani aamerĩire, wa kwĩyathaga. No handũ ha kũgĩa na wĩyathi makĩria, aciari acio aitũ a tene meeyendirie o ene na njiarũa ciao harĩ ũkombo wa mehia, namo moimĩrĩro maarĩ moru.—Rom. 5:12.

3, 4. Shaitani ageragia gũtũheenia atĩa ũhoro-inĩ wĩgiĩ ithimi cia Jehova?

³ Angĩkorũo Shaitani nĩ aahotire kũheenia andũ akinyanĩru, hamwe na ciũmbe nyingĩ cia kĩĩroho kũrega ũnene wa Ngai-rĩ, o na ithuĩ no atũheenie. Waara ũrĩa aahũthĩrire noguo ahũthagĩra. Ageragia gũtũhĩtithia twĩcirie atĩ ithimi cia Ngai nĩ mũrigo mũritũ, na nĩ  itũgiragĩrĩria gwĩkenia. (1 Joh. 5:3) Mwĩcirĩrie ũcio no ũtũhatĩke mũno tũngĩkuruhanaga kaingĩ na andũ marĩ naguo. Mwarĩ wa Ithe witũ ũmwe wa mĩaka 24 ũrĩa weingĩrĩtie ngomanio-inĩ itagĩrĩire oigire ũũ: “Thiritũ njũru nĩ yaathũkirie mũno, makĩria nĩ ũndũ nĩ ndeetigagĩra gũkorũo na mawoni ngũrani na riika rĩakwa.” Kwahoteka o nawe wanahatĩkwo ũguo nĩ riika.

⁴ Ũndũ wa kĩeha nĩ atĩ, rĩngĩ na rĩngĩ hatĩka icio njũru ciumanaga na arĩa marĩ thĩinĩ wa kĩũngano gĩa Gĩkristiano. Mũira ũmwe wa Jehova mwĩthĩ oigire ũũ: “Nĩ njũĩ andũ amwe ethĩ manatuma ndũgũ na andũ matetĩkĩtie. No thutha-inĩ, ngĩona atĩ o ũrĩa ndaacerithanagia nao, noguo ndahaananaga nao makĩria. Maũndũ makwa ma kĩĩroho makĩambĩrĩria gũthũka. Ndiakenagĩra maũndũ marĩa maarutanagwo mĩcemanio-inĩ, o na ndiathiaga kũhunjia. Maũndũ macio nĩmo maamenyithirie atĩ nĩ batiĩ gũtigana na arata acio, na ngĩtigana nao!” Hihi wee nĩ ũĩ ũrĩa mĩtugo ya arata aku ĩngĩkũhutia? Ta wĩcirie kĩonereria gĩkĩ kĩa Bibilia tũngĩĩruta nakĩo.—Rom. 15:4.

NĨ AAGUCĨRĨIRIE NGORO CIAO

5, 6. Abisalomu aahĩngĩcire andũ arĩa angĩ atĩa, na hihi waara wake nĩ waakinyanĩire?

⁵ Bibilia nĩ ĩkoragwo na cionereria nyingĩ cia andũ maarĩ na ũgucania mũũru harĩ arĩa angĩ. Ũmwe wao nĩ Abisalomu, mũrũ wa Mũthamaki Daudi. Abisalomu aarĩ mũndũrũme mũthaka mũno. No thutha wa ihinda, o ta Shaitani, nĩ aarekire ũkoroku ũkũre thĩinĩ wa ngoro yake, akĩambĩrĩria kwĩrirĩria gĩtĩ kĩa ithe kĩa ũnene, kĩrĩa gĩtaarĩ gĩake. a Nĩguo agerie kuoya ũthamaki na waara, Abisalomu eetuire atĩ nĩ aarũmbũyagia Aisiraeli arĩa angĩ mũno, o akĩgeragia kuonania atĩ mũthamaki ndaameciragia. Ĩĩ-ni, o ta ũrĩa Mũcukani eekire mũgũnda-inĩ wa Edeni-rĩ, Abisalomu eetuire atĩ arenda gũteithia, o agĩthũkagĩria ithe rĩĩtwa atarĩ na tha.—2 Sam. 15:1-5.

⁶ Hihi mũbango ũcio wa Abisalomu wa waara nĩ wakinyanĩire? Ĩĩ, gwa itĩna rĩna, amu Bibilia yugaga ũũ: ‘Abisalomu akĩgucĩrĩria ngoro cia andũ a Isiraeli irore harĩ we.’ (2 Sam. 15:6) O na kũrĩ ũguo, mũthia-inĩ, mwĩtĩo wa Abisalomu wacũngĩrĩire kũhootwo gwake. Ũndũ wa kĩeha nĩ atĩ, warehithirie gĩkuũ gĩake na kĩa andũ angĩ ngiri nyingĩ arĩa maahenekete nĩwe.—2 Sam. 18:7, 14-17.

