1, 2. Nĩ wĩra ũrĩkũ Jehova aaheire Musa, na aamũmĩrĩirie atĩa?

TA HŨŨRA mbica wĩrĩtwo ũrũgame mbere ya mũtongoria ũrĩa ũrĩ hinya mũno thĩinĩ wa thĩ warie handũ-inĩ ha andũ a Jehova. Ũngĩigua atĩa? No ũtangĩke, wĩigue ta ũtagĩrĩire, na ũigue guoya mũno. Ũngĩhaarĩria atĩa maũndũ marĩa ũgũthiĩ kũmwĩra? Ũngĩka atĩa nĩguo warie na ũmĩrĩru ũkĩaria handũ-inĩ ha Ngai mwene-hinya-wothe?

² Kũrĩ hĩndĩ Musa eekorire ũndũ-inĩ ta ũcio. Jehova eerĩte ‘mũthuri ũcio warĩ mũhoreri mũno gũkĩra andũ othe arĩa maarĩ gũkũ thĩ guothe’ atĩ nĩ ekũmũtũma kũrĩ Firauni akahonokie Aisiraeli kuuma mĩnyamaro-inĩ na ũkombo-inĩ bũrũri-inĩ wa Misiri. (Ndar. 12:3) Firauni aarĩ mũndũ ũtaarĩ gĩtĩo na mũtũrĩku mũno. (Tham. 5:1, 2) O na kũrĩ ũguo, Jehova eerire Musa aathe Firauni arekererie andũ ake milioni nyingĩ arĩa maarĩ ngombo moime bũrũri ũcio! No kũhoteke nĩkĩo Musa oririe Jehova ũũ: “Niĩ na niĩ ndĩ ũ wa gũthiĩ kũrĩ Firauni, nĩ getha ngoimagarie ciana cia Isiraeli ndĩcirute bũrũri wa Misiri?” No mũhaka akorũo Musa nĩ eeiguaga ta ataagĩrĩire na ta ataarĩ na ũhoti. Ĩndĩ Ngai nĩ aamũmĩrĩirie atĩ nĩ angĩakorirũo hamwe nake. Jehova aamwĩrire ũũ: “Ti-itherũ niĩ mwene nĩndĩrĩgĩaga hamwe nawe.”—Tham. 3:9-12.

3, 4. (a) Nĩ maũndũ marĩkũ Musa eetigagĩra? (b) Nĩ na njĩra ĩrĩkũ ũngĩkorũo ũgĩcemania na moritũ ta marĩa Musa aacemanirie namo?

³ Nĩ maũndũ marĩkũ meekĩraga Musa guoya? No kũhoteke  eetigagĩra atĩ Firauni nĩ angĩaregire gũthikĩrĩria mũndũ ũtũmĩtwo nĩ Jehova Ngai. Ningĩ Musa nĩ eetigagĩra Aisiraeli matikage gwĩtĩkia atĩ nĩ Jehova wamwamũrĩte nĩguo amatongorie kuuma Misiri. Nĩ ũndũ ũcio, Musa akĩra Jehova ũũ: “No rĩrĩ, andũ acio matikanjĩtĩkia, o na kana maigue ũrĩa ngũmera, nĩ ũndũ makoiga atĩrĩ, Jehova ndakuumĩrĩire.”—Tham. 3:15-18; 4:1.

⁴ Ũrĩa Jehova aacokeirie Musa na maũndũ marĩa maacokire gwĩkĩka no matũrute ũndũ wa bata mũno. Nĩ ma, no gũkorũo gũtirĩ hĩndĩ ũkaarũgama mbere ya mũtongoria mũnene thirikari-inĩ. No rĩrĩ, hihi nĩ wonaga arĩ ũndũ mũritũ kwaria ũhoro wa Ngai na Ũthamaki wake na andũ arĩa ũcemanagia nao o mũthenya? Angĩkorũo nĩguo, ta wĩcirie ũrĩa ũngĩĩruta kuumana na maũndũ marĩa Musa eeyoneire.

