Hihi nĩ ũthomete na kinyi icunjĩ cia ica ikuhĩ cia Mũrangĩri? ta rora kana no ũhote gũcokia ciũria ici:

Gatũrũme ga Pasaka kaagĩrĩirũo gũthĩnjwo mathaa marĩkũ mũthenya wa Nisani 14?

Bibilia imwe, ciugaga atĩ kaagĩrĩirũo gũthĩnjwo “kũrĩ na mairia.” Ingĩ nacio “gũgĩthiĩ gũtuka” kana “riũa rĩathũa.” (Tham. 12:6)—12/15, karatathi ga 18-19.

Nĩ motaaro marĩkũ ma Bibilia mangĩteithia andũ ethĩ gũtua matua ma ũũgĩ?

(1) Ambai mũcarie Ũthamaki wa Ngai o na ũthingu wake. (Mat. 6:19-34) (2) Wĩgĩre na gĩkeno nĩ ũndũ wa gũtungatĩra arĩa angĩ. (Atũm. 20:35) (3) Kenera gũtungatĩra Jehova ũnyinyi-inĩ waku. (Koh. 12:1)—1/15, karatathi ga 19-20.

Nĩ atwarithia arĩkũ a mbarathi makoretwo makĩoneka kuuma 1914?

Jesu, mũtwarithia wa mbarathi ĩrĩa njerũ, nĩ arĩkĩtie kũingata Shaitani na ndaimono ciake kuuma igũrũ. Mũtwarithia wa mbarathi ndune arũgamĩrĩire mbaara iria ikoretwo thĩinĩ wa thĩ. Mũtwarithia wa mbarathi njirũ arũgamĩrĩire ng’aragu. Nake mũtwarithia wa mbarathi theũku arehaga mĩrimũ akoraga andũ milioni nyingĩ. (Kũg. 6:2-8)—2/1, karatathi ga 6-7.

‘Ũhiki wa Gatũrũme’ ũgeekwo rĩ? (Kũg. 19:7)

‘Ũhiki wa Gatũrũme’ ũgeekwo thutha wa Mũthamaki Jesu Kristo kũrĩkia ũhootani wake, ũguo nĩ kuuga thutha wa Babuloni Ũrĩa Mũnene kũniinwo na mbaara ya Hari–Magedoni kũrũo.—2/15, karatathi ga 10.

Ayahudi a karine ya mbere maarĩ na itũmi irĩkũ cia ‘gũtaanya’ Mesia? (Luk. 3:15)

Tũtingĩmenya biũ kana Ayahudi a karine ya mbere nĩ maataũkĩirũo wega nĩ ũrathi wa Danieli wĩgiĩ Mesia ta ũrĩa tũtaũkĩirũo. (Dan. 9:24-27) Ĩndĩ, no kũhoteke nĩ maaiguĩte ũrĩa mũraika wa Jehova eerire arĩithi, kana ũrĩa Anna mũtumia mũnabii oigĩte igũrũ rĩgiĩ Jesu rĩrĩa aatwarĩtwo hekarũ-inĩ arĩ kaana. Ningĩ ogĩ a njata nĩ mookĩte gũcaria ‘ũrĩa waciarĩtwo e Mũthamaki wa Ayahudi.’ (Mat. 2: 1, 2) Thutha-inĩ, Johana Mũbatithania nĩ aagwetire atĩ Kristo nĩ angĩokire thutha wa kahinda gatarĩ coho.—2/15, karatathi ka 26-27.

Tũngĩĩthema atĩa gũtũmaga Ĩĩ itũ ĩtuĩke Aca? (2 Kor. 1:18)

Ma nĩ atĩ, rĩmwe na rĩmwe no kuumĩre ũndũ tũtangĩhota gwĩthema ũtũme twage kũhingia kĩrĩko giitũ. O na kũrĩ ũguo, rĩrĩa twarĩkanĩra ũndũ na mũndũ twagĩrĩirũo gwĩka o ũrĩa wothe tũngĩhota tũhingie kĩrĩko kĩu.—3/15, karatathi ka 32.

Ũngĩhota atĩa gũtooria magerio ma kwĩrorera mbica cia ũũra-thoni?

Kũrĩ na makinya matatũ mangĩgũteithia: (1) Ũngĩona mbica ya ũũra thoni ũterĩgĩrĩire eheria maitho maku narua. (2) Gitagĩra meciria maku na njĩra ya gwĩciragia maũndũ marĩa mega na kũhoya Ngai. (3) Gitagĩra mĩthiĩre yaku na njĩra ya gwĩthema thenema kana ciarĩro cia intaneti iria ikoragwo na mbica cia ũũra-thoni.—4/1, karatathi ga 10-12.

Kũngĩgĩa na moimĩrĩro marĩkũ materĩgĩrĩirũo Mũkristiano angĩtiga famĩlĩ yake athiĩ bũrũri ũngĩ agacarie mbeca?

Aciari mangĩaga gũikara hamwe na ciana ciao, mĩtugo yacio no ĩthũke na igĩe na mathĩna ma kĩĩmeciria. Ciana ciahota nginya gũthũũra aciari. Andũ agima arĩa marutaga wĩra kũraihu na arĩa mahikanĩtie nao no maingĩre magerio-inĩ ma ngomanio itagĩrĩire.—4/15, karatathi ga 19-20.

Nĩ kĩĩ gĩatũmaga eki-naĩ makĩũragwo moinwo magũrũ?

Aroma mooragaga eki-naĩ amwe na njĩra ya kũmacuuria mũtĩ igũrũ. Ayahudi mooigire magũrũ ma eki-naĩ arĩa maacurĩtio hamwe na Jesu moinangwo. Gwĩkwo ũguo nĩ kũngĩatũmire maremwo nĩ kũhuhia wega na nĩ ũndũ ũcio makue narua. Nĩ ũndũ ũcio, matingĩararire mũtĩ igũrũ. (Gũcok. 21:22, 23)—5/1, karatathi ga 11.

Nĩ ciũria irĩkũ inya twagĩrĩirũo gwĩciria ũhoro wacio rĩrĩa tũrahunjia?

Nĩ andũ arĩkũ ndĩrahunjĩria? Nĩkũ ndĩrahunjia? Nĩ hĩndĩ ĩrĩkũ njega ya kũhunjĩria andũ? Njagĩrĩirũo kwambĩrĩria ndeereti atĩa?—5/15, karatathi ga 12-15.

Kũnyua thigara gũkoretwo na moimĩrĩro marĩkũ mooru?

Kwa ihinda rĩa mĩaka igana rĩmwe mĩhĩtũku, thigara yũragĩte andũ 100,000,000. Kahinda-inĩ gaka thigara yũragaga andũ 6,000,000 o mwaka.—6/1, karatathi ga 3.