Gĩa na Ũgaacĩru wa ma Ũtũũro-inĩ
Gĩa na Ũgaacĩru wa ma Ũtũũro-inĩ
“Mĩthiĩre yaku nĩĩgatũma ũgaacĩre, . . . ningĩ nĩũkagĩaga na ũũgĩ maũndũ-inĩ.”—JOSH. 1:8.
ŨNGĨCOKIA ATĨA?
Suleimani aagacĩrĩte na gĩkĩro kĩrĩkũ?
Nĩ na njĩra ĩrĩkũ Paulo aarĩ na ũgaacĩru wa ma?
Ũngĩgĩa na ũgaacĩru wa gũtũũra atĩa?
1, 2. (a) Andũ aingĩ mathimaga ũgaacĩru na njĩra irĩkũ? (b) Ũngĩthima atĩa mawoni maku megiĩ ũgaacĩru?
KŨGAACĨRA ũtũũro-inĩ nĩ kuuga atĩa? Ũngĩũria andũ kĩũria kĩu, no wone atĩ macokagia na njĩra itiganĩte. Kwa ngerekano, aingĩ mathimaga ũgaacĩru na maũndũ marĩa mũndũ ahingĩtie ma kĩĩmbeca, kĩĩwĩra, kana gĩthomo. Angĩ nao mathimaga na mĩikaranĩrie—ũrĩa maiguanĩte na famĩlĩ yao, arata kana arĩa marutithanagia wĩra. Mũndũ ũtungatagĩra Ngai o na ahota gũkuruhithania ũgaacĩru na mĩeke ĩrĩa arĩ nayo kĩũngano-inĩ kana maũndũ marĩa anahingia ũtungata-inĩ.
2 Nĩguo ũmenye ũrĩa wee mwene ũthimaga ũgaacĩru, no wandĩke marĩtwa ma andũ maigana ũna arĩa wonaga ta magacĩire—arĩa makũgucagĩrĩria na ũheete gĩtĩo mũno. Andũ acio makoragwo na ngumo irĩkũ ihaanaine? Hihi nĩ atongu kana marĩ igweta? Nĩ marĩ na ũnene? Macokio no monanie wega kĩrĩa kĩrĩ ngoro-inĩ yaku, na no gĩkorũo na ũgucania mũnene harĩ matua maku na mĩoroto ĩrĩa ũthingataga.—Luk. 6:45.
3. (a) Joshua aabataraga gwĩka atĩa nĩguo agaacĩre mĩthiĩre-inĩ yake? (b) Rĩu tũkwarĩrĩria ũhoro ũrĩkũ?
3 Ũndũ ũrĩa wa bata makĩria nĩ kana Jehova nĩ atuonaga tũrĩ agaacĩru, amu ũtũũro witũ wĩhocetie harĩ gwĩtĩkĩrĩka nĩwe. Rĩrĩa Jehova aaheaga Joshua wĩra mũritũ wa gũtongoria Aisiraeli maingĩre Bũrũri wa Kĩĩranĩro, aamwĩrire athomage Watho wa Musa “mũthenya o na ũtukũ” na erutanagĩrie gwathĩkĩra ũhoro ũrĩa wandĩkĩtwo thĩinĩ waguo. Ngai aamũmĩrĩirie ũũ: “Weka ũguo, mĩthiĩre yaku nĩĩgatũma ũgaacĩre, o na ningĩ nĩũkagĩaga na ũũgĩ maũndũ-inĩ.” (Josh. 1:7, 8) Na nĩ ũĩ wega atĩ Joshua nĩ aagacĩrire. Ĩ ithuĩ na ithuĩ? Tũngĩmenya atĩa kana mawoni maitũ megiĩ ũgaacĩru nĩ maringaine na ma Ngai? Nĩguo tũmenye-rĩ, rekei twarĩrĩrie mũtũũrĩre wa athuri erĩ magwetetwo thĩinĩ wa Bibilia.
