Cukuru cia Gĩtheokrasi nĩ Ũira Atĩ Jehova nĩ Atwendete

 JEHOVA nĩwe ‘Mũrutani witũ’ Mũnene. (Isa. 30:20) Wendo nĩguo ũmũtindĩkaga gũthomithia na kũmenyeria angĩ. Kwa ngerekano, nĩ ũndũ wa wendo, Jehova nĩ onagia Jesu ‘maũndũ mothe marĩa ekaga.’ (Joh. 5:20) Wendo wa Jehova harĩ ithuĩ, Aira ake, nĩ ũmũtindĩkaga gũtũhe ‘rũrĩmĩ rwa andũ arĩa marutĩtwo,’ rĩrĩa twerutanĩria biũ kũmũtĩa na gũteithia andũ arĩa angĩ.—Isa. 50:4.

Ĩkĩĩgerekania na wendo wa Jehova, Kamĩtĩ ya Kũrutana ya Kĩama Kĩrĩa Gĩtongoragia ĩhũthagĩra cukuru ikũmi cia gĩtheokrasi gũthomithia andũ arĩa marĩ na wendi na mangĩĩtĩkĩrio nĩ maũndũ mao kwĩyandĩkithia. Hihi wee nĩ wonaga cukuru icio irĩ ũira atĩ Jehova nĩ atwendete?

Kenera gũthoma maũndũ manini megiĩ cukuru iria irĩ kuo rĩu na ciugo cia andũ amwe arĩa manacithiĩ. Ũcoke wĩyũrie, ‘Ingĩgunĩka atĩa kuumana na gĩthomo gĩkĩ kiumĩte kwĩ Ngai?’

 GUNĨKA NĨ GĨTHOMO GĨA GĨTHEOKRASI

Tondũ Jehova nĩ “Ngai mwene wendani,” aheanaga gĩthomo gĩtũmaga ũtũũro witũ ũgĩe na muoroto, gĩgatũhaarĩria kũhiũrania na mathĩna, na gĩgatũteithia gũkenera mũno ũtungata witũ. (2 Kor. 13:11) O ta arutwo a karine ya mbere, nĩ tũhaarĩirio wega gũteithia arĩa angĩ, ‘tũkĩmarutaga kũrũmia maũndũ marĩa mothe’ twathĩtwo.—Mat. 28:20.

O na gũtuĩka tũtingĩhota gũthiĩ cukuru icio ciothe, no tũgunĩke nĩ ĩmwe yacio kana makĩria. No tũhote kũhũthĩra ũtaaro umĩte Bibilia-inĩ ũrĩa iheanaga. Ningĩ no tuongerere ũhoti witũ ũtungata-inĩ na njĩra ya kũrutithania wĩra na ndungata cia Jehova iria imenyeretio wega.

Wĩyũrie atĩrĩ, ‘Maũndũ makwa no manjĩtĩkĩrie kwĩrutanĩria gũthiĩ ĩmwe ya cukuru icio?’

Athathaiya a Jehova monaga kĩrĩ gĩtĩo kũnyita mbaru cukuru icio cia bata na gũthomera kuo. Reke gĩthomo kĩrĩa ũkwĩgĩĩra gĩkũgucĩrĩrie harĩ Ngai makĩria na gĩkũhotithie kũhingia maũndũ marĩa wĩhokeirũo nĩwe, na makĩria wĩra wa mĩtũkĩ wa kũhunjia ũhoro ũrĩa mwega.

[Ithandũkũ karatathi-inĩ ga 13-17]

MAŨNDŨ MEGIĨ CUKURU CIA GĨTHEOKRASI

Cukuru ya Ũtungata wa Gĩtheokrasi

Muoroto: Kũmenyeria ahunjia nĩguo mahote kũhunjia na kũrutana ũhoro ũrĩa mwega na njĩra ĩrĩ na moimĩrĩro mega.

Ihinda: Hingo ciothe. Kũrĩa Ĩkagĩrũo: Nyũmba-inĩ ya Ũthamaki ĩrĩa ĩrĩ itũũra-inĩ rĩanyu.

Kũrĩa Ĩkagĩrũo: Nyũmba-inĩ ya Ũthamaki ĩrĩa ĩrĩ itũũra-inĩ rĩanyu.

