Mũthamaki Daudi akĩgooca Jehova, aainire ũũ: “Niĩ ngenagio no gwĩka ũrĩa wendaga, wee Ngai wakwa; ĩĩ-ni, kĩrĩra gĩaku kĩrĩ o ngoro-inĩ yakwa.” (Thab. 40:8) O na gũtuĩka Daudi nĩ aacemanirie na hatĩka na moritũ maingĩ ũtũũro-inĩ wake, hatarĩ nganja, nĩ aakenagĩra gwĩka wendi wa Ngai. Ma nĩ atĩ, Daudi towe wiki wakenagĩra gũtungatĩra Ngai ũrĩa wa ma.

Mũtũmwo Paulo akĩaria ũhoro wa Mesia kana Kristo, nĩ aahũthĩrire ciugo cia Thaburi 40:8. Aandĩkire ũũ: “Nĩkĩo Kristo, agĩũka gũkũ thĩ, ekuuga atĩrĩ: Wee-rĩ, ti magongona na mahaki wendaga, No nĩ mwĩrĩ ũ’thondekeire; Mahaki ma gũcinwo, na ma kũrutwo nĩ ũndũ wa mehia-rĩ, timo ũkenagĩra. Hĩndĩ ĩo ngĩkiuga atĩrĩ, Niĩ ũyũ! Ndĩ gũũka, (Thĩinĩ wa ibuku o rĩo rĩa gĩkũnjo, ũhoro wakwa nĩho wandĩkĩtwo) gwĩkaga o ũrĩa wendaga, wee Ngai.”—Ahib. 10:5-7.

Hĩndĩ ĩrĩa Jesu aarĩ gũkũ thĩ, nĩ aakenagĩra kwĩrorera ũũmbi, gũkorũo hamwe na arata, na kũrĩanĩra na andũ. (Mat. 6:26-29; Joh. 2:1, 2; 12:1, 2) O na kũrĩ ũguo, ũndũ ũrĩa onaga ũrĩ wa bata na wamũkenagia mũno nĩ gwĩka wendi wa Ithe. Oigire ũũ: “Irio ciakwa nĩ njĩkage ũrĩa ekwenda, ũrĩa wandekirie, ngarĩkie wĩra wake.” (Joh. 4:34; 6:38) Arutwo a Jesu nĩ meerutĩte kuuma kũrĩ Mwathi wao hitho ya kũgĩa na gĩkeno kĩa ma. Marĩ na gĩkeno kĩnene, maahunjagĩria andũ ndũmĩrĩri ya Ũthamaki meeyendeire na marĩ na kĩyo.—Luk. 10:1, 8, 9, 17.

Jesu eerire arũmĩrĩri ake ũũ: “Thiĩi mũgatũme andũ a ndũrĩrĩ ciothe matuĩke arutwo akwa, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa Roho Mũtheru: mũkĩmarutaga kũrũmia maũndũ marĩa mothe ndĩmwathĩte inyuĩ: na atĩrĩrĩ, niĩ ndĩ hamwe na inyuĩ mĩthenya yothe, o nginya ithirĩro rĩa mahinda maya.” (Mat. 28:19, 20) Nĩguo tũhingie wĩra ũcio tũbataire gũcaria andũ kũrĩa guothe mangĩoneka, gũcokera arĩa monania  kwenda, na kũmaruta Bibilia. Gwĩka ũguo nĩ gũtũrehagĩra gĩkeno kĩnene.

Gũkorũo na mwerekera ũrĩa wagĩrĩire no gũtũteithie gũkorũo na gĩkeno ũtungata-inĩ o na rĩrĩa andũ mataratũthikĩrĩria. Nĩ kĩĩ gĩtũmaga tũthiĩ na mbere kũhunjia ũhoro ũrĩa mwega o na rĩrĩa andũ matarenda gũtũthikĩrĩria? Nĩ tũmenyaga atĩ kũhunjia ũhoro wa Ũthamaki na gũtua andũ arutwo nĩ njĩra ya kuonania wendo witũ harĩ Ngai na harĩ andũ. Ma nĩ atĩ, mĩoyo itũ na ya andũ arĩa angĩ ĩrĩ ũgwati-inĩ. (Ezek. 3:17-21; 1 Tim. 4:16) Rekei twarĩrĩrie maũndũ mamwe marĩa mateithĩtie aarĩ na ariũ a Ithe witũ aingĩ matũũrie kana mongerere kĩyo ũtungata-inĩ, o na makĩhunjagia kũndũ kũrĩ na moritũ.

Kaingĩ kũhũthĩra ciũria iria ciagĩrĩire nĩ kũrehaga moimĩrĩro mega ũtungata-inĩ. Mũthenya ũmwe rũcinĩ, Amalia nĩ onire mũthuri aikarĩte handũ andũ mahurũkaga agĩthoma ngathĩti ya mohoro. Akĩmũkuhĩrĩria na akĩmũũria kana harĩ ũhoro mwega aathomete ngathĩti-inĩ ĩyo. Rĩrĩa mũthuri ũcio aamwĩrire hatirĩ, Amalia aamwĩrire ũũ: “Ndakũrehera ũhoro mwega wa Ũthamaki wa Ngai.” Ũndũ ũcio nĩ wagucĩrĩirie mũthuri ũcio, na agĩtĩkĩra kwĩruta Bibilia. Amalia nĩ aahotire kwambĩrĩria kwĩruta Bibilia na andũ atatũ gĩcigo-inĩ kĩu andũ mahurũkaga.

