Hihi Nĩ Ũraririkana?

Hihi nĩ ũthomete na kinyi icunjĩ cia ica ikuhĩ cia Mũrangĩri? Ta rora kana no ũhote gũcokia ciũria ici:

Hihi njuĩrĩ cia Samsoni nĩcio ciamũheaga hinya?

Njuĩrĩ cia Samsoni ticio ciarĩ kĩhumo kĩa hinya wake. Ciarũgamĩrĩire ũkuruhanu wake wa mwanya na Jehova arĩ Mũnaziri. Ũkuruhanu ũcio nĩ waahutirio rĩrĩa Delila eenjithirie njuĩrĩ yake.—4/1, karatathi ga 15.

Ĩkĩringithanio na ngoro itũ ya kĩĩmwĩrĩ-rĩ, nĩ maũndũ marĩkũ matatũ mangĩkorũo na moimĩrĩro mega harĩ ngoro itũ ya mũhaano?

(1) Kĩrĩa tũrĩaga. O ta ũrĩa ngoro citũ cia kĩĩmwĩrĩ ibataraga kũheo irio njega, no taguo tũrabatara gũtigĩrĩra atĩ nĩ tũrarĩa irio njega na cia kũigana cia kĩĩroho. (2) Kwĩmenyeria. Kuongerera kĩyo ũtungata-inĩ no kũige ngoro citũ cia mũhaano irĩ na ũgima mwega. (3) Arĩa matũrigicĩirie. No tũnyihie mĩtangĩko tũngĩnyitanagĩra na Akristiano arĩa angĩ, arĩa matũrũmbũyagia.—4/1, karatathi ka 22.

Thutha wa mũndũ ũmwe kwaga wĩhokeku thĩinĩ wa kĩhiko-rĩ, andũ acio erĩ mangĩcokia atĩa kwĩhokana?

Magĩrĩirũo (1) kwaranagĩria ma; (2) kũnyitanĩra hamwe; (3) gũkũria mĩtugo mĩerũ ithenya rĩa ĩrĩa mĩkũrũ; na (4) kũmenya ihinda rĩrĩa rĩagĩrĩru rĩa kweheria marakara, nĩguo macokerere ũkuruhanu wao.—5/1-SW, karatathi 12-15.

Nĩkĩ ũrĩa ũraruta mĩario ya mathiko ndagĩrĩirũo kũhũthĩra Thaburi 116:15 harĩ ũrĩa ũkuĩte?

Rĩandĩko rĩu riugaga ũũ: “Arĩa marĩ ũiguano nake-rĩ, ikua rĩao nĩ ũndũ wĩ bata maitho-inĩ ma Jehova.” Ũguo nĩ kuuga atĩ Ngai onaga gĩkuũ kĩa ndungata ciake ciothe iria njĩhokeku kĩrĩ ũndũ wa goro mũno ũũ atĩ ndangĩgĩtĩkĩria. Ndakareka ndungata ciake irĩ gĩkundi cieherio thĩinĩ wa thĩ.—5/15-SW, karatathi ka 22.

Makolpota maarĩ a?

Mbere ya 1931, rĩĩtwa “makolpota” rĩahũthagĩrũo harĩ arĩa ũmũthĩ metagwo mapainia.—5/15-SW, karatathi ka 31.

Maũndũ mamwe marĩa monanagia atĩ Bibilia to ibuku ta marĩa mangĩ mandĩkĩtwo nĩ andũ nĩ marĩkũ?

Bibilia ĩkoragwo na morathi maingĩ maahingire. Maũndũ ma tene marĩa mandĩkĩtwo thĩinĩ wayo nĩ ma ma, ti ng’ano. Ndĩhĩtagia maũndũ-inĩ ma sayansi, na mabuku mayo nĩ marĩ ũiguano. Ũtaaro wayo no ũkorũo na ũguni ũmũthĩ.—6/1-SW, karatathi 4-8.

“Mothamaki macio” marĩa magwetetwo thĩinĩ wa Danieli 2:44 nĩ marĩkũ?

Ũrathi ũcio waragia ũhoro wa mothamaki kana thirikari iria irũgamĩrĩirũo nĩ icunjĩ itiganĩte cia mũhianano ũrĩa waataarĩirio nĩ Danieli.—6/1, karatathi ga 19.

Thirikari ya Thĩ ya Ngeretha na Amerika yatuĩkire thirikari nene ya mũgwanja ya ũrathi wa Bibilia rĩ?

Thirikari ĩyo nene ya mabũrũri merĩ ya thĩ yagĩire kuo rĩrĩa Ngeretha na Amerika ya U.S. ciathondekire ngwatanĩro ya mwanya hĩndĩ ya Mbaara ya Mbere ya Thĩ.—6/1, karatathi ga 17.

Nĩ na njĩra ĩrĩkũ Ngai ohagĩra na akariganĩrũo nĩ mehia ma andũ arĩa meerira?

Jehova oigaga ũũ igũrũ rĩgiĩ arĩa metĩkĩrĩkaga harĩ we: “Nĩngamohera waganu wao, o namo mehia mao ndigacoka kũmaririkana o rĩ, o rĩ.” (Jer. 31:34) No ohanĩre mehia kũgerera mũthingi wa igongona rĩa ũkũũri. Rĩrĩa eka ũguo, Ngai ariganagĩrũo na njĩra ya atĩ ndakaririkana mehia macio atĩ nĩguo aherithie rĩngĩ ũrĩa wĩhĩtie.—7/1-SW, karatathi ga 18.

Tũngĩĩtĩkia ciama iria ciandĩkĩtwo thĩinĩ wa Bibilia nĩkĩ?

Kaingĩ ciaringagĩrũo kũndũ kũrĩ na andũ, ti hitho-inĩ. Itiakoragwo na maũndũ maingĩ. Ciaringagwo irĩ cia kũgoocithia Ngai, ti andũ. Ciama iria ciaringagwo ciarĩ cia mĩthemba mĩingĩ, na akararia a hĩndĩ ĩyo matigana kuuga atĩ itiekĩkire. Icio nĩ itũmi itũmaga twĩhoke ciama iria ciandĩkĩtwo Bibilia-inĩ.—8/1-SW, karatathi ka 7-8.