WARĨ mwaka wa 49 Mahinda Maitũ (M.M.). Petero, Jakubu na Johana—‘arĩa monagwo marĩ itugĩ,’ makĩhe mũtũmwo Paulo na Baranaba wĩra mũna. Maagĩrĩirũo kũiga Akristiano arĩa maarĩ athĩni meciria-inĩ o makĩhunjagĩria ndũrĩrĩ. (Gal. 2:9, 10) Hihi wĩra ũcio warutirũo atĩa?

Marũa ma Paulo nĩ maguũrĩtie ũrĩa oyaga wĩra ũcio na ũritũ. Kwa ngerekano-rĩ, aandĩkĩire Akristiano a Korintho ũũ: “Ha ũhoro wa mũhothi ũrĩa ũhothagwo nĩ ũndũ wa andũ arĩa aamũre-rĩ, inyuĩ na inyuĩ ĩkagai o ta ũrĩa ndaathanire gwĩkagwo makanitha-inĩ ma Galatia. Mũthenya wa kwambĩrĩria kiumia-rĩ, o mũndũ wanyu nĩaigage mũthithũ, o ta ũrĩa arathimĩtwo, nĩ getha mĩhothi ndĩgatuĩke ya kũhothwo rĩrĩa ndoka. Na ndakinya kwanyu, andũ o arĩa mũgakorũo mũgathĩrĩirie na marũa-rĩ, nĩo ngatũma magatware kĩndũ kĩrĩa mũheanĩte na ũtugi Jerusalemu.”—1 Kor. 16:1-3.

Thĩinĩ wa marũa make ma kerĩ kũrĩ Akorintho, Paulo nĩ aagwetire rĩngĩ muoroto wa mĩhothi ĩyo. Aatarĩirie akiuga “kũigananio maũndũ, ihinda rĩrĩ ũrĩa inyuĩ mũingĩhĩtie indo ũtuĩke wa gũteithia wagi wao.”—2 Kor. 8:12-15.

Paulo akĩandĩkĩra Akristiano a Roma kĩndũ mwaka wa 56 M.M., wĩra wa kũngania mĩhothi nĩ ta warĩ mũrĩku. Oigire ũũ: ‘Rĩu nĩ ngũthiĩ Jerusalemu, ngateithie andũ arĩa aamũre a kuo. Nĩ gũkorũo andũ a Makedonia na a Akaia nĩ monire arĩ wega mahothithanie mũhothi wa gũteithia athĩni a thiritũ ya andũ arĩa aamũre, acio me kũu Jerusalemu.’ (Rom. 15:25, 26) Kahinda kanini thutha ũcio Paulo nĩ aahingirie itemi rĩake, amu rĩrĩa aacokire Jerusalemu na akĩnyitwo arĩ kũu, eerire Felike Ngavana Mũroma atĩrĩ: “Nĩndokire kũrehere andũ a rũrĩrĩ ruitũ mbia iria ciahothetwo nĩ ũndũ wa tha, o na indo cia kũrutĩrũo Ngai.”—Atũm. 24:17.

Roho ũrĩa Akristiano a karine ya mbere moonanagia no ũmenyeke kuumana na ciugo iria Paulo oigire ciĩgiĩ andũ a Makedonia. Oigire atĩ ‘maatũhoyaga na hinya mũno atĩ metĩkĩrio meke wega ũcio.’ Mũtũmwo ũcio nĩ eekĩrire Akorintho ngoro marũmagĩrĩre kĩonereria kĩu. Aamerire ũũ: “O mũndũ nĩeke o ta ũrĩa acirĩire gwĩka na ngoro yake, na ndakarute kĩndũ ta egũkĩiguĩra ruo, kana ta arĩ kũringĩrĩrio aringĩrĩirio arute: nĩ gũkorũo Ngai endaga mũndũ ũrĩa ũkũheana akenete.” Nĩ kĩĩ gĩatindĩkire ciũngano cionanie ũtana ta ũcio? Muoroto ndwarĩ o ‘gũtũma andũ arĩa aamũre maiganwo nĩ kĩrĩa maagĩte, no nĩ nginya gũthothora mũno ũhoro wa gũcokeria Ngai ngatho nyingĩ.’ (2 Kor. 8:4; 9:7, 12) Ũheani witũ no ũkorũo na mĩoroto o ta ĩyo. Hatarĩ nganja Jehova Ngai nĩ arĩrathimaga roho ta ũcio mwega ũtarĩ wa mwĩyendo—na irathimo ciake ti itherũ nĩ itongagia mũndũ.—Thim. 10:22.

