NĨ ŨHORO wa gũcanjamũra ngoro kuona Aira a Jehova aingĩ ethĩ makĩhũthia mũtũũrĩre nĩguo mahote kwandandũra ũtungata wao wa Gĩkristiano. (Mat. 6:22) Nĩ mogarũrũku marĩkũ mekaga? Macemanagia na moritũ marĩkũ? Nĩguo tũmenye-rĩ, rekei tũigue kuuma kũrĩ amwe ao arĩa ihinda-inĩ rĩrĩ marahunjia bũrũri-inĩ wa Mexico.

Dustin na Jassa a kuuma bũrũri wa Amerika (U.S.) maahikanirie Janũarĩ 2007. Ihinda inyinyi thutha ũcio nĩ maahotire kũgũra kameeri kanini karĩa maakoretwo makĩĩrirĩria ihinda iraya nĩguo maikarage thĩinĩ wako mwaka wothe. Kameeri kau kao kaarũgamagio hakuhĩ na Astoria, Oregon, kũrĩa U.S.A., taũni ĩmwe thaka ĩrigicĩirio nĩ tũrĩma tũrĩ na mĩtitũ na irĩma irĩ na mbarabu, itĩna inyinyi kuuma Iria-inĩ rĩa Pacific. Dustin oigaga, “mwena o wothe ũngĩacũthĩrĩirie, gwakoragwo kũrĩ gũthaka mũno!” Meeciragia atĩ maatũũraga mũtũũrĩre mũhũthũ, wa kwĩhoka Jehova. Meeĩraga atĩrĩ, ‘Tũikaraga thĩinĩ wa kameeri ka fiti 26, tũkaruta wĩra o mathaa manyinyi, tũgathiĩ mĩcemanio thĩinĩ wa kĩũngano kĩa rũthiomi rũgeni, na rĩmwe nĩ tũtungataga tũrĩ mapainia a gũteithĩrĩria.’ No thutha wa ihinda, magĩcoka kuona atĩ nĩ kwĩheenia meehenagia. Dustin oigire ũũ: “Handũ ha kũnyita mbaru maũndũ ma  kĩũngano, mahinda maingĩ twakoragwo tũgĩthondeka kameeri kau. Nĩ tuonire atĩ nĩguo tũige Jehova mbere ũtũũro-inĩ witũ, no mũhaka tũngĩagarũrĩire.”

Nake Jassa akiuga ũũ: “Itanahika, ndaikaraga Mexico, kũrĩa ndanyitanagĩra na kĩũngano gĩa Gĩthũngũ. Nĩ ndakeneire mũno gũtungata kũu, na nĩ nderiragĩria gũcoka kuo.” Nĩguo mekĩre hinya wendi wao wa gũtungata bũrũri-inĩ ũngĩ, nĩ maambĩrĩirie kũhũthĩra hĩndĩ ya ũthathaiya wa famĩlĩ gũthoma ng’ano cia ũtũũro ciĩgiĩ ariũ na aarĩ a Ithe witũ arĩa maathamĩire mabũrũri marĩa marĩ na bata mũnene wa ahunjia. (Joh. 4:35) Dustin oigire, “Nĩ twerirĩirie kũgĩa na gĩkeno o ta kĩu.” Rĩrĩa merirũo nĩ arata ao bũrũri-inĩ wa Mexico atĩ kwarĩ na gĩkundi kĩerũ kĩabataraga ũteithio, Dustin na Jassa magĩtua itua. Magĩtiga wĩra, makĩendia kameeri kao, na magĩthamĩra Mexico.

Dustin na Jassa maathire gũtũũra taũni-inĩ ya Tecomán, o hakuhĩ na Iria rĩa Pacific, kilomita 4,345 mũhuro wa Astoria. Dustin oigire, “Handũ ha karũhuho kahoreru na irĩma thaka, gũkũ gũkoragwo na ũrugarĩ mũingĩ na mĩtĩ ya ndimũ kũndũ guothe.” Maakinya kuo o ũguo, mationire wĩra. Nĩ ũndũ wa kwaga mbeca, maatiarĩaga irio njega ta iria maamenyerete. Jassa oigaga, “Ĩndĩ o hĩndĩ twambĩrĩria kũnyira irio icio, arutwo aitũ a Bibilia makĩambĩrĩria gũtũheaga maembe, marigũ, na ndimũ nyingĩ ma!” Thutha wa ihinda nĩ moonire wĩra wa kũrutana rũthiomi kũgerera Intaneti cukuru-inĩ ĩmwe ya Taiwan. Mbeca iria maheagwo kuumana na wĩra ũcio rĩu nĩ cimaiganaga kũhingia mabataro mao ma o mũthenya.

