Gũtũũria Mũrũgamo Witũ Tũrĩ “Agendi”
Gũtũũria Mũrũgamo Witũ Tũrĩ “Agendi”
“Nĩndamũthaitha, mũkĩrĩ o ageni na agendi, atĩ mũtigane na merirĩria marĩa moru ma mwĩrĩ.”—1 PET. 2:11.
ŨNGĨCOKIA ATĨA?
Nĩ kĩĩ kĩngĩtũma arĩa aitĩrĩrie maguta metwo agendi?
Arĩa a “ng’ondu ingĩ” makoragwo marĩ agendi na njĩra ĩrĩkũ?
Nĩ ũndũ ũrĩkũ wĩriragĩria mũno wĩgiĩ mahinda mokĩte?
1, 2. Nĩ a Petero eetire ‘arĩa athuure,’ na nĩ kĩĩ gĩatũmire amete “agendi”?
MĨAKA ta 30 thutha wa Jesu kwambata igũrũ, mũtũmwo Petero nĩ aandĩkire marũa kũrĩ ‘andũ athuure arĩa maatũire ũgeni-inĩ, maharaganĩire mabũrũri ma Ponto, Galatia, Kapadokia, Asia, na Bithunia.’ (1 Pet. 1:1) Hatarĩ nganja, akiuga ‘arĩa athuure,’ Petero aaragia ũhoro wa arĩa maitĩrĩirio maguta kũgerera roho mũtheru o take, na ‘magaciarũo rĩngĩ nĩ getha magĩe na kĩĩrĩgĩrĩro kĩĩ muoyo,’ nĩguo magaathana na Kristo kũrĩa igũrũ. (Thoma 1 Petero 1:3, 4.) No nĩ kĩĩ gĩatũmire acoke ete acio athuure “ageni na agendi”? (1 Pet. 2:11) Na hihi ũndũ ũcio ũrĩ na bata ũrĩkũ harĩ ithuĩ ũmũthĩ o rĩrĩa arĩ Aira a Jehova anini tu moigaga atĩ nĩ athuure kana magaitĩrĩrio maguta?
2 Gwĩta arĩa aitĩrĩrie maguta a karine ya mbere “agendi” warĩ ũndũ mwagĩrĩru. O ta arĩa matigarĩte a gĩkundi kĩu ũmũthĩ, matiarĩ aikari a gũtũũra gũkũ thĩ. Arĩ ũmwe wa acio aitĩrĩrie maguta a ‘karũũru kanini,’ mũtũmwo Paulo aataarĩirie ũũ: “Bũrũri ũrĩa tũrĩ aguo kĩũmbe nĩ kũrĩa Igũrũ, na twetagĩrĩra Mũhonokia ũrĩa ũkoima kuo, nĩwe Mwathani Jesu Kristo.” (Luk. 12:32; Afil. 3:20) Tondũ wa gũkorũo ‘bũrũri ũrĩa marĩ aguo kĩũmbe nĩ kũrĩa igũrũ-rĩ,’ arĩa aitĩrĩrie maguta maakua magĩaga na kĩndũ kĩega makĩria, muoyo ũtangĩthira kũrĩa igũrũ. (Thoma Afilipi 1:21-23.) Kwoguo, no merũo o nĩ “agendi” thĩinĩ wa thĩ ĩno ĩrĩ rungu rwa Shaitani.
3. Nĩ kĩũria kĩrĩkũ kĩyumĩragia kĩgiĩ arĩa a “ng’ondu ingĩ”?
3 Ĩ nao arĩa a “ng’ondu ingĩ”? (Joh. 10:16) Githĩ Maandĩko mationanagia atĩ kĩĩrĩgĩrĩro kĩao nĩ gũgatuĩka aikari a gũtũũra thĩinĩ wa thĩ? Ĩĩ, ũcio nĩguo ũgaatuĩka mũciĩ wao tene na tene! Ĩndĩ, o nao no merũo atĩ ihinda-inĩ rĩrĩ nĩ agendi. Na njĩra ĩrĩkũ hihi?