HIHI SULEIMANI NĨ AAGACĨRĨTE ŨTŨŨRO-INĨ?
4. Nĩ kĩĩ kĩngĩtũma tuuge atĩ Suleimani nĩ aagacĩrĩte?
4 Suleimani nĩ aagacĩrĩte mũno maũndũ-inĩ maingĩ. Nĩkĩ? Tondũ kwa ihinda rĩa mĩaka mĩingĩ, nĩ aathĩkagĩra na agetigĩra Jehova, ũrĩa wamũrathimire na njĩra nene. Ririkana atĩ rĩrĩa Jehova eerire Suleimani amũhoe kĩrĩa ekwenda, mũthamaki ũcio aahoire ũũgĩ wa gũtongoria andũ. Nake Ngai akĩmũrathima na ũũgĩ na ũtonga. (Thoma 1 Athamaki 3:10-14.) Ũũgĩ wake warĩ ‘mũingĩ mũno gũkĩra ũũgĩ wa ciana cia mwena wa Irathĩro, o na wa Misiri.’ Ngumo ya Suleimani yamenyekire “ndũrĩrĩ-inĩ ciothe iria ciamũthiũrũrũkĩirie.” (1 Ath. 4:30, 31) Ha ũhoro wa ũtonga-rĩ, thahabu ĩrĩa aarehagĩrũo ĩrĩ igooti o mwaka yakoragwo na ũritũ wa tani ta 25! (2 Maũ. 9:13) Aarĩ na ũũgĩ mũingĩ wa kũiguithania na mothamaki mangĩ, gwaka, na kũhũũra biacara. Ĩĩ-ni, hĩndĩ ĩrĩa yothe aarĩ na mũrũgamo mwega maitho-inĩ ma Ngai, Suleimani nĩ aagacĩrĩte.—2 Maũ. 9:22-24.
5. Suleimani aakinyĩrĩire itua rĩrĩkũ rĩgiĩ andũ arĩa monagwo marĩ agaacĩru nĩ Ngai?
5 Maũndũ marĩa Suleimani aandĩkire ibuku-inĩ rĩa Kohelethu nĩ monanagia atĩ ndaigana gwĩciria atĩ ũgaacĩru na gĩkeno cionagwo no andũ arĩa atongu kana marĩ igweta. Aandĩkire ũũ: “Nĩnjũĩ atĩ hĩndĩ ĩrĩa yothe megũtũra muoyo, matirĩ ũndũ ũngĩ mangĩĩka ũhĩtũkanĩte na gũkena o na kwĩyonera wega. O na ningĩ ngamenya atĩ kĩheo kĩa Ngai nĩ gĩkĩ, atĩ o mũndũ arĩage na anyuage, na onage wega mĩĩtungumanĩrie-inĩ yake yothe.” (Koh. 3:12, 13) Nĩ aamenyaga atĩ ikeno ta icio nĩ cia bata harĩ arĩa metĩkĩrĩkĩte nĩ Ngai, arĩa makoragwo na ũkuruhanu mwega Nake. Nĩkĩo Suleimani oigire ũũ: “Kĩrĩkĩrĩro kĩa ndeto icio ciothe nĩ gĩkĩ, atĩ maũndũ mothe nĩmaiguĩtwo; wĩtigĩre Ngai, na ũmenyagĩrĩre maathani make; nĩ ũndũ gwĩka ũguo nĩ kũhingia maũndũ mothe marĩa mũndũ aagĩrĩirũo nĩ gwĩka.”—Koh. 12:13.