O ta hĩndĩ ya Paulo-rĩ, andũ aingĩ ũmũthĩ nĩ ‘maigaga mũthithũ’ kana makabangĩra mbeca mũigana mũna na magacikia thĩinĩ wa mathandũkũ ma mĩhothi ma kĩũngano marĩa mandĩkĩtwo “Wĩra wa Thĩ Yothe.” (1 Kor. 16:2) O mweri, ciũngano nĩ itũmaga mĩhothi ĩyo kũrĩ wabici ya Aira a Jehova ĩrĩa ĩrũgamĩrĩire bũrũri wao. Ningĩ no ũhote gũtũma mĩhothi ĩmwe kwa ĩmwe kũrĩ rũhonge rwĩtĩkĩrĩku kĩĩwatho rũrĩa rũhũthagĩrũo nĩ Aira a Jehova bũrũri-inĩ wanyu. Nĩguo ũmenye rĩĩtwa rĩa rũhonge rũrĩa rũhũthagĩrũo nĩ Aira a Jehova bũrũri-inĩ wanyu, ũkũũrio waranĩrie na wabici ya rũhonge ĩrĩa ĩtungatagĩra bũrũri wanyu. Andirethi ya wabici ĩyo ya rũhonge no yoneke thĩinĩ wa www.pr418.com. Mĩthemba ya mĩhothi ĩrĩa ũngĩtũma ĩmwe kwa ĩmwe nĩ ĩno:

MĨHOTHI YA ĨMWE KWA ĨMWE

• Mĩhothi ya mbeca, mathaga ma goro, kana indo ingĩ cia goro cia mũndũ kĩũmbe.

• Nĩ wega gũtũma irũa rĩronania atĩ mbeca kana indo icio nĩ mĩhothi ya ĩmwe kwa ĩmwe.

MŨBANGO WA MĨHOTHI ĨRĨ NA MĨHAKA

• Mĩhothi ya mbeca irĩkanĩirũo atĩ no icokio mũheani angĩcibatara.

• Nĩ wega gũtũma irũa rĩronania atĩ mĩhothi ĩyo ĩrĩ na mĩhaka.

MŨBANGO WA KŨRUTA MĨHOTHI

Makĩria ma iheo cia mbeca na indo cia goro cia mũndũ kĩũmbe, nĩ harĩ njĩra ingĩ cia kũhotha nĩguo mũndũ ateithĩrĩrie wĩra wa Ũthamaki wa thĩ yothe. Njĩra icio nĩ cionanĩtio haha mũhuro. O na angĩkorũo ũngĩenda kũhũthĩra njĩra irĩkũ, ũroorio wambe warie na wabici ya rũhonge ĩrĩa ĩtungatagĩra bũrũri wanyu nĩguo ũmenye nĩ njĩra irikũ ingĩhũthĩka bũrũri-inĩ wanyu. Na tondũ mawatho ma mabũrũri na ma kũruta igooti nĩ matiganĩte, harĩ bata kwaranĩria na mũndũ ũĩ wega ũhoro wa watho na igooti ũtanathuura njĩra ĩrĩa njega ya kũhotha.

Marĩhi ma Kũrũgamĩrĩra Ũndũ Ũngĩũka (Insurance): Mĩhothi ĩrutĩtwo na njĩra ya kũgweta atĩ rũhonge rũna rũhũthagĩrũo nĩ Aira a Jehova nĩruo rũkaagunĩka nĩ marĩhi macio kana mbeca iria mũndũ arĩhagwo ũkũrũ-inĩ kana atiga wĩra.

