BIBILIA yugaga ũũ: “Ciana-rĩ, nĩ igai riumaga kwĩ Jehova; maciara ma nda nĩ ngerenwa.” (Thab. 127:3) Nĩkĩo aciari Akristiano magĩaga na gĩkeno kĩnene rĩrĩa magĩa na kaana.

O na gũtuĩka kũgĩa kaana nĩ kũrehaga gĩkeno-rĩ, ningĩ nĩ kũrehaga wĩra. Angĩkorũo mwana nĩ egũkũra arĩ na ũgima mwega wa mwĩrĩ, nĩ abataraga gũthiĩ na mbere kũheo irio njega. Nĩguo mwana agĩe na ũrata wa hakuhĩ na Jehova nĩ abataraga kũrutwo na gũtongorio nĩ aciari ake. No mũhaka mamũrute mootaro ma Kiugo kĩa Ngai. (Thim. 1:8) Aciari magĩrĩirũo kwambĩrĩria kũruta ciana ciao rĩ, na magĩrĩirũo gũciruta maũndũ marĩkũ?

Ta wĩcirie ũhoro wa mũthuri ũmwe wetagwo Manoa, ũrĩa watũũraga itũũra-inĩ rĩa Zora hĩndĩ ya Isiraeli ya tene. Mũraika wa Jehova eerire mũtumia wa Manoa ũrĩa warĩ thata atĩ nĩ egũciara kahĩĩ. (Atiir. 13:2, 3) Hatarĩ nganja, Manoa na mũtumia wake nĩ maakenirio mũno nĩ kĩĩranĩro kĩu. O na kũrĩ ũguo, nĩ harĩ ũndũ wamathumbũraga. Nĩ ũndũ ũcio, Manoa agĩthaitha Jehova, akiuga ũũ: “Ndagũthaitha ũreke mũndũ ũcio wa Ngai ũrareketie oke harĩ ithuĩ rĩngĩ, nĩguo atũmenyithie ũrĩa tũkaagĩrĩrũo nĩ gwĩka kaana kau gagaciarũo.” (Atiir. 13:8) Ũndũ ũrĩa wathumbũraga Manoa na mũtumia wake nĩ ũrĩa mangĩarerire kaana kao. Ma nĩ atĩ, nĩ maarutire mũriũ wao Samusoni watho wa Ngai, na kĩyo kĩao gĩkĩgĩa na moimĩrĩro mega. Bibilia yugaga ũũ: ‘Ningĩ roho wa Jehova ũgĩitĩka kũhĩka Samusoni.’ Na nĩ ũndũ ũcio, arĩ ũmwe wa atirĩrĩri bũrũri a Isiraeli, nĩ eekire maũndũ maingĩ ma magegania.—Atiir. 13:25; 14:5, 6; 15:14, 15.

Mũciari agĩrĩirũo nĩ kwambĩrĩria kũruta mwana rĩ? Eunike, nyina wa Timotheo, na ũcũwe Loisi maambĩrĩirie kũruta Timotheo “Maandĩko marĩa matheru” kuuma arĩ o “kaana kana rũkenge.” (2 Tim. 1:5; 3:15) Kwoguo Timotheo aambĩrĩirie kũrutwo Maandĩko arĩ o kaana kanini.

Aciari Akristiano magĩrĩirũo kũhoya ũtongoria wa Jehova na mabange o mbere nĩguo makaambĩrĩria kũruta mwana wao arĩ o “kaana kana rũkenge.” Thimo 21:5 yugaga atĩ, ‘mĩbango ya ũrĩa wĩ kĩyo irehage ũthegei.’ Nĩ ũndũ ũcio, mbere ya mũthenya wa kaana gũciarũo, aciari magĩrĩirũo gũkorũo meharĩirie wega. O na no makorũo maandĩkĩte indo iria kaana kao gakaabatara. Ningĩ nĩ ũndũ wa bata gũkorũo mabangĩte ũhoro wĩgiĩ maũndũ mako ma kĩĩroho. Muoroto wao wagĩrĩirũo gũkorũo ũrĩ kwambĩrĩria kũruta kaana kao kuuma karĩ o rũkenge.

Ibuku rĩmwe rĩrĩa rĩtaarĩirie ũrĩa mwana akũraga nginya agatuĩka mũndũ mũgima, riugaga atĩ mĩeri ya mbere kaana gaciarũo o ũguo, tombo wako nĩ ũnyitaga maũndũ na ihenya mũno. Kwoguo harĩ bata mũno aciari kũhũthĩra kahinda kau kũruta kaana kao ũhoro wa Jehova na mawatho make.

Akĩaria ũhoro wa kairĩtu gake kanini, mũtumia ũmwe painia wa hĩndĩ ciothe oigire ũũ: “Ngoretwo ngĩthiĩ nako kũhunjia kuuma karĩ na mweri ũmwe. O na gũtuĩka gatiamenyaga ũrĩa kũrathiĩ na mbere, ndĩ na ma atĩ kwambĩrĩria kũhunjia nako karĩ o kanini nĩ gũkoretwo na moimĩrĩro mega harĩ ko. Gagĩkinyia mĩaka ĩĩrĩ kaarĩ na ũmĩrĩru wa kũheana trakti kũrĩ arĩa twacemanagia nao tũrĩ ũtungata-inĩ.”

