JESU oigĩte atĩ gũtirĩ ihiga o na rĩmwe rĩa hekarũ ya Jehova rĩngĩgatigwo igũrũ wa rĩrĩa rĩngĩ—ũrathi ũcio waahingire rĩrĩa mbũtũ ya Roma ĩtongoretio nĩ Tito yaanangire Jerusalemu mwaka wa 70 Mahinda Maitũ (M.M.). (Mat. 24:2) Thutha ũcio, Mũthamaki Julian nĩ aabangire gwaka hekarũ ĩyo rĩngĩ.

Julian oĩkaine ta mũthamaki wa mũthia wa Roma mũthathaiya wa ngai cia maheeni. Mũihwa ũcio wa Constantine ũrĩa Mũnene aathomithĩtio gĩthomo kĩrĩa andũ metaga kĩa Gĩkristiano. No rĩrĩ, thutha wa gũtuo mũthamaki mwaka wa 361 M.M., nĩ aareganire na gĩthomo kĩu na Ũkristiano mũhĩtanu wa hĩndĩ ĩyo akĩambĩrĩria gũthathaiya ngai cia maheeni. Mabuku ma historĩ mamwĩtaga “Mũregenyũki ũrĩa.”

Julian nĩ aamenire Ũkristiano mũno. No gũkorũo gĩtũmi kĩmwe nĩ tondũ rĩrĩa aarĩ na mĩaka itandatũ, nĩ eyoneire andũ amwe meeĩtaga Akristiano makĩũraga ithe na andũ angĩ ao. Kũringana na andĩki a maũndũ ma tene ma kanitha, Julian eekĩrire Ayahudi ngoro make hekarũ yao rĩngĩ, etĩkĩtie atĩ gwĩka ũguo nĩ kũngĩonanirie atĩ Jesu aarĩ mũnabii wa maheeni. *

Hatirĩ nganja atĩ Julian nĩ aabangire gwaka hekarũ rĩngĩ. Andĩki a historĩ matikoragwo na ma kana nĩ aambĩrĩirie kũmĩaka rĩngĩ, na angĩkorũo nĩ eekire ũguo, kĩrĩa gĩatũmire wĩra ũcio ũtiganĩrio. No harĩ ũndũ ũmwe ũĩkaine wega. Julian oragirũo ihinda rĩnyihĩire mĩaka ĩĩrĩ kuuma atuĩka mũthamaki, na mũbango ũcio ũkĩharagana.