7. Nĩ maũndũ marĩkũ tũngĩĩruta kuumana na ũhoro wĩgiĩ Abisalomu? (Rora mbica karatathi-inĩ ga 14.)

⁷ Nĩ kĩĩ hihi gĩatũmire Aisiraeli acio maheeneke na ihenya ũguo? No gũkorũo meeriragĩria maũndũ marĩa Abisalomu aamerĩire. Kana makorũo maatahirũo nĩ ũthaka wake. O na mangĩkorũo maarĩ na gĩtũmi kĩrĩkũ, no tũkorũo na ma atĩ: Matiarĩ ehokeku harĩ Jehova na harĩ mũthamaki ũrĩa aathuurĩte. Ũmũthĩ, Shaitani no ahũthagĩra andũ matariĩ ta “Abisalomu” kũgeria kũgucĩrĩria ngoro cia ndungata cia Jehova. Andũ acio mahota kuuga, ‘Ithimi cia Jehova nĩ ituohaga mũno. Ta rora andũ arĩa matatungatagĩra Jehova. Nĩ makenagĩra maũndũ maingĩ!’ Hihi nĩ ũkũhota gũkũũrana maheeni ta macio moru na ũtũũre wĩ mwĩhokeku harĩ Ngai? Hihi nĩ ũrĩkũũranaga atĩ watho wa Jehova “ũrĩa mwagĩrĩru kũna,” watho ũrĩa wa Kristo noguo ũngĩkũhe wĩyathi wa ma? (Jak. 1:25) Okorũo nĩguo, kĩonanagie atĩ nĩ wendete watho ũcio, na ndũkanaheeneke ũhũthĩre wĩyathi waku wa Gĩkristiano ũũru.—Thoma 1 Petero 2:16.

8. Nĩ maũndũ marĩkũ monetwo maronania atĩ gĩkeno gĩtiumanaga na kwagarara ithimi cia Jehova?

⁸ Andũ ethĩ nĩo mathingatagwo makĩria nĩ Shaitani. Akĩaria ũhoro wa wĩthĩ wake,  mũrũ wa Ithe witũ ũmwe ũrĩ mĩaka-inĩ ya 30 oigire ũũ: “Ndoonaga ithimi cia Jehova cia mĩtugo irĩ cia kũhĩnga no ti kũngitĩra.” Macũngĩrĩro-inĩ, akĩingĩra ngomanio-inĩ itaagĩrĩire. No gwĩka ũguo gũtiamũreheire gĩkeno. Oigire ũũ: “Ndaikarire ndĩĩmenete na ngĩĩrira mĩaka mĩingĩ.” Akĩririkana rĩrĩa aarĩ na mĩaka ikũmi na kĩndũ, mwarĩ wa Ithe witũ ũmwe aandĩkire ũũ: “Mũndũ angĩingĩra ngomanio-inĩ itaagĩrĩire, aiguaga ũũru na atarĩ kĩene. O na rĩu thutha wa mĩaka 19, no ndirikanaga maũndũ macio moru.” Nake mwarĩ wa Ithe witũ ũngĩ oigire ũũ: “Kũmenya atĩ mĩthiĩre yakwa nĩ yaatuuragia andũ arĩa ndendete mũno nĩ kwahinyĩrĩirie kĩĩmeciria, kĩĩroho, na ngoro-inĩ. Nĩ ũndũ mũritũ mũno gũtũũra ũtegwĩtĩkĩrĩka nĩ Jehova.” Shaitani ndendaga wĩcirie ũhoro wa moimĩrĩro ta macio ma mehia.

9. (a) Nĩ ciũria irĩkũ ingĩtũteithia gwĩthuthuria ũrĩa tuonaga Jehova, watho wake o na ũrutani wake? (b) Nĩkĩ nĩ ũndũ wa bata kũmenya Ngai wega?