Kwagĩrĩra: Andũ othe arĩa manyitanagĩra na kĩũngano hĩndĩ ciothe, na nĩ metĩkanĩtie na morutani ma Bibilia, na magatũũra kũringana na mawatho ma Gĩkristiano.

Kwĩyandĩkithia: Mũrori wa Cukuru ya Ũtungata wa Gĩtheokrasi nĩwe wandĩkithagia arutwo.

Sharon, ũrĩa ũkoragwo akuĩte ciĩga nĩ ũndũ wa mũrimũ wa tombo na mũnyiginyigi (ALS), oigaga ũũ: “Cukuru ya Ũtungata wa Gĩtheokrasi nĩ ĩndutĩte gwĩka ũthuthuria na gũtaarĩria ũhoro na njĩra njega. Ningĩ nĩ ndĩĩrutĩte kũrũmbũyagia mabataro ma kĩĩroho ma andũ arĩa angĩ, to makwa.”

Arnie, mũrori ũkoretwo akĩgenda ihinda iraya, oigire ũũ: “Ndaakũrire ngĩtondoiraga na ndingiahotire kũrora andũ. Cukuru ĩno nĩ ĩndeithĩtie kwĩĩtĩkia na kwĩhe gĩtĩo. Nĩ ũndũ wa ũteithio wa Jehova kũgerera gĩthomo kĩu, nĩ ndĩĩrutĩte njĩra cia kũhihia na kũiga meciria ũndũ-inĩ mũna. Nĩ ngenagĩra mũno kũhota kũgooca Ngai thĩinĩ wa kĩũngano hamwe na ũtungata-inĩ wakwa.”

 Cukuru ya Arĩa Metwo Gũtungata Betheli

Muoroto: Gũteithia arĩa metwo Betheli mahote kũgaacĩrithia ũtungata wao. Ihinda: Ndagĩka 45 o kiumia kwa ihinda rĩa ciumia 16.

Kũrĩa Ĩkagĩrũo: Betheli.

Kwagĩrĩra: No mũhaka mũndũ akorũo arĩ wa famĩlĩ ya Betheli kana mwĩrutĩri wĩtĩkĩrĩtio gũtungata Betheli ihinda rĩa mwaka ũmwe kana makĩria.

Kwĩyandĩkithia: Erutĩri arĩa erũ Betheli metagwo matekũbatara kwĩyandĩkithia.

Demetrius, ũrĩa waathire cukuru ĩyo mĩaka-inĩ ya 1980, oigire ũũ: “Gĩthomo kĩu nĩ kĩandeithirie kwagagĩria njĩra ciakwa cia kwĩruta na kwĩhaarĩria gũtungata Betheli ihinda iraya. Arutani, maũndũ marĩa maarutanirũo, na ũtaaro mwega nĩ ciatũmire njĩtĩkie Jehova nĩ anyendete na atĩ nĩ endaga kũndeithia ngacĩre ũtungata-inĩ wakwa wa Betheli.”

Kaitlyn oigire ũũ: “Nĩ ndaateithirio gũthingata ũndũ ũrĩa wa bata makĩria—gũtuĩka mũndũ wa kĩĩroho. Cukuru ya arĩa metwo gũtungata Betheli nĩ ĩndeithĩtie gũtĩa Jehova, nyũmba yake, na ithondeka rĩake makĩria.”

Cukuru ya Ũtungata wa Ũthamaki

Muoroto: Kũruta arori arĩa magendaga, athuri, na rĩmwe na rĩmwe ateithia a ũtungata kũrũmbũiya mawĩra marĩa mehokeirũo thĩinĩ wa ithondeka rĩa Jehova. (Atũm. 20:28) Maũndũ marĩa marĩ kuo, mĩthiĩre, na mabataro marĩa marĩ kuo ciũngano-inĩ nĩ maragĩrĩrĩrio. Cukuru ĩno ĩkagwo thutha wa mĩaka ĩigana ũna kũringana na itua rĩa Kĩama Kĩrĩa Gĩtongoragia.

Ihinda: Mĩaka-inĩ ya ica ikuhĩ, ĩkoretwo ĩgĩkwo kwa ihinda rĩa mĩthenya ĩrĩ kana ĩrĩ na nuthu harĩ arori arĩa magendaga, mũthenya ũmwe na nuthu harĩ athuri a kĩũngano, na mũthenya ũmwe harĩ ateithia a ũtungata.