Kũruta mwana arĩ o mũnini nĩ kũrĩ maciaro mega. O na kũrĩ ũguo, aciari nĩ moĩ atĩ gũteithia ciana ciao ciende Jehova ti ũndũ mũhũthũ.

Tondũ ciana itihotaga gũkindĩria handũ hamwe mũno, ti ũndũ mũhũthũ harĩ aciari gũciruta. Ciana nĩ ciendete mũno kũmenya na kwĩruta maũndũ marĩa macirigicĩirie. Aciari mangĩteithia mwana wao atĩa kũiga meciria make harĩ ũhoro ũrĩa maramũruta?

Ta ririkana ũrĩa Musa oigire thĩinĩ wa Gũcokerithia Maathani 6:6, 7: “Mohoro maya ndĩrakũhe ũmũthĩ ngĩgũtaara-rĩ, reka matũũre ngoro-inĩ yaku; na ũmarute ciana ciaku na kĩyo, na waragie ũhoro wamo hĩndĩ ĩrĩa ũikarĩte nyũmba yaku thĩinĩ, na hĩndĩ ĩrĩa ũgũthiĩ na njĩra, na hĩndĩ ĩrĩa ũkomete, o na rĩrĩa ũũkĩrĩte.” Rĩandĩko rĩu rĩonanagia atĩ aciari magĩrĩirũo gũcokagĩra kaingĩ maũndũ marĩa mararuta ciana ciao. Kaana gatariĩ ta kamũmera kanini karĩa kabataraga gũikara gagĩitagĩrĩrio maĩ. Tondũ gũcokera nĩ gũteithagia nginya andũ agima kũririkana maũndũ ma bata-rĩ, hatarĩ nganja nĩ gũteithagia ciana nini!

Nĩguo mũciari arute ciana ciake ũhoro wa Ngai, nĩ ekũbatara kũhũthĩra mahinda hamwe nacio. Tondũ tũratũũra thĩinĩ wa thĩ ĩrĩ na maũndũ maingĩ-rĩ, ti ũndũ mũhũthũ gũkorũo na mahinda ta macio. Nĩkĩo mũtũmwo Paulo oigire ‘tũtigateage ihinda rĩrĩa rĩagĩrĩru’ rĩa kũhingia maũndũ ma bata ma kĩĩroho. (Ef. 5:15, 16) Tũngĩhota kũrũmĩrĩra ũtaaro ũcio atĩa? Mũthuri ũmwe wa kĩũngano ũrĩa mũtumia wake nĩ painia wa hĩndĩ ciothe, oigire atĩ ndwarĩ ũndũ mũhũthũ kũruta mwana wao, kũhingia maũndũ marĩa ehokeirũo kĩũngano-inĩ, na  kũruta wĩra wa kĩĩmwĩrĩ. Hihi maahotaga atĩa kũruta kairĩtu kao? Mũthuri ũcio oigire ũũ: “Hingo ciothe rũcinĩ itanathiĩ wĩra, tũrĩ na mũtumia wakwa twaambaga gũthomera kaana gaitũ Ibuku Rĩakwa rĩa Ng’ano cia Biblia kana kabuku ga Gũthuthuria Maandĩko o Mũthenya. Narĩo hwaĩ-inĩ, twatigagĩrĩra atĩ mbere ya gathiĩte toro, nĩ twagathomera, na rĩrĩa tũrathiĩ kũhunjia tũgathiĩ nako. Tũtieendaga kũrũo nĩ mweke ũcio wa gũkaruta karĩ o kanini.”

Hatarĩ nganja, wendi witũ nĩ ciana citũ itũĩke andũ agima mangĩĩrũgamĩrĩra wega. O na kũrĩ ũguo, gĩtũmi gitũ kĩnene gĩa gũciruta nĩ gũciteithia ciende Jehova na ngoro yothe.—Mar. 12:28-30.

Thaburi 127:4 yugaga, “Ta mĩguĩ ĩĩ guoko kwa njamba, noguo ciana itariĩ iria mũndũ aciarĩte e mũnyinyi.” Kwoguo, ciana igerekanĩtio na mĩguĩ ĩrĩa ĩrabatara gũikio na ũbacĩrĩru nĩguo ĩrathe harĩa ĩrongoreirio. Mũndũ arĩkia gũikia mũguĩ ndũmũcokagĩrĩra rĩngĩ. Aciari makoragwo na “mĩguĩ,” nĩyo ciana ciao, o kwa ihinda inini. Magĩrĩirũo kũhũthĩra ihinda rĩu gũkindĩra motaaro ma Kiugo kĩa Ngai meciria-inĩ na ngoro-inĩ cia ciana ciao.

Mũtũmwo Johana akĩaria ũhoro wa ciana ciake cia kĩĩroho aandĩkire ũũ: “Ndirĩ ũndũ ũngenagia gũkĩra ũcio, kũigua atĩ ciana ciakwa no irũmagĩrĩra ũhoro-ũrĩa-wa-ma.” (3 Joh. 4) Aciari Akristiano o nao no magĩe na gĩkeno o ta kĩu mangĩona ciana ciao ‘ikĩrũmĩrĩra ũhoro-ũrĩa-wa-ma.’