PETERO nĩ aarĩrire mũno thutha wa gũkaana Jesu. O na gũtuĩka mũtũmwo ũcio nĩ angĩabatarire kwĩrutanĩria nĩguo acokererie kĩĩroho, Jesu no eendaga kũmũhũthĩra nĩguo ateithie arĩa angĩ. Nĩkĩo Jesu aamwĩrire ũũ: “Nawe warĩkia kũgarũrũka, ũcoke ũũmagĩrĩrie ariũ a Ithe witũ.” (Luk. 22:32, 54-62) Petero aacokire gũtuĩka kĩmwe gĩa itugĩ cia kĩũngano gĩa Gĩkristiano gĩa karine ya mbere. (Gal. 2:9) Ũndũ ũmwe na ũguo, mũndũ watungataga tene arĩ mũthuri wa kĩũngano no acokerere wĩra ũcio rĩngĩ na nĩ ũndũ ũcio agĩe na gĩkeno kĩrĩa kiumanaga na gwĩkĩra Akristiano arĩa angĩ hinya kĩĩroho.

Amwe arĩa maatungataga tene marĩ athuri nĩ meheretio, na ũndũ ũcio no ũkorũo ũtũmĩte meigue matagĩrĩire. Julio, * ũrĩa watungatĩte arĩ mũthuri wa kĩũngano makĩria ma mĩaka 20 bũrũri-inĩ wa Bolivia, oigire ũũ: “Kũhaarĩria mĩario, gũkorũo na mahinda na aarĩ na ariũ a Ithe witũ, na kũrĩithia ng’ondu cia Jehova, nĩ gwatũmaga ngorũo ndĩ na maũndũ maingĩ ma gwĩka ũtũũro-inĩ wakwa! Maũndũ macio maathirire o rĩmwe ta kũbucia kwa riitho, magĩtiga ithenya inene mũno ũtũũro-inĩ wakwa. Ma nĩ atĩ, rĩu rĩarĩ ihinda iritũ mũno.” Mahinda-inĩ maya, Julio nĩ aratungata rĩngĩ arĩ mũthuri wa kĩũngano.

Mũrutwo Jakubu aandĩkire ũũ: “Mwakorũo nĩ magerio mĩthemba mĩingĩ, tuagai atĩ ũguo no gĩkeno gĩtheri.” (Jak. 1:2) Jakubu aaragia ũhoro wa magerio marĩa moimanaga na kũnyarirũo na kwaga gũkinyanĩra gwitũ. Aagwetire merirĩria mooru, kuonania mũthutũkanio, na maũndũ mangĩ ta macio. (Jak. 1:14; 2:1; 4:1, 2, 11) Tũngĩrũithio nĩ Jehova twahota kũigua ruo mũno. (Ahib. 12:11) No magerio ta macio matiagĩrĩirũo gũtũma tũũrũo nĩ gĩkeno.

O na angĩkorũo nĩ twehereirio mĩeke ya ũtungata ĩrĩa  twarĩ nayo kĩũngano-inĩ, tũrĩ o na mweke wa gũthuthuria ũrĩa wĩtĩkio witũ ũtariĩ na kuonania wendo witũ harĩ Jehova. Ningĩ no twĩcũranie kĩrĩa gĩatũmaga tũtungate. Hihi twekaga ũguo nĩ ũndũ wa ũguni witũ kana twatindĩkĩtwo gũkinyĩra mweke ũcio nĩ ũndũ wa wendo witũ harĩ Jehova na gwĩtĩkia atĩ kĩũngano nĩ gĩake na kĩagĩrĩirũo kũrũmbũiyo na wendo? (Atũm. 20:28-30) Ariũ a Ithe witũ arĩa tene maatungataga marĩ athuri a kĩũngano na no mathiaga na mbere ũtungata-inĩ wa Jehova marĩ na gĩkeno, nĩ monagia andũ othe o hamwe na Shaitani, atĩ wendo wao harĩ Jehova nĩ wa ma.

Rĩrĩa Mũthamaki Daudi aarũithirio nĩ ũndũ wa gwĩka mehia maritũ, nĩ eetĩkĩrire irũithia rĩa Jehova na akĩoherũo. Aainire ũũ: “Mũndũ gũkena, nĩ ũrĩa woheirũo wĩhia wake, kũhĩtia gwake gũgakĩhumbĩrũo. Gũkena-rĩ, nĩ ũrĩa Jehova atangĩtua mwaganu, o ũrĩa ũtakĩrĩ na ũhinga ngoro.” (Thab. 32:1, 2) Kũrũithio nĩ gwateithirie Daudi arũngĩrĩrie mĩthiĩre yake na hatarĩ nganja agĩtuĩka mũrĩithi mwega wa andũ a Ngai.

Kaingĩ, ariũ a Ithe witũ arĩa macokagĩrĩra gũtuĩka athuri a kĩũngano, matuĩkaga arĩithi ega o na gũkĩra ũrĩa maarĩ hau mbere. Mũrũ wa Ithe witũ ũmwe wacokereire gũtuĩka mũthuri wa kĩũngano, oigire ũũ: “Rĩu nĩ ndaũkagĩrũo wega ũrĩa ingĩrũmbũyania na arĩa meka mahĩtia.” Mũthuri ũngĩ nake oigire ũũ: “Rĩu nĩ njoyaga na ũritũ mũno mweke wakwa wa gũtungatĩra aarĩ na ariũ a Ithe witũ.”