Kũrĩa Ĩkagĩrũo: Kaingĩ ĩkagĩrũo thĩinĩ wa Nyũmba ya Ũthamaki kana Nyũmba ya Kĩgomano. Kwagĩrĩra: No mũhaka mũndũ akorũo arĩ mũrori ũgendaga, mũthuri wa kĩũngano, kana mũteithia wa ũtungata.

Kwĩyandĩkithia: Athuri a kĩũngano na ateithia a ũtungata metagwo cukuru ĩyo nĩ mũrori wa mũthiũrũrũko. Wabici ya rũhonge nĩyo ĩĩtaga arori arĩa magendaga.

“O na gũtuĩka nĩ ĩrutanaga maũndũ maingĩ kahinda-inĩ kanini mũno, cukuru ĩyo nĩ ĩkagĩra athuri hinya na ĩkamateithia gũtũũria gĩkeno na ‘kwĩhanda ta arũme’ ũtungata-inĩ wa Jehova. Athuri arĩa erũ na a tene nĩ merutaga kũrĩithia rũũru na njĩra njega na ‘gũtuaga ũhoro na njĩra ĩmwe.’”—Quinn (mũhuro).

“Gĩthomo kĩu nĩ gĩatũteithirie kũmenya wega maũndũ makonainie na wĩtĩkio witũ, gũtũhe mĩkaana ĩgiĩ mogwati, na gũtuonia njĩra tũngĩhũthĩra kũrĩithia rũũru. Jehova nĩ eekire wega mũno gũtũteithia.”—Michael.

 Cukuru ya Ũtungata wa Ũpainia

Muoroto: Gũteithia mapainia ‘mahingie ũtungata’ wao biũ.—2 Tim. 4:5.

Ihinda: Ciumia igĩrĩ.

Kũrĩa Ĩkagĩrũo: Wabici ya rũhonge nĩyo yugaga nĩ kũ; kaingĩ ĩkagĩrũo Nyũmba-inĩ ya Ũthamaki.

Kwagĩrĩra: No mũhaka mũndũ akorũo atungatĩte arĩ painia wa hĩndĩ ciothe mwaka ũmwe kana makĩria. a

Kwĩyandĩkithia: Mapainia arĩa magĩrĩire metagwo na makamenyithio nĩ mũrori wao wa mũthiũrũrũko matekũbatara kwĩyandĩkithia.

“Cukuru ĩyo nĩ ĩndeithĩtie kũhiũrania na moritũ thĩinĩ wa ũtungata na ũtũũro wakwa,” nĩguo Lily (ũrĩo) oigaga. “Njĩra yakwa ya kwĩruta, kũrutana, na kũhũthĩra Bibilia nĩ yagĩrĩte mũno. Rĩu no hote gũteithia andũ angĩ wega makĩria, kũnyita athuri mbaru, na gũteithia kĩũngano gĩkũre.”

Brenda, ũrĩa ũthiĩte cukuru ĩyo maita merĩ, oigire ũũ: “Nĩ yandeithirie kũrikĩra biũ maũndũ-inĩ ma kĩĩroho, gwĩkĩra thamiri yakwa hinya, na kwĩrutanĩria gũteithia arĩa angĩ. Hatarĩ nganja, Jehova nĩ mũtaana!”

[Kohoro ka magũrũ-inĩ]

Cukuru ya Athuri a Kĩũngano

Muoroto: Gũteithia athuri a kĩũngano marũmbũiye mawĩra mao marĩa mehokeirũo thĩinĩ wa kĩũngano na mataũkĩrũo wega makĩria nĩ maũndũ makonainie na ũthathaiya.

Ihinda: Thikũ ithano.

Kũrĩa Ĩkagĩrũo: Wabici ya rũhonge nĩyo yugaga nĩ kũ; kaingĩ ĩkagĩrũo Nyũmba-inĩ ya Ũthamaki kana ya Kĩgomano.

Kwagĩrĩra: No mũhaka mũndũ akorũo arĩ mũthuri wa kĩũngano.

Kwĩyandĩkithia: Wabici ya rũhonge nĩyo ĩĩtaga athuri.

Rora ũrĩa amwe arĩa maathire kĩrathi kĩa 92 thiĩnĩ wa Amerika U.S. moigire:

“Cukuru ĩyo nĩ ĩng’unĩte mũno, ĩkandeithia gwĩthuthuria na kuona ũrĩa ingĩrũmbũiya ng’ondu cia Jehova.”

