Ciugo cia Gwĩkĩra Ngoro ‘Kuuma Tũnua-inĩ twa Twana’

Dicemba mwaka wa 2009, Igooti Rĩrĩa Inene rĩa bũrũri wa Russia nĩ rĩahĩtũkirie itua rĩatũmire ithondeka rĩa kĩndini rĩa Aira a Jehova gĩcigo-inĩ gĩa Taganrog, Russia, rĩhingwo, magĩtunywo Nyũmba ya Ũthamaki, na gũkĩanĩrĩrũo atĩ mabuku mao 34 maarĩ ũgwati harĩ mũingĩ. Ũndũ ũcio wa kũmakania nĩ wekĩrirũo Rĩarĩro-inĩ rĩa Aira a Jehova hamwe na mbica cia Aira a Jehova arĩa maahutirio nĩ itua rĩu, amwe ao marĩ twana tũnini.

Mĩeri mĩnini thutha ũcio, Wabici Ĩrĩa Ĩtabanagia maũndũ ya Aira a Jehova bũrũri-inĩ wa Russia nĩ yaamũkĩrire kamũrigo hamwe na irũa rĩrĩ rĩ haha mũhuro rĩa famĩlĩ ĩmwe ya Aira a Jehova ya Queensland, Australia, yonete ũhoro wĩgiĩ itua rĩu rĩa Igooti: “Ariũ a Ithe witũ ende, twana twitũ Cody na Larissa, nĩ twahutirio mũno nĩ wĩtĩkio na magerio ma arata a kũu Russia. Nĩ tũmandĩkĩire kandi na marũa, na ithuĩ nĩ tũhaarĩirie kamũrigo kanini ka iheo tũngĩenda gũtũmĩra twana twa kũu Taganrog, nĩguo twana tũu tũmenye atĩ o na kũndũ kũngĩ kũraihu, nĩ kũrĩ twana tũngĩ tũtungatagĩra Jehova tũrĩ na wĩhokeku na tũrameciria. Nĩ tũramatũmĩra ngeithi nyingĩ cia wendo.”

Rĩrĩa twana tũu twa Taganrog twakinyĩirũo nĩ iheo icio, nĩ twandĩkire marũa maarĩ na mbica ma gũcokeria famĩlĩ ĩyo ya Australia ngatho. Nĩ ũndũ wa kũhutio nĩ ciugo icio cia gwĩkĩra ngoro ‘kuuma tũnua-inĩ twa twana,’ Mũira wa Jehova ũmwe ũtungataga wabici-inĩ ya rũhonge ya Russia aandĩkĩire Cody na Larissa ũũ: “Ta wĩcirie ũrĩa arĩ ũndũ mũru rĩrĩa andũ agima na ciana maraherithĩrio ũndũ matekĩte. Aarĩ na ariũ a Ithe witũ a Taganrog matiĩkĩte ũndũ mũru, no nĩ maatunyirũo Nyũmba yao ya Ũthamaki. Ũndũ ũcio nĩ ũmekĩrĩte kĩeha kĩnene. Nĩ megwĩkĩrũo ngoro mũno mamenya atĩ nĩ kũrĩ andũ angĩ kuuma mĩena ĩngĩ ya thĩ marameciria. Nĩ ngatho nĩ ũndũ wa wendo na ũtana wanyu!”—Thab. 8:2.

Ti itherũ tũrĩ thĩinĩ wa ũrũmwe wa aarĩ na ariũ a Ithe witũ thĩ yothe, na wendo witũ harĩ mũndũ na ũrĩa ũngĩ nĩ ũtũteithagia kũhiũrania na magerio na moritũ ma ũtũũro. Rĩrĩa magooti maracirĩra kana mabuku ma Aira a Jehova nĩ macogagĩra rũmena, ciana citũ kuuma mabũrũri na ũndũire ũtiganĩte na njĩra ya ũhoreri nĩ cionanagia wendo na ũcayanĩri na mwerekera wacio ũkonania ũũma wa ciugo ici cia Jesu: “Nĩ ũguo andũ othe marĩmenyaga mũrĩ arutwo akwa, mwatũũra mwendaine.”—Joh. 13:35.

[Mbica karatathi ka 32]

Twana twa Russia (ũmotho) tũrĩa twatũmĩirũo iheo nĩ twana twa Australia (ũrĩo)