Mũrũ wa Ithe Witũ Ũngĩ Kuongererũo Kĩama-inĩ Kĩrĩa Gĩtongoragia

Kũrĩ Njumatano rũcinĩ, Septemba 5, 2012, famĩlĩ ya Betheli ya Amerika (U.S.) na ya Canada nĩ ciamenyithirio atĩ kũrĩ na mũrũ wa Ithe witũ ũngĩ ũrongereirũo thĩinĩ wa Kĩama Kĩrĩa Gĩtongoragia kĩa Aira a Jehova. Kuuma Septemba 1, 2012, nĩrĩo Mark Sanderson aambĩrĩirie gũtungatĩra thĩinĩ wa kĩama kĩu.

Mũrũ wa Ithe witũ Sanderson aarerirũo nĩ aciari Akristiano thĩinĩ wa San Diego, California, U.S.A. Aabatithirio Februarĩ 9, 1975 na akĩambĩrĩria gũtungata arĩ painia thĩinĩ wa Saskatchewan, Canada, Septemba 1, 1983. Kũrĩ Dicemba 1990, nĩ aarĩkirie Cukuru ya Kũmenyeria maũndũ ma Ũtungata (rĩu ĩtagwo Cukuru ya Bibilia ya Ariũ a Ithe Witũ Arĩa Matahikanĩtie) kĩrathi kĩa mũgwanja bũrũri-inĩ wa Amerika (U.S.). Mũrũ wa Ithe witũ Sanderson nĩ aatuĩkire painia wa mwanya gĩcigĩrĩra-inĩ kĩa Newfoundland, Canada, mweri-inĩ wa Ĩpuro 1991. Thutha wa gũtungatĩra arĩ mũrori wa mũthiũrũrũko wa gũteithĩrĩria, nĩ eetirũo Betheli ya Canada kuuma Februarĩ 1997. Novemba 2000, nĩ aatũmirũo wabici-inĩ ya rũhonge ya Amerika (U.S.) kũrĩa aaheirũo wĩra thĩinĩ wa Rũhonge rwa Ũhoro wa Thibitarĩ na thutha-inĩ thĩinĩ wa Rũhonge rwa Ũtungata.

Septemba 2008 Mũrũ wa Ithe witũ Sanderson nĩ aathire Cukuru ya Arĩa Marĩ Kamĩtĩ-inĩ cia Wabici cia Honge na thutha ũcio aakĩamũrũo gũtungatĩra thĩinĩ wa Kamĩtĩ ya Wabici ya Rũhonge ya Philippines. Kũrĩ Septemba 2010 nĩ oririo acoke Amerika (U.S.) kũrĩa aathire gũteithĩrĩria Rũhonge rwa Ũtungata rwa Kĩama Kĩrĩa Gĩtongoragia.

[Mbica karatathi ka 26]

[Ithandũkũ Karatathi-ini ka 26]

Arĩa Ihinda-inĩ Rĩrĩ Marĩ Thĩinĩ wa Kĩama Kĩrĩa Gĩtongoragia

Thutha, kuuma ũmotho gũthiĩ ũrĩo: D. H. Splane, A. Morris III, D. M. Sanderson, G. W. Jackson, M. S. Lett. Mbere, ũmotho gũthiĩ ũrĩo: S. F. Herd, G. Lösch, G. H. Pierce. Ariũ a Ithe witũ othe a Kĩama Kĩrĩa Gĩtongoragia nĩ Akristiano aitĩrĩrie maguta

[Mbica]