‘CIŨMBE CIOTHE ITŨIRE ICAYAGA’
4. Nĩ ũndũ ũrĩkũ atongoria a thĩ maremetwo kũgirĩrĩria?
4 Hĩndĩ ĩrĩa yothe mũtabarĩre ũyũ mũũru wa Shaitani ũgũkorũo kuo, andũ othe, nginya Akristiano, megũthiĩ na mbere kũnyamarĩka nĩ ũndũ wa ũkararia wa Shaitani kwerekera Jehova. Tũthomaga ũũ thĩinĩ wa Aroma 8:22: “Nĩtũũĩ atĩ ciũmbe icio ciothe o nginya rĩu itũire icayaga o hamwe, ikĩiguaga ruo ta rũa mũndũ-wa-nja akĩrũmwo.” No atongoria a thĩ, andũ a sayansi, na arĩa maheaga andũ ũteithio, o na makĩendaga nĩ maremetwo kũgirĩrĩria ũndũ ũcio.
5. Nĩ ikinya rĩrĩkũ andũ milioni nyingĩ moete kuuma mwaka wa 1914, na nĩkĩ?
5 Nĩ ũndũ ũcio, kuuma mwaka wa 1914 andũ milioni nyingĩ nĩ matuĩte itua rĩa gũtuĩka raiya a Kristo Jesu, Mũthamaki ũrĩa ũhaandĩtwo nĩ Ngai. Matiĩriragĩria gũtuĩka a mũtabarĩre ũyũ wa Shaitani. Matiĩtĩkagĩra kũnyita mbaru thĩ ya Shaitani. Ithenya rĩa ũguo, mahũthagĩra ũtũũro wao na indo ciao kũnyita mbaru Ũthamaki wa Ngai.—Rom. 14:7, 8.
6. Aira a Jehova mangĩĩtwo ageni na njĩra ĩrĩkũ?
6 Nĩ ma, Aira a Jehova nĩ raiya mathĩkagĩra watho mabũrũri-inĩ makĩria ma 200, ĩndĩ, kũrĩa guothe matũũraga, maikaraga ta ageni. Matiĩingĩragia o na hanini ngucanio-inĩ cia gĩũteti na cia mĩikarĩre cia mabũrũri marĩa matũũraga. O na rĩu, meyonaga marĩ raiya a thĩ njerũ, ĩrĩa Ngai eranĩire. Nĩ makenaga kuona ihinda rĩao rĩa gũtũũra marĩ agendi thĩinĩ wa thĩ ĩno ĩtarĩ nginyanĩru rĩgĩkuhĩrĩria gũthira.
7. Ndungata cia Ngai igaatuĩka atĩa aikari a gũtũũra, na igaatũũra kũ?
7 Ica ikuhĩ Kristo nĩ arĩhũthĩra wathani wake kwananga mũtabarĩre ũyũ mũũru wa Shaitani. Thirikari nginyanĩru ya Kristo nĩ ĩrĩniina mehia na mĩnyamaro thĩinĩ wa thĩ. Ĩkeeheria ciũmbe ciothe iria ikararagia wathani wa Jehova, iria cionekaga o na iria itonekaga. Thutha ũcio arĩa matungatagĩra Ngai marĩ ehokeku matuĩke aikari a gũtũũra thĩinĩ wa Paradiso gũkũ thĩ. (Thoma Kũguũrĩrio 21:1-5.) Hĩndĩ ĩyo, ciũmbe ciothe igaakorũo ‘ciohoretwo ikoima ũkombo-inĩ wa ũhoro wa kũbutha igakinyĩra ũrĩa ũtarĩ wa ũkombo o na hanini, ũrĩa ũkonainie na riri ũrĩa ũkaheo ciana cia Ngai.’—Rom. 8:21.
