María Isabel nĩ mũhunjia mwĩthĩ wĩ kĩyo taũni-inĩ ya San Bernardo bũrũri wa Chile, Amerika ya Mũhuro. Kairĩtu kau na famĩlĩ yao moimĩte rũrĩrĩ-inĩ rwĩtagwo Mapuche. Famĩlĩ ĩyo yothe ĩkoretwo ĩkĩnyita mbaru mĩbango ya kwambĩrĩria kĩũngano kĩerũ kĩa rũthiomi rwa Mapuche, rũrĩa ningĩ rwĩtagwo Mapudungun.

Rĩrĩa kwamenyithanirio atĩ Kĩririkano gĩa gĩkuũ kĩa Jesu nĩ kĩngĩekirũo na rũthiomi rwa Mapudungun na atĩ tũratathi 2,000 twa kũnyita andũ ũgeni nĩ twacabĩtwo na rũthiomi rũu, ũndũ ũcio nĩ watũmire María Isabel ecirie. Hihi angĩateithirie atĩa? Aaririkanire maũndũ maneyonerũo nĩ Aira a Jehova angĩ ethĩ arĩa maahotete kũhunjĩria arutwo arĩa mathomaga nao na arutani. Akĩaria na aciari ake igũrũ rĩgiĩ ũndũ ũcio, na magĩtua atĩ María Isabel agerie gwĩciria njĩra ĩrĩa angĩahũthĩrire kũheana tũratathi tũu cukuru. Hihi eciririe kũhũthĩra njĩra ĩrĩkũ?

Mbere, María Isabel aahoire arũgamĩrĩri a cukuru rũtha etĩkĩrio acuurie karatathi ga kũnyita andũ ũgeni kĩhingo-inĩ gĩa cukuru. Makĩmwĩtĩkĩria na makĩmũgaathĩrĩria nĩ rĩciria rĩu rĩake. Mũthenya ũmwe rũcinĩ hĩndĩ ya arutwo gwĩtwo marĩĩtwa, mũrutani mũnene wa cukuru ĩyo o na nĩ aanĩrĩire ũhoro wa rĩĩtana rĩu na gĩkero!

Thutha ũcio, María Isabel akĩũria kana no acerere irathi ciothe. Arutani mamũhe rũtha, akoria arutwo o kĩrathi kana nĩ kũrĩ ũmwe wao Mũmapuche. Oigaga atĩrĩ, “Ndeeciragia atĩ cukuru yothe gũgũkorũo na arutwo ta 10 kana 15 a kuuma famĩlĩ cia Mapuche, no kwarĩ na angĩ aingĩ—macũngĩrĩro-inĩ ndaheanire tũratathi 150!”

Mũtumia ũmwe wonire karatathi kau ga kũnyita andũ ũgeni gacuurĩtio kĩhingo-inĩ gĩa cukuru nĩ oririe nũ angĩaririe nake igũrũ rĩgiĩ ũndũ ũcio. Ta hũũra mbica ũrĩa aagegire rĩrĩa eerekeirio gwĩ kairĩtu ka mĩaka ikũmi! María Isabel oigaga ũũ akenete, “Eerĩgagĩrĩra kuona mũndũ mũkũra-kũrũ.” Thutha wa kũmũhe karatathi ga kũmũnyita ũgeni na akĩmũtaarĩria na njĩra nguhĩ, nĩ aahoire mũtumia ũcio andirethi nĩguo mena aciari ake marĩmũceerera maarie ũhoro makĩria wĩgiĩ Ũthamaki wa Ngai. Ahunjia acio 20 matungataga gĩcigo-inĩ kĩu kĩaragio rũthiomi rwa Mapudungun nĩ maakenire mũno kuona mũtumia ũcio hamwe na andũ angĩ 26 erũ a rũrĩrĩ rwa Mapuche Kĩririkano-inĩ. Gĩkundi kĩu rĩu nĩ kĩũngano gĩkũrĩte mũno!

O na kana wĩna mĩaka ĩigana-rĩ, hihi wee no ũnyite ũgeni arutwo arĩa angĩ kana andũ arĩa mũrutithanagia wĩra moke Kĩririkano, mĩario-inĩ ya andũ othe, kana kĩrũrũngano kĩa ng’ongo? Githĩ ti wega wĩke ũthuthuria mabuku-inĩ maitũ wone maũndũ maneyonerũo marĩa mangĩgũteithia kuona ũrĩa ũngĩgaacĩra ũndũ-inĩ ũcio? Hamwe na ũguo, hoya Jehova akũhe roho wake mũtheru ũgũteithie kũgĩa na ũcamba wa kũhota kwaria igũrũ rĩake. (Luk. 11:13) Weka ũguo, o nawe wahota kũgega na wĩkĩrũo ngoro mũno nĩ kuona moimĩrĩro mega ma kĩyo gĩaku.