6. Kĩonereria gĩa Suleimani gĩtũteithagia kũgĩa na ũtaũku ũrĩkũ ũhoro-inĩ wĩgiĩ gũthima ũgaacĩru wa ma?
6 Kwa ihinda rĩa mĩaka mĩingĩ, Suleimani aarĩ mwĩtigĩri Ngai. Tũthomaga atĩ ‘aatũũrire endete Jehova, akĩrũmĩrĩra irĩra cia watho iria cia ithe Daudi.’ (1 Ath. 3:3) Githĩ ndũkuona ũcio warĩ ũgaacĩru wa ma? Atongoretio nĩ Ngai, Suleimani nĩ aakire hekarũ thaka ya ũthathaiya wa ma na akĩandĩka mabuku matatũ ma Bibilia. O na gũtuĩka tũtingĩrĩgĩrĩra gwĩka take-rĩ, kĩonereria gĩa Suleimani hĩndĩ ĩrĩa aarĩ mwĩhokeku harĩ Ngai nĩ kĩagĩrĩire gũtũteithia kũmenya ũrĩa tũngĩthima ũgaacĩru wa ma na ũrĩa tũngĩgĩa naguo. Ũndũ-inĩ ũcio, ririkana atĩ Suleimani atongoretio nĩ roho aandĩkire atĩ ũtonga, ũũgĩ, ngumo, na ũnene—maũndũ marĩa andũ aingĩ ũmũthĩ monaga ta arĩ mo ithimi cia ũgaacĩru—nĩ ma tũhũ. Ti itherũ, nĩ “gwĩthĩnia gũtheri.” Githĩ ndwĩyoneire atĩ andũ arĩa mendete mbeca mendaga o kũgĩa nyingĩ makĩria? Na hĩndĩ ciothe indo iria marĩ nacio nĩ imekagĩra kĩeha. Makĩria ma ũguo, ũtonga ũcio wao no ũgatuĩka wa andũ angĩ mũthenya ũmwe.—Thoma Kohelethu 2:8-11, 17; 5:10-12.
7, 8. Suleimani aagire wĩhokeku atĩa, na moimĩrĩro maarĩ marĩkũ?
7 Ningĩ nĩ ũĩ atĩ thutha-inĩ Suleimani nĩ aatigire gwathĩka arĩ na wĩhokeku. Kiugo kĩa Ngai kiugaga ũũ: “Nĩgwakinyire atĩrĩ, atĩ hĩndĩ ĩrĩa Suleimani aarĩ mũkũrũ, aka acio ake nĩmaamũgarũrire ngoro, arũmĩrĩre ngai ingĩ; na ndaigana kũrũmĩrĩra Jehova Ngai wake na ngoro yake yothe, ta ũrĩa ithe Daudi ekaga. . . . Suleimani agĩgĩĩka maũndũ marĩa monagwo marĩ moru nĩ Jehova.”—1 Ath. 11:4-6.
8 Tondũ Jehova ndaakenire, eerire Suleimani atĩrĩ: “Tondũ ũcio, . . . kuona atĩ nĩwĩkĩte ũguo, na ũkaaga kũmenyerera kĩrĩkanĩro gĩakwa, o irĩra cia watho wakwa wa kũrũmĩrĩrũo iria ngwathĩte-rĩ, ti-itherũ ndirĩ hingo itegũgũtunya ũthamaki, ndĩũhe ndungata yaku.” (1 Ath. 11:11) Kaĩ warĩ ũndũ mũũru-ĩ! O na gũtuĩka Suleimani nĩ aagacĩrĩte maũndũ-inĩ maingĩ, thutha-inĩ nĩ aarakaririe Jehova. Suleimani nĩ aagire wĩhokeku harĩ Ngai—ũndũ ũrĩa wa bata makĩria ũtũũro-inĩ. O ũmwe witũ no eyũrie, ‘Niĩ nĩ nduĩte itua rĩa gũtigĩrĩra atĩ ũndũ ũrĩa ndĩĩrutĩte kuumana na ũtũũro wa Suleimani nĩ ũkũndeithia kũgaacĩra?’