AKRISTIANO A MA MERĨGAGĨRĨRŨO MAIKARE ATĨA?
8, 9. Taarĩria kĩrĩa Petero eendaga kuuga rĩrĩa oigire ‘mũtiganage na merirĩria ma mwĩrĩ.’
8 Petero nĩ aataarĩirie ũrĩa Akristiano merĩgagĩrĩrũo maikare rĩrĩa oigire ũũ: “Endwa akwa, nĩndamũthaitha, mũkĩrĩ o ageni na agendi, atĩ mũtigane na merirĩria marĩa moru ma mwĩrĩ, marĩa marũaga na roho.” (1 Pet. 2:11) Ũtaaro ũcio riita rĩa mbere weerekeirio kũrĩ Akristiano aitĩrĩrie maguta, ĩndĩ nĩ wa bata nginya harĩ arĩa a ngo’ondu ingĩ cia Jesu.
9 Merirĩria mamwe ti moru, mangĩhingio na njĩra ĩrĩa Mũũmbi endaga. Ma nĩ atĩ, nĩ matumaga andũ makenere ũtũũro. Kwa ngerekano, andũ nĩ meriragĩria gũkenera irio njega na kĩndũ gĩa kũnyua, gwĩka maũndũ ma gũcanjamũra, na gũkorũo hamwe na arata ega. O na mũndũ kwĩrirĩria gũkomania na ũrĩa mahikanĩtie nake nĩ ũndũ mwagĩrĩru na mwega. (1 Kor. 7:3-5) No Petero onanirie atĩ ‘merirĩria ma mwĩrĩ’ marĩa aaragia ũhoro wa mo nĩ marĩa “marũaga na roho.” Bibilia ya New International Version nĩ yonanĩtie wega nĩ merirĩria marĩkũ maaragĩrĩrio, ĩmetĩte “merirĩria ma wĩhia.” Hatarĩ nganja, merirĩria o mothe marĩa mataringaine na wendi wa Jehova na marĩa mangĩthũkia ũkuruhanu mwega wa mũndũ na Ngai no mũhaka methemwo. Mũkristiano angĩaga gwĩka ũguo, no orũo nĩ kĩĩrĩgĩrĩro gĩake gĩa gũgaatũũra muoyo.
10. Njĩra imwe iria Shaitani ahũthagĩra kũgucĩrĩria Akristiano matuĩke a thĩ ĩno yake nĩ irĩkũ?
10 Muoroto wa Shaitani nĩ kwagithia hinya itua rĩa Akristiano a ma rĩa kwĩyona marĩ “agendi” thĩinĩ wa mũtabarĩre ũyũ. Riri wa indo cia kĩĩmwĩrĩ, ũgucĩrĩria wa maũndũ ma ũũra thoni, kũgĩa igweta, mũndũ kwenda gũtuĩka wa mbere maũndũ-inĩ mothe, na ũtũũgĩria wa bũrũri—ĩyo yothe nĩ mĩtego ya Shaitani na ũguo nĩguo twagĩrĩirũo kũmĩona. Rĩrĩa twatua itua irũmu rĩa gwĩthema merirĩria macio moru ma kĩĩmwĩrĩ, tuonanagia wega atĩ tũtingĩenda gũtuĩka a thĩ ĩno njũru ya Shaitani. Ningĩ nĩ tuonanagia atĩ tũratũũra thĩinĩ wayo gwa kahinda. Ũndũ ũrĩa twendaga na twĩrutanagĩria mũno gũkinyĩra nĩ gũtuĩka aikari a gũtũũra thĩinĩ wa thĩ njerũ ya Ngai ĩrĩ na ũthingu.
MĨTHIĨRE MĨEGA
11, 12. Rĩmwe na rĩmwe ageni monagwo atĩa, na andũ amwe moigaga atĩa igũrũ rĩgiĩ Aira a Jehova?