Dustin na Jassa monaga atĩa mũtũũrĩre wao mwerũ? Moigire, “Ũyũ nĩguo ũndũ ũrĩa mwega mũno wanekĩka ũtũũro-inĩ witũ. Ũrata witũ na Jehova o na witũ ithuerĩ nĩ ũgĩte na hinya mũno gũkĩra ũrĩa tũngĩeciririe. Nĩ twĩkaga maũndũ maingĩ mũno o mũthenya tũrĩ hamwe ta kũhunjia, kwarĩrĩria ũrĩa tũngĩteithia arutwo aitũ a Bibilia, na kũhaarĩria mĩcemanio. Ningĩ, rĩu tũtikoragwo na mĩtangĩko ta ĩrĩa twakoragwo nayo tene.” Maacokire makiuga ũũ: “Rĩu nĩ tũtaũkĩirũo nĩ ũndũ tũtaamenyete hau kabere, ũũma wa ciugo ici cia Thaburi 34:8, ‘Camai muone atĩ Jehova nĩ mwega.’”

Makĩria ma aarĩ na ariũ a Ithe witũ 2,900, marĩ kĩhiko-inĩ na angĩ matarĩ, arĩa marĩ mĩaka-inĩ ya 20 na 30, nĩ mathamĩire icigo-inĩ imwe cia Mexico iria o na ihinda-inĩ rĩrĩ irĩ na bata mũnene wa ahunjia. Nĩ kĩĩ gĩtindĩkĩte ahunjia acio othe merutĩre wĩra-inĩ ũcio mũritũ? Rĩrĩa amwe ao mooririo kĩũria kĩu, maaheanire itũmi ithatũ nene. Nĩ irĩkũ hihi?

 Wendo harĩ Jehova na harĩ andũ. Leticia ũrĩa wabatithirio arĩ na mĩaka 18, oigaga ũũ: “Rĩrĩa ndeyamũrĩire Jehova, nĩ ndamenyire atĩ ndabataraga kũmũtungatĩra na ngoro na muoyo wakwa wothe. Kwoguo, nĩguo nyonie Jehova nĩ ndĩmwendete na ngoro yakwa yothe, nĩ ndendire kũhũthagĩra mahinda na hinya wakwa mũingĩ ũtungata-inĩ wake.” (Mar. 12:30) Hermilo, ũrĩa rĩu mahikanĩtie na Leticia, aathamĩire kũndũ kwarĩ na bata mũnene wa ahunjia a Ũthamaki arĩ na mĩaka 20 na kĩndũ. Oigaga ũũ: “Nĩ ndamenyire atĩ gũteithia andũ magĩe na ũrata na Jehova nĩyo njĩra ĩrĩa njega biũ ya kuonania atĩ nĩ nyendete andũ.” (Mar. 12:31) Nĩ ũndũ ũcio, akiuma taũni yarĩ na ũtonga mũnene ya Monterrey kũrĩa aarutaga wĩra bengi na agaikara mũtũũrĩre mwega, agĩthamĩra taũni nini.

Kũgĩa na gĩkeno kĩa ma na gĩa gũtũũra. Kahinda kanini thutha wa Leticia kũbatithio, we na mwarĩ wa Ithe witũ ũmwe painia warĩ na ũmenyeru nĩ maathire taũni ĩmwe yarĩ kũraya makĩhunjia mweri mũgima. Leticia oigaga ũũ: “Nĩ ndagegire mũno. Kuona ũrĩa andũ maaiyũkagia wega ndũmĩrĩri ya Ũthamaki ĩrĩa twamahunjagĩria nĩ gwatũmire ngĩe na gĩkeno kĩnene. Mũthia-inĩ wa mweri ũcio, ngĩtua atĩ ũguo nĩguo ingĩendire kũhũthĩra ũtũũro wakwa!” Mwarĩ wa Ithe witũ ũtarĩ mũhiku wĩtagwo Essly, ũrĩa rĩu ũrĩ na mĩaka 20 na kĩndũ, o nake aagucĩrĩirio ũtungata-inĩ ũcio nĩ ũndũ wa kuona gĩkeno kĩrĩa arĩa marĩ ũtungata-inĩ ũcio makoragwo nakĩo. Atarĩkĩtie sekondarĩ nĩ aacemanĩtie na ahunjia maigana ũna maarĩ kĩyo arĩa maatungataga kũndũ kwarĩ na bata mũnene wa ahunjia. Oigaga ũũ: “Kuona gĩkeno kĩrĩa aarĩ na ariũ acio a Ithe witũ maakoragwo nakĩo nĩ gwatũmaga ndĩrirĩrie mũikarĩre ta ũrĩa maarĩ naguo.” Kũrĩ na aarĩ a Ithe witũ aingĩ mekĩte o ta Essly. Thĩinĩ wa Mexico, aarĩ a Ithe witũ makĩria ma 680 matarĩ ahiku maratungata kũndũ kũrĩ na bata mũnene wa ahunjia. Na githĩ ti kĩonereria kĩega harĩ andũ ethĩ o na arĩa akũrũ!