“Rĩu nĩ ndĩĩhaarĩirie gwĩkagĩra arĩa angĩ ngoro makĩria na njĩra ya gũtĩtĩrithagia maũndũ marĩa ma bata makĩria thĩinĩ wa Maandĩko.”

“Ngũtũũra nũmagĩrĩra maũndũ marĩa ndaathomithirio ũtũũro-inĩ wakwa wothe.”

Cukuru ya Arori Arĩa Magendaga na Atumia Ao

Muoroto: Gũteithia arori a mũthiũrũrũko na a ng’ongo kũgĩa na moimĩrĩro mega magĩtungata ciũngano, o hamwe na “wĩra-inĩ wa kũheana ũhoro na wa kũrutana” na kũrĩithia arĩa marĩ rungu rwao.—1 Tim. 5:17; 1 Pet. 5:2, 3.

Ihinda: Mĩeri ĩĩrĩ.

Kũrĩa Ĩkagĩrũo: Wabici ya rũhonge nĩyo yugaga nĩ kũ.

Kwagĩrĩra: No mũhaka mũndũ akorũo arĩ mũrori wa mũthiũrũrũko kana wa ng’ongo.

Kwĩyandĩkithia: Wabici ya rũhonge nĩyo ĩĩtaga arori arĩa magendaga na atumia ao.

“Nĩ twateithirio gũtĩa makĩria Jesu arĩ we mũtwe wa ithondeka rĩrĩ. Tũkĩona bata wa gwĩkĩra ngoro ariũ a Ithe witũ arĩa tũtungatagĩra na gwĩkĩra hinya ũrũmwe wa o kĩũngano. Gĩthomo kĩu nĩ gĩatũteithirie kuona atĩ o na gũtuĩka mũrori ũragenda nĩ aheanaga ũtaaro o na akarũnga andũ rĩmwe, muoroto wake ũrĩa mũnene nĩ gũteithia ariũ a Ithe witũ mone atĩ Jehova nĩ amendete.”—Joel, kĩrathi kĩa 1, 1999.

 Cukuru ya Bibilia ya Ariũ a Ithe Witũ Arĩa Matahikanĩtie

Muoroto: Kũhaarĩria athuri a kĩũngano na ateithia a ũtungata arĩa matahikanĩtie kũrũmbũiya wĩra ũrĩa mangĩĩhokerũo ithondeka-inĩ rĩa Jehova. Andũ aingĩ marĩkia cukuru ĩno nĩ matũmagwo gũtungata kũrĩa kũrĩ na bata bũrũri-inĩ wao. Nao angĩ no matũmwo bũrũri ũngĩ mangĩĩrutĩra. Amwe arĩa marĩkĩtie cukuru ĩyo no matungate marĩ mapainia a mwanya a kahinda kũndũ gũtarĩ kwahunjio kana icigo iria irĩ kũraihu na ciĩikarĩtie.

Ihinda: Mĩeri ĩĩrĩ.

Kũrĩa Ĩkagĩrũo: Wabici ya rũhonge nĩyo yugaga nĩ kũ; kaingĩ ĩkagĩrũo Nyũmba-inĩ ya Ũthamaki kana ya Kĩgomano.

Kwagĩrĩra: Ariũ a Ithe witũ arĩa matahikanĩtie a mĩaka gatagatĩ ka 23 na 62 na marĩ na ũgima mwega wa mwĩrĩ arĩa marenda gũtungatĩra kũrĩa kũrĩ na bata mũnene wa ahunjia. (Mar. 10:29, 30) No mũhaka makorũo matungatĩte marĩ mapainia a hĩndĩ ciothe na marĩ ateithia a ũtungata kana athuri a kĩũngano kwa ihinda rĩtanyihĩire mĩaka ĩĩrĩ mategũtigithĩria.

Kwĩyandĩkithia: Mũcemanio wa arĩa mangĩenda kwĩyandĩkithia nĩ wĩkagwo kĩgomano-inĩ kĩa mũthiũrũrũko ũkaheana ũhoro makĩria.

“Kũrikĩra thĩinĩ wa gĩthomo kĩu nĩ kwahotithirie roho wa Jehova ũngarũre na thĩinĩ,” nĩguo Rick, wa kĩrathi kĩa 23 kĩa Amerika (U.S.) oigire. “Jehova angĩkũhe wĩra-rĩ, nĩ agũteithagĩrĩria kũũruta. Nĩ ndeerutire atĩ ingĩthingata wendi wa Ngai handũ ha gwĩciria ũhoro wakwa mwene, nĩ arĩnjĩkĩraga hinya.”