11 Petero nĩ athiĩte na mbere gũtaarĩria ũrĩa Akristiano merĩgagĩrĩrũo maikare marĩ “agendi,” akoiga ũũ thĩinĩ wa mũhari wa 12: “Na mũtũũre na mĩtũũrĩre mĩagĩrĩru, mũikaranĩtie na andũ a Ndũrĩrĩ iria itoĩ Ngai, nĩguo atĩ, o na harĩa mamũigagĩrĩra igenyo ta mũrĩ eki ũũru-rĩ, macoke gũkumagia Ngai mũthenya wakinya ũrĩa agoka kũmarora, nĩ ũndũ wa mawĩra manyu mega marĩa meonagĩra.” Rĩmwe ageni kana agendi thĩinĩ wa bũrũri ũtarĩ wao nĩ mamenagĩrĩrio. Nĩ ũndũ wa gũkorũo marĩ ngũrani na aikari a kũu, no monwo ta marĩ andũ oru. Mwarĩrie wao, mĩĩkĩre yao ya maũndũ, mĩĩhumbĩre yao, o na maũthĩ mao no makorũo marĩ ngũrani. No mangĩka maũndũ mega, ũguo nĩ kuuga, mĩthiĩre yao ĩkorũo ĩrĩ mĩega, ndeto njũru imegiĩ nĩ cionekaga itirĩ na mũthingi.
12 No taguo, Akristiano a ma makoragwo marĩ ngũrani na andũ arĩa angĩ maũndũ-inĩ mamwe, ta ndeto iria maragia kana maũndũ marĩa mathuuraga ma gwĩkenia. Mĩĩhumbĩre yao kaingĩ nĩ ĩtũmaga makũũrĩkane na andũ arĩa angĩ. Rĩmwe na rĩmwe ũtiganu ũcio nĩ ũtũmaga andũ amwe matamoĩ wega moige atĩ nĩ andũ oru. O na kũrĩ ũguo, angĩ nĩ mamagathagĩrĩria nĩ ũndũ wa mĩthiĩre yao.
13, 14. Ũũgĩ ‘ũmenyekaga kĩhooto kĩaguo nĩ ũndũ wa ciĩko ciaguo’ na njĩra ĩrĩkũ? Heana ngerekano.
13 Ti itherũ, mĩthiĩre itũ mĩega no ĩtũme arĩa matũcambagia moneke matirĩ na kĩhooto gĩa gwĩka ũguo. O na Jesu, mũndũ ũrĩa wiki wanatũũria wĩhokeku mũkinyanĩru harĩ Ngai, nĩ aaigagĩrĩirũo igenyo. Andũ amwe maamwĩtaga “mũndũ mũrĩi na mũnyui wa ndibei, na mũrata wa etia mbia cia igoti, na wa ehia.” No ũrĩa kũrĩ nĩ atĩ, mĩthiĩre yake ya ũũgĩ agĩtungatĩra Ngai nĩ yonanirie atĩ we ndaarĩ mwĩhia. Jesu oigire atĩ, ‘ũũgĩ ũmenyekaga kĩhooto kĩaguo nĩ ũndũ wa ciĩko ciaguo.’ (Mat. 11:19) Noguo kũrĩ o na ũmũthĩ. Kwa ngerekano, andũ amwe arĩa maikaraga hakuhĩ na Betheli ĩrĩa ĩrĩ Selters, Njĩrĩmani, monaga aarĩ na ariũ a Ithe witũ arĩa matungataga kũu marĩ andũ ngũrani mũno. No mũnene ũmwe wa taũni ĩyo nĩ aamateteire akiuga: “Aira a Jehova arĩa matungataga kũu marĩ mũikarĩre wao ene, ĩndĩ ndũingagĩrĩra ũtũũro wa andũ arĩa mamarigicĩirie.”
