Harĩ maũndũ maigana ũna monetwo kuuma Ngeretha marĩa megũgũteithia kuona nĩkĩ ndwagĩrĩirũo nĩ gũte mwĩhoko. Ningĩ nĩ ũkuona ũrĩa ũngĩka ‘ũikie irio kana mũgate waku igũrũ rĩa maĩ’ na njĩra ya ngerekano, nĩguo ũteithie arĩa matarĩ moya ikinya ũhoro-inĩ ũrĩa wa ma.—Koh. 11:1.

Ũndũ ũmwe ũrĩa ũrabatara gwĩka nĩ gũkirĩrĩria. Nĩ ũrabatara kũrũmia ũhoro wa ma na kwĩgwatania na Jehova. (Gũcok. 10:20) Ũguo nĩguo Georgina eekire. Rĩrĩa ambĩrĩirie kwĩruta Bibilia hamwe na Aira a Jehova, mwaka-inĩ wa 1970, muthuriwe, Kyriacos, nĩ aarakarire mũno. Akĩgeria kũmũgiria kwĩruta, na ndeetĩkagĩria Aira a Jehova matonye gwake, o na nĩ aateaga mabuku mao marĩa atũngana namo.

Rĩrĩa Georgina aambĩrĩirie gũthiaga mĩcemanio ya Aira a Jehova, Kyriacos akĩrakara o na makĩria. Mũthenya ũmwe nĩ aathire Nyũmba-inĩ ya Ũthamaki nĩguo akarute ngarari. Rĩrĩa mwarĩ wa Ithe witũ ũmwe aamenyire atĩ Kyriacos aragia Kĩgiriki wega gũkĩra Gĩthũngũ, akĩhũrĩra mũrũ wa Ithe witũ ũmwe Mũgiriki thimũ nĩguo oke amũteithie. Kyriacos nĩ aakenirio nĩ ũtugi wa mũrũ wa Ithe witũ ũcio o na makĩĩruta Bibilia hamwe nake kwa ihinda rĩa mĩeri ĩigana ũna. No Kyriacos agĩcoka agĩtiga kwĩruta Bibilia.

Gwa kahinda ka mĩaka ĩngĩ ĩtatũ, Georgina agĩthiĩ na mbere gũkarario. Kyriacos oigĩte atĩ angĩkaabatithio no kũmũtiga akamũtiga. Mũthenya wake wa kũbatithio Georgina nĩ aahoire Jehova mũno kuuma ngoro akĩmũthaitha ndagetĩkĩrie Kyriacos amũtige. Rĩrĩa Aira a Jehova mookire kũmũgĩra mathiĩ kĩgomano-inĩ, Kyriacos aamerire: “Inyuĩ thiagai. Nĩ tũgũkaga na ngari itũ.” Nĩ aathikĩrĩirie programu ya rũcinĩ o na akĩyonera mũtumia wake akĩbatithio!

Thutha ũcio Kyriacos agĩtiga kũmũkararia mũno, o na akĩambĩrĩria gwĩka mogarũrũku manene. Hakuhĩ mĩaka 40 kuuma acemanie na Aira a Jehova, nĩrĩo Georgina onire mũthuri wake akĩbatithio! Nĩ kĩĩ gĩateithirie Kyriacos? Oigaga ũũ: “Nĩ ndakenirio mũno nĩ Georgina tondũ ndarekire ũndũ o na ũrĩkũ ũmũgirie gũthathaiya Jehova.” Georgina nake oigaga ũũ: “O na gũtuĩka mũthuri wakwa nĩ aangararagia, ndingĩarekire ũndũ o na ũrĩkũ ũngirie gũthathaiya Ngai wakwa. Hĩndĩ ĩyo yothe, ndaatũire hoyaga Jehova, na ndigana gũte mwĩhoko.”

Ũndũ ũngĩ ũrabatara nĩguo ũteithie ũrĩa mũhikanĩtie nake, nĩ gũkũria ũmũndũ mwerũ wa Gĩkristiano. Mũtũmwo Petero aatarire atumia Akristiano ũũ: ‘Athĩkagai nĩ athuri anyu, nĩguo atĩ angĩkorũo nĩ harĩ amwe mataiguaga ũhoro, mahote kũgarũrũo ngoro, ũhoro ũtarĩ ho, nĩ mĩikarĩre ya atumia ao.’ (1 Pet. 3:1) Christine nĩ aarũmagĩrĩra ũtaaro ũcio, o na gũtuĩka mĩaka mĩingĩ nĩ yahĩtũkire mũthuriwe agĩkaagarũrũka. Rĩrĩa Christine aatuĩkire Mũira wa Jehova mĩaka makĩria ma 20 mĩthiru, mũthuriwe John, ndoonaga bata wa Ngai ũtũũro-inĩ wake. Ndeendaga gũkuruhana na ndini, no nĩ onaga atĩ wĩtĩkio wa Christine warĩ wa bata mũno harĩ we. John oigaga atĩ, “nĩ ndonaga ũrĩa wĩtĩkio wake watũmaga agĩe na gĩkeno, ũkamwĩkĩra hinya na ũkamũtua mũndũ wa kwĩhokeka, na ũndũ ũcio nĩ wandeithagia kũhiũrania na moritũ maingĩ.”