5. Nĩ kĩĩ Jehova aaheete Musa, na kĩamũteithirie atĩa gũtooria guoya? (Rora mbica kĩambĩrĩria-inĩ gĩa gĩcunjĩ gĩkĩ.)

⁵ Rĩrĩa Musa eerire Jehova atĩ eetigagĩra andũ matikage gwĩtĩkia ciugo ciake, Ngai nĩ aamũhaarĩirie nĩguo ahiũranie na maũndũ marĩa maarĩ mbere yake. Ibuku rĩa Thama riugaga ũũ: “Nake Jehova akĩmũũria atĩrĩ, Nĩ kĩ kĩu ũgwete na guoko? Nake akiuga atĩrĩ, Nĩ rũthanju. Agĩcoka akiuga atĩrĩ, Ta rũikie rũgũe thĩ. Nake akĩrũikia thĩ, naruo rũgĩtuĩka nyamũ-ya-thĩ; nake Musa akĩmĩũrĩra. Nake Jehova akĩĩra Musa atĩrĩ, Tambũrũkia guoko ũmĩnyite gĩtong’oe. (Nake agĩtambũrũkia guoko, akĩmĩnyita, ĩgĩcoka gũtuĩka rũthanju ĩĩ guoko-inĩ gwake.) Nake Jehova agĩcoka akĩmwĩra atĩrĩ, Nĩũgeka ũguo nĩguo metĩkie atĩ Jehova . . . nĩakuumĩrĩire.” (Tham. 4:2-5) Ngai nĩ aaheete Musa kĩndũ angĩahũthĩrire kuonania atĩ ndũmĩrĩri yake yoimĩte kũrĩ Jehova. O na gũtuĩka maitho-inĩ ma andũ rũarĩ o rũthanju tu, nĩ rwatuĩkire kĩndũ kĩ muoyo nĩ ũndũ wa hinya wa Ngai. Kĩama kĩu nĩ kĩngĩekĩrire ciugo cia Musa hinya mũno, na hatarĩ nganja kĩonanie atĩ Musa aatongoragio nĩ Jehova. Nĩ ũndũ ũcio, Jehova aamwĩrire ũũ: “Naruo rũthanju rũu, thiĩ naruo ũrũnyitĩte na guoko, nĩguo ũringage ciama naruo.” (Tham. 4:17) Anyitĩte rũthanju rũu, rũrĩa ruoonanagia atĩ atũmĩtwo nĩ Ngai, Musa nĩ angĩahotire gũthiĩ arĩ na ũmĩrĩru mbere ya Aisiraeli na mbere ya Firauni na ameere ũrĩa Jehova aathanĩte.—Tham. 4:29-31; 7:8-13.

6. (a) Twagĩrĩirũo gũkorũo twĩharĩirie kũhũthĩra kĩĩ rĩrĩa tũrahunjia, na nĩkĩ? (b) Taarĩria ũrĩa ‘Kiugo kĩa Ngai kĩrĩ muoyo,’ na ũrĩa ‘kĩrĩ ũhoti.’

⁶ Kaingĩ rĩrĩa tũrahunjia nĩ kĩĩ tũkoragwo tũnyitĩte na guoko? Tũkoragwo na Bibilia, twĩharĩirie kũmĩhũthĩra. O na gũtuĩka andũ amwe no mone Bibilia arĩ o ibuku ta mabuku marĩa mangĩ-rĩ, Jehova ahũthagĩra Kiugo gĩake kwaranĩria na ithuĩ. (2 Pet. 1:21) Kiugo gĩake gĩkoragwo na ciĩranĩro ciake ciĩgiĩ maũndũ marĩa makaahanĩka hĩndĩ ya Ũthamaki wake. No kũhoteke nĩkĩo mũtũmwo Paulo aandĩkire ũũ: “Ũhoro wa Ngai wĩ muoyo, na wĩ na ũhoti.” (Thoma Ahibirania 4:12.) Gũtirĩ kĩndũ kĩngĩgiria ciĩranĩro ciothe cia Jehova iria irĩ thĩinĩ wa Kiugo gĩake ihinge. (Isa. 46:10; 55:11) Mũndũ arĩkia kũmenya ũguo ũhoro wĩgiĩ Kiugo kĩa Jehova, maũndũ marĩa arathoma Bibilia-inĩ no magarũre ũtũũro wake.

7. Tũngĩhota atĩa ‘kũheana ũhoro-ũrĩa-wa-ma na mũheanĩre ũrĩa mũrũngarũ’?

⁷ Jehova nĩ atũheete Kiugo gĩake kĩrĩ muoyo kĩrĩa tũngĩhũthĩra kuonania atĩ ũhoro ũrĩa tũhunjagia nĩ wa kwĩhokeka na umĩte kũrĩ we. No kũhoteke nĩkĩo Paulo thutha wa kwandĩkĩra Ahibirania eerire Timotheo ‘aheanage ũhoro-ũrĩa-wa-ma na mũheanĩre ũrĩa mũrũngarũ.’ (2 Tim. 2:15) Tũngĩhũthĩra ũtaaro wa Paulo atĩa? Nĩ na njĩra ya gũthuura wega maandĩko marĩa tũgũthomera andũ, tũrĩ na muoroto wa kũhutia ngoro ciao. Trakti iria cioimire mwaka wa 2013 irongoreirio gũtũteithia kũhingia muoroto ũcio.