ŨTŨŨRO MŨGAACĨRU KŨNA
9. Agĩthimwo na ithimi cia thĩ ĩno-rĩ, hihi Paulo nĩ aagacĩrĩte? Taarĩria.
9 Ũtũũro wa mũtũmwo Paulo warĩ ngũrani mũno na wa Mũthamaki Suleimani. Paulo ndaakoragwo na ũnene kana ndĩa hamwe na athamaki. Ithenya rĩa ũguo, kwĩ hĩndĩ aahũtaga, akanyota, akaigua heho, na akaaga nguo. (2 Kor. 11:24-27) Kuuma rĩrĩa eetĩkĩrire atĩ Jesu nĩwe Mesia, Paulo ndaatigirũo na gaturwa ndini-inĩ ya Kĩyahudi. Handũ ha ũguo, atongoria a ndini ya Kĩyahudi nĩ kũmũthũũra maamũthũũrire. Agĩikio korokoro, akĩhũrũo iboko, na akĩhũrũo na mahiga. Paulo oigire atĩ we na Akristiano arĩa angĩ nĩ maarumagwo, makanyarirũo, na magaconorithio. “Tũtuagwo ta arĩ ithuĩ gĩko gũkũ thĩ, na ta arĩ ithuĩ makũro marĩa makũrũragwo ma indo o na arĩ irĩkũ.”—1 Kor. 4:11-13.
10. Nĩ kĩĩ kĩngĩatũmire kuoneke ta Paulo aaregaga ũgaacĩru?
10 Rĩrĩa aarĩ mwanake wetagwo Saulu, mũtũmwo Paulo onekaga ta aarorete kũgaacĩra biũ. Aaciarĩirũo famĩlĩ-inĩ hihi yarĩ igweta, agĩthomithio nĩ Gamalieli mũrutani warĩ ngumo, na thutha-inĩ akĩandĩka ũũ: “Ũhoro-inĩ wa ndini ĩo ya Ayahudi, nĩnderutanĩirie ngathiĩ na mbere mũno, ngakĩra andũ aingĩ a riika rĩakwa.” (Gal. 1:14) Saulu nĩ angĩahotire kwaria wega Kĩhibirania na Kĩgiriki, ningĩ aarĩ na ũraiya wa Roma, ũndũ ũrĩa wamũheete ũhoti na mĩeke ĩrĩa ĩriragĩrio mũno. Korũo nĩ aathire na mbere gũthingata ũgaacĩru ta ũcio wa thĩ, kwahoteka nĩ angĩatĩĩkire makĩria na agĩe na mbeca. No ithenya rĩa ũguo, aathuurire gwĩka ũndũ andũ aingĩ—o na hihi amwe a ndĩra ciao mangĩonire ũrĩ ũrimũ mũtheri. Nĩkĩ?
11. Nĩ muoroto na maũndũ marĩkũ Paulo onaga marĩ ma bata mũno, na nĩkĩ?
11 Paulo nĩ eendete Jehova na nĩ eeriragĩria gwĩtĩkĩrĩka nĩwe gũkĩra kũgĩa na ũtonga na igweta gatagatĩ-inĩ ka andũ. Paulo agĩa na ũmenyo wa ma, nĩ aatĩire mũno igongona rĩa ũkũũri, ũtungata wa Gĩkristiano, na kĩĩrĩgĩrĩro kĩa muoyo kũrĩa igũrũ—maũndũ marĩa thĩ ĩtatindanagĩra namo. Paulo nĩ aamenyete atĩ harĩ thitango yabataraga kũniinwo. Shaitani oigĩte atĩ no ahote kũgarũra andũ matige gũtungatĩra Ngai. (Ayub. 1:9-11; 2:3-5) O na aacemania na magerio mahaana atĩa, Paulo nĩ aatuĩte itua rĩa gũikara arĩ mwĩhokeku harĩ Ngai, na gũkirĩrĩria ũthathaiya-inĩ wa ma. Ũcio nĩ muoroto arĩa mendaga kũgaacĩra thĩinĩ wa thĩ ĩno matakoragwo naguo.
