‘KIUGO kĩa Ngai kĩ muoyo, na kĩ ũhoti.’ (Ahib. 4:12) Mũtũmwo Paulo aahũthĩrire ciugo icio gũtĩtĩrithia ũrĩa kiugo kĩa Ngai gĩkoragwo na ũhoti wa gũkinyĩra ngoro na gũcenjia mũtũũrĩre wa andũ.

No mawoni macio megiĩ hinya wa ndũmĩrĩri ya Bibilia nĩ moogomirio rĩrĩa ũregenyũki ũrĩa warathĩtwo wagĩire na mĩri thutha wa atũmwo gũkua. (2 Pet. 2:1-3) Thutha wa ihinda, atongoria a kanitha makĩambĩrĩria kuuga atĩ Kiugo kĩa Ngai nĩ kĩrĩ hinya wa kũringa ciama. Profesa Harry Y. Gamble nĩ andĩkĩte igũrũ rĩgiĩ “ũrĩa maandĩko ma Gĩkristiano maahũthagĩrũo na njĩra ya ũgo.” Oigĩte atĩ karine-inĩ ya gatatũ, Mũtongoria wa kanitha, Origen, aarutanaga atĩ “mũgambo wa ciugo theru nĩ ũrĩ ũguni mũna harĩ matũ: na angĩkorũo ciugo iria ihũthagĩrũo nĩ athathaiya a maheeni kũragũria nĩ irĩ hinya-rĩ, no mũhaka ciugo cia maandĩko ma Ngai nĩ irĩ hinya o na makĩria.” John Chrysostom wa karine ya kana aandĩkire atĩ “mũcukani ndangĩgeria gũkuhĩrĩria nyũmba ĩna maandĩko ma Injiri.” Ningĩ nĩ oigire atĩ kũrĩ andũ amwe maacuragia tũcunjĩ twa Injiri ngingo-inĩ ciao tũrĩ ta gĩthitũ. Profesa Gamble athiĩte na mbere akoiga atĩ mũrutani Mũgatoreki Augustine “onaga ũrĩ ũndũ mwagĩrĩru gũkomera gĩcunjĩ kĩa Injiri ya Johana rungu rwa muto mũndũ angĩatuurirũo nĩ mũtwe”! Na njĩra ĩyo, Bibilia ĩkĩambĩrĩria kũhũthĩrũo maũndũ-inĩ ma ũgo. Hihi wee nĩ wonaga Bibilia ta arĩ gĩthitũ, kana kĩndũ gĩa gũkũrehera mũnyaka kĩrĩa kĩngĩkũgitĩra ndũkone ũũru?

Njĩra ĩrĩa yũĩkaine mũno Bibilia ĩhũthagĩrũo ũũru nayo hihi nĩ ĩrĩa ĩĩtagwo bibliomancy. Ĩyo nayo nĩ ĩrĩkũ? Ĩkoragwo ĩgiĩ mũndũ kũhingũra ibuku na makĩria Bibilia, o harĩa harĩhingũka, agathoma mũhari ũrĩa maitho megũcemania naguo etĩkĩtie atĩ ciugo icio nĩ ikũmũtongoria. Kwa ngerekano-rĩ, kũringana na ũrĩa Profesa Gamble oigĩte, hĩndĩ ĩmwe rĩrĩa Augustine aaiguire mũgambo wa kaana nyũmba maariganĩtie ũkiuga: “Oya ũthome, oya ũthome,” Augustine aatuire nĩ Ngai ũramwĩra ahingũre Bibilia athome mũhari ũrĩa angĩacemanirie naguo.

Hihi ũrĩ waigua ũhoro wa andũ mahoyaga Ngai rĩrĩa macemania na ũndũ mũritũ magacoka makahingũra Bibilia o harĩa ĩrĩhingũka, metĩkĩtie atĩ mũhari ũrĩa marĩona mbere nĩ ũkũmateithia kũhiũrania na thĩna ũcio? O na gũtuĩka no makorũo na muoroto mwega, ĩyo tiyo njĩra ĩrĩa Mũkristiano agĩrĩirũo kũhũthĩra gũcaria ũtongoria wa Maandĩko.

Jesu nĩ eerĩire arutwo ake atĩ nĩ angĩamatũmĩire ‘mũteithia, roho mũtheru.’ Agĩcoka akĩmeera ũũ: ‘Ũcio nĩ ũkaamũruta maũndũ mothe, na ũmũririkanagie mohoro mothe marĩa ndanamũhe.’ (Joh. 14:26) Mũgarũ na ũguo, bibliomancy ndĩbataraga mũndũ akorũo oĩ Maandĩko.

Mũtugo ũcio wa bibliomancy na ũhũthĩri ũngĩ wa Bibilia na njĩra cia ũgo nĩ ũingĩhĩte mũno. O na kũrĩ ũguo, Kiugo kĩa Ngai nĩ kĩmenagĩrĩria ũragũri. (Alaw. 19:26; Gũcok. 18:9-12; Atũm. 19:19) ‘Kiugo kĩa Ngai kĩ muoyo, na kĩ ũhoti,’ no twagĩrĩirũo gũkĩhũthĩra na njĩra ĩrĩa yagĩrĩire. Ũmenyo wa ma wa Bibilia nĩguo wagĩragia ũtũũro wa andũ, no ti kũmĩhũthĩra na njĩra cia ũgo. Kwĩĩgĩra na ũmenyo ta ũcio nĩ gũteithĩtie andũ aingĩ gũkũria mĩtugo mĩega, gũtigana na mĩtũũrĩre mĩũru, gwĩkĩra famĩlĩ ciao hinya, na kũgĩa na ũkuruhanu mwega na Mũtungi wa Bibilia.