Akaunti cia Bengi: Akaunti cia bengi, marũa ma marĩhi, kana akaunti cia mũndũ ũmwe ũmwe arĩa matigĩte wĩra iria ingĩĩhokerũo kana irĩhwo kũrĩ rũhonge rũna rũhũthagĩrũo nĩ Aira a Jehova mũndũ angĩkua, kũringana na mĩtaratara ya bengi cia kwanyu.

Cĩya na Bondi: Cĩya na bondi (stocks and bonds) iria iheanagwo kũrĩ rũhonge rũna rũhũthagĩrũo nĩ Aira a Jehova irĩ kĩheo kĩa ĩmwe kwa ĩmwe kana kũgerera ngirimiti atĩ nĩ igatuĩka cia rũhonge rũu mũndũ akua.

Nyũmba na Mĩgũnda: Nyũmba na mĩgũnda ĩngĩendio ĩrĩa ĩheanagwo kũrĩ rũhonge rũna rũhũthagĩrũo nĩ Aira a Jehova, hihi irĩ iheo cia ĩmwe kwa ĩmwe kana, angĩkorũo nĩ nyũmba ya gũikara, no marĩkanĩre atĩ mũheani egũthiĩ na mbere gũikara thĩinĩ wayo hĩndĩ yothe ĩrĩa egũkorũo muoyo.

Bacici cia o Mwaka: Mbeca kana indo iria iheanagwo kũrĩ rũhonge rũna rũhũthagĩrũo nĩ Aira a Jehova harĩ na mũbango atĩ mũheani, kana mũndũ ũngĩ ũrĩa ũthuurĩtwo nĩwe, aamũkagĩre mũigana mũna wa bacici o mwaka hĩndĩ ĩrĩa yothe e muoyo. Mũheani nĩ anyihanyihagĩrio igooti mwaka ũrĩa mũbango ũcio wambĩrĩria.

Marũa ma Kwĩgaya na Ũramati (Wills and Trusts): Indo kana mbeca no ciĩhokerũo rũhonge rũhũthagĩrũo nĩ Aira a Jehova kũgerera marũa ma kĩĩwatho ma kwĩgaya kana kũgweta atĩ rũhonge rũu nĩruo rũkaagunĩka nĩ ngirimiti ya ũramati. Mũbango ũcio no ũkorũo na ũguni mũna ũhoro-inĩ wĩgiĩ igooti.

O ta ũrĩa ciugo “mũbango wa kũruta mĩhothi” ironania-rĩ, mĩhothi ya mĩthemba ĩyo nĩ ĩbataraga mĩbango harĩ mũheani. Nĩ ũndũ wa gũteithĩrĩria andũ arĩa mangĩenda gũteithia wĩra wa thĩ yothe wa Aira a Jehova kũgerera njĩra imwe cia icio, broshua ĩĩtagwo Charitable Planning to Benefit Kingdom Service Worldwide nĩ ĩhaarĩirio na Gĩthũngũ na Kĩhispania. Broshua ĩyo yaandĩkirũo nĩguo ĩtaarĩrie njĩra imwe cia kũheana iheo rĩu kana thutha-inĩ, ta kũgerera gũtiganĩrũo mũndũ angĩkua. Ũhoro ũmwe ũrĩa ũrĩ broshua-inĩ ĩyo no wage kũhũthĩka harĩ wee nĩ ũndũ wa igooti kana mawatho mangĩ ma bũrũri wanyu. Kwoguo thutha wa gũthoma broshua ĩyo, wagĩrĩirũo kwaranĩria na wakiri waku kana mũndũ ũrĩa ũgũtaaraga ũhoro-inĩ wĩgiĩ watho kana igooti. Kũgerera njĩra icio cia kũruta mĩhothi, andũ aingĩ nĩ mahotete kũnyita mbaru wĩra witũ wa kĩĩndini na wa gũteithia andũ thĩ yothe na makanyihanyihia marĩhi mao ma igooti. Angĩkorũo broshua ĩyo nĩ yonekaga bũrũri-inĩ wanyu, no ũmĩone ũngĩĩtia kobĩ kuuma kũrĩ mwandĩki wa kĩũngano kĩanyu.

Ũngĩenda ũhoro makĩria no waranĩrie na wabici ya rũhonge ĩrĩa ĩtungatagĩra bũrũri wanyu kũgerera thimũ kana marũa.