⁹ Githĩ ti ũndũ wa kĩeha kuona andũ aingĩ ethĩ—o na amwe akũrũ arĩa marĩ ithondeka-inĩ—makĩĩruta na rĩao atĩ ikeno cia wĩhia irehaga ruo rũnene! (Gal. 6:7, 8) Kwoguo wĩyũrie ũũ: ‘Niĩ nĩ ngũũranaga ũrĩa waara ũrĩa Shaitani akungagia ũhaana kũna—atĩ nĩ maheeni matheri? Nĩ nyonaga Jehova arĩ Mũrata wakwa wa hakuhĩ mũno, ũrĩa waragia ma hĩndĩ ciothe na akanyendera maũndũ mega? Nĩ njĩtĩkĩtie biũ atĩ ndarĩ hĩndĩ angĩĩnyima kĩndũ kĩrĩa oĩ nĩ kĩega na kĩngĩndehera gĩkeno kĩingĩ?’ (Thoma Isaia 48:17, 18.) Nĩguo uuge ĩĩ kuuma ngoro thĩinĩ, nĩ ũrabatara kũmenya Jehova na njĩra ndikĩru. Ũbatiĩ kũmũmenya wega na ũkũũrane  atĩ watho na ũrutani wa Bibilia wonanagia wendo wake gũkwerekera, no ti atĩ eendaga gũkũima wĩyathi.—Thab. 25:14.

HOYA ŨHEO NGORO ĨNA ŨŨGĨ NA NJATHĨKI

10. Twagĩrĩirũo kwĩrutanĩria gwĩka ta Mũthamaki Suleimani rĩrĩa aarĩ mwĩthĩ nĩkĩ?

¹⁰ Rĩrĩa aarĩ mwanake mũnini, Suleimani aahoire ũũ arĩ na wĩnyihia: ‘Ndariĩ o ta kaana kanini, ndirĩ na ũũgĩ wa kũmenya mĩthiĩre irĩa mĩega ngiumagara kana ngĩcoka.’ Agĩcoka akĩhoya ngoro ĩna ũũgĩ na njathĩki. (1 Ath. 3:7-9, 12) Jehova nĩ aacokirie ihoya rĩu rĩa kuuma ngoro, na noguo arĩĩkaga harĩ wee, ũrĩ mwĩthĩ kana wĩ mũkũrũ. Nĩ ma, Jehova ndegũkũhe ũtaũku na ũũgĩ na njĩra ya kĩama. No nĩ egũkũhe ũũgĩ ũngĩĩruta Kiugo gĩake na kĩyo, ũhoe roho mũtheru, na ũhũthĩre biũ maũndũ ma kĩĩroho marĩa tũheagwo kũgerera kĩũngano gĩa Gĩkristiano. (Jak. 1:5) Ti itherũ, kũgerera njĩra icio, Jehova nĩ atũmaga nginya ndungata ciake iria nyinyi ciũhĩge gũkĩra arĩa mahũthagia ũtaaro wake, o na arĩa metagwo “ogĩ na imenyi maũndũ” a thĩ ĩno.—Luk. 10:21; thoma Thaburi 119:98-100.

11-13. (a) Nĩ maũndũ marĩkũ ma bata tũngĩĩruta na Thaburi 26:4, Thimo 13:20, na 1 Akorintho 15:33? (b) Ũngĩhũthĩra atĩa ũrutani wa Maandĩko macio?

¹¹ Nĩguo wone bata wa kwĩruta Bibilia na gwĩcũrania ũhoro ũrĩa tũrathoma nĩgetha tũhote kũmenya Jehova wega-rĩ, ta wĩcirie maandĩko maya. O rĩmwe rĩamo rĩna ũrutani wa bata ũkoniĩ gũthuura arata: “Ndirĩ ndatuĩka wa gũikaranagia na andũ a tũhũ, o na ndingĩtonyania na arĩa ahinga.” (Thab. 26:4) “Thiaga thiritũ na andũ arĩa ogĩ, nawe no ũgĩe na ũũgĩ, no ũrĩa ũtindanagia na irimũ nĩ gũtuurũo agatuurũo.” (Thim. 13:20) “Thigari njũru nĩithũkagia mĩtugo mĩega.”—1 Kor. 15:33.

¹² Nĩ maũndũ marĩkũ ma bata tũngĩĩruta kuumana na maandĩko macio? (1) Jehova nĩ eendaga tũthuure arata na njĩra njega. Endaga gũtũgitĩra kĩĩmĩtugo na kĩĩroho. (2) Andũ arĩa tũthiaga thiritũ nao no matũme tũtuĩke andũ ega kana oru; na ũcio nĩ ũndũ ũtangĩkararĩka. Ciugo iria ihũthĩrĩtwo maandĩko-inĩ macio ironania atĩ Jehova arageria gũkinyĩra ngoro citũ. Na njĩra ĩrĩkũ? Rora wone atĩ hatirĩ mũhari ũraheana watho ta “ndũkaneke ũna . . . ” Ithenya rĩa ũguo, yandĩkĩtwo ĩtũmenyithie ũhoro wa ma. Nĩ ta Jehova aratwĩra atĩrĩ: ‘Ũũ nĩguo maũndũ matariĩ. Hihi ũgwĩka atĩa? Ngoro yaku ĩtariĩ atĩa?’