“Nĩ ndaahotire kũmenya atĩ njĩra ĩrĩa ithondeka rĩa Ngai rĩrutaga wĩra nayo ũmũthĩ nĩ ta kĩama,” nĩguo Andreas, ũrĩa ũtungataga Njĩrĩmani oigire. “Gĩthomo kĩu nĩ kĩandeithirie kwĩhaarĩria nĩ ũndũ wa wĩra ũrĩa warĩ mbere. Ningĩ, cionereria nyingĩ cia Bibilia nĩ ciandutire ma ĩno ya mũthingi: Gũtungatĩra ariũ a Ithe witũ na Jehova kũrehaga gĩkeno kĩa ma.”

[Mbica karatathi ka 16]

Cukuru ya Bibilia ya Akristiano Arĩa Mahikanĩtie

Muoroto: Kũhe arĩa mahikanĩtie ũrutani wa mwanya ũndũ mangĩhũthĩrũo makĩria nĩ Jehova na ithondeka rĩake. Andũ aingĩ arĩa maarĩkia nĩ matũmagwo gũtungata kũndũ kũrĩa kũrĩ na bata mũnene bũrũri-inĩ wao. Amwe ao no matũmwo bũrũri ũngĩ angĩkorũo nĩ megwĩtĩkĩra. Arĩa marĩkĩtie cukuru ĩyo no matungate marĩ mapainia a mwanya a kahinda kũndũ gũtarĩ kwahunjio kana icigo iria irĩ kũraihu na ciĩikarĩtie.

Ihinda: Mĩeri ĩĩrĩ.

Kũrĩa Ĩkagĩrũo: Cukuru ĩno ĩkagĩrũo Amerika U.S., na kwambĩrĩria Septemba 2012, nĩ ĩrĩkagĩrũo icigo-inĩ cia wabici imwe cia honge, kaingĩ Nyũmba-inĩ ya Ũthamaki kana ya Kĩgomano.

Kwagĩrĩra: Andũ mahikanĩtie a gatagatĩ ka mĩaka 25 na 50 na marĩ na ũgima mwega wa mwĩrĩ na maũndũ mao mangĩmetĩkĩria gũtungata kũndũ o guothe kũrĩ na bata mũnene na marĩ na mwerekera wa: “Niĩ ũyũ haha! Ndũma niĩ.” (Isa. 6:8, NW) No mũhaka makorũo mahikanĩtie kwa ihinda rĩa mĩaka ĩĩrĩ na makorũo marĩ ũtungata-inĩ wa mahinda mothe kwa ihinda rĩa mĩaka ĩĩrĩ mategũtigithĩria. Mũthuri no mũhaka akorũo atungatĩte arĩ mũthuri wa kĩũngano kana mũteithia wa ũtungata mĩaka ĩtanyihĩire ĩĩrĩ kĩrũmanĩrĩrio.

Kwĩyandĩkithia: Mũcemanio nĩ wĩkagwo kĩrũrũngano-inĩ kĩa ng’ongo nĩguo arĩa mangĩenda kwĩyandĩkithia maheo ũhoro makĩria. Angĩkorũo irũrũngano-inĩ cia bũrũri wanyu gũtiĩkagwo mũcemanio ũcio na no wende kwĩyandĩkithia, no wandĩkĩre wabici yanyu ya rũhonge ũhoe ũhoro makĩria.

“Ciumia icio inyanya ciarehire ũgarũrũku mũnene ũtũũro-inĩ witũ na ciarĩ mweke mũnene harĩ arĩa mahikanĩtie arĩa mendaga kwĩrutĩra makĩria! Twĩhotorete gũtũũra mũtũũrĩre mũigananĩru ũrĩa ũgũtũhotithia kũhũthĩra ihinda na njĩra ya ũũgĩ.”—Eric na Corina (mũhuro), kĩrathi kĩa 1, 2011.

Cukuru ya Bibilia ya Gileadi

Muoroto: Kũmenyeria arutwo ũrĩa mangĩtungata marĩ amishonarĩ kũndũ kũrĩa kũrĩ andũ aingĩ, gũtuĩka arori arĩa magendaga kana gũtungata Betheli. Muoroto nĩ gwĩkĩra hinya njĩra cia kũhunjia na mĩĩkĩre ya maũndũ thĩinĩ wa wabici cia honge.