Christine ndaigana kũringĩrĩria mũthuriwe wĩtĩkio wake, nake oigaga ũũ: “Kuuma o kĩambĩrĩria, Christine nĩ aamenyire atĩ kaba kwaga kwaragia ũhoro wa wĩtĩkio wake, akĩreka ndĩrute na njĩra ciakwa o kahora.” Hĩndĩ ĩrĩa Christine ona icunjĩ irĩ na ũhoro ũngĩkenia John ngathĩti-inĩ ya Mũrangĩri kana Amkeni! ta iria ciarĩrĩirie sayansi kana ũũmbi, aamuonagia akamwĩra, “Ngwĩciria nĩ ũgũkenera gũthoma ũhoro ũyũ.”

Thutha wa kahinda, John nĩ aakinyirie mĩaka ya gũtiga wĩra na akĩambĩrĩria kũruta wĩra mũgũnda-inĩ wake. Nĩ ũndũ wa kũgĩa na mahinda maingĩ ma gwĩcũranagia, akĩambĩrĩria kwĩyũria ciũria ndikĩru ciĩgiĩ mũtũũrĩre ta, ‘Hihi twokire thĩ ĩno na njĩra ya indo kwĩyumĩria-ĩ, kana twombirũo harĩ na muoroto mũna?’ Mũthenya ũmwe mũrũ wa Ithe witũ ũmwe magĩteereta na John akĩmũria, “No wende kwĩruta Bibilia?” John oigaga atĩ, “na tondũ nĩ ndambĩrĩirie gwĩtĩkia Ngai, ngĩtĩkĩra kwĩruta.”

Githĩ ndwarĩ ũndũ wa bata Christine kwaga gũte mwĩhoko! Thutha wa kũhoya kwa ihinda rĩa mĩaka 20 atĩ etĩkĩre ũhoro wa ma, John nĩ aabatithirio. Rĩu matungatagĩra Jehova na kĩyo marĩ hamwe. John oigaga ũũ: “Harĩ maũndũ merĩ maatũmire njĩtĩkĩre ũhoro wa ma—ũtugi na ũrata wa Aira a Jehova. Na angĩkorũo ũrĩa mũhikanĩtie nake nĩ Mũira wa Jehova, ũkoragwo ũhikanĩtie na mũndũ mwĩhokeku, na mwĩrutĩri.” Nĩ ma, Christine nĩ aahũthĩrire ũtaaro wa 1 Petero 3:1, na moimĩrĩro maarĩ mega!

Ĩ nao arutwo a Bibilia arĩa matigaga kwĩruta nĩ ũndũ wa gĩtũmi kĩna? Mũthamaki Suleimani aandĩkire atĩrĩ, “Rũcinĩ roka kũhanda mbeũ ciaku, o na ningĩ hwaĩ-inĩ ndũkahurũkie guoko gwaku; nĩ gũkorũo ndũũĩ ĩrĩa ĩkaagĩra, hihi nĩ ĩo, kana nĩ ĩrĩa ĩngĩ, o na kana hihi o cierĩ nĩikaagĩra.” (Koh. 11:6) Rĩmwe na rĩmwe mbeũ cia ũhoro wa ma no cioe mĩaka mĩingĩ igĩkamera. O na kũrĩ ũguo, thutha mũtheri mũndũ ahota kuona bata wa gũkuhĩrĩria Ngai. (Jak. 4:8) Ĩĩ, mũthenya ũmwe wahota gũkaagĩa na ũndũ wa gũkenera.

Ta wĩcirie ũhoro wa Alice, ũrĩa wathamĩire Ngeretha kuuma India. Aambĩrĩirie kwĩruta Bibilia mwaka wa 1974. Aaragia Kĩhĩndĩ no nĩ eendaga kwagĩria Gĩthũngũ gĩake. Agĩthiĩ na mbere kwĩruta mĩaka ĩigana ũna na agathiaga mĩcemanio ĩmwe kĩũngano-inĩ kĩa rũthiomi rwa Gĩthũngũ. Nĩ aamenyaga kĩrĩa eerutaga nĩ ũhoro wa ma no ndaawoyaga na ũritũ. Makĩria ma ũguo, nĩ aacaragia mbeca na kĩyo mũno na gwĩkenia na arata. Macũngĩrĩro-inĩ, agĩtiga kwĩruta Bibilia.