¹³ Ningĩ-rĩ, tondũ maandĩko macio matatũ makuĩĩte ma cia mũthingi, matihĩtũkagwo nĩ mahinda na no mahũthĩrũo na njĩra nyingĩ mũno. Kwa ngerekano, wĩyũrie ciũria ta ici: Ingĩĩthema atĩa gũthiĩ thiritũ na andũ “arĩa ahinga”? Nĩ ta kũ ingĩcemania na andũ ta acio? (Thim. 3:32; 6:12) “Andũ arĩa ogĩ” acio Jehova endaga thiage thiritũ nao nĩ arĩkũ? Acio “irimũ” endaga ndĩĩtheme nĩ a? (Thab. 111:10; 112:1; Thim. 1:7) “Mĩtugo mĩega” ĩrĩa ngũthũũkia ingĩthuura arata oru nĩ ĩrĩkũ? Hihi thiritũ njũru ingĩoneka o gatagatĩ-inĩ ka andũ a thĩ tu? (2 Pet. 2:1-3) Ũngĩcokia atĩa ciũria icio?

14. Mũngĩagĩria atĩa hwaĩ-inĩ wanyu wa Ũthathaiya wa Famĩlĩ?

¹⁴ Thutha wa gwĩciria Maandĩko macio-rĩ, ĩ ti wega ũthuthurie maandĩko mangĩ ma Bibilia marĩa maguũrĩtie mwĩcirĩrie wa Ngai ũhoro-inĩ wa maũndũ marĩa wee na famĩlĩ yaku mũtangĩkagĩra? b Inyuĩ aciari, mwĩciriei ũrĩa mũngĩarĩrĩria maũndũ ta macio hĩndĩ ya hwaĩ-inĩ wanyu wa Ũthathaiya wa Famĩlĩ. Mũgĩĩka ũguo-rĩ, ririkanai atĩ muoroto wanyu nĩ gũteithia o mũndũ thĩinĩ wa famĩlĩ amenye makĩria wendo mũingĩ ũrĩa Ngai atwendete naguo  ta ũrĩa ũguũrĩtio thĩinĩ wa watho na ũrutani wake. (Thab. 119:72) Ti itherũ, wĩruti ta ũcio wagĩrĩirũo gũteithia andũ othe thĩinĩ wa famĩlĩ makuhanĩrĩrie o na makuhĩrĩrie Jehova makĩria.

15. Ũngĩmenya atĩa kana nĩ ũrakũria ngoro ĩna ũũgĩ na njathĩki?

¹⁵ Ũngĩmenya atĩa kana nĩ ũrakũria ngoro ĩna ũũgĩ na njathĩki? Njĩra ĩmwe nĩ kũringithania mwĩcirĩrie waku na wa andũ ehokeku a tene, ta Mũthamaki Daudi, ũrĩa waandĩkire ũũ: ‘Niĩ ngenagio no gwĩka ũrĩa wendaga, wee Ngai wakwa; ĩĩ-ni, kĩrĩra gĩaku kĩrĩ o ngoro-inĩ yakwa.’ (Thab. 40:8) Mwandĩki wa Thaburi 119 o nake oigire ũũ: ‘Kaĩ kĩrĩra gĩaku, nĩndĩkĩendete-ĩ! Ndindaga ngĩtarania ũhoro wakĩo mũthenya wothe.’ (Thab. 119:97) Wendo ta ũcio ndũkũraga o ũguo. Umanaga na wĩruti mũrikĩru, mahoya, gwĩcũrania, na mũndũ kwĩyonera ũtũũro-inĩ wake mwene irathimo nyingĩ iria ciumanaga na kũrũmĩrĩra ithimi cia Ngai.—Thab. 34:8.

RŨĨRĨRA WĨYATHI WAKU WA GĨKRISTIANO!