8. Mũrori ũmwe wa ũtungata oigire atĩa ũhoro wa trakti citũ njerũ?

⁸ Trakti icio ciothe njerũ ibangĩtwo na njĩra ĩhaanaine. Nĩ ũndũ ũcio twamenya kũhũthĩra ĩmwe yacio, nĩ twamenya kũhũthĩra icio ingĩ ciothe. Hihi nĩ ũndũ mũhũthũ gĩcihũthĩra? Mũrori ũmwe wa ũtungata kuuma Hawaii, U.S.A., aandĩkire ũũ: “Tũtieciragia atĩ trakti icio no ikorũo na moimĩrĩro mega ũguo tũgĩcihũthĩra nyũmba kwa nyũmba na kũndũ kwa mũingĩ.” Nĩ eyoneire atĩ ũrĩa trakti icio ciandĩkĩtwo nĩ ũtũmaga andũ magucĩrĩrio narua na kaingĩ ũndũ ũcio ũgatũma andũ magĩe na ndeereti njega. Oigire atĩ ũndũ ũcio umanaga na kĩũria na macokio matiganĩte marĩa monekaga mwena wa na mbere wa trakti icio. Na kwoguo mwene nyũmba ndangĩĩtigĩra atĩ nĩ ekũheana macokio mataagĩrĩire.

9, 10. (a) Trakti citũ ibangĩtwo na njĩra ĩrĩkũ nĩguo itũteithie kũhũthĩra Bibilia? (b) Nĩ trakti irĩkũ wonete irĩ na moimĩrĩro mega ũtungata-inĩ, na nĩkĩ?

⁹ O trakti ĩkoragwo na rĩandĩko rĩmwe rĩthure wega tũngĩthomera mwene nyũmba. Kwa ngerekano, ta rora trakti ya Hihi Mĩnyamaro nĩ Ĩgathira? Gũtekũmakania mwene nyũmba egũcokia “ĩĩ,” “aca,” kana “no gũkorũo,” mũhumbũrĩrie trakti ũtekuongerera ũndũ ũngĩ na ũmwĩre, “Ũũ nĩguo Bibilia yugaga.” Ũcoke ũthome Kũguũrĩrio 21:3, 4.

¹⁰ Ũguo noguo wagĩrĩirũo nĩ gwĩka rĩrĩa ũrahũthĩra trakti ya Wee Wonaga Bibilia Atĩa? Gũtekũmakania ũrĩa mwene nyũmba egũcokia, humbũria trakti ĩyo na ũmwĩre ũũ: “Bibilia yugaga atĩ ‘Ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki.’” No ũcoke ũmwĩre ũũ: “Rĩandĩko rĩrĩ nĩ rĩarĩrĩirie ũhoro ũcio na njĩra njariĩ.” Ũcoke ũhumbũrie Bibilia yaku, na ũthome rĩandĩko rĩa 2 Timotheo 3:16, 17 rĩrĩ rĩothe.

11, 12. (a) Nĩ gĩkeno kĩrĩkũ tũgĩaga nakĩo rĩrĩa tũrĩ ũtungata-inĩ? (b) Trakti ingĩgũteithia atĩa ũkĩĩharĩria gũcokera andũ?

¹¹ Ũrĩa mwene nyũmba egwĩtĩkĩra nĩ ũgũgũteithia ũmenye nĩ ũhoro ũigana atĩa mũgũthoma na mwarĩrĩrie kuuma trakti-inĩ. Makĩria ma gũtigĩra andũ trakti, nĩ tũgĩaga na gĩkeno kĩrĩa kiumanaga na gũthomera andũ Kiugo kĩa Ngai o na angĩkorũo nĩ rĩandĩko rĩmwe kana merĩ rĩrĩa mwacemania na mũndũ rita rĩa mbere. No ũcoke hĩndĩ ĩngĩ nĩguo ũtwarithie ndeereti na mbere.