12. Wee wathuurire kũiga mwĩhoko waku harĩ Ngai nĩkĩ?
12 Hihi wee nĩ ũkoragwo ũtuĩte itua ta rĩa Paulo? O na gũtuĩka gũtũũra na wĩhokeku ti ũndũ mũhũthũ hĩndĩ ciothe-rĩ, nĩ tũĩ atĩ nĩ kũrehaga irathimo cia Jehova na gwĩtĩkĩrĩka nĩwe, na ũcio nĩguo ũndũ ũrĩa ũtũmaga mũndũ akorũo arĩ mũgaacĩru kũna. (Thim. 10:22) Nĩ tũgunĩkaga rĩu, na no tũtanye irathimo ihinda rĩrĩa rĩũkĩte. (Thoma Mariko 10:29, 30.) Kwoguo twĩna gĩtũmi kĩiganu gĩa kwaga kwĩhoka ‘indo icio itamenyagĩrũo, no tũkehokaga Ngai, we ũtũheaga indo ciothe agĩtũtanahagĩra, nĩ getha tũcihũthagĩre na gĩkeno. Tũkeigĩra mũthithũ ũrĩa ũngĩtuĩka gĩtina gĩa gwakwo maũndũ mega mahinda marĩa mokĩte, nĩ getha tũkona muoyo ũrĩa wa ma.’ (1 Tim. 6:17-19) Ĩĩ-ni, no tũkorũo na ma biũ atĩ mĩaka igana rĩmwe, o na mĩaka ngiri ĩmwe kana makĩria kuuma rĩu, nĩ tũkahotaga gũcokia meciria na thutha tũkoiga, “Hatarĩ nganja, nĩ ndaathuurire njĩra ĩrĩa ya ũgaacĩru wa ma!”
KŨRĨA ŨTONGA WAKU ŨRĨ
13. Jesu aaheanire ũtaaro ũrĩkũ wĩgiĩ kwĩigĩra mũthithũ?
13 Jesu oigire ũũ igũrũ rĩgiĩ mũthithũ: “Tigagai kwĩigĩra ũtonga gũkũ thĩ, kũrĩa indo irĩagwo nĩ memenyi, na irotaga, na kũrĩa aici matũrĩkagia makaiya; no mwĩigagĩrei ũtonga Igũrũ, kũrĩa indo itarĩagwo nĩ memenyi, na itarotaga, na kũrĩa gũtarĩ aici matũrĩkagia makaiya; tondũ-rĩ, o kũrĩa ũtonga waku ũrĩ, nĩkuo ngoro yaku nayo ĩkoragwo ĩrĩ.”—Mat. 6:19-21.
14. Nĩkĩ ti ũndũ wa ũũgĩ gũcaria ũtonga wa thĩ ĩno?
14 Ũtonga wa mũndũ gũkũ thĩ to mbeca ciki. Na njĩra ĩngĩ-rĩ, no ũkorũo ũrĩ indo ta iria Suleimani aandĩkire igũrũ rĩacio atĩ nĩ ikonainie na ũgaacĩru maitho-inĩ ma andũ—gĩtĩo, igweta, kana ũnene. Jesu nĩ aaririe ũndũ ũhaanaine na ũcio Suleimani aagwetire ibuku-inĩ rĩa Kohelethu—ũtonga wa thĩ ĩno nĩ wa kahinda. O ta ũrĩa ũngĩkorũo wĩyoneire thĩinĩ wa thĩ, ũtonga ta ũcio nĩ wa kahinda na no ũthire na njĩra hũthũ. Profesa F. Dale Bruner aandĩkire ũũ ũhoro-inĩ wĩgiĩ ũtonga ta ũcio: “Nĩ kũĩkaine wega atĩ ngumo ndĩtũũraga. Mũndũ ũrĩa njamba ũmũthĩ rũciũ rũngĩ akeeragwo aarĩ njamba. Ũrĩa ũgaacĩrĩte biacara-inĩ mwaka ũyũ nĩwe ũgakorũo e mũharu mwaka ũkĩte. . . . [Jesu] nĩ endete andũ. Amekagĩra ngoro methemage mĩtangĩko ĩrĩa yumanaga na riri wa kahinda. Tondũ ndũtũũraga. Jesu ndendaga arutwo [ake] makue ngoro. ‘O mũthenya thĩ nĩ ĩgarũrũkaga mũndũ wagaacĩrĩte thĩinĩ wayo.’” O na gũtuĩka andũ aingĩ no metĩkanie na ciugo icio-rĩ, hihi nĩ aigana marekaga ũũma wacio ũgarũre muonere wao wĩgiĩ ũtũũro? Hihi wee nĩ ũkũreka?