16. Nĩ ũndũ ũrĩkũ arĩ o mũhaka tũririkane angĩkorũo nĩ tũgũtooria mbaara ya kũrũĩrĩra wĩyathi wa ma?

¹⁶ Hĩndĩ ĩrĩa yothe hĩtũku, ndũrĩrĩ nĩ irũĩte mbaara ndũrũ nĩ ũndũ wa wĩyathi. Githĩ wee ndũkĩagĩrĩirũo kũrũĩrĩra o na makĩria wĩyathi waku wa Gĩkristiano! Ririkana atĩ thũ ciaku to Shaitani, thĩ ĩno, na roho wayo mũũru. No mũhaka ningĩ ũrũe na kwaga gũkinyanĩra gwaku, o na ngoro yaku ĩrĩa ĩheenanagia. (Jer. 17:9; Ef. 2:3) Ĩndĩ, wĩna ũteithio wa Jehova, no ũtoorie mbaara ĩyo. Makĩria ma ũguo-rĩ, o ihootana, rĩrĩ inene kana inyinyi, rĩtiagaga maũndũ merĩ mega. Mbere ndaya-rĩ, nĩ ũrĩkenagia ngoro ya Jehova. (Thim. 27:11) Kerĩ, weyonera ũrĩa watho wa Ngai “ũrĩa mwagĩrĩru kũna o ũrĩa ũtarĩ wa ũkombo” ũkũũraga andũ ũkombo-inĩ, nĩ ũkũhota kũrũmia itua rĩaku rĩa kũrũmĩrĩra ‘gacĩra karĩa gakunderu’ karĩa gakinyagia andũ muoyo-inĩ wa tene na tene. Thutha-inĩ, nĩ ũrĩkenera wĩyathi mũingĩ makĩria ũrĩa Jehova aigĩire arĩa ehokeku ihinda rĩũkĩte.—Jak. 1:25; Mat. 7:13, 14.

17. Nĩkĩ tũtiagĩrĩirũo gũkua ngoro nĩ ũndũ wa kwaga gũkinyanĩra gwitũ, na Jehova atũheaga ũteithio ũrĩkũ?

¹⁷ Hatarĩ nganja, ithuothe nĩ tũhĩtagia rĩmwe na rĩmwe. (Koh. 7:20) Rĩrĩa ũndũ ta ũcio wekĩka, ndwagĩrĩirũo kwĩmena kana gũkua ngoro biũ. Ũngĩhĩtia, geria ũrĩa ũngĩhota kũrũnga ihĩtia rĩu—o na angĩkorũo gwĩka ũguo gũkũbatara ũcarie ũteithio wa athuri. Jakubu aandĩkire ũũ: ‘Ihoya rĩao nĩ rĩgũtũma mũndũ ũcio mũrũaru ahone; nake Mwathani nĩ ekũmũũkĩria; o na angĩkorũo nĩ ehĩtie, nĩ ekuoherũo.’ (Jak. 5:15) Ndũkanariganĩrũo atĩ Ngai e tha nyingĩ na atĩ aakũgucĩrĩirie thĩinĩ wa kĩũngano tondũ nĩ onire ũndũ mwega harĩ wee. (Thoma Thaburi 103:8, 9.) Angĩkorũo nĩ ũgũtũũra ũtungatagĩra Jehova na ngoro yaku yothe, ndarĩ hĩndĩ agagũtiganĩria.—1 Maũ. 28:9.

18. Tũngĩikara atĩa kũringana na ihoya rĩa Jesu rĩrĩa rĩrĩ thĩinĩ wa Johana 17:15?

¹⁸ Rĩrĩa aahoyaga ũtukũ wa mũthia arĩ hamwe na atũmwo ake arĩa 11 ehokeku, Jesu aahũthĩrire ciugo ici itangĩriganĩra akĩhoya nĩ ũndũ wao: ‘Maikaragie matikanathũkio nĩ ũrĩa mũũru.’ (Joh. 17:15) Jesu ndeeciragia o ũhoro wa atũmwo ake tu, no nĩ nginya wa arũmĩrĩri ake othe. Kwoguo, no tũkorũo na ma atĩ Jehova nĩ arĩcokagia ihoya rĩu rĩa Jesu na njĩra ya gũtũgitĩra matukũ-inĩ maya ma ũgwati. ‘Andũ acio me mĩthiĩre mĩgima-rĩ, Jehova atũũraga arĩ ngo yao, andũ arĩa maiguaine nake-rĩ, nĩ amenyagĩrĩra njĩra yao.’ (Thim. 2:7, 8) Nĩ ma, njĩra ĩrĩa nũngĩrĩru nĩ ĩrĩ moritũ mayo, ĩndĩ noyo iki ingĩtũkinyia harĩ muoyo wa tene na tene na wĩyathi wa ma. (Rom. 8:21) Ndũkanareke mũndũ o na ũrĩkũ akũhĩngĩce ũmĩtige!

[Ũhoro wa magũrũ-inĩ]

[Ciũria cia wĩruti]

[Mbica karatathi ga 14]

Tũngĩkũũrana atĩa andũ arĩa mahaana ta Abisalomu ũmũthĩ na tũmemenyerere?