¹² Mwena wa na thutha wa trakti icio nĩ hakoragwo na kĩũria rungu rwa kĩongo  “Ta Wĩyũrie” na maandĩko mũngĩarĩrĩria na mwene nyũmba hĩndĩ ĩrĩa wamũcokera. Thĩinĩ wa trakti Wonaga Ihinda Rĩũkĩte ta Rĩgakorũo Rĩhaana Atĩa? kĩũria gĩa kwarĩrĩria na mũndũ rĩrĩa wamũcokera nĩ: “Ngai akagarũra thĩ itũ atĩa nĩguo yagĩre biũ?” Nĩ honanĩtio rĩandĩko rĩa Mathayo 6:9, 10 na rĩa Danieli 2:44. Nayo trakti ya Hihi Arĩa Makuĩte no Macoke Muoyo? kĩũria nĩ: “Nĩ kĩĩ gĩtũmaga tũkũre na tũkue?” Na nĩ honanĩtio rĩandĩko rĩa Kĩambĩrĩria 3:17-19 na Aroma 5:12.

13. Taarĩria ũrĩa tũngĩhũthĩra trakti kwambĩrĩria wĩruti wa Bibilia.

¹³ Ambĩrĩria wĩruti wa Bibilia na njĩra ya kũhũthĩra trakti. Hĩndĩ ĩrĩa mũndũ ahingũra kodi ĩrĩa ĩkoragwo mwena wa na thutha wa trakti, nĩ ekũingĩra rĩarĩro-inĩ riitũ harĩa egũthoma ũhoro ũngĩmwĩkĩra ngoro ende kwĩruta Bibilia. Ningĩ trakti icio, nĩ igwetete ũhoro ũrĩa ũrĩ broshua-inĩ ya Ũhoro Mwega Kuuma Kũrĩ Ngai! na o trakti ĩgatũtwara ithomo-inĩ rĩna broshua-inĩ ĩyo. Kwa ngerekano, trakti ya Nũũ Kũna Wathaga Thĩ Ĩno? yerekagĩria mũndũ ithomo-inĩ rĩa 5 rĩa broshua ĩyo. Nayo trakti ya Nĩ Kĩĩ Kĩngĩtũteithia Kũgĩa na Gĩkeno Thĩinĩ wa Famĩlĩ? yerekagĩria mũndũ ithomo-inĩ rĩa 9. Muoroto wa trakti icio nĩ gũtũteithia kũhũthagĩra Bibilia rĩrĩa twacerera mũndũ rita rĩa mbere na rĩrĩa tũramũcokera. Na njĩra ĩyo, no tũhote kũgĩa na arutwo aingĩ a Bibilia. Nĩ ũndũ ũrĩkũ ũngĩ ũngĩka nĩguo ũgĩe na moimĩrĩro mega ũkĩhũthĩra Kiugo kĩa Ngai ũtungata-inĩ?

14, 15. Ũngĩĩgerekania atĩa na mwerekera wa Paulo ũtungata-inĩ?

¹⁴ Paulo nĩ aarĩ na wendi mũnene wa kũmenya maũndũ marĩa maathĩnagia “andũ othe” arĩ ũtungata-inĩ. (Thoma 1 Akorintho 9:19-23.) Paulo aatanyaga ‘kuona Ayahudi magarũrũkĩte, arĩa matongoragio nĩ watho magarũrũkĩte, arĩa matatongoragio nĩ watho magarũrũkĩte,’ na ‘arĩa manyihĩtie hinya magarũrũkĩte.’ Eendaga gũkinyĩra ‘andũ othe na maũndũ mao mũthemba o mũthemba, nĩguo agerie na njĩra ciothe gũtũma amwe mahonoke.’ (Atũm. 20:21) Nĩ na njĩra ĩrĩkũ tũngĩĩgerekania na mwerekera wa Paulo rĩrĩa tũrehaarĩria kũhunjĩria “andũ othe” gĩcigo-inĩ gitũ?—1 Tim. 2:3, 4.