15. Twagĩrĩirũo kwĩrutanĩria kũgĩa na ũgaacĩru wa mũthemba ũrĩkũ?
15 Atongoria amwe a ndini mahunjagia atĩ nĩ mahĩtia gũcaria ũgaacĩru na atĩ kĩyo o gĩothe gĩa gwĩcarĩria ũgaacĩru kĩagĩrĩire kũgirio. No ta rora wone atĩ Jesu ndonanagia atĩ kĩyo o gĩothe ta kĩu nĩ kĩũru. Ithenya rĩa ũguo, eekagĩra arutwo ake ngoro merekerie kĩyo kĩao mwena ũngĩ, aamataarire meigagĩre “ũtonga Igũrũ” ũrĩa ũtangĩthira. Ũndũ ũrĩa twagĩrĩirũo kwĩrirĩria mũno nĩ kũgĩa na ũgaacĩru maitho-inĩ ma Jehova. Ĩĩ, ciugo cia Jesu itũririkanagia atĩ no mũhaka tũthuure ũndũ ũrĩa tũgũthingata. Ĩndĩ, ma nĩ atĩ, tũgũthingata kĩrĩa kĩrĩ ngoro-inĩ citũ, kĩrĩa tuonaga kĩrĩ kĩa bata.
16. Nĩ ũndũ ũrĩkũ twagĩrĩirũo kwĩhoka biũ?
16 Angĩkorũo nĩ twendete gũkenia Jehova, no twĩhoke atĩ nĩ arĩtigagĩrĩra nĩ tuona indo iria tũbataraga. No areke tũkorũo na ng’aragu kana nyota gwa kahinda o ta mũtũmwo Paulo. (1 Kor. 4:11) Ĩndĩ, no twĩhoke biũ ũtaaro ũyũ mwega wa Jesu: “Tigagai gwĩtangĩkĩra, mũkiugaga atĩrĩ, Tũkũrĩa kĩ? kana, Tũkũnyua kĩ? o na kana, Tũkwĩhumba kĩ? Nĩ ũndũ indo icio ciothe nĩcio imathagwo nĩ andũ a Ndũrĩrĩ; tondũ Ithe wanyu wĩ Igũrũ nĩoĩ atĩ nĩmũbataragio nĩ indo icio ciothe. No ambai mũcarie ũthamaki wa Ngai o na ũthingu wake, nacio indo icio ciothe nĩmũrĩkĩragĩrĩrio.”—Mat. 6:31-33.
GAACĨRA MAITHO-INĨ MA NGAI
17, 18. (a) Ũgaacĩru wa ma wĩhocetie harĩ kĩĩ? (b) Nĩ ũndũ ũrĩkũ ũgaacĩru ũtehocetie harĩ guo?