14 Ũndũ ta ũcio nĩ wĩrĩgĩte kũgwetwo igũrũ rĩgiĩ Aira a Jehova arĩa maikaraga Moscow, Russia. Nĩ maaigĩrĩrũo kĩgenyo atĩ nĩ meekĩte maũndũ maigana ũna matagĩrĩire. No kũrĩ Juni mwaka wa 2010, Igooti rĩa Rũraya rĩa Ihooto cia Ũmũndũ rĩa Strasbourg, Faranja, rĩgĩtua ũũ: “Igooti rĩrĩ nĩ rĩona atĩ [Moscow] ndĩarĩ na kĩhooto gĩa kũingĩrĩra wĩyathi wa Aira a Jehova wa gũthathaiya na kũũngana. Magooti ma kũu matiarĩ na itũmi ‘njega na njiganu’ cia kuonania atĩ Aira a Jehova” nĩ magayũkanagia famĩlĩ, magacogera andũ meyũrage, kana makarega ũrigitani. Kwoguo rĩgĩtua atĩ, “magooti ma kũu maahũthĩrire watho wa bũrũri ũcio na njĩra ya kũhinyĩrĩria.”
WATHĨKI ŨRĨA WAGĨRĨIRE
15. Akristiano a ma thĩ yothe marũmagĩrĩra ũtaaro ũrĩkũ?
15 Aira a Jehova a Moscow—na a thĩ yothe nĩ mahingagia ũndũ ũngĩ Akristiano magĩrĩirũo gwĩka wonanĩtio nĩ Petero. Aandĩkire ũũ: “Athĩkagai tondũ wa Mwathani nĩ ũndũ o wothe mũtabarĩre nĩ andũ: o na wakorũo nĩ wa mũthamaki, arĩ we mũnene igũrũ rĩa arĩa angĩ othe, o na kana watuĩka nĩ wa abarũthi.” (1 Pet. 2:13, 14) O na gũtuĩka o ti gĩcunjĩ gĩa thĩ ĩno njũru, Akristiano a ma nĩ mathĩkagĩra thirikari iria ‘ituĩtwo cia gwathana’ meyendeire o ta ũrĩa Paulo aamataarire.—Thoma Aroma 13:1, 5-7.
16, 17. (a) Nĩ ũndũ ũrĩkũ wonanagia atĩ tũtikoragwo tũgĩkararia thirikari? (b) Nĩ ũndũ ũrĩkũ atongoria amwe a gĩũteti manoiga?
16 Rĩrĩa Aira a Jehova maikara ta “agendi” thĩinĩ wa mũtabarĩre ũyũ-rĩ, matiĩkaga ũguo makĩenda gũkararia thirikari; ningĩ matingagĩrĩra matua ma andũ arĩa angĩ megiĩ ũteti kana mĩikarĩre. Ngũrani na ndini imwe, Aira a Jehova nĩ methemaga kwĩingĩria ũteti-inĩ. Gũtirĩ hĩndĩ mageragia kwĩra thirikari ũrĩa igwĩka maũndũ. Matikoragwo na rĩĩciria rĩa kũgeria gũthũkia thayũ wa andũ arĩ angĩ kana gũkararia thirikari o na hanini!
17 Rĩrĩa maathĩkĩra atongoria a thirikari kũringana na ũtaaro wa Petero atĩ ‘matĩage athamaki,’ Akristiano nĩ maheaga atongoria acio gĩtĩo kĩrĩa kĩaganĩrĩire na ũnene wao. (1 Pet. 2:17) Rĩmwe na rĩmwe atongoria manoiga atĩ matiarĩ na gĩtũmi kĩega gĩa gwĩtigĩra Aira a Jehova. Kwa ngerekano, mũteti ũmwe Mũnjĩrĩmani oigire ũũ: “Mĩthiĩre ya Aira a Jehova rĩrĩa maikĩtio kambĩ-inĩ na korokoro, nĩ yonanirie ngumo ikoragwo irĩ cia bata ũmũthĩ o ta ũrĩa ciarĩ tene harĩ ũthii wa na mbere wa bũrũri: nacio nĩ ta, mũrũgamo wao mũrũmu wa kwaga kũnyitanĩra na SS na gũcaĩra arĩa maikĩtio korokoro hamwe nao. Tondũ wa ũrĩa andũ makĩrĩrĩirie gwĩka andũ a kũngĩ maũndũ moru o hamwe na arĩa maramakararia gĩũteti, ngumo icio nĩ irabatarania harĩ o ũmwe wa raiya a bũrũri witũ.”