Gũikara mũtũũrĩre ũrĩ na muoroto na gĩkeno. Essly arĩkia sekondarĩ, nĩ aaheirũo ũteithio wa mbeca nĩguo akongerere gĩthomo kĩa univasĩtĩ. Andũ a riika rĩake nĩ maamũhatĩkaga etĩkĩre nĩguo egĩĩre na “mũtũũrĩre mwega”—aheo ndingirii, agĩe na wĩra, ngari na aceerangage. O na kũrĩ ũguo, ndaigana kũrũmĩrĩra ũtaaro wao. Oigire ũũ: “Kũrĩ arata akwa amwe thĩinĩ wa kĩũngano maathingatĩte maũndũ ta macio, na nĩ ndonete atĩ maũndũ ma kĩĩroho matiarĩ ma bata mũno mũtũũrĩre-inĩ wao. Ningĩ nĩ ndonete ũrĩa macũngĩrĩro-inĩ maakuire ngoro nĩ ũndũ wa mathĩna marĩa maacemanagia namo o ũrĩa meingĩragia mũno maũndũ-inĩ ma thĩ ĩno. Niĩ ndendaga kũhũthĩra ũnyinyi wakwa gũtungatĩra Jehova biũ.”

Essly nĩ aathomeire kothi cigana ũna iria ciamũteithirie kuona wĩra ũrĩa ũngĩamũrũgamĩrĩire  agĩtungata arĩ painia, agĩcoka agĩthamĩra kũndũ kwarĩ na bata mũnene wa ahunjia a Ũthamaki. Ningĩ nĩ eerutanĩirie kwĩruta thiomi iria ciaragio kũu nĩ andũ metagwo Otomi na Tlapaneco. Eciria ũhoro wa mĩaka ĩtatũ ĩrĩa akoretwo akĩhunjia icigo cia kũraya, oigaga ũũ: “Gũtungata kũrĩa kũrĩ na bata mũnene wa ahunjia nĩ gũtũmĩte njiganĩre mũno na ũtũũro wakwa ũgakorũo na muoroto. Makĩria ma ũguo, nĩ gũtũmĩte ngĩe na ũkuruhanu wa hakuhĩ mũno na Jehova.” Phillip na mũtumia wake Racquel kuuma bũrũri wa Amerika (U.S.) arĩa rĩu marĩ na mĩaka 30 na kĩndũ moigaga ũũ: “Maũndũ ma thĩ ĩno maragarũrũka na ihenya mũno na nĩ ũndũ ũcio andũ aingĩ magakorũo na wagagu. Ĩndĩ, gũtungata kũrĩa kũrĩ na andũ aingĩ marathikĩrĩria ndũmĩrĩri ya Bibilia nĩ gũtũmaga ũtũũro witũ ũkorũo na muoroto. Tũiguaga tũiganĩire mũno!”

Ma nĩ atĩ, gũtungata kũrĩa kũrĩ na bata mũnene wa ahunjia a Ũthamaki nĩ kũrĩ moritũ makuo. Ũritũ ũmwe nĩ ũrĩa ũngĩĩrũgamĩrĩra kĩĩmbeca. Nĩguo wĩke ũguo, nĩ ũkũbatara gũkorũo wĩhaarĩirie kũgarũrĩra kũringana na maũndũ ma kũrĩa ũgũthamĩra. Painia ũmwe ũrĩ na ũmenyeru wĩtagwo Verónica oigire ũũ: “Gĩcigo-inĩ kĩmwe kĩrĩa ndatungataga, ndarugaga na ngendia irio itarĩ cia goro. Kũngĩ nakuo, ndendagia nguo na ngenja andũ njuĩrĩ. Ihinda-inĩ rĩrĩ, thambagĩria mũndũ nyũmba na ningĩ nĩ thomithagia kĩrathi kĩa aciari erũ ũrĩa mangĩhota kwaranagĩria na ciana ciao.”