17 Ũndũ ũrĩa mũnene nĩ ũyũ: Kũgaacĩra kwa ma harĩ ithuĩ gũtiĩhocetie harĩ kũgĩa na ũtonga kana igweta maitho-inĩ ma andũ. Ningĩ-rĩ, ũgaacĩru wa ma ndũthimagwo na wĩra mũna ũrĩa twĩhokeirũo thĩinĩ wa kĩũngano gĩa Gĩkristiano. Kĩrathimo ta kĩu no gĩkorũo gĩkonainie na ũndũ ũrĩa kũna ũrehaga ũgaacĩru, wathĩki na wĩhokeku witũ harĩ Ngai, o we ũtũũmagĩrĩria ũũ: “Ha ũhoro wa aramati-rĩ, no mũhaka mũndũ ta ũcio akoragwo arĩ wa kwĩhokeka.” (1 Kor. 4:2) Ningĩ no mũhaka tũkirĩrĩrie tũrĩ ehokeku. Jesu oigire ũũ: “Ũrĩa wa gũkirĩrĩria o nginya hĩndĩ ya marigĩrĩrio, nĩwe ũkahonoka.” (Mat. 10:22) Githĩ ndũgwĩtĩkania na ciugo icio atĩ kũhonokio gũgaakorũo kũrĩ ũira mũiganu atĩ nĩ twagaacĩrĩte?
18 Ũngĩĩciria ũhoro ũcio, no wone atĩ wĩhokeku harĩ Ngai ndũkonainie na igweta, gĩthomo, ũtonga, kana mĩikarĩre ya mũndũ; o na wĩhokeku ndwĩhocetie harĩ ũũgĩ, kana ũhoti. O na tũngĩĩkora ũndũ-inĩ ũrĩkũ, no tuonanie wĩhokeku witũ harĩ Ngai. Andũ amwe a Ngai karine-inĩ ya mbere maarĩ atongu, nao angĩ maarĩ athĩni. Harĩ acio atongu, ũtaaro wa Paulo atĩ ‘mekage wega, matonge na ũtonga o ũrĩa wa gwĩkaga maũndũ mega, na maikarage mehaarĩirie kũheana indo’ nĩ waagĩrĩire. Acio maarĩ atongu o hamwe na acio athĩni nĩ mangĩahotire ‘kuona muoyo ũrĩa wa ma.’ (1 Tim. 6:17-19) Ũndũ ũcio nĩ wa ma o na ũmũthĩ. Ithuothe tũrĩ na mweke ũmwe na wĩra ũmwe: No mũhaka tũikare tũrĩ ehokeku na ‘tũtonge na ũtonga wa gwĩkaga maũndũ marĩa mega.’ Tũngĩka ũguo, nĩ tũrĩkoragwo tũrĩ agaacĩru maitho-inĩ ma Mũũmbi witũ na tũkagĩa na gĩkeno gĩa kũmenya atĩ nĩ tũramũkenia.—Thim. 27:11.
19. Ũhoro-inĩ wĩgiĩ kũgaacĩra-rĩ, wee ũtuĩte itua rĩrĩkũ?
19 No ũremwo nĩ kũgirĩrĩria biũ maũndũ marĩa mangĩgũkora, ĩndĩ no ũhote kũgirĩrĩria ũrĩa ũhiũranagia namo. Wĩrutanĩrie gũkorũo ũrĩ mwĩhokeku o na maũndũ maku mangĩikara atĩa. Nĩ ũndũ mwagĩrĩru. Gĩa na ma atĩ Jehova nĩ egũkũrathima mũno—rĩu na nginya tene na tene. Ndũkanariganĩrũo nĩ ciugo iria Jesu eerire Akristiano aitĩrĩrie maguta: “Wee ikaraga wĩ mwĩhokeku kinya o gũkua, na nĩngakũhe thũmbĩ ya muoyo.” (Kũg. 2:10) Hatarĩ nganja ũcio nĩ ũgaacĩru wa ma!
[Ciũria cia wĩruti]
[Mbica karatathi ka 6]
Kũringana na ithimi cia andũ, Saulu onekaga ta aarorete kũgaacĩra
[Mbica karatathi ka 7]
Paulo nĩ aagĩire na ũgaacĩru wa ma