Nake Janice nĩ aahunjagia kũrĩa aarutaga wĩra. Mũthenya ũmwe mũndũ ũmwe ũrangagĩra kũu wĩra-inĩ, na mũndũ ũngĩ marutithanagia wĩra nake nĩ maakenirio nĩ gĩcunjĩ kĩarĩ thĩinĩ wa Mũrangĩri, na nĩ ũndũ ũcio Janice akĩambĩrĩria kũmarehagĩra ngathĩti o mweri. Ningĩ nĩ aambĩrĩirie kũrehagĩra mũruti wĩra ũngĩ wakenirio nĩ maũndũ matiganĩte marĩa makoragwo thĩinĩ wa Mũrangĩri na Amkeni! Ũndũ ũcio nĩ watũmire mũruti wĩra ũngĩ o nake etie ngathĩti. Janice oigire ũũ: “Kĩu nĩ kĩrathimo kĩnene kuuma kũrĩ Jehova.” Macũngĩrĩro-inĩ aarĩ na andũ 11 arĩa aatwaragĩra ngathĩti wĩra-inĩ o mweri.

Mũrori ũmwe wa mũthiũrũrũko eerire ahunjia atĩ rĩrĩa marahunjia nyũmba kwa nyũmba, matiagĩrĩirũo kwĩra mwene nyũmba tu atĩ nĩ magaacoka rĩngĩ. Ithenya rĩa ũguo, no moorie mũndũ ũũ: “Hihi no wende nguonie ũrĩa twĩrutaga Bibilia na andũ?” kana, “Hihi nĩ mũthenya ũrĩkũ na nĩ thaa irĩkũ ũngĩenda njoke nĩguo tũtwarithie ndeereti itũ?” Mũrori ũcio wa mũthiũrũrũko oigire atĩ nĩ ũndũ wa kũhũthĩra njĩra ĩyo, aarĩ na ariũ a Ithe witũ thĩinĩ wa kĩũngano kĩmwe aacereire, maambĩrĩirie kwĩruta Bibilia na andũ 44 thĩinĩ wa kiumia kĩmwe.

No tũgĩe na moimĩrĩro mega tũngĩcokera andũ o na ihenya kuuma twamahunjĩria rita rĩa mbere. Nĩkĩ? Gwĩka ũguo kuonanagia atĩ nĩ tũrenda biũ gũteithia andũ arĩa marĩ na ngoro njega mataũkĩrũo nĩ Bibilia. Rĩrĩa mũtumia ũmwe oririo kĩrĩa gĩatũmire etĩkĩre kwĩruta Bibilia na Aira a Jehova, oigire ũũ: “Ndaambĩrĩirie kwĩruta nĩ ũndũ nĩ maanyonirie  wendo na makĩonania biũ atĩ nĩ marenda kũndeithia.”

Ihinda inini thutha wa kũrĩkia Cukuru ya Ũtungata wa Ũpainia, Madaí eerutaga Bibilia na andũ 15 na nĩ aaheanĩte angĩ 5 kũrĩ ahunjia angĩ. Amwe arĩa eerutaga Bibilia nao nĩ maambĩrĩirie gũthiĩ mĩcemanio itũ mategũtĩrĩria. Nĩ kĩĩ gĩateithirie Madaí aambĩrĩrie kwĩruta Bibilia na andũ aingĩ ũguo? Cukuru ĩyo nĩ yamũteithĩtie kuona bata wa gũikara agĩcokaga nginya hĩndĩ ĩrĩa agaakora mũndũ aahunjĩirie na akĩonania kwenda ũhoro mwega. Mũhunjia ũngĩ ũteithĩtie andũ aingĩ kwĩruta ma cia Bibilia oigire ũũ: “Nĩ menyete atĩ gũkorũo na ũkirĩrĩria rĩrĩa tũracokera andũ, nĩyo hitho ya gũteithia arĩa marenda kũmenya Jehova.”

Tũrabatara gũkorũo na kĩyo kĩingĩ nĩguo tũhote gũcokera andũ na kũmaruta Bibilia. O na kũrĩ ũguo, irathimo iria tũgĩaga nacio itingĩringithanio na kĩyo kĩu. Twerutanĩria biũ kũhunjia ũhoro wa Ũthamaki, nĩ tũrĩteithagia andũ “matuĩke a kũmenya ũhoro-wa-ma” na ũndũ ũcio no ũmarehere ũhonokio. (1 Tim. 2:3, 4) Na ithuĩ nĩ tũrĩgĩaga na gĩkeno na kũiganĩra gũtangĩgereka.