Mwandĩki wa Thaburi oigire ũũ: “[Jehova] ndangĩikara o acirithanagia hĩndĩ ciothe.” (Thab. 103:9) Kwoguo tũtiagĩrĩirũo gwĩciria atĩ Ngai ndangĩhoka rĩngĩ mũndũ wekĩte rĩhia iritũ. Ricardo, ũrĩa weehereirio mweke wa gũkorũo arĩ mũthuri wa kĩũngano thutha wa gũkorũo atungatĩire mĩaka mĩingĩ, oigire ũũ: “Nĩ ndaakuire ngoro mũno nĩ ũndũ wa mahĩtia makwa. Nĩ ndaikarire ihinda iraya itegũtuĩka mũthuri wa kĩũngano rĩngĩ nĩ ũndũ wa kwĩigua itagĩrĩire. Ndietĩkagia atĩ andũ no manyone rĩngĩ ndĩ mũndũ mwĩhokeku. No tondũ nĩ ngenagĩra gũteithia andũ arĩa angĩ, nĩ ndahotaga kũruta andũ Bibilia, gwĩkĩra aarĩ na ariũ a Ithe witũ ngoro nyũmba-inĩ ya Ũthamaki, na kũhunjia hamwe nao. Ũndũ ũcio nĩ wandeithirie kũgĩa na ũũmĩrĩru rĩngĩ, na rĩu nĩ ndĩratungata rĩngĩ ndĩ mũthuri wa kĩũngano.”

Kũiga marakara ngoro no gũtũme mũrũ wa Ithe witũ age gũtuĩka mũthuri wa kĩũngano rĩngĩ. Na githĩ  ti wega gũkĩĩgerekania na Daudi ndungata ya Jehova, ũrĩa worire nĩ getha eherere marakara ma Mũthamaki Saulu! Daudi nĩ aaregire kwĩrĩhĩria harĩ Saulu o na rĩrĩa mĩeke ya gwĩka ũguo yeyumĩririe. (1 Sam. 24:4-7; 26:8-12) Rĩrĩa Saulu aakuĩrĩire mbaara-inĩ, Daudi nĩ aamũcakaĩire. Oigire atĩ Saulu na mũrũ wake Jonathani maarĩ andũ ‘a kwendeka na ega mũno.’ (2 Sam. 1:21-23) Daudi ndaigire marakara ngoro-inĩ.

Angĩkorũo nĩ wonaga ta wekirũo ũndũ ũtarĩ wa kĩhooto, ndũkareke marakara magũtongoragie. Kwa ngerekano, rĩrĩa William eehereirio mweke wa gũkorũo arĩ mũthuri wa kĩũngano thutha wa gũkorũo atungatĩte kĩndũ mĩaka 30 kũrĩa Ngeretha, nĩ aaigĩire athuri amwe marakara. Nĩ kĩĩ kĩamũteithirie agĩe na hinya kĩĩroho rĩngĩ? Oigire ũũ: “Gũthoma ibuku rĩa Ayubu nĩ kwanjĩkĩrire ngoro mũno. Angĩkorũo Jehova nĩ aateithirie Ayubu gũcokia thayũ hamwe na arata arĩa atatũ ake, o na niĩ nĩ angĩandeithirie gũcokia thayũ na athuri a kĩũngano.”—Ayub. 42:7-9.

Angĩkorũo nĩwe wendire gũtiga gũtungata ũrĩ mũthuri wa kĩũngano nĩ wega gwĩciria kĩrĩa gĩatũmire ũtue itua rĩu. Hihi watigire nĩ kũritũhĩrũo nĩ mathĩna maku kĩũmbe? Hihi nĩ maũndũ mangĩ wonire marĩ ma bata mũno ũtũũro-inĩ waku? Kana hihi wakuire ngoro nĩ ũndũ wa mahĩtia ma andũ angĩ marĩa moimanaga na kwaga gũkinyanĩra? O kĩrĩa kĩngĩkorũo gĩatũmire ũtige, ririkana atĩ rĩrĩa watungataga ũrĩ mũthuri wa kĩũngano nĩ wateithagia andũ na njĩra nyingĩ makĩria. Mĩario ĩrĩa warutaga kĩũngano-inĩ nĩ yamekagĩra hinya, kĩonereria gĩaku gĩkamekĩra ngoro, na iceera rĩaku rĩa ũrĩithi rĩkamateithia gũkirĩrĩria magerio mao. Ũtungata waku ũrĩ mũthuri mwĩhokeku nĩ wakenagia ngoro ya Jehova, o ta ũrĩa wakenagia ngoro yaku.—Thim. 27:11.

Jehova nĩ ateithĩtie ariũ a Ithe witũ gũcokia gĩkeno na wendi wao wa gũtungatĩra kĩũngano. O na angĩkorũo nĩwe wendire gũtiga gũtungata ũrĩ mũthuri wa kĩũngano kana nĩ kweherio weheririo, no ũthingate rĩngĩ “gũtuwo mũrori wa maũndũ ma kanitha.” (1 Tim. 3:1) Paulo ‘ndaatigithagĩria kũhoera na gũthaithanĩrĩra’ Akristiano a Kolosai maiyũrio na ũmenyo ũrĩa wagĩrĩire wĩgiĩ wendi wa Ngai, ‘nĩguo mathiage na mĩthiĩre ĩrĩa yagĩrĩire andũ a Mwathani, na mamũkenagie maũndũ-inĩ mothe.’ (Kol. 1:9, 10) Angĩkorũo nĩ ũratuĩkire mũthuri wa kĩũngano rĩngĩ, wĩhoke Jehova agũteithie ũgĩe na hinya, wetereri, na gĩkeno. Matukũ-inĩ maya ma kũrigĩrĩria, andũ a Ngai nĩ marabatara ũteithio wa kĩĩroho kuuma kũrĩ arĩithi marĩ na wendo. Hihi ũrĩ na ũhoti na wendi wa gwĩkĩra hinya aarĩ na ariũ a Ithe witũ?