KUONANIA WENDO
18. (a) Nĩkĩ ti ũndũ mũritũ harĩ ithuĩ kwenda aarĩ na ariũ a Ithe witũ othe? (b) Nĩ ũndũ ũrĩkũ andũ amwe matarĩ Aira a Jehova meyoneire?
18 Mũtũmwo Petero aandĩkire ũũ: “Endagai ariũ othe a Ithe witũ. Wĩtigagĩrei Ngai.” (1 Pet. 2:17) Aira a Jehova nĩ monanagia wĩtigĩri Ngai ũrĩa wagĩrĩire, na nĩ ũtũmaga mende gwĩka wendi wake o na makĩria. Nĩ makenagĩra gũtungatĩra Jehova marĩ na aarĩ na ariũ a Ithe wao thĩ yothe arĩa mendaga gwĩka o tao. Nĩkĩo ti ũndũ mũritũ harĩ o ‘kwenda ariũ othe a Ithe wao.’ Wendo ta ũcio ũrĩa ũnyihĩte thĩinĩ wa thĩ ĩno ĩiyũirũo nĩ mwĩyendo, rĩmwe nĩ ũmakagia arĩa matarĩ Aira a Jehova. Kwa ngerekano, mũndũ ũmwe ũrutaga wĩra wa gũceeria ageni na Kambuni ĩmwe ya Amerika nĩ aagegirio nĩ ũrĩa Aira a Jehova mateithirie na makĩonia wendo ageni a kuuma mabũrũri mangĩ mwaka wa 2009 arĩa maathiĩte kĩrũrũngano-inĩ gĩa kĩĩmabũrũri Njĩrĩmani. Oigire atĩ mĩaka ĩrĩa yothe aarutĩte wĩra wa gũceeria ageni, ndaakoretwo onete ũndũ ta ũcio. Thutha-inĩ, ũmwe wa Aira acio a Jehova oigire ũũ: “Ũndũ o wothe oigaga ũtwĩgiĩ aaũtaaragĩria amakĩte na acanjamũkĩte.” Hihi wee ũrĩ weiguĩra andũ arĩa meroragĩra Aira a Jehova makiuga ũndũ ta ũcio irũrũngano-inĩ iria wanathiĩ?
19. Twagĩrĩirũo kwĩhotora gwĩka atĩa, na nĩkĩ?
19 Kũgerera njĩra icio—na ingĩ nyingĩ—Aira a Jehova nĩ monanagia biũ atĩ nĩ “agendi” mũtabarĩre-inĩ ũyũ wa Shaitani. Na nĩ makenagĩra gũtũũra ũguo. Kĩĩrĩgĩrĩro kĩao atĩ ica ikuhĩ nĩ megũtuĩka aikari a gũtũũra thĩinĩ wa thĩ njerũ ya Ngai ĩrĩa ĩgaakorũo na ũthingu nĩ kĩrũmu. Githĩ o nawe ndwĩriragĩria ũndũ ũcio?
[Ciũria cia wĩruti]
[Mbica karatathi ka 20]
Tũtigeragia gũteithia thĩ ĩno ya Shaitani
[Mbica karatathi ka 20]
Tũtetagĩra thĩ njerũ ya Ngai
[Mbica karatathi ka 22]
Ma ya Bibilia nĩ ĩteithĩtie kũnyitithania famĩlĩ ĩno kuuma Russia
