Mĩtangĩko no ĩkorũo na moimĩrĩro moru mũno harĩ ithuĩ. No ĩtũme tũthumbũke kĩĩmeciria, tũnyihĩrũo nĩ hinya, na ĩtũme tũgĩe na mawoni matagĩrĩire megiĩ mũtũũrĩre. Mũthamaki Daudi wa Isiraeli ya tene nĩ aagũmĩirũo nĩ mathĩna maingĩ. Aahiũranirie namo atĩa? Thĩinĩ wa thaburi ĩmwe oigaga ũũ: “Ngũkaĩra Jehova na mũgambo; nĩ gũthaitha ngũgĩthaitha Jehova o na mũgambo. Ũhoro ũrĩa ũranjaithia ngũũitũrũra mbere-inĩ yake; nĩ kũmuonia ngũmuonia mĩnyamaro ĩrĩa ndĩ nayo. Rĩrĩa ngoro yakwa ĩrahooteka thĩinĩ wakwa, wee nĩũkoragwo ũũĩ harĩa ngũgera.” Hatarĩ nganja, Daudi aahoire ũteithio wa Jehova arĩ na wĩnyihia.—Thab. 142:1-3.

Thĩinĩ wa rĩandĩko rĩngĩ rĩa Thaburi Daudi oigire ũũ: “Ndĩ o ũndũ ũmwe nyendete harĩ Jehova, na nĩguo ndĩĩthingataga; nĩ atĩ njikarage nyũmba ya Jehova matukũ mothe ma muoyo wakwa, ndĩĩonagĩre wega wa Jehova, na ndĩĩtuĩragĩrie ũhoro kũu thĩinĩ wa hekarũ yake.” (Thab. 27:4) Daudi ndaarĩ Mũlawii, ĩndĩ ta hũũra mbica arũgamĩte nja ya harĩa hatheru hakuhĩ na hema ya Jehova ya gũtũnganwo ĩrĩa yarĩ gatũũrũ ka ũthathaiya wa ma hĩndĩ ĩyo. Arĩ na ngatho nyingĩ ũũ atĩ, arenda kũhũthĩra matukũ make marĩa matigarĩte, arĩ kũu hema-inĩ nĩguo, ‘eyonagĩre wega wa Jehova.’

Kiugo gĩa Kĩhibirania kĩrĩa gĩtaũrĩtwo “wega” thĩinĩ wa Thaburi 27:4, kĩonanagia ũhoro wa kĩndũ kĩega, kana kĩrakenia meciria, kana ngoro. Hingo ciothe Daudi nĩ aakenagio nĩ mũbango wa Jehova wa ũthathaiya. Nĩ wega o na ithuĩ twĩyũrie ũũ: ‘Hihi niĩ nĩ njiguaga ta ũrĩa Daudi aaiguaga?’

Mahinda-inĩ maya, njĩra ya gũkuhĩrĩria Jehova ndĩhocetie harĩ hekarũ yakĩtwo gũkũ thĩ. Ithenya rĩa ũguo, ĩhocetie harĩ hekarũ nene ya Ngai ya kĩĩroho, nĩguo mũbango mũtheru wa ũthathaiya wa ma. * O na ithuĩ ‘tũngĩtuĩria’ mũbango ũcio, nĩ ‘tũrĩĩyonagĩra wega wa Jehova.’

Ta wĩcirie ũhoro wa kĩgongona kĩa mahaki ma njino gĩa gĩcango kĩrĩa gĩakoragwo mũromo-inĩ wa hema ya gũtũnganwo. (Tham. 38:1, 2; 40:6) Kĩgongona kĩu kĩoonanagia wendi wa Jehova wa gwĩtĩkĩra muoyo wa Jesu ũtuĩke igongona. (Ahib. 10:5-10) Ta wĩcirie ũrĩa tũgunĩkaga nĩ ũndũ ũcio! “Rĩrĩa twatũire tũrĩ thũ ciake twaiguithanirio na Ngai na njĩra ĩo ya gũkua kwa Mũriũ.” (Rom. 5:10) Twagĩa na wĩtĩkio harĩ thakame ya Jesu, nĩ tũrĩkenagĩra ũiguano hamwe na Ngai, na kĩĩrĩgĩrĩro kĩrĩa kiumanaga na gũkorũo mũndũ arĩ mũrata wa Ngai. Nĩ ũndũ ũcio, nĩ tũrĩkoragwo ‘ndundu na Jehova.’—Thab. 25:14.

Nĩ ũndũ wa ‘mehia maitũ kũrihũrũo’ nĩ tũkoragwo na “mahinda ma kũrurumũkio moimĩte kwĩ Mwathani.” (Atũm. 3:19) Tũtariĩ ta mũndũ wohetwo njera, ĩndĩ akerira mũno nĩ ũndũ wa mehia make, na nĩ ũndũ ũcio ageka ũgarũrũku mũnene o etereire kũũragwo. Nĩ ũndũ ũcio, mũcirithania mwega akona arĩ wega kuohera mũndũ ũcio na akamwehereria ituĩro rĩa gĩkuũ. Na githĩ mũndũ ta ũcio to aigue akenete mũno! O ta mũcirithania ũcio, Jehova nĩ ohagĩra arĩa meriraga na akamehereria ituĩro rĩa gĩkuũ.