Thutha wa mĩaka ta 30, Stella, ũrĩa werutaga Bibilia na Alice, nĩ aamũkĩrire marũa kuuma kũrĩ we. Moigaga ũũ: “Nĩ njũĩ nĩ ũgũkena mũno kũmenya atĩ, mũrutwo waku wa Bibilia wa kuuma 1974 nĩ arabatithirio kĩrũrũngano-inĩ kĩa ng’ongo gĩa ica ikuhĩ. Nĩ wanyitire itemi rĩa bata mũno ũtũũro-inĩ wakwa. Waahandire mbeũ ya ũhoro wa ma thĩinĩ wakwa, na o na gũtuĩka ndiehaarĩirie kwĩyamũrĩra Ngai hĩndĩ ĩyo-rĩ, nĩ ndamĩigire meciria-inĩ na ngoro-inĩ yakwa.”

Nĩ kĩĩ gĩathiĩte na mbere? Alice ataaragĩria atĩ nĩ aanyitirũo nĩ ihooru inene mũno thutha wa mũthuriwe gũkua mwaka wa 1997. Akĩhoya Ngai. Na thutha wa ndagĩka ikũmi, Aira a Jehova arĩa maaragia rũthiomi rwa Punjabi makĩmũceerera na makĩmũtigĩra trakti Kwĩ na Kĩĩrĩgĩrĩro Kĩrĩkũ Harĩ Endwa Arĩa Makuĩte? Alice akĩona atĩ rĩu rĩarĩ icokio rĩa ihoya rĩake na agĩtua atĩ nĩ ekwambĩrĩria kũnyitanĩra na Aira a Jehova. No hihi angĩamonire kũ? Nĩ onire kabuku kanini kaarĩ na andirethi, iria aahetwo nĩ Stella cia kĩũngano gĩa Kĩpunjabi. Alice nĩ aaceerire Nyũmba-inĩ ya Ũthamaki na akĩnyitwo ũgeni wega nĩ aarĩ na ariũ a Ithe witũ acio a rũthiomi rwa Punjabi. Alice oigaga, “Wendo mũnene ũrĩa ndonirio nĩ wahutirie o na ndoima kuo na ũkĩndeithia kũniina ihooru rĩrĩa ndaarĩ narĩo.”

Akĩambĩrĩria gũthiaga mĩcemanio ategũtĩrĩria, agĩcokerera kwĩruta Bibilia, na akĩĩruta kwaria na gũthoma Kĩpunjabi na njĩra njega. Mwaka wa 2003 akĩbatithio. Marũa marĩa aatũmĩire Stella maarĩkĩrĩirie na njĩra ĩno, “Nĩ ngatho mũno nĩ kũhanda mbeũ icio mĩaka 29 mĩhĩtũku na kũnjigĩra kĩonereria kĩega gĩa kũrũmĩrĩra.”

“Nĩ ngatho mũno nĩ kũhanda mbeũ icio mĩaka 29 mĩhĩtũku na kũnjigĩra kĩonereria kĩega gĩa kũrũmĩrĩra.”—Alice

Ũreruta atĩa kuumana na maũndũ macio monetwo? Mũndũ no oye ihinda iraya gũkĩra ũrĩa ũngĩrĩgĩrĩra, no angĩkorũo nĩ mũndũ ũnyotagĩra maũndũ ma kĩĩroho, ũtarĩ ũhinga, na mwĩnyihia, Jehova nĩ egwĩtĩkĩria ũhoro wa ma ũkũre thĩinĩ wa ngoro yake. Ta ririkana ciugo cia ngerekano ya Jesu, ‘Mbeũ imeraga na igakũra, mũhandi atoĩ ũrĩa ikũraga. Thĩ ĩĩciaragia yo nyene; ĩkaamba kũmeria nguha, na thutha gũgoka igira, na thutha ũcio igira thĩinĩ hakagĩa na hĩndĩ iria njiganu.’ (Mar. 4:27, 28) Mbeũ ĩkũraga ũguo o kahora “yo nyene.” No taguo mũhunjia ũmwe ũmwe wa Ũthamaki ndamenyaga ũrĩa mbeũ ĩkũraga. Nĩ ũndũ ũcio thiĩ na mbere kũhanda kwa ũingĩ. Wahota gũkaagetha kwa ũingĩ.

Ningĩ ndũkariganĩrũo nĩ bata wa mahoya. Georgina na Christine matiatigithĩirie kũhoya Jehova. O nawe ‘ũngĩrũmanagĩrĩria kũhoya na kĩyo’ na wage gũte mwĩhoko, “thutha matukũ maingĩ maathira,” wahota gũkona ‘mũgate’ waku rĩngĩ ũrĩa waikirie igũrũ rĩa maĩ.—Rom. 12:12; Koh. 11:1.