Ihinda: Mĩeri ĩtano.

Kũrĩa Ĩkagĩrũo: Gĩikaro Kĩnene kĩa Ũrutani, Patterson, New York, U.S.A.

Kwagĩrĩra: Andũ mahikanĩtie na makoretwo ũtungata-inĩ wa mũthemba mũna wa mahinda mothe—ũguo nĩ kuuga, marĩ amishonarĩ arĩa matarĩ mathiĩ cukuru ĩyo, mapainia a mwanya, arori arĩa magendaga, kana arĩa matungataga Betheli. No mũhaka makorũo matungatĩire hamwe ũtungata-inĩ ũcio ihinda rĩtanyihĩire mĩaka ĩtatũ kĩrũmanĩrĩrio. Nĩ mabataraga gũkorũo moĩ kwaria, gũthoma, na kwandĩka Gĩthũngũ wega.

Kwĩyandĩkithia: Arĩa mahikanĩtie no morio nĩ Kamĩtĩ ya Wabici ya Rũhonge ya kwao meyandĩkithie.

Lade na Monique kuuma Amerika (U.S.) rĩu matungataga Afrika. Lade oigire ũũ: “Cukuru ya Gileadi nĩ yatũhaarĩrĩirie gũthiĩ kũrĩa guothe tũngĩtũmwo thĩinĩ wa thĩ, kwĩhotora kũrutithania wĩra na ariũ a Ithe witũ ende.”

Monique nake akĩongerera ũũ: “O ũrĩa ndĩrahũthĩra maũndũ marĩa ndĩĩrutĩte kuuma harĩ Kiugo kĩa Ngai, noguo ngoragwo na gĩkeno kĩnene wĩra-inĩ wakwa. Nyonaga gĩkeno kĩu kĩrĩ ũira makĩria atĩ Jehova nĩ atwendete.”

[Mbica karatathi ka 17]

Cukuru ya Arĩa Marĩ Kamĩtĩ-inĩ cia Wabici cia Honge na Atumia Ao

[Mbica karatathi ka 17]

Muoroto: Gũteithia arĩa maratungata Kamĩtĩ-inĩ cia Wabici cia Honge kũrũgamĩrĩra mĩciĩ ya Betheli, kũrũmbũiya maũndũ megiĩ ũtungata wa ciũngano, na kũrora maũndũ megiĩ mĩthiũrũrũko, na ng’ongo. Ningĩ nĩ merutaga ũhoro wĩgiĩ wĩra wa ũtaũri, gũcaba, na gũkinyĩria andũ mabuku.

Ihinda: Mĩeri ĩĩrĩ.

Kũrĩa Ĩkagĩrũo: Gĩikaro Kĩnene kĩa Ũrutani, Patterson, New York, U.S.A.

Kwagĩrĩra: Mũrũ wa Ithe witũ no mũhaka akorũo arĩ wa Kamĩtĩ ya Wabici ya Rũhonge kana Kamĩtĩ ya Bũrũri kana e mũhe wĩra ta ũcio.

Kwĩyandĩkithia: Kĩama Kĩrĩa Gĩtongoragia nĩkĩo gĩtaga ariũ a Ithe witũ acio na atumia ao.

Lowell na Cara, a kĩrathi kĩa 25 matungataga Nigeria. “Nĩ ndaririkanirio atĩ o na ingĩkorũo na wĩra mũingĩ atĩa kana heetwo wĩra ũrĩkũ-rĩ, hitho ya gũkenia Jehova nĩ gwĩka maũndũ na njĩra yake,” nĩguo Lowell oigire. “Ningĩ gĩthomo kĩu nĩ gĩatĩtĩrithirie atĩ mũikaranĩrie witũ na andũ arĩa angĩ no mũhaka wonanagie wendo ta ũrĩa Jehova onagia ndungata ciake.”

Cara ongereire ũũ: “Ciugo imwe ngoretwo ngĩĩcũũrania nĩ ici, angĩkorũo ndingĩhota kũrutana ũndũ na njĩra hũthũ-rĩ, batiĩ kwĩruta ũhoro ũcio mbere ya kũgeria kũruta andũ angĩ.”