Maũndũ mamwe makoniĩ ũthathaiya marĩa Daudi eeyonagĩra thĩinĩ wa nyũmba ya Jehova nĩ ta kũgomana kwa Aisiraeli, Aisiraeli gũthomerũo na gũtaarĩrio Watho, gũcinwo kwa ũbumba, na ũtungata mũtheru ũrĩa warutagwo nĩ athĩnjĩri Ngai na Alawii. (Tham. 30:34-38; Ndar. 3:5-8; Gũcok. 31:9-12) Nĩ kũrĩ maũndũ ma mahinda-inĩ  maya mahanaine na maũndũ macio ma ũthathaiya wa ma hĩndĩ ya Isiraeli ya tene.

O ta hĩndĩ ya tene-rĩ, na githĩ o na ũmũthĩ ti ‘ũhoro mwega na wĩ gĩkeno, ariũ a Ithe witũ gũikaranagia maiguaine!’ (Thab. 133:1) Thĩinĩ wa thĩ yothe nĩ kũgĩte na wongerereku mũnene mũno thĩinĩ wa ũrũmwe wa ‘ariũ a Ithe witũ.’ (1 Pet. 2:17) Kiugo kĩa Ngai nĩ gĩthomagwo na gĩgatarĩrio thĩinĩ wa mĩcemanio itũ. Jehova nĩ atũrutaga maũndũ maingĩ mega kũgerera ithondeka rĩake. Ningĩ nĩ atũheaga irio nyingĩ cia kĩĩroho kũgerera mabuku nĩguo tũmahũthagĩre wĩruti-inĩ witũ kĩũmbe na wa famĩlĩ. Mũrũ wa Ithe witũ ũmwe wa Kĩama Kĩrĩa Gĩtongoragia oigire ũũ: “Gwĩcũrania ũhoro wa Kiugo kĩa Jehova, na gũcaria ũũgĩ na ũtaũku gũtũmaga hingo ciothe njigue njiganĩire na ndĩ na ũtonga wa kĩĩroho.” Ma nĩ atĩ, ‘ũmenyi nĩ ũiguithagia roho wa mũndũ wega.’—Thim. 2:10.

Ũmũthĩ, mahoya marĩa metĩkĩrĩku ma ndungata cia Jehova nĩ mamũkinyagĩra o mũthenya. Jehova onaga mahoya ta macio matariĩ ta mũtararĩko mwega wa ũbumba. (Thab. 141:2) Na githĩ tũtiguaga wega ngoro-inĩ twamenya atĩ Jehova Ngai witũ nĩ akenagio nĩ ithuĩ rĩrĩa tũramũhoya twĩnyihĩtie!

Musa aahoire ũũ: “Wega wa Mwathani Ngai witũ ũrokĩgĩa igũrũ riitũ: wĩra wa moko maitũ naguo, wee tũrũmagĩrie.” (Thab. 90:17) Jehova nĩ arathimaga ũtungata witũ rĩrĩa twekĩra kĩyo. (Thim. 10:22) No kũhoteke kũrĩ andũ tũteithĩtie makeruta ũhoro wa ma. Kana nĩ tũkirĩrĩirie thĩinĩ wa ũtungata mĩaka mĩingĩ o na gũtarĩ na moimĩrĩro mega, kana tũrĩ na mathĩna ma mwĩrĩ, ma kĩĩmeciria, kana kũnyarirũo. (1 Thes. 2:2) O na kũrĩ ũguo-rĩ, na githĩ tũtiĩyoneire “wega wa Jehova” na tũkamenya atĩ Ithe witũ wa igũrũ nĩ akenagio mũno nĩ kĩyo giitũ?

Mũthamaki Daudi oigire ũũ: “Jehova nĩwe rũgai rũrĩa ngaĩte, o na nowe riita rĩa gĩkombe gĩakwa: wee-rĩ, iringa rĩrĩa ningithĩtio, nĩwe ũnyitĩrĩire. Thanju ciakwa njatũrĩirũo kũndũ kũrĩa gũthaka.” (Thab. 16:5, 6) Daudi nĩ aacokirie ngatho mũno nĩ ũndũ wa ‘igai’ rĩake. Igai rĩu nĩ gũkorũo etĩkĩrĩkĩte nĩ Jehova na akaheo mweke wa kũmũtungatĩra. O ta Daudi, no tũnyamarĩke nĩ ũndũ wa mathĩna. O na kũrĩ ũguo, tũrĩ na irathimo nyingĩ cia kĩĩroho! Nĩ ũndũ ũcio, rekei tũthiĩ na mbere gũkenera ũthathaiya wa ma na hingo ciothe ‘tũtuĩragie’ maũndũ thĩinĩ wa hekarũ ya kĩĩroho ya Jehova.