¹⁵ O mweri thĩinĩ wa Ũtungata Witũ wa Ũthamaki, nĩ twĩragwo maũndũ marĩa tũngiuga rĩrĩa tũrahunjia. Geragia kũmahũthĩra. No angĩkorũo nĩ kũrĩ na maũndũ mangĩ marathumbũra andũ kũrĩa mũhunjagia, haarĩria ũhoro ũkũmagucĩrĩria ũrĩa ũringaine na mabataro mao. Wĩcirie ũrĩa maũndũ matariĩ kũrĩa ũikaraga, andũ arĩa maikaraga kuo, na maũndũ marĩa mamathumbũraga mũno. Ũcoke wĩcirie ũhoro wa rĩandĩko rĩrĩa rĩarĩrĩirie mabataro mao. Akĩaria ũhoro wa ũrĩa we na mũtumia wake mahũthagĩra Bibilia, mũrori ũmwe wa mũthiũrũrũko oigire ũũ: “Tũngĩaria na njĩra nguhĩ na ya ĩmwe kwa ĩmwe, andũ aingĩ nĩ matũheaga mweke tũmathomere rĩandĩko rĩmwe. Tũthiaga tũnyitĩte Bibilia itũ ĩrĩ humbũrie, twarĩkia kũgeithia mwene nyũmba tũkamũthomera rĩandĩko.” Ta wĩcirie ũhoro wa ngerekano cia maũndũ maigana ũna, ciũria, na maandĩko ũngĩgeria kũhũthĩra kũrĩa ũhunjagia.

16. Taarĩria ũrĩa rĩandĩko rĩa Isaia 14:7 rĩngĩhũthĩrũo ũtungata-inĩ.

¹⁶ Angĩkorũo ũikaraga kũndũ gũtakoragwo na thayũ kaingĩ, no ũũrie mũndũ ũũ: “Ta hũũra mbica mũthenya ũmwe ngathĩti cia mohoro irĩ na kĩongo gĩkĩ karatathi-inĩ ka mbere: ‘Rĩu thĩ yothe nĩĩhurũkĩte, ikahorera, na ĩgaitĩka kũinwo.’ Ũguo nĩguo Bibilia yugaga thĩinĩ wa Isaia 14:7. Bibilia nĩ ĩkoragwo na ciĩranĩro nyingĩ cia Ngai ciĩgiĩ mahinda ma thayũ marĩa marĩ mbere itũ.” Ũcoke ũmũthomere kĩmwe gĩa ciĩranĩro icio kuuma Bibilia-inĩ.

17. Ũngĩhũthĩra atĩa rĩandĩko rĩa Mathayo 5:6 ũkĩaria na mwene nyũmba?

¹⁷ Hihi kũrĩa ũikaraga nĩ ũkoragwo ũrĩ ũndũ mũritũ harĩ athuri aingĩ kuonera famĩlĩ ciao mabataro ma o mũthenya? Angĩkorũo  nĩguo-rĩ, no wambĩrĩrie ndeereti na kĩũria gĩkĩ: “Mũndũ agĩrĩirũo gũkorũo agĩthũkũma mbeca cigana nĩguo famĩlĩ yake ĩgĩe na gĩkeno?” Arĩkia gũcokia mwĩre ũũ: “Athuri aingĩ nĩ mathũkũmaga mbeca nyingĩ gũkĩra icio, ĩndĩ famĩlĩ ciao itikoragwo na gĩkeno. Kwoguo-rĩ, nĩ ũndũ ũrĩkũ ũbataranagia nĩguo mũndũ agĩe na gĩkeno?” Ũcoke ũmũthomere rĩandĩko rĩa Mathayo 5:6 na ũmuonie ũrĩa angĩĩruta Bibilia.

18. Ũngĩhũthĩra Jeremia 29:11 atĩa kũũmĩrĩria arĩa angĩ?

¹⁸ Hihi andũ kũrĩa ũikaraga nĩ maranyamarĩka kuumana na moimĩrĩro ma gĩcanjama merĩga gũcemania nakĩo? No wambĩrĩrie ndeereti na njĩra ya kuuga: “Ndagũceerera ndĩ na ndũmĩrĩri ya gũkũũmĩrĩria. (Thoma Jeremia 29:11.) Hihi nĩ wona maũndũ matatũ marĩa Ngai aratwendera? ‘Thayũ,’ ‘kĩĩrĩgĩrĩro,’ na ‘ũhoro witũ wa thutha-inĩ kwagĩra.’ Na githĩ ti ũndũ wa gũtwĩkĩra ngoro kũmenya atĩ Ngai nĩ endaga tũkorũo na ũtũũro mwega? No hihi ũndũ ũcio ũngĩhoteka atĩa?” Ũcoke ũmũtware ithomo-inĩ rĩrĩa rĩagĩrĩire thĩinĩ wa broshua ya Ũhoro Mwega.

19. Taarĩria ũrĩa tũngĩhũthĩra Kũguũrĩrio 14:6, 7 kũhunjĩria arĩa mendete maũndũ ma ndini.

¹⁹ Hihi kũrĩa ũikaraga andũ nĩ makenagio nĩ maũndũ ma ndini? Angĩkorũo nĩguo-rĩ, no wambĩrĩrie ndeereti na kũmooria: “Hihi mũraika angĩkwarĩria no wĩtĩkĩre kũmũthikĩrĩria? (Thoma Kũguũrĩrio 14:6, 7.) Tondũ mũraika aroiga ‘wĩtigĩrei Ngai-rĩ,’ na githĩ ti ũndũ wa bata kũmenya araria ũhoro wa Ngai ũrĩkũ? Mũraika ũcio, nĩ aratũteithia kũmenya tondũ aroiga nĩ ‘ũrĩa wombire igũrũ na thĩ.’ Nĩ Ngai ũrĩkũ ũcio?” Ũcoke ũthome Thaburi 124:8, ĩrĩa yugaga ũũ: “Gũteithio gwitũ kuumaga harĩ rĩĩtwa rĩa Jehova, ũrĩa wombire igũrũ na thĩ.” Banga ũrĩa mũngĩarĩrĩria makĩria ũhoro wa Jehova Ngai.

20. (a) Tũngĩhũthĩra atĩa rĩandĩko rĩa Thimo 30:4 kũruta mũndũ rĩĩtwa rĩa Ngai? (b) Hihi nĩ harĩ rĩandĩko rĩna ũhũthagĩra ũkagĩa na moimĩrĩro mega?

²⁰ No wambĩrĩrie ndeereti na mũndũ mwĩthĩ ũkĩhũthĩra njĩra ĩno: “No nyende gũgũthomera rĩandĩko rĩmwe rĩũragia kĩũria kĩa bata mũno. (Thoma Thimo 30:4.) Gũtirĩ mũndũ ũngĩhota gwĩka maũndũ marĩa rĩandĩko rĩu rĩtaarĩirie, kwoguo no mũhaka akorũo rĩraaria ũhoro wa Mũũmbi witũ. * Tũngĩmenya atĩa rĩĩtwa rĩake? No nyende gũkuonia rĩĩtwa rĩu thĩinĩ wa Bibilia.”

21, 22. (a) Rĩandĩko rĩthurĩtwo wega rĩngĩgarũra ũtũũro wa mũndũ atĩa? (b) Ũtuĩte itua rĩa gwĩka atĩa ũtungata-inĩ waku?

²¹ Tũtingĩhota kũmenya moimĩrĩro megũkorũo marĩ marĩkũ twathomera mũndũ rĩandĩko tũthuurĩte wega. Kwa ngerekano, ariũ a Ithe witũ erĩ bũrũri-inĩ wa Australia maaringaringire mũrango wa nyũmba ya mũtumia ũmwe mwĩthĩ. Ũmwe wao akĩũria mũtumia ũcio ũũ: “Hihi nĩ ũĩ rĩĩtwa rĩa Ngai?” Agĩcoka akĩmũthomera rĩandĩko rĩa Thaburi 83:18. Mũtumia ũcio oigire ũũ: “Ndagegire mũno. Marĩkia gũthiĩ, ndatwarithirie ngaari kiromita 56 ndorete nyũmba-inĩ ya kwendia mabuku nĩguo ngarore kana Bibilia ingĩ irĩ na rĩĩtwa rĩu na ngĩcoka ngĩrora rĩĩtwa rĩu thĩinĩ wa ibuku rĩmwe rĩa gũthathaũra ciugo. Thutha wa gwĩtĩkia biũ atĩ Ngai etagwo Jehova, nĩ ndaarigirũo hihi nĩ maũndũ mangĩ maigana atĩa itoĩ.” Kahinda kanini thutha ũcio, marĩ na ũrĩa wacokire gũtuĩka mũthuri wake nĩ mambĩrĩirie kwĩruta Bibilia na magĩcoka makĩbatithio.

²² Kiugo kĩa Ngai nĩ kĩgarũraga ũtũũro wa arĩa magĩthomaga na makagĩa na wĩtĩkio harĩ ciĩranĩro cia Jehova cia kwĩhokeka. (Thoma 1 Athesalonike 2:13.) Ũhoro ũrĩa ũrĩ Bibilia-inĩ nĩ ũrĩ ũhoti mũnene gũkĩra ũndũ ũngĩ o wothe tũngiuga tũkĩgeria gũkinyĩra ngoro ya mũndũ. Nĩ ũndũ ũcio, hĩndĩ ĩrĩa yothe twagĩa na mweke, twagĩrĩirũo nĩ kũhũthĩra Kiugo kĩa Ngai tondũ kĩrĩ muoyo.