Ciũria Kuuma Kũrĩ Athomi
Jesu eerire Asadukai atĩ andũ arĩa makaariũkio “matikahikanagia kana makahikio.” (Luka 20:34-36) Hihi aaragia ũhoro wa arĩa makaariũkio matũũre gũkũ thĩ?
Mũndũ ta ũcio no akorũo na wendi mũnene wa gũgaatũũrania rĩngĩ na ũrĩa maahikanĩtie nake aariũkio thĩinĩ wa thĩ njerũ. Mũthuri ũmwe wa ndigwa oigire ũũ: “Ithuĩ tũrĩ na mũtumia wakwa tũtiabangĩte gũgaatigana. Warĩ wendi witũ gũtungatĩra Jehova tene na tene tũrĩ mũthuri na mũtumia. Na ũcio noguo wendi wakwa o na rĩu.” Hihi nĩ harĩ na gĩtũmi kĩega gĩa kwĩrĩgĩrĩra atĩ arĩa makaariũkio nĩ makahikania? Ũhoro wa ma nĩ atĩ tũtiũĩ.
Kwa ihinda rĩa mĩaka mĩingĩ mabuku maitũ makoretwo magĩtaarĩria atĩ no kũhoteke rĩrĩa Jesu aaragia ũhoro wa kũriũka na kũhikania aaragia ũhoro wa arĩa makaariũkio matũũre gũkũ thĩ, na atĩ arĩa makaariũkio matũũre thĩinĩ wa thĩ njerũ matikahika kana mahikanie. * (Mat. 22:29, 30; Mar. 12:24, 25; Luk. 20:34-36) O na gũtuĩka tũtingĩkorũo na ma biũ-rĩ, hihi no kũhoteke atĩ Jesu aaragia ũhoro wa arĩa makaariũka matũũre igũrũ? Rekei tũthuthurie ũrĩa Jesu oigire.
Ta wĩcirie ũrĩa gwathiĩte. (Thoma Luka 20:27-33.) Tondũ Asadukai matietĩkĩtie ũhoro wa kũriũka, nĩ maageririe kũhĩngĩca Jesu na kĩũria kĩgiĩ kũriũka na kĩgiĩ mũtumia wa ndigwa kũhikio nĩ mũrũ wa nyina na mũthuriwe. * Jesu aacokirie ũũ: ‘Andũ a mahinda maya nĩmahikanagia na makahikio: no rĩrĩ, arĩa magatuwo aagĩrĩru a gũkinya mahinda marĩa magoka, o na gũkinya hĩndĩ ĩrĩa arĩa akuũ makariũka, acio-rĩ, matikahikanagia kana mahikio: nĩ gũkorũo matikahota gũcoka gũkua o na rĩ: nĩ ũndũ nĩmagakorũo mahanaine na araika; na marĩ ciana cia Ngai, makĩrĩ ciana cia ũhoro ũcio wa kũriũka.’—Luk. 20:34-36.
Nĩ kĩĩ gĩtũmĩte mabuku maitũ makorũo magĩtaarĩria atĩ no kũhoteke Jesu aaragia ũhoro wa arĩa makaariũka matũũre gũkũ thĩ? Harĩ na maũndũ merĩ. Wa mbere, no kũhoteke Asadukai makĩũria Jesu kĩũria kĩu meeciragia ũhoro wa iriũkĩro rĩrĩa rĩgaakorũo gũkũ thĩ na nĩ ũndũ ũcio Jesu angĩamacokeirie kũringana na ũrĩa moorĩtie. Wa kerĩ, mũico-inĩ wa macokio make Jesu nĩ aagwetire athuri ehokeku a tene nĩo Iburahimu, Isaaka, na Jakubu na kĩĩrĩgĩrĩro kĩao nĩ gũkaariũkio matũũre gũkũ thĩ.—Luk. 20:37, 38.
O na kũrĩ ũguo, no kũhoteke atĩ Jesu eeciragia ũhoro wa arĩa makaariũkio magatũũre igũrũ. Nĩ kĩĩ kĩngĩtũma tuuge ũguo? Rekei twĩcirie ũhoro wa maũndũ merĩ marĩa aagwetire.
‘Arĩa magatuwo aagĩrĩru a gũkaariũka.’ Akristiano aitĩrĩrie maguta arĩa matũũragia wĩhokeku wao nĩ ‘matuĩtwo agĩrĩru a gũgaatonya ũthamaki-inĩ wa Ngai.’ (2 Thes. 1:5, 11) Nĩ matuĩtwo athingu a gũkaaheo muoyo nĩ ũndũ wa igongona rĩa ũkũũri na nĩ ũndũ ũcio maakua Ngai ndacokaga kũmona marĩ ehia. (Rom. 5:1, 18; 8:1) Akristiano acio metagwo nĩ Bibilia andũ ‘marĩ na gĩkeno na atheru’ na nĩ monagwo marĩ aagĩrĩru a gũkaariũkio magatũũre igũrũ. (Kũg. 20:5, 6) Ngũrani na ũguo, amwe arĩa makaariũkio matũũre gũkũ thĩ nĩ andũ “matarĩ athingu.” (Atũm. 24:15) Hihi no kwĩrũo atĩ acio nĩ ‘matuĩtwo agĩrĩru’ a gũkaariũkio?
“Matikahota gũcoka gũkua o na rĩ.” Jesu ndoigire ũũ: “Matigakua o na rĩ.” Ithenya rĩa ũguo, oigire: “Matikahota gũcoka gũkua o na rĩ.” Bibilia ingĩ ciugaga “matingĩkua o na atĩa” na “gĩkuũ gĩtirĩ na hinya rĩngĩ igũrũ rĩao.” Akristiano aitĩrĩrie maguta arĩa makuaga marĩ ehokeku mariũkagio magathiĩ igũrũ na makaheo muoyo ũtangĩkua. (1 Kor. 15:53, 54) Gĩkuũ gĩtikoragwo na hinya rĩngĩ o na hanini harĩ arĩa mariũkagio magathiĩ igũrũ. *
Kũringana na maũndũ macio twarĩrĩria-rĩ, tũngiuga atĩa? No kũhoteke atĩ hĩndĩ ĩrĩa Jesu aaragia ũhoro wa kũhikania na kũriũka, aaragia ũhoro wa arĩa makaariũka magatũũre igũrũ. Angĩkorũo nĩguo-rĩ, ciugo ciake no itũteithie kũmenya maũndũ maigana ũna megiĩ arĩa makaariũkio magatũũre igũrũ: Matingĩhika kana mahikanie, matingĩkua, na nĩ mahaanaine na araika maũndũ-inĩ mamwe. O na kũrĩ ũguo, kuuga ũguo no gũtũme twĩyũrie ciũria cigana ũna.
Kĩa mbere: Nĩ kĩĩ gĩatũmire Jesu aarie ũhoro wa arĩa makaariũka magatũũre igũrũ agĩcokeria Asadukai, arĩa kũngĩhoteka meeciragia ũhoro wa iriũkĩro rĩa gũkũ thĩ? Ti hingo ciothe Jesu aacokagĩria arĩa maamũkararagia kũringana na ũrĩa meeciragia. Kwa ngerekano, Ayahudi arĩa maamwĩrĩte amaringĩre kĩama, aamerire ũũ: “Thariai hekarũ ĩno, na mĩthenya ĩtatũ nĩngamĩcokia igũrũ.” No kũhoteke Jesu nĩ aamenyaga atĩ Ayahudi acio meeciragia ũhoro wa mwako wa hekarũ, “no we nĩ hekarũ ya mwĩrĩ wake aagwetaga.” (Joh. 2:18-21) Nĩ ũndũ wa ũhinga wa Asadukai acio mateetĩkĩtie kũriũka na mateetĩkĩtie atĩ nĩ kũrĩ araika, no kũhoteke nĩkĩo Jesu aatonire bata wa kũmacokeria. (Thim. 23:9; Mat. 7:6; Atũm. 23:8) Ithenya rĩa ũguo, no kũhoteke onire arĩ wega aguũrie ũhoro wa ma wĩgiĩ arĩa makaariũka magatũũre igũrũ nĩguo arutwo ake ehokeku magunĩke, tondũ nĩo maarĩ na kĩĩrĩgĩrĩro gĩa kũriũka magatũũre igũrũ.
Gĩa kerĩ: Nĩ kĩĩ gĩatũmire Jesu akĩrĩkĩrĩria ndeereti yake agwete Iburahimu, Isaaka, na Jakubu, andũ maarĩ na kĩĩrĩgĩrĩro gĩa gũkariũka matũũre gũkũ thĩ? (Thoma Mathayo 22:31, 32.) Ũngĩrora wega nĩ ũkuona atĩ mbere ya kwaria ũhoro wa athuri acio a tene, Jesu aambĩte kuuga ũũ: “Naho ha ũhoro wa kũriũka kwa arĩa akuũ-rĩ.” Ciugo icio cionanagia atĩ no kũhoteke atĩ rĩu Jesu nĩ aambĩrĩirie kwaria ũhoro ũngĩ wĩgiĩ iriũkĩro rĩa gũkũ thĩ. Tondũ Jesu nĩ oĩ atĩ Asadukai mooigaga nĩ meetĩkĩtie ũhoro wa Musa, aacokire akĩhũthĩra ciugo iria Jehova eerire Musa rĩrĩa aarĩ hakuhĩ na kĩhinga kĩrĩa gĩaakanaga mwaki, nĩguo ekĩre hinya atĩ nĩ muoroto wa Ngai gũkaariũkia andũ matũũre gũkũ thĩ.—Tham. 3:1-6.
Gĩa gatatũ: Angĩkorũo Jesu akĩaria ũhoro wa kũriũka na kũhikania aaragia ũhoro wa arĩa makaariũkio magatũũre igũrũ-rĩ, hihi ũguo nĩ kuuga atĩ arĩa makaariũkio matũũre gũkũ thĩ nĩ makahikaga kana makahikania? Kiugo kĩa Ngai gĩtiheanĩte macokio ma ĩmwe kwa ĩmwe megiĩ kĩũria kĩu? Angĩkorũo kũna Jesu aaragia ũhoro wa iriũkĩro rĩa arĩa magathiĩ igũrũ, ciugo ciake itingĩtũteithia kũmenya kana arĩa makaariũkio matũũre thĩinĩ wa thĩ njerũ nĩ makahikaga kana makahikania.
Gwa kahinda gaka, ũrĩa tũĩ nĩ atĩ Kiugo kĩa Ngai kiugaga atĩ gĩkuũ nĩ gĩtigithanagia arĩa mahikanĩtie. Nĩ ũndũ ũcio, mũtumia kana mũthuri wa ndigwa ndagĩrĩirũo kwĩigua arĩ na mahĩtia angĩtua itua rĩa kũhika kana kũhikania rĩngĩ. Rĩu nĩ itua rĩa mũndũ kĩũmbe, na gũtirĩ mũndũ wagĩrĩirũo kuuga atĩ mũndũ ta ũcio nĩ ahĩtĩtie nĩ ũndũ wa kũhika kana kũhikania rĩngĩ.—Rom. 7:2, 3; 1 Kor. 7:39.
Ma nĩ atĩ, no tũkorũo na ciũria nyingĩ mũno ciĩgiĩ ũrĩa ũtũũro ũgakorũo ũhaana thĩinĩ wa thĩ njerũ. Handũ ha gũtindanĩrĩra mũno na gũcaria macokio ma ciũria icio, tũkũbatara o gweterera tũkeyonera. Ĩndĩ tũrĩ na ma na ũndũ ũyũ: Andũ arĩa athĩki nĩ magakorũo na gĩkeno tondũ Jehova nĩ akamahingĩria mabataro na merirĩria mao mothe na njĩra ĩrĩa yagĩrĩire.—Thab. 145:16.
^ kib. 4 Thoma ngathĩti ya The Watchtower, ya Juni 1, 1987, karatathi ka 30-31.
^ kib. 5 Hĩndĩ ya tene, kwarĩ na mũtugo atĩ mũthuri angĩakuire ataciarĩte kahĩĩ, mũtumia ũrĩa atiga nĩ angĩahikirio nĩ mũrũ wa nyina, nĩguo amũtwarithĩrie na mbere rũciaro.—Kĩam. 38:8; Gũcok. 25:5, 6.
^ kib. 9 Arĩa makaariũkio matũũre gũkũ thĩ matikaaheo muoyo ũtangĩkua ĩndĩ magakorũo na kĩĩrĩgĩrĩro gĩa kũheo muoyo wa tene na tene. Nĩguo wĩrute makĩria ngũrani ya muoyo ũtangĩkua na muoyo wa tene na tene, thoma ngathĩti ya The Watchtower, ya Ĩpuro 1, 1984, karatathi ka 30-31.