Kũmenyerana na ũndũire na mĩtugo ya kũndũ kũraya kũrĩa wathamĩra no ũkorũo ũrĩ ũndũ mũritũ makĩria wambĩrĩria gũikarania nao. Phillip na Racquel nĩ meeyoneire ũndũ ũcio rĩrĩa maatungataga gĩcigo-inĩ kĩa rũthiomi rwa Nahuatl. Phillip oigaga, “Ũndũire wa kũu warĩ ngũrani mũno.” Nĩ kĩĩ kĩamateithirie kũmenyerana naguo? “Twekagĩrĩra maũndũ mega marĩa andũ acio meekaga ta gũkorũo na wendo gatagatĩ-inĩ ka andũ a famĩlĩ, gũikarania mehokanĩte, na ũtana.” Racquel oigaga: “Nĩ twerutire maũndũ maingĩ rĩrĩa twaikaraga na tũgatungata hamwe na aarĩ na ariũ a Ithe witũ a kũu.”

Angĩkorũo no wende gũtungata icigo-inĩ cia kũraya iria irĩ na bata mũnene wa ahunjia-rĩ, ũngĩĩhaarĩria atĩa? Aarĩ na ariũ a Ithe witũ arĩa marĩ na ũmenyeru ũtungata-inĩ ũcio moigaga: Ũtanathama-rĩ, ambĩrĩria kũhũthia mũtũũrĩre waku na wĩrute kũiganagwo nĩ kĩrĩa ũrĩ nakĩo. (Afil. 4:11, 12) Nĩ atĩa ũngĩ ũngĩka? Leticia ataraagĩria ũũ: “Ndietĩkagĩra kwandĩkwo wĩra ũgũtũma njikare handũ hamwe ihinda iraya. Ndendaga gũikara ũndũ ingĩahotire gũthiĩ hĩndĩ o yothe na kũndũ o guothe ingĩabataranirie.” Hermilo oigaga: “Nĩ nderutire kũruga, gũthambia na kũhũũra nguo bathi.” Verónica oigaga ũũ: “Rĩrĩa ndaikaraga mũciĩ hamwe na famĩlĩ itũ, nĩ ndateithagĩrĩria gũtheria na ngĩĩruta kũruga irio njega no itarĩ cia goro. Ningĩ nĩ nderutire kũigaga tũbeca kahora kahora.”

Levi na mũtumia wake Amelia kuuma Amerika (U.S.) arĩa makoretwo kĩhiko-inĩ ihinda rĩa mĩaka ĩnana nĩ moigaga ũrĩa mahoya mamateithirie kwĩhaarĩria gũthiĩ gũtungata bũrũri-inĩ wa Mexico. Levi oigire ũũ: “Twatarire mbeca iria tũngĩabatarire nĩguo tũgatungate bũrũri ũngĩ mwaka ũmwe tũgĩcoka tũkĩhoya Jehova atũteithie kuona mũigana ũcio.” Thutha wa mĩeri ĩigana ũna, nĩ maahotire gũcokanĩrĩria mbeca iria maagwetete mahoya-inĩ na magĩthama matekũrĩa marĩĩgu. Aacokire akiuga ũũ: “Jehova aacokirie mahoya maitũ kũringana na ũrĩa twamũhoete, kwoguo kĩrĩa gĩatigarĩte nĩ ithuĩ tũhingie itemi ritũ.” Nake Amelia akiuga ũũ: “Twecirĩtie atĩ tũgũikara o mwaka ũmwe tu, no tũkoretwo gũkũ mĩaka mũgwanja, na tũtibangĩte kuuma kuo! Gũikara gũkũ nĩ gũtũheaga mweke wa kwĩyonera Jehova agĩtũteithia. Nĩ twĩyonagĩra wega wake o mũthenya.”

Ningĩ mahoya nĩ maateithirie Adam na mũtumia wake Jennifer a kuuma bũrũri wa Amerika (U.S.) arĩa maratungata gĩcigo-inĩ kĩaragio Gĩthũngũ bũrũri-inĩ wa Mexico. Maheanaga ũtaaro ũyũ: “Tiga gweterera o nginya rĩrĩa maũndũ makaagĩra biũ. Hoya igũrũ rĩgiĩ wendi waku wa gũtungata bũrũri-inĩ ũngĩ, ũcoke wĩke kũringana na mahoya maku. Hũthia mũtũũrĩre waku, wandĩkĩre wabici ya rũhonge ya bũrũri ũrĩa ũrenda gũthiĩ gũtungata, na thutha wa gũthuthuria maũndũ wega, ũthame!” * Weka ũguo, nĩ ũkũgĩa na mũtũũrĩre ũrĩ na gĩkeno na